Yuditi 5
5
Huvo ya Holofani ni vafambisi va mavuthu ya yena
1Loko Holofani ndhunankulu ya mavuthu ya Vaasiriya a twa leswaku Vaisraele va tilulamisele ku lwa ni leswaku va sivile swiphandze swa swintshabyana, va vekele ni swisivelo erivaleni, 2a hlundzuka ngopfu. Kutani a hlengeleta tindhuna ta Mowabu ni vafambisi va mavuthu ya Amoni ni varhangeri hinkwavo va matiko lama nga eribuweni ra lwandle, 3a ku ka vona: “Ndzi byeleni n'wina Vakanana, i vanhu vahi lava akeke etikweni ra swintshabyana? Hi yihi miti ya vona? Mavuthu ya vona i mangani? Matimba ni vunhenha bya vona swi huma kwihi? Hosi ya vona leyi fambisaka mavuthu ya vona, i mani? 4Hikwalaho ka yini eka vanhu hinkwavo lava akeke evupeladyambu va ri vona ntsena lava aleke ku tinyiketa eka mina ke?”
Ku vulavula ka Akiyoro
5Kavaloko Akiyoro, murhangeri wa Vaamoni hinkwavo, a ku ka Holofani: “Hosi yanga, ndzi kombela hi xichavo, ndzi yingise. Ndzi ta ku byela ntiyiso hi vanhu lava akeke etikweni ra swintshabyana leswi nge kusuhi ni mixaxa ya wena. A ndzi nga ku byeli mavunwa. 6Vanhu lava i vatukulu va Vakalediya. 7Eminkarhini yin'wana a va akile eMesopotamiya, hikuva a va nga ha gandzeli swikwembu swa vatata wa vona lava a va ri eKalediya. 8A va tshikile mikhuva ya vakokwa wa vona, va khongela Xikwembu xa matilo, Xikwembu lexi a va sungurile ku xi tiva. Kutani va hlongoriwile etikweni ra vona kule ni swikwembu swa ka vona, va balekela eMesopotamiya laha va tshameke kona nkarhi wo leha.
9 # Gen. 11:31 – 12:5 “Kutani Xikwembu xa vona xi va lerisa ku rhurhela etikweni ra Kanana, laha va tshamisekeke va ndlandlamuka hi rifuwo ra nsuku ni silivhere ni tihomu to tala ngopfu. 10#Gen. 42:1-5; Eks. 1:7Loko ndlala yi wa eKanana, va rhurhele etikweni ra Egipta, laha va tshameke kona va kuma swakudya. Kwalaho va andza ngopfu, va va ntsandza-vahlayi. 11#Eks. 1:8-14Hikokwalaho hosi ya Egipta yi va khoma hi tihanyi, yi va tshikelela, yi va sindzisa ku vumba switina, yi va tsongahata ni ku va endla mahlonga. 12#Eks. 7:1-12; 29:46Kutani Vaisraele va khongela Xikwembu xa vona hi rito leri tlakukeke, kutani xi ba tiko hinkwaro ra Egipta hi mintungu#Kumbe: makhombo yo pfumala vatshunguri; hikokwalaho Vaegipta va va hlongola va suka exikarhi ka vona. 13#Eks. 14:21-22Xikwembu xi phyisa Lwandle-ro-Tshwuka emahlweni ka vona, 14xi va fambisa hi ndlela ya Sinayi na Kadexe-Bariniya.
“Vaisraele va hlongola vanhu hinkwavo lava tshamaka emananga. 15Va aka etikweni ra Vaamori, hi matimba ya vona va dlayetela Vaexibona hinkwavo; va pela nambu wa Yordani, va teka tiko hinkwaro ra swintshabyana. 16Va hlongola Vakanana, na Vaperesi, na Vayebusi, na Vaxikeme, na Vagerigasi hinkwavo, kutani va tshama ematikweni ya vanhu lava nkarhi wo leha.
17 #
Dut. 28:1-68
“Loko va nga dyoheli Xikwembu xa vona, va ndlandlamuka, hikuva Xikwembu lexi xi venga ku homboloka, kutani a xi ri na vona. 18Kambe loko va sungula ku hambuka endleleni leyi xi nga va vekela yona, xi va nyiketa va hluriwa etinyimpini, va yisiwa evuhlongeni ematikweni ya vanhu vambe. Kutani Tempele ya Xikwembu xa vona yi mbundzumuxiwa, ni miti ya vona yi phangiwa hi valala va vona. 19Kambe sweswi va tlhelerile eka Xikwembu xa vona, va vuyile va huma laha a va hangalaseriwe kona, va tshamisa eYerusalema laha Xivandla lexo hlawuleka xa vona xi nga kona. Kutani va akile etikweni ra swintshabyana, hikuva a ku nga ri na munhu kona.
20“Kutani ke, we hosi n'wini wanga, loko ku ri ni xidyoho, hambi lexi vanhu lava va nga xi tiviki, lexi va dyoheleke Xikwembu xa vona ha xona, kambe hina hi tiva xidyoho xa kona, hi nga ya lwa na vona hi va hlula. 21Kambe loko ku ri hava xidyoho exikarhi ka vona, va tshike we hosi yanga, hikuva HOSI Xikwembu xa vona xi ta va sirhelela, na hina hi ta khomisiwa tingana emahlweni ka matiko hinkwawo.”
Ntshungu wu ala marito ya Akiyoro
22Loko Akiyoro a heta ku vulavula, hinkwavo lava a va yimile va rhendzela ntsonga wa Holofani va sungula ku dzumadzuma. Tindhuna ta Holofani ni vavanuna hinkwavo lava humaka eribuweni ra lwandle ni le ka Vamowabu va sindzisa leswaku Akiyoro a dlawa.
23A va ku: “Hikwalaho ka yini hi fanele hi chava Vaisraele? I vanhu lava nga riki na matimba eku lweni. 24Kutani ke, a hi tlhandlukeleni etikweni ra swintshabyana, we hosi Holofani. Vaisraele va ta mitiwa hi mavuthu layo tala ya wena.”
હાલમાં પસંદ કરેલ:
Yuditi 5: TSO89
Highlight
શેર કરો
નકલ કરો
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.