Zɛnɛse 37
37
Zosɛ da ǹêɣe é pɛ́lɛ ǹîa-ni dîa
1Zeeka è sèe Keena lɔii su nyii ǹâŋ è kɛ̀ zu a ŋɔ̃yai. 2Zeeka ŋɔsuui maa mɛni pɔlɔi ká ŋí.
Zosɛ kɛ́ɛ a kóraŋ puu káo lɔ́ɔlu mɛi feerɛi, da ǹîa-ni dí kɛ̀ ƃála mɛi kâai. Dia ƃe kɛ̀ a ǹâŋ ŋɔnɛyâai Bila da Zipa dílônii-sinaai. Zosɛ è dítûa-pere nyɔŋ kélee pù dínâŋ ŋɛ́i.
3Ǹyaŋ Zeeka è kɛ̀ a Zosɛ wɛ́liɛɛ é tɛ́ɛ ǹônii kélee dîa. Kpɛ́ni fêi, ǹyaa ƃé kɛ̀ a bɔlɔ lôŋ. Nya ƃe è yokpo kôya lɛ́lɛɛ sɔ̀lɔ mì. 4Kɛ́lɛ tãi ǹîa-ni dí gàa la a gɛɛ dínâŋ è kɛ̀ a ŋwɛ́liɛɛ é tɛ́ɛ díkelee diai, dí gbɔ̀ara a sɛŋ dífe ŋɔ́nɔ kɛ́ ní lônoi bɔ́ a ǹɛ́lɛɛ.
5Nya ƃe Zosɛ è sèe ƃô. Tãi è zee-wooi ƃô la ǹîa-ni diai, dí gbɔ̂ara a zu kɛ́tɛ. 6Nya ƃe è mò dîa ǹyɛɛ, “Zeei ŋá mòi, ka mɛni. 7Kú kɛ̀ mɔlɔŋ ɣirîi gbâlaŋ ŋá, ǹyaŋ ŋámɔlɔŋ-kɔŋ è sìɣe é tɔ́ɔ, káwɔ̂-ŋai dí tínaŋ ma dí pú ŋ́ɔ̂i kɔ́ɔ mu.”
8Ǹîa-ni dí mò ma dîyɛɛi, “Ƃa ŋ̀wɛ̂lii í kɛ́ kúmɛi a kâloŋ?” Dí gbɔ̀ara kpɔ́ a ŋánaa ŋɔsee-wooi mɛni ma da ŋ̀óo-ŋai.
9È ŋɔ́nɔ see da kpɛ́ni ƃò, é mó ǹîa-ni dîa ǹyɛɛi, “Ŋá see da kpɛ́ni ƃò. Vóloi da ŋ̀áloŋ é pɛ́lɛ pɛ̂mɛlɛŋ-kao puu káo tɔnɔ̀ɔi mâ dí kɛ̀ pɛlɛ̂i ŋ́gɔɔ mu.”
10Kɛ́lɛ tãi è zee-wooi ŋí ƃò la ǹâŋ ma da ǹîa-ni, ǹâŋ è ǹia-woo ƃò ǹyɛɛ mai, “Zeei ŋí í mòi, ǹyaa ƃa lé? Gáa a sɛŋ kwa ílee da ílîa-ni kú pɛ́lɛ íkɔɔ mu?” 11Nya ƃe ǹîa-ni dí nâa kɛ̀ tólo kulâi mà. Kɛ́lɛ ǹâŋ è ŋ̀óo-ŋai lâai kɛ̀ gíli ŋá.
Dí Zosɛ kɔ̀lɛ Ize
12È kɛ̀ a tãi tɔnɔ Zosɛ ǹîa-ni dí lì a dínâŋ ŋɔƃála-ŋai vɛ̃ɛ-kpâlaŋ su Sɛkɛŋ kɔlɛ mâ. 13Nya ƃe Zeeka è mò Zosɛ ma ǹyɛɛi, “Ílîa-ni díkaa m̀ála-ŋai mɛi kâai Sɛkɛŋ. Pá ŋá ítɛɛ dípɔ naa.”
È mò mà ǹyɛɛi, “Ńyãa ká ŋí.”
14Ǹâŋ è mò ma ǹyɛɛi, “Lí í ílîa-ni naa káa da m̀ála-ŋai. À kɛ̀ díkɔlɔ̂i ponoɔ̂ɔi í pá í mó ḿâ.” Mɛni ma è gùla Iburɔŋ yeei kwára é dɛ́ɛ Sɛkɛŋ.
15Nalôŋ tɔnɔ è gàa sîa-siai vɛ̃ɛ-kpâlaŋ su é marê kɛ́ ǹyɛɛ ma, “Lé ƃé íkaa gɔ̂rii?”
16Ńyɛɛ mai, “Ŋ́gaa ńîa-ni kɔ̂rii. Kpera yɛ̂ ƃɛ́i lɛ́ ḿâ díkaa m̀ála-ŋai mɛi kâai naai.”
17Nalôŋ ǹyɛɛ mai, “Da lí, kpɛ́ni fêi, ŋá mɛ̀ni díla dîyɛɛi, ‘Kwaa kú lí Dotaŋ.’ ” Nya ƃe Zosɛ è lɛ̀ɛ ǹîa-ni pôlu é díkaa Dotaŋ.
18Dí gàa pâi kwaa kôya ma. É lɛ́ɛ pâi serîi dîa, dí gbɛ̀tɛ a gɛɛ dí bàa. 19Dí mò díkîe-ni dîa dîyɛɛi, “Zee-ƃo-nuui ká tí pâi. 20Ka pá kú bàa kú bíli ǹóai su. Gɛ̀ ní kwa pâi môi a gɛɛ fɛnɛ-sãa nyɔmɔɔ ŋàa ƃé mîi. Kwa pâi nâa gâai mɛnii pâi kɛ̂i a ŋɔsee-wooi.”
21Kɛ́lɛ tãi Lubiŋ è mɛni-kpɛtɛɛi ŋí mɛ̀ni lai, è kɛ̀ ŋ̀wɛ̂lii é Zosɛ kula ǹîa-ni yêei. È mò dîa ǹyɛɛi, “Kúfe bàa.” 22Lubiŋ è mò dîa ǹyɛɛi, “Káfe ŋ̀ãa pù. Ka bìli nɔ́ ƃɛ́ ǹóai su vɛ̃ɛ-kpâlaŋ su, kɛ́lɛ káfe káyee pɛ̀lɛ ma.” È kɛ̀ ŋ̀wɛ̂lii a gɛɛ é gùla díyêei é pá la ǹâŋ pɔ́. 23Tãi Zosɛ è sèri la ǹîa-ni diai, dí ŋɔyokpo lɛ́lɛɛi kùla mà. 24Dí lí a Zosɛ dí bíli ǹóai su. Ǹóai è kɛ̀ a vólo, yá fé kɛ́ ní zu.
25Nya ƃe dí sèe díkɛ dílaa mìi. Dí díŋuŋ mu sìɣe dí Isima-ŋai káa kulâi Gilia díkɛ pà a díkpulu kɛ́tɛ soo-fáleŋ-ŋa mɛi. Dí kɛ̀ pâi a wúru-malaŋ, tuma-laa kúŋ nɛ̃ɛ da wúlɔ kúŋ nɛ̃ɛ. Dí kɛ̀ liî Ize. 26Nya ƃe Zuda è mò m̀arâai dîa ǹyɛɛi, “Lé lɛ́lɛɛ ƃé kwa pâi zɔlɔ ƃôi à kɛ̀ kwa kúlêɣe pàa kú bàa mɛni lòo? 27Ka pá kú gɔlɛ Isima-ŋai dîa. Kúfe kúyee pɛ̀lɛ mà, kpɛ́ni fêi, gáa a kúlêɣe, kú ƃô a kpono tɔnɔ.” Nya ƃe m̀arâai dí fàa ŋ̀óo mâ. 28Midiɛŋ pɔni tɔɔ-ƃela dí kɛ̀ tɛɛ̂i naa kɔlɛ mâ. Nya ƃe Zosɛ ǹîa-ni dí gùla ǹóai su dí gɔlɛ Isima-ŋai dîa a káne kpua-kpua buu feerɛ. Nya ƃe dí lì a Zosɛ Ize.
29Tãi Lubiŋ è lì la pôlu ǹóai lái, vé Zosɛ káa ní zui, è ŋɔseɣei fála a lii-soli. 30É lí pôlu m̀arâai pɔ́ naa ǹyɛɛ diai, “Ǹôloŋ fé naa. Mí ƃé ŋa pɔ̂ri liî naa?”
31Nya ƃe dí Zosɛ ŋɔyokpoi sîɣe dí ƃoli páa dí ǹɔ́ m̀oli ŋãai su. 32Dí lì la dínâŋ pɔ́ díyɛɛ mai, “Kú ǹyokpoi ŋí kàa. Gáa à kɛ̀ gáa a íloŋ pɔ́.”
33Nya ƃe è maa kpɛ̂ɛ ǹyɛɛi, “Ńoŋ ŋɔyokpoi ká ŋí. Fɛnɛ-sɛŋ nyɔ́mɔɔ a ńoŋ míi. Ńâai la vɛnɛ-sɛŋ nyɔ́mɔɔi tí è Zosɛ su tèe a gbua-kpûa!” 34Nya ƃe Zeeka è ŋɔseɣei fâla é maloŋ too-maa seɣɛ tôo mà é wɔ́lɔ kpɔ́ ǹóŋ mɛni ma a ɣele kûu támaa. 35Ǹônii-sinaai da ǹônii-nɛyãai kélee dí dímu sìɣe dí lí a gɛɛ dí ŋ̀á nɛnɛ. Kɛ́lɛ vé fáa ní a gɛɛ dí ŋ̀á nɛnɛ. È mò ǹyɛɛi, “Kpao, ŋa pâi lɛɛ̂i ńoŋ maa wɔ̂lɔ kɛ̂i é lɛ́ɛ la zu ŋá sáa.”
36Midiɛŋ-ŋai dí lì dí Zosɛ kɔ̀lɛ gɔkuluƃa-ŋai kɛ́ Ize kaloŋ mɛi kâai laa-tuɛ nuu kɛ́tɛi mâ Ize. Nalôŋ kpîŋ láa ƃe kɛ̀ a Potifa.
હાલમાં પસંદ કરેલ:
Zɛnɛse 37: KWB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2012 Bible Society in Liberia