Tobiti 12
12
Ta ntsumi Rafaele
1Loko nkhuvo wa vukati wu herile, Tobiti a vitana Tobiya n'wana wa yena, a ku ka yena: “N'wananga, u fanele ku hakela munhu loyi a fambeke na wena. U nga rivali ku tlhandlekela muholo wa yena.”
2Tobiya a n'wi vutisa a ku: “Tatana, xana ndzi fanele ndzi n'wi hakela hi yini? Swi nge ndzi vilerisi ku n'wi nyika hafu ya hinkwaswo leswi ndzi vuyeke na swona. 3Ú vuyile na mina ndzi hlayisekile, ú yile a ya ndzi tekela mali eka Gabaele, ú ntshunxile nsati wa mina eka demona, naswona ú ku horisile, u tlhela u vona. Hikokwalaho, xana ndzi fanele ku n'wi tlhandlekela muholo wa yena hi yini?”
4Tobiti a ku ka yena: “N'wi nyike hafu ya hinkwaswo leswi a ku pfuneke ku vuya na swona. Swa n'wi fanela.”
5Tobiya a vitana Rafaele a ku ka yena: “Teka hafu ya hinkwaswo leswi u ndzi pfuneke ku vuya na swona. Swa ku fanela. Tlhelela ekaya ka wena hi ku rhula.”
6Kutani Rafaele a vitanela Tobiti na Tobiya etlhelo, a ku ka vona: “Dzunisani Xikwembu. Byelani vanhu hinkwavo leswinene leswi xi mi endleleke swona, leswaku na vona va ta xi fundzha ni ku xi dzunisa hi tinsimu. Mi nga tshiki ku xi dzunisa ni siku ni rin'we.
7“Swi fanerile ku fihla xihundla xa hosi ya tiko, kambe swiendlo swa Xikwembu swi fanele swi paluxiwa hinkwako-nkwako, leswaku xi ta fundzhiwa ni ku dzunisiwa.
“Loko mi endla leswinene, mi nga ka mi nga vavisiwi hi nchumu.
8 #
Sir. 29:8-13
“Ku khongela hi mbilu yo basa ni ku tsakisa Xikwembu hi ku nyika swisiwana swi tlula ku va ni xuma lexo tala lexi xi kumiweke hi tindlela leto biha. Ku nyika swisiwana swi tlula ku tihlengeletela nsuku. 9#Swiv. 11:4; Dan. 4:27; Sir. 3:30Ku nyika hi mbilu yo hanana swi ta mi kutsula eka rifu, swi ta susa swidyoho swa n'wina. Lava nyikaka swisiwana va ta hanya malembe yo tala. 10Kambe lava hanyaka hi vubihi ni ku homboloka va tivenga swinene.
11“Ndzi mi byerile leswaku xihundla xa hosi ya tiko xi fanele ku fihliwa, kambe swiendlo swa Xikwembu swi fanele swi paluxiwa eka vanhu hinkwavo. Sweswi ndzi ta mi paluxela swilo hinkwaswo, ndzi nga ka ndzi nga mi fihleli nchumu. 12#Yob. 33:23-24; Mint. 10:4; Nhlav. 8:3-4Kutani ke, Tobiti loko wena na Sara mi khongerile, loyi a yiseke swikhongelo swa n'wina eka Xikwembu hi mina. Ndzi endlile tano ni loko u lahla vafi. 13Siku leriya u nga suka etafuleni u tshika ku dya u ya lahla ntsumbu lowuya, Xikwembu a xi lo ndzi rhuma leswaku ndzi ku kambela. 14Nakambe xi ndzi rhumile ku ta ku tshungula ni ku ponisa nsati wa n'wana wa wena Sara eka leswi swi n'wi karhateke. 15#Zak. 4:10; Lk. 1:19; Nhlav. 8:2Hi mina Rafaele, yin'wana ya tintsumi ta 7 to hlawuleka leti yimaka emahlweni ka Xikwembu xo dzuneka ku xi tirhela minkarhi hinkwayo.”
16Tobiti na Tobiya va tshuka ku tlula mpimo, va rhurhumela hi ku chava, kutani va wela hansi hi mimombo. 17Kambe Rafaele a ku ka vona: “Mi nga chavi. Hinkwaswo swi lunghile. Tsundzukani ku dzunisa Xikwembu minkarhi hinkwayo. 18Hi xona xi rhandzeke leswaku ndzi ta mi pfuna, a ndzi tanga hi ku rhandza ka mina. Hikokwalaho xi dzuniseni evutomini bya n'wina hinkwabyo. 19Loko mi ndzi vonile onge ndzi le ku dyeni, a swi nga ri tano, a mi vona xivono. 20Mi fanele ku dzunisa ni ku nkhensa HOSI Xikwembu vutomi bya n'wina hinkwabyo. Sweswi ndzi fanele ku tlhelela eka loyi a ndzi rhumeke. Tsalani hinkwaswo leswi swi mi humeleleke.”
21Kuteloko Rafaele a nyamalala. Tobiti na Tobiya va suka va yima, kambe a va ha n'wi vonanga. 22Kutani va sungula ku yimbelela ni ku dzunisa Xikwembu, va xi nkhensa hikwalaho ka swiendlo swa xona swa matimba leswi xi swi endleke loko ntsumi Rafaele a ha ri na vona.
હાલમાં પસંદ કરેલ:
Tobiti 12: TSO89
Highlight
શેર કરો
નકલ કરો
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.