Zɛnɛse 27
27
Aise è lûwa làa Zeeka mà
1Tãi Aise è pɔ̀lɔ lai ŋ̀ɛ́i fé ŋɔ́nɔ kɛ́ ní kwaa kâai. Nya ƃe è Isɔɔ tòli nyii kɛ̀ a ǹóŋ maa-ŋuŋ ǹyɛɛ mai, “Ńoŋ!”
Ǹóŋ è ŋ̀óo su tòo ǹyɛɛ mai, “Ńyãa ká ŋí.”
2Aise ǹyɛɛ mai, “Gáa ŋa nâa pɔ́lɔ, ǹyaŋ fé ńzaa tãi kɔ́lɔŋ. 3Íkerâŋ síɣe da dɔ̃a í lí nɔ̀ɔi su í sua kɔ́ri mî, 4Í gbɛtɛ kpɔ́ a mii-sɛŋ yɛ̂ɛ berei ŋa ŋ̀wɛ̂lii lai, í pá la ŋá mii ŋá lûwa too yâ ŋá lɛ́ɛ saâi.”
5Ǹyaŋ Lubɛka è kɛ̀ ŋ̀óli tɔɔ̂i Aise ma tãi è kɛ̀ lônoi la Isɔɔ pɔ́i. Tãi nâa Isɔɔ è lì la nɔ̀ɔi su zuai kɔ̂rii, 6Lubɛka è mò ǹóŋ Zeeka ma ǹyɛɛi, “Ŋá ínâŋ wóo mɛ̀ni gɛ́ lòno ílîa Isɔɔ pɔ́ ǹyɛɛ mai, 7‘Sua páa í ŋíli a mii-sɛŋ yɛ̂ɛ berei ŋa ŋ̀wɛ̂lii lai, í pá la ŋá mii ŋá lûwa too yâ Yâwɛɛ ŋɛ́i ŋá lɛ́ɛ pâi saâi.’ 8Mɛni ma, ńoŋ, mɛnii ŋa pâi môi yâi gɛ́. 9Lí daa-tulɛ kpului sáma, í ƃoli naɣa feerɛ sóŋ í dípaa í pá a dîa ŋá díkpɛtɛ a mii-sɛŋ ínâŋ mì yɛ̂ɛ berei a ŋ̀wɛ̂lii lai. 10Ƃa pâi liî la ínâŋ pɔ́ a gɛɛ é mii é lûwa láa yâ é lɛ́ɛ pâi saâi.”
11Kɛ́lɛ Zeeka è mò ǹee Lubɛka ma ǹyɛɛi, “Ǹîa Isɔɔ kɔlɔ-leɣa káa ma, ńyaŋ ŋ́gɔlɔ-leɣa fé ḿâ. 12Tãi da ńâŋ a pâi ǹyée siâi ḿâ. Ǹyaŋ à gàa a gɛɛ ŋ́gaa moôi, gɛ̀ ní ŋa pâi foo-wôo sɔlɔ ƃôi lûwa pɔ́ ŋá.”
13Ǹee è mò ma ǹyɛɛi, “Ńoŋ, tɔɔ ífoo-wooi é kɛ́ ḿâ, kɛ́lɛ, ŋ́oo mɛni nɔ́. Lí í pá a zua-ŋai ḿbɔ.” 14Nya ƃe è lì é pá a dia ǹee pɔ́, ǹee é díkpɛtɛ a mii-sɛŋ yɛ̂ɛ berei ǹâŋ è kɛ̀ ŋ̀wɛ̂lii lai. 15Nya ƃe Lubɛka è Isɔɔ ŋɔseɣe-ŋai ǹɛ́lɛɛi sìɣe zu é doo ǹóŋ Zeeka ma. 16È m̀oli kɔlɔi sîɣe é bɛ́lɛ Zeeka yée ma é da pɛlɛ gɔŋ ma ƃɛ́i gɔlɔ-leɣa fé kɛ́ ní naai. 17Mii-sɛŋ è gbɛ̀tɛi, è nâa dɛ̀ɛ ǹóŋ Zeeka pɔ́ da gbóloi.
18Nya ƃe è lì ǹâŋ pɔ́ naa ǹyɛɛ mai, “Ńâŋ!”
Ǹâŋ ǹyɛɛ mai, “Ńyãa ká ŋí. Gbɛ̂ɛ ƃa yá ńoŋ?”
19Zeeka è mò ǹâŋ ma ǹyɛɛi, “Íloŋ maa-ŋuŋ Isɔɔ ƃa ńyãa. Mɛnii í mò mai ŋâa gɛ́. Ímu síɣe í mii-sɛŋ míi í lûwa too ḿâ.”
20Kɛ́lɛ Aise è mò ǹóŋ ma ǹyɛɛi, “Ǹóŋ, gɛ̀ɛi léŋ í zuai sɔlɔ ƃô a maa félaai?”
È zu tòo ǹyɛɛi, “Kpɛ́ni fêi, Yâwɛɛ nyii gáa a Íɣâlai, è kpɔ̀ŋ ḿâ.”
21Nya ƃe Aise è mò Zeeka ma ǹyɛɛi, “Ńoŋ lɛɣɛ a ńyãa ŋá ńyee sía yâ ŋá gáa a kɛ̀ íkaa a ńoŋ Isɔɔ a tɔ̃yâ.” 22Nya ƃe Zeeka è lɛ̀ɣɛ a ǹâŋ Aise. Aise é ǹyée sía mà ǹyɛɛi, “Íwoo kɛ̂ɛi yɛ̂ɛ Zeeka wóo, kɛ́lɛ íyee kɛ́ɛ yɛ̂ɛ Isɔɔ.” 23Vé maa kpɛɛ ní, kpɛ́ni fêi, ǹyée è kɛ̀ nɔ́ yɛ̂ɛ ǹîa Isɔɔ yée. Nya ƃe è lûwa lâa ma. 24È marê kɛ̀ ǹyɛɛ mai, “Ńoŋ Isɔɔ ƃa yá a tɔ̃yâ?”
Ńyɛɛ mai, “Isɔɔ ƃa ńyãa.”
25È mò ma ǹyɛɛi, “Pá la ŋá míi ŋá lûwa láa yâ.” Nya ƃe è pà la bɔ́ é mii, é pá bɔ́ a ŋwãai é gbele. 26Nya ƃe ǹâŋ Aise è mò mà ǹyɛɛi, “Ńoŋ, lɛɣɛ a ńyãa í íla-gbɔ see ḿâ.” 27Nya ƃe è lɛ̀ɣɛ la é ǹá-gbɔ see mà. È ŋɔseɣei kúŋ mɛ̀ni é lûwa láa ma ǹyɛɛ mai, “Ńoŋ kɔlɔ kúŋ lɛ̂lɛɛi yɛ̂ɛ wolâi kúŋ nyii Yâwɛɛ è lûwa làa mai. 28Ɣâla é lúu kúla ŋ̀elei su é ǹɔii lɛ́lɛ, é mii-sɛŋ támaa tɛ́ɛ ípɔ da ŋwãai! 29Nûa dí tíi kɛ́ yɛ̂. Lɔii-ŋuŋ-ŋa dí pɛ́lɛ íkɔɔ mu. Kɛ́ a ílêɣe-ni da ílîa-ni mɛi-nuu. Ílee ǹônii dí pɛ́lɛ íkɔɔ mu. Náɣaŋ é kɛ́ diai dîa da ínàɣaŋ. Lûwa é kɛ́ diai kélee dîa da lûwa làa yâi.”
Isɔɔ è Aise kperâi fè lûwa mɛni ma
30Aise kɛ́ɛ a kpɛɛ lûwa lâai Zeeka ma, Zeeka è kɛ̀ nɔ́ pâi kulâi ǹâŋ Aise kɔlɛ é lí, ǹîa Isɔɔ kɛ́ kùla gbâna-pili siai ma gɛ́ pà. 31Ǹyaa máŋ è mii-sɛŋ lɛ́lɛɛ kpɛ̀tɛ é pá la ǹâŋ pɔ́. È mò ǹâŋ ma ǹyɛɛi, “Ńâŋ, ímu síɣe í ŋásuai míi ńyãai a íloŋ, a gɛɛ í lûwa láa ḿâ.”
32Ǹâŋ Aise è mò ma ǹyɛɛi, “Gbɛ̂ɛ ƃa yá?”
È zu tòo ǹyɛɛi, “Íloŋ maa-ŋuŋ Isɔɔ ƃa ńyãa.”
33Nya ƃe Aise líi è kàra-kara ǹyɛɛi, “Gɛ̀ ní gbɛ̂ɛ ƃé zuai pâa é pá la ŋá gélee míi í lɛ́ɛ pâi, ŋá lûwa láa mai? Tɔ̃yâ mà ǹûwai káa nâa mà.”
34Tãi Isɔɔ è ǹâŋ wóo-ŋai ŋí mɛ̀ni lai, è wɔ̀lɔ kpɔ́ a zu kɛ́tɛ ǹyɛɛi, “Lûwa láa ḿâ máŋ, óo ńâŋ!”
35Kɛ́lɛ ǹâŋ è mò ma ǹyɛɛi, “Ílêɣe è pà ƃɛ́ a wôya-pere, ǹyaŋ aâ ílûwai sɔlɔ ƃó.”
36Isɔɔ ǹyɛɛ mai, “Ǹáa ƃa Zeeka a tɔ̃yâ. Kpɛ́ni fêi, a ŋôya sii ŋí kɛ́ nâa a ńyãa gîei feerɛ. È ŋápɔɔ-sɛŋ sìɣe, ǹya ƃe a ŋɔ́nɔ ŋálûwai síɣe.” Naa pôlu ma è mò ǹâŋ ma ǹyɛɛi, “Lûwa da kélee fé naa ḿɛni ma ŋɔ́nɔ?”
37Aise è Isɔɔ wóo su tòo ǹyɛɛi, “Gáa, ŋa nâa gɛ́ a ímɛi-nuu. Ŋa ǹîa-ni da ǹêɣe-ni kɛ́ a ǹyée mu-ƃela. Ŋa mii-sãa da ŋwãai tɛ́ɛ bɔ́. Lé ŋaŋ ƃé ŋa pɔ̂ri gɛ̂i yɛ̂ ńoŋ?”
38Isɔɔ è ǹâŋ wóo su tòo ǹyɛɛi, “Ńâŋ, ǹûa tɔnɔi tí nɔ́ ƃé ílai? Óo ńâŋ, lûwa láa ḿâ máŋ!” Isɔɔ è làɣi a wɔ́lɔ.
39Nya ƃe ǹâŋ Aise è ŋ̀óo su tòo ǹyɛɛi,
“Íkɛ̂i a pâi kɛ̂i lɔii
nyɔ́mɔɔ ma ƃɛ́i
sí-sɛŋ fa lɛ̂lɛ naa,
lúu fa pù naai.
40Ƃa pâi ífulu-laai kɛ̂i íkɔ kɔ́-sãai sârai.
Ƃa pâi kɛ̂i a ílêɣe ŋɔtíi kɛ́-nuu.
Kɛ́lɛ ƃa ítɔɔ̂i kpànaŋ, tãi a pâi pâi
gbîrii ŋí a pâi kulâi íŋûa.”
41Ǹyaŋ Isɔɔ è nâa Zeeka kpɔ̀ara ǹúwai mɛni ma ǹâŋ è nàa mai. Nya ƃe è mò ǹyɛɛi, “Ńâŋ saa tãi a kɛ́ lɛɣɛ̂i. À sàa, ŋa pâi ńêɣe Zeeka paâi.”
42Kɛ́lɛ Lubɛka è ǹóŋ maa-ŋuŋ Isɔɔ wóo-ŋai ŋí mɛ̀ni, é ǹóŋ Zeeka worɛ̂ tɛ̀ɛ ǹyɛɛ mai, “Gáa, ílîa Isɔɔ a gbɛ̀tɛ gíli ŋá a gɛɛ é ípaa. 43Mɛni ma m̀ɛnii ŋa pâi môi yâi m̀ɛni. Pú í lí ńzâaƃɔlɔ Laƃaŋ pɔ́ naa Araŋ. 44Ka ǹyaa ká lɛɛ naa é lɛ́ɛ la zu ílîa ŋɔlii-ŋwanai ŋá é yéŋ. 45Lɛɛ naa é lɛ́ɛ la zu ílîa ŋɔlii-ŋwanai ŋá é yéŋ é nia mɛnii ma í gɛ̀ lai. Gɛ̀ ní ŋa pâi íworɛ̂ tɛɛ̂i í kúla naa. Ŋa pâi ƃalânii ńônii veerɛ su a ɣele tɔnɔ lé mɛni ma?”
Aise è Zeeka tɛ̀ɛ Laƃaŋ pɔ́ naa
46Nya ƃe Lubɛka è mò Aise ma ǹyɛɛi, “Ŋáfulu-laai maa lii-sɛlɛŋ káa mâ Ita-nɛyãai mɛni ma. À kɛ̀ Zeeka à Ita-nɛyâai ŋí dɔnɔ kùla a nɛnî ǹɔii ŋí su, gɛ̀ ní lé fúlu-laa lɛ́lɛɛ ƃé pâi kɛ̂i ńyêei?”
હાલમાં પસંદ કરેલ:
Zɛnɛse 27: KWB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2012 Bible Society in Liberia