Luka 24
24
Yesu femnɩ sɩm taa
(Mat 28.1-10; Mrk 16.1-8; Yoh 20.1-10)
1Kujuka wiye tanaŋ tɛɛ cu lɛ, halaa ḿbá pakpaɣ num ndɩ ndɩ nɛ tɩlaaɖɩnaa mbá paañɩnaa yɔ se powoki pɩlaʋ yɔɔ. 2Patalaa lɛ, pamaɣnɩ patʋlɩ pɩyɛ nɖɩ́ paaɖɩɣ pɩlaʋ nɔɔ yɔ. 3Pasʋ kɩ-taa lɛ, patana Kɩpaɣlʋ Yesu tomnaɣ. 4Ɛlɛ́, pɩɖɩɣzɩ-wɛ siŋŋ. Kpaagbaa ḿbʋ́ lɛ, abalaa naalɛ nabɛyɛ tɩlɩʋ pɔ-yɔɔ. Posu wondu, nɛ tɩñɩlɩzɩɣ pelu pelu. 5Peeɖe sɔɔndʋ kpa halaa ḿbá nɛ paka pɛ-ɛsɛ nɛ tɛtʋ nɛ abalaa ḿbá pɔpɔzʋʋ-wɛ se: «Pɩlabɩ ɛzɩma nɛ ɩñɩnɩɣ weyi ɛwɛnɩ ɛ-ɛsɛ yɔ ɖenɖe sɩɖaa wɛɣ yɔ? 6Ɛfɛyɩ cɩnɛ, efema. Ɩtɔzɩ tɔm ndʋ́ eeheyi-mɩ Galilee egeetiye taa se: 7pʋwɛɛ se paɖʋ Ɛyʋ Pɩyalʋ kɩwɛɛkɩm laɖaa nesi taa nɛ pakam-ɩ kaamaŋkaɣ yɔɔ nɛ ɛsɩ nɛ kɩyakɩŋ naadozo wiye lɛ, Ɛsɔ fezi-i yɔ tɩ-yɔɔ.»
8Peeɖe pɔtɔzɩ tɩ-yɔɔ 9nɛ palɩɩ pɩlaʋ ŋ́gʋ́ kɩ-taa nɛ powolo pɛkɛdɩ Yesu tiyiyaa hiu nɛ kʋɖʋm nɛ ɛ-tɔmkpɛlɩkɩyaa lɛlaa tɩŋa mbʋ́ pɩtɩŋa panawa yɔ. 10Halaa ḿbá lɛ: Magdala Maarɩɩ nɛ Yaanɩ nɛ Yakubu ɖoo Maarɩɩ. Halaa lɛlaa mbá paawobi peeɖe ɖɔɖɔ yɔ, peheyi Yesu tiyiyaa ḿbá ɖɔɖɔ ḿbʋ́. 11Ɛlɛ́, pakpaɣ-tʋ se tɩkɛ kɩmɛlɛndʋ tɔm nɛ petetisi-tʋ. [ 12Paa ḿbʋ́ yɔ, Pɩyɛ ñaakʋyaa ɛkpaɣ seya nɛ ewolo pɩlaʋ yɔɔ. Ɛtalaa eluŋ nɛ ewili kɩ-taa lɛ, ɛnaɣ pɩsaŋ weyi paahɔkɩ-ɩ ɩ-taa yɔ i-ɖeke. Peeɖe pɩlabɩ-ɩ piti pɩŋŋ nɛ mbʋ́ pɩtɩŋa payɩ pɩlaba yɔ nɛ ɛpɩsɩ ekpe.]
Tiyiyaa naalɛ katɩ Yesu
(Mrk 16.12-13)
13Kɩyakʋ kʋɖʋmʋʋ ŋ́gʋ́ ki-wiye Yesu tɔmkpɛlɩkɩyaa naalɛ kʋyaa se powoki tɛtʋ cikpetu ndʋ́ payaɣ se Emayuusɩ yɔ tɩ-taa. Tiiposini Yeruusalɛm ɛzɩ kiloomɛtanaa hiu nɛ kʋɖʋm yɔ. 14Pɛɖɛɣaɣ lɛ, pɔyɔɔdʋʋ mbʋ́ pɩtɩŋa pɩlaba yɔ pʋ-tɔm. 15Pɔyɔɔdaɣnɩ ɖama ḿbʋ́ lɛ, Yesu ɖɔ nɛ ewolo pɔ-cɔlɔ nɛ ɛ nɛ wɛ pɛɖɛɣ. 16Ɛlɛ́, patasɩm-ɩ, mbʋ́ pʋyɔɔ yɔ, piihuuzi pɛ-ɛsɛ yɔɔ. 17Peeɖe ɛpɔzɩ-wɛ se: «Tɔm ndʋ́ ɩyɔɔdʋʋnɩ ɖama nʋmɔʋ taa ḿbʋ́?» Ɛpɔzɩ-wɛ ḿbʋ́ lɛ, pasɩŋnɩ ɛsɛñɩŋɩyɛ 18nɛ pa-taa weyi payaɣ se Kleyoopaasɩ yɔ, ɛpɔzɩ-ɩ se: «Ɛzɩ ñe-ɖeke koŋ ŋwɛnɩ Yeruusalɛm nɛ ŋtanɩɩ mbʋ́ pɩtɩŋa payɩ pɩlabɩ peeɖe kɩyakɩŋ ɩnɛ ɩ-taa yɔ?» 19Ɛlɛ́, ɛpɔzɩ-wɛ se: «Ɛbɛ laba tɛ?» Pocosi-i se: «Ɛzɩ ŋtanɩɩ mbʋ́ pɩlabɩ Nazarɛɛtɩ tʋ Yesu yɔ? Ɛɛkɛ náyʋ nɛ ɛlakɩ tʋma nɛ ɛyɔɔdʋʋ tɔm nɛ abalɩtʋ Ɛsɔ nɛ ɛyáa tɩŋa pɛ-ɛsɩndaa. 20Ɛlɛ́, ɖɔ-cɔjɔnaa sɔsaa nɛ ɖa-ñʋndɩnaa pakpa-ɩ pɛcɛlɩ nɛ pakʋ ɛ-tɔm nɛ pakam-ɩ kaamaŋkaɣ yɔɔ nɛ ɛsɩ. 21Ŋgʋ́, ɖɩtaɣaɣ liu se ɛnʋ kɔŋnɩ yabʋ Izrɛɛlɩ ñɩma ñʋʋ. Ɛlɛ́, pɩtɛm labʋ kɩyakɩŋ naadozo yɔ, pɩtɩŋa pɩlabʋ ḿbʋ́ yɔ. 22Meheyiɣ-mɩ se ɖa-taa halaa nabɛyɛ yeba nɛ pɩɖɩɣzɩ-ɖʋ pɩŋŋ. Pakʋyɩ tanaŋ kʋnɛ kɩ-tɛɛ cu nɛ powolo pasʋʋ pɩlaʋ taa 23ɛlɛ́, patana e-tomnaɣ. Peeɖe papɩsaa peheyi-ɖʋ se Ɛsɔ tiyiyaa lɩ pɔ-yɔɔ nɛ peheyi-wɛ se efema. 24Pɔyɔɔdɩ ḿbʋ́ lɛ, ɖa-taa lɛlaa wolo pewili pɩlaʋ taa nɛ pamaɣnɩ ɛzɩ paaheyuu-ɖʋ yɔ. Patana Yesu.» 25Peeɖe Yesu heyi-wɛ se: «Kɩmɛlɛmɩŋ mɩ! Pɩlabɩ ɛzɩma mɩ-laŋa wɛɛ kpɩzɩŋ nɛ iitisiɣ tɔm ndʋ́ náyaa kɔyɔɔdaa yɔ? 26Pɩtaawɛɛ se Weyi Ɛsɔ Lɩzaa Yɔ, ɛtɔɔ kʋñɔŋ ḿbʋ́ nɛ pʋcɔ ɛsʋʋ e-koboyaɣ taa yaa we?» 27Pʋwayɩ lɛ, ɛkɛdɩ-wɛ ɖenɖe ɖenɖe paama ɛ-tɔm Ɛsɔtɔm Takayaɣ taa yɔ nɛ ɛlɩzɩ-wɛ tɩ-tɔbʋʋ. Ɛpazɩnɩ Mooyiizi takayɩsɩ nɛ ɛkɔɔ ɛtɛzɩnɩ náyaa ñɩnzɩ tɩŋa.
28Pɔñɔtɩnɩ tɛtʋ ndʋ́ powokaɣ tɩ-taa yɔ lɛ, Yesu la ɛzɩ ɛɖɛɣ poliŋ yɔ. 29Ɛlɛ́, pɛcɛyɩ-ɩ se: «Kɔɔ ɖa nɛ ŋ ɖɩsʋʋ cɩnɛ. Mbʋ́ pʋyɔɔ yɔ, ɖanaɣ ɖanaa nɛ pɩcaɣ yuu.» Peeɖe ewoba nɛ ɛ nɛ wɛ pɛwɛɛ. 30Pɩkɛdaa lɛ, ɛ nɛ wɛ pacaɣ tɔɔnaɣ ɖɩtɔɔyɛ nɛ ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ. 31Peeɖe pɩcɛbɩ pɛ-ɛsɛ yɔɔ nɛ pasɩm-ɩ. Ɛlɛ́, ɛmʋʋ pɛ-ɛsɩndaa. 32Pɩlabɩ ḿbʋ́ lɛ, pɔyɔɔdɩnɩ ɖama se: «Naze ḿbʋ́ eheyaɣ-ɖʋ Ɛsɔtɔm nʋmɔʋ taa nɛ ɛlɩzɩɣ-ɖʋ tɩ-tɔbʋʋ nɛ ɖa-laŋa hʋlʋmʋʋ pɩtɩɩfɛyɩ!»
33Kpaagbaa ḿbʋ́ lɛ, pakʋyɩ papɩsɩ Yeruusalɛm nɛ pamaɣnɩ tiyiyaa ḿbá pe-hiu nɛ kʋɖʋm nɛ pa-taabalaa. Paakpeɣlaa 34nɛ pɔtɔŋ se: «Kɩpaɣlʋ fema toovenim nɛ ɛlɩzɩ ɛ-tɩ ɛwɩlɩ Siimɔɔ.» 35Peeɖe ɛ-tɔmkpɛlɩkɩyaa ḿbá pa-naalɛ pɛkɛdɩ-wɛ mbʋ́ pɩtɩŋa pɩlabɩ-wɛ nʋmɔʋ taa yɔ, nɛ ɛzɩma mbʋ́ paasɩm-ɩ alɩwaatʋ ndʋ́ ɛcɩyaɣ tindine yɔ.
Yesu wɩlɩ ɛ-tɩ e-tiyiyaa
(Mat 28.16-20; Mrk 16.14-18; Yoh 20.19-23; Tʋma 1.6-8)
36Pɛkɛdaɣ-wɛ ḿbʋ́ lɛ, Yesu lɩɩ pɔ-yɔɔ [nɛ eheyi-wɛ se: «Ɩwɛɛ laŋhɛzɩyɛ taa.»] 37Peeɖe sɔɔndʋ kpa-wɛ pɩŋŋ, mbʋ́ pʋyɔɔ yɔ, paasɩm se ñazɩñazʋʋ nakʋyʋ. 38Ɛlɛ́, ɛpɔzɩ-wɛ se: «Ɛbɛ yɔɔ piliɣtiɣ-mɩ ḿbʋ́ nɛ ɩpʋtʋʋ mɩ-taa? Ɛbɛ lakɩ-mɩ? 39Ɩcɔnɩ me-nesi nɛ ma-naŋgbanzɩ nɛ ɩna. Toovenim lɛ, ma! Itukuni-m nɛ ɩna, mɩ-maɣmaɣ ɩtɛm sɩm se ñazɩñazʋʋ fɛyɩnɩ tomnaɣ ɛzɩ ma yɔ.» [ 40Ɛyɔɔdɩ ḿbʋ́ lɛ, ɛwɩlɩ-wɛ e-nesi nɛ ɛ-naŋgbanzɩ.] 41Ɛlɛ́, ɛzɩma mbʋ́ pa-laŋa kahʋlʋmaa siŋŋ nɛ pɩlabɩ-wɛ piti yɔ, pʋ-yɔɔ lɛ, patapɩzɩ pɛwɛnɩ lidaʋ ɛ-yɔɔ kpaagbaa. Peeɖe ɛpɔzɩ-wɛ se: «Ɩwɛnɩ tɔɔnaɣ nakɛyɛ cɩnɛ yaa we?» 42Peeɖe pɛcɛlɩ-ɩ kpakpayaɣ ŋgá pɔhɔbɩ-kɛ yɔ ke-titiɖe 43nɛ ɛmʋ-ɖɩ ɛtɔɔ pɛ-ɛsɩndaa. 44Ɛlɛ́, eheyi-wɛ se: «Mbʋ́ pʋ-tɔm maaheyi-mɩ alɩwaatʋ ndʋ́ ma nɛ mɩ ɖɩɩwɛɛ yɔ, ḿbʋ́ labɩnɩ ɛzʋnɔ yɔ. Mbʋ́ pʋyɔɔ yɔ, pɩɩwɛɛ se mɔn-tɔm ndʋ́ tɩtɩŋa paama Mooyiizi nɛ náyaa nɛ keɣsi maɖaa pa-takayɩsɩ taa yɔ, tɩla.» 45Peeɖe ekuli pa-lɩmaɣza yɔɔ se panɩɩ Ɛsɔtɔm Takayaɣ taa tɔm tɔbʋʋ 46nɛ eheyi-wɛ se: «Ndʋ́ pama ka-taa yɔ lɛ se pʋwɛɛ se Weyi Ɛsɔ Lɩzaa Yɔ, ɛtɔɔ kʋñɔŋ nɛ ɛsɩ nɛ pepim-i. Kɩyakʋ naadozo ñɩŋgʋ wiye lɛ, pefezi-i nɛ ɛlɩɩnɩ pɩlaʋ taa. 47Pʋwɛɛ ɖɔɖɔ se posusini ɛ-nɔɔ ajɛya kpeekpe taa ɛyáa se pɛlɛɣzɩ wɛtʋ nɛ Ɛsɔ kpeɣ-wɛ pa-kɩwɛɛkɩm. Ɛlɛ́, pʋwɛɛ se papazɩnɩ Yeruusalɛm. 48Mɩ lɛ mbʋ́ pɩlaba yɔ pɩ-aseɣɖe tɩnaa. 49Meheyiɣ-mɩ se ma lɛ, mentiyiɣni-mɩ ɖoŋ weyi man-Caa ɖʋwa se ɛhaɣ-mɩ yɔ. Ɛlɛ́, pʋwɛɛ se ɩcaɣ Yeruusalɛm nɛ pʋkɔɔ pɩsɩɩnɩ alɩwaatʋ ndʋ́ ɖoŋ ɛnʋ etibi mɩ-yɔɔ yɔ.»
Yesu kʋyɩ e-tiyiyaa cɔlɔ
(Mrk 16.19-20; Tʋma 1.9-11)
50Pʋwayɩ lɛ, Yesu woni-wɛ Betaanii tɛtʋ cɔlɔ. Peeɖe ɛkpazɩ e-nesi nɛ ɛwazɩɣ pɔ-yɔɔ. 51Ɛwazaɣ pɔ-yɔɔ ḿbʋ́ lɛ, pʋkʋsɩ-ɩ pɔ-cɔlɔ peeɖe yem nɛ pɩkpazɩ-ɩ ɛsɔdaa. 52Peeɖe poluŋaa nɛ paɖʋ-ɩ hɩɖɛ nɛ pacaŋ papɩsɩ Yeruusalɛm nɛ laŋhʋlʋmɩyɛ pɩtɩɩfɛyɩ 53nɛ powoki Ɛsɔ ɖɩɣa taa paa ɖooye nɛ pasaŋ Ɛsɔ.
હાલમાં પસંદ કરેલ:
Luka 24: KABI
Highlight
શેર કરો
નકલ કરો
Want to have your highlights saved across all your devices? Sign up or sign in
