Luke 7
7
1နွို့ယော့ ကိုယ်တော်ယေရှုနောင်း လို့ဖုန်ကုန်းနွို့ ဟောဖြိုကရီပလေစ်ယော့နောင်း မြိုကပေရနောင်နွို့ ကြွကု့ဟောက်။ 2ဗဟိုတမြိုနွို့ ရောမတပ်မှုးဟိုအာ့်ကွက်နွို့ အမ်ဗင်အားကိုးအားထားဘို့မဲ့ အစေခံအာ့်ကွက်နောင်း ကလုပ်ကွက်တွို့ထာ ကလုဲင်မဲ့မောင်းဗီးမောင်းဗီးကိုးနွို့နဲ့။ 3တပ်မူးနွို့နောင်း ကတမ်းကိုယ်တော်ယေရှုနွို့ ဆောင့်အွမ်နောင်း အစေခံအမ်နွို့ အ့်ကျန်းမာအောင် လို့မျိုးဂျူးအကုန်းအပေ့တောင်ခိုင့်နွို့ တာ့ကိုယ်တော်နု့ ပလွှတ်တွို့ထာ အာ့်ဖိတ်ဟောက်နွို့နဲ့။ 4လို့ဇာ့နွို့နောင်းလဲဉ်း ပို့တွို့ထာ ကိုယ်တော်နား “တပ်မှုးနီးနား အ့်ကူအ့်ညီကိုယ်တော်ယေရှုနွို့ လို့ခံထိုင်ဟောက်နွို့နဲ့။ 5ရွားနွို့ပဒေကား အမ်နား လို့မျိုးအေ့နွို့နု့ ခှိက်ဟောက်နွို့ခေါင်း တာအေ့နောင်း ဓမ္မာရုံအကျောင်းနွို့ ကလုဲင်လို့ဆုပ်လှူအာပို့နွို့ခေါင်း” နွို့တောင်းပန်ကြဘို့နွို့နဲ့။ 6စနွိုနား ကိုယ်တော်ယေရှုနောင်း ခွို့နအနုဲင်နုဲင် တန်လွမ်းပို့နွို့ခေါင်း ညာ့တပ်မှုးန မာ့ငါတငါနွို့ ဆောင့်လောက်ပို့နို့ တပ်မှုးနောင်း ဘို့ပေ့အမ်တောင်ခိုင့်နွို့ ပလွှတ်တွို့ထာ ကိုယ်တော်နား “ကိုယ်တော်၊ ညာ့အေ့နွို့နား ကိုယ်တော်မောင်းကြွပိုတွိုနွို့နောင်း လာ့ထိုက်တန်ကောနွို့ခေါင်း ခံတွို့အပန်ထာ ကြွတော်မူကောရော။ 7နွို့ခရိုန်စယ် အေ့နွို့နားလဲဉ်း တာ့ကိုယ်တော်နွို့ မောင်ပို့ထွိနွို့လဲဉ်း လာ့ထိုက်တန်ကော။ ကိုယ်တော်ဆောင့်အာအ့်မိန့်န အစေခံအို့နား မာန်တူးပိုလောက်ဟောက်။ 8အို့ကိုယ်တိုင်နားလဲဉ်း နာ့အို့ဟို့မဲ့တာ့ကက်လို့အ့်ရာဟိုနွို့ တာ့ကက်တိအို့နီးနားလဲဉ်း လို့စစ်ဟိုဘို့ဘက်တွိုန်းနွို့ကိုးနဲ့။ အို့နား တပ်သားအာ့်ကွက်နွို့ ‘ကု့’ နွို့တာဖြိုနွို့နု့ အမ်နား မင်ကု့တွို့၊ ‘ပို့’ နွို့တာ့ဖြိုနွို့လဲဉ်း အမ်နား မင်ပို့ဟောက်နွို့နဲ့။ အစေခံအို့နွို့နားလဲဉ်း ‘ယို့နီး’ နွို့တာဖြိုနွို့ အမ်မင်ယို့ဟောက်” နွို့လျှောက်တံမနနဲ့။ 9ပနောင်နွို့နု့ ကိုယ်တော်ယေရှုဆောင့်အွမ်နောင်း အံ့သြတွို့ထာ ဘတ်နွို့ဘာ့တန်လွမ်းမဲ့လို့နွို့နု့ လှည့်ရေ့တွို့ထာ “ပွို့နွို့နား အို့ဖြိုလောက်ဟောက်။ လို့မျိုးအစ္စရေးဘို့ဘက်နွို့မှ လို့ယုံကြည်မှုကုန်းရီးနီးနောင်း အို့ခါထွိဖူးကော” နွို့ဖြိုမနနဲ့။ 10တပ်မှုးဘာ့ပလွှတ်ကု့မဲ့လို့နွို့နားလဲဉ်း ဆောင်လောက်ရန်းညာ့နွို့ အစေခံနောင်း ဟိုမဲ့ကျန်းကျန်းမာမာနား ထွိဟောက်နွို့နဲ့။ကွန်ဖြောက်မိတ်ရန်းအာ့်ကွက်နွို့ အ့်ထက်အ့်ပလုဲင်းဘက်ကု့ 11လောက်ဘတ်အာ့်ရှိနွို့ ကိုယ်တော်ယေရှုနောင်း တပည့်တော်ဘို့ဘက်နအနုဲင်နုဲင် ဘာဟက်မဲ့မြိုနာဣနနွို့ ဆောင့်ကြွပိုနွို့နောင်း လို့ဖုန်ကုန်းနောင်းလဲဉ်း ဘတ်နွို့နု့တန်လွမ်းကြဘို့နွို့နဲ့။ 12တာ့တောင်းခါမြိုနွို့နု့ ဆောင့်လောက်နောင်း လို့ဗီးအာ့်ကွက်နွို့ မောင်းသင်္ဂြိုဟ် လို့အ့်စုနောင်း ဂွတ်နွို့ညာ့လို့ဗီးထာ ထှက်လေးကြဘို့ ဖက်ပလန်းမြိုနွို့နဲ့။ လို့ဘာ့ဗီးနွို့နောင်း ကလုဲင်အာ့်ကွက်တိန့်တိန့် ကွန်မိတ်ရန်းအာ့်ကွက်နွို့နား မိတ်မြိုလို့မြိုနွို့နောင်းလဲဉ်း သမြနွို့နအနုဲင်နုဲင် တန်လွမ်းဖု့ကြဘို့နွို့နဲ့။ 13ကိုယ်တော်နောင်း ဆောင့်ရင်မုဲင်ရန်းနွို့ သမြနွို့နား နွက်သနားကြင်နာဟိုဟောက်နွို့ခေါင်း “လညှင်းန” နွို့ဖြိုမနနဲ့။ 14နွို့ခေါင်း ကိုယ်တော်နောင်း လို့ဘာ့ဂွတ်ပိုမဲ့ဘို့ တာ့ဇာ့ညာ့လို့ဗီးနွို့ ဆောင့်ကြွပိုယော့နု့ ညာ့လို့ဗီးနွို့ တိအမ်န ခိုက်ဟောက်ခေါင်း လို့ဂွတ်ပို့ညာ့လို့ဗီးနွို့နောင်းလဲဉ်း ဆောင့်မုဲင်အာနွို့နား ကိုယ်တော်နွို့ “လို့ပေ့၊ အို့ဖြိုလောက်ဟောက်မို့။ အောက်စေး” နွို့ဖြိုမနနဲ့။ 15ချန်နွို့နု့ လို့ဘာ့ဗီးနွို့နောင်း အောက်ထုစ်တွို့ထာ စဖြိုမဲ့ပနောင်နွို့နဲ့။ ကိုယ်တော်နောင်းလဲဉ်း အမ်နား တာမိတ်အမ်နွို့ အပ်ပလောက်ဝဲ့နွို့နဲ့။ 16လို့မေ့မေ့နွို့နောင်းလဲဉ်း ခရုံးအံသြတွို့ထာ “ကောင်ဗလတာ့အေ့နီး ဘာ့မြင့်မြတ်မဲ့ ပရောဖက်အာ့်ပါး ပေါ်လေးပို့တွို့။ ဖြားနား အေ့နွို့နု့ ဆုပ်ရေ့တွို့” နွို့ကျေးဇူးဖြားနွို့ ချီးမွမ်းကြဘို့နွို့နဲ့။ 17ကိုယ်တော်န ဘာ့တာ့ဗောက်မဲ့ ဂုဏ်ကတမ်းနွို့နောင်းလဲဉ်း ဖြိုင်ယုဒနွို့မေ့မေ့န တာ့မေ့တာ့ဇာ့ခွို့နွို့မေ့မေ့နွို့ နှံ့နောလေကု့ဟောက်နွို့နဲ့။ 18နွို့ခေါင်း ဆာယာအာအွူမင်္ဂလာ ယောဟန်နောင်း တန်းဘာ့ဟိုကောင်ထောင်နွို့ တပည့်တော်အမ်ဘို့ဘက်နောင်း အကြောင်းအရာဇာ့နီးမေ့မေ့နွို့ ဖြိုပလေစ်ကြပို့နွို့နား ယောဟန်နောင်း တပည့်အမ်အဲဉ်ကွက်နွို့ ဟက်တွို့ထာ 19တကိုယ်တော်နွို့ ပလွှတ်တွို့ထာ “ကိုယ်တော်နောင်း အေ့ဘာ့ဆုပ်ရေ့မယ့် မေရှိယကက်ရား၊ တာ့ကက်ကောလဲ အေ့နီး လို့အခြားအ်ာ့ကွက်နွို့ မင်ဆုန့်မဲ့ဟား” နွို့ မားကြဘို့စနွို့ကိုးနဲ့။ 20လို့စာနွို့နောင်းလဲဉ်း တကိုယ်တော်နွို့ ဆောင့်လောက်ကြဘို့နောင်း “ဆာယာအာအွူမင်္ဂလာယောဟန်နား အမ်ပလွတ်ကူအေ့ တကိုယ်တော်နွို့ ထာ ‘ကိုယ်တော်နောင်း အေ့ဘာ့ဆုပ်ရေ့မယ့် မေရှိယကက်ရား၊ တာ့ကက်ကောလဲ အေ့နီး လို့အခြားအာ့်ကွက်နွို့ မင်ဆုန့်မဲ့ဟား’ မားဝဲ့စနွို့ကိုးနဲ့” နွို့ဖြိုကြမဲ့ဘို့ကိုးနဲ့။ 21တမ်းချန်နွို့ ကိုယ်တော်နောင်း လို့ပမန်းတူးကားဘို့ဘက်နွို့ အ့်ကျန်းမာတွိုထာ တာ့လို့ကနံဆို့တာ့ဗောက်မဲ့ဘို့ဘက်နွို့မှ ကနံဆို့ဘို့ဘက်နောင်းလဲဉ်း ဒေါက်လေးအာမှကကော လို့လာ့ငုဲင်းရင်ကောဘို့ဘက်နွို့လဲဉ်း လာ့ငုဲင်းအ့်ရင်ဘက်အောင် ကုဟောက်နွို့နဲ့။ 22ကိုယ်တော်နား တပည့်တော်ယောဟန်ဘို့ဘက်နွိုနား “ခမ်ပွို့ယင် ဇာ့ဘာ့အွမ်နွို့နား ပို့မဲ့ဇာ့နွို့ နု့ တယောဟန်နို့ ကု့ဖြိုကြဘို့နွို့နဲ့။ လို့လငုဲင်းဘာ့ယင်ကားနို့လဲဉ်း လုနီးလငုဲင်းအမ်ယင်ကြတွိုဘို့။ လို့တီ့ကောက် ဘာ့ဗီးမဲ့နို့နားလဲဉ်း ကု့နိုင်းကြတွို့ဘို့။ လို့အ့်ကစုကုန်းရောဂါ သည်ဇာ့နိုလဲဉ်း ရောဂါဗာပွန်ကြတွို့ဘို့။ လို့လာ့သန်ဘာ့အွမ်ကောနွို့လဲဉ်း အွမ်ဘက်ကြတွို့ဘို့။ လို့ဘာ့ဗီးမဲ့နွို့လဲဉ်း အ့်ထက်ပလုဲင်းဘက်တွို့။ လို့ဆန်းရဲဇာ့နွို့လဲဉ်း မင်္ဂလာကတမ်းကလို့နွို့ မင်အွမ်တွို့။ 23လို့ဘာ့ယွမ်တည်မြဲအို့နွို့နောင်း ဖြားနား မင်ခံစွေလောက်ဟောက်ကောင်းကြီးမင်္ဂလာကိုး” နွို့ဟောဖြိုမနနွို့နဲ့။ 24တပည့်ယောဟန် ဆောင့်ယန်းပွန်ယော့နောင်း ခံမ့်ယောဟန်နား လို့ဖုန်ကုန်းနွို့နု့ ကိုယ်တော်ဘာ့ဟောဖြိုနွို့နု့နား “ကောင်ဗွေကန္တာရနွို့ မောင်းကုရေ့တတ်ထား။ ဂွဉ်ဘာ့ဒု ဘာ့ကမိုက်မဲ့ ဆုပ်သားပေါင်း နွို့ဆောင်ရင်ဟောက်ဟား။ 25တကက်ကောနွို့နု့ ပွို့လေးဖက်ပလန်းနား ဆောင်ယင်တတ်ထား ပွို့ကု့ဖက်နွို့နား။ ဆောင်ယင်လို့ဘာ့ဗာ့ခရိုန်းဇာ့ကလို့နွို့ အာ့်ကွက်ကွက်ကိုးဟား။ နာ့ဇာနွို့ တန်ဖိုးကုန်းမဲ့ ဘာ့ဗာ့မဲ့ခရိုန်းဇာ့ကလို့နွို့န လို့ဘာ့စွေပျော်ပါးနွို့နား ကောင်နန်းတော်ဖရင်နွို့စယ် မင်ထွိဟောက်နွို့နဲ့။ 26တာ့ကက်ကောလဲ ဆောင်ယင်လို့ကမာ့မား လေးပို့ကြဘို့ဖက်ပလန်းနောင်း။ ယောဟန်နောင်း ကလုဲင်ပရောဖက်အပါးနွို့ခေါင်း ပွို့နွို့နောင်း ဆောင်ယင် အမ်ကိုးဟား။ မှန်မန။ စနွို့လဲ အို့ဘာ့ဆောင်ဖြိုပွို့နွို့ကား ယောဟန်နား လို့ကုန်းမြတ်ထက်မဲ့ သာမန်ပရောဖက်အာ့်ပါးကိုးနွို့နဲ့။” 27ရွားနွို့ပဒေကား ပရောဖက်ကစာ့အပါးနား ခံယောဟန်နွို့ ဘာတဲင်းပွို့နွို့နောင်း ဖြားနောင်း အမ်ဖြိုမေရှိယဇာ့နီး။ ရွားနွို့ကား“ခါပလွှတ်ကောမို့နွို့တွိုန်း အို့နောင်း စေတမန်နွို့ ပလွှတ်ကု့တွို့ငွမ်း။အမ်နောင်း ကညွမ်းမို့နွို့ ဖြောင်အာလောက်ဟောက်” နွို့ကိုးနဲ့။ 28“အို့ဖြိုလောက်ဟောက်ပွို့။ ကွေကမ္ဘာနီးနား လို့ဘာ့ကုန်းမြတ်ထက်ယောဟန်နွို့ ကွေမှခါမွီးကော။ ဇာ့နွို့လဲ ကောင်ထာထနာတော်ဖြားနွို့နား အရေရ်ဘာ့တန်ထက်ကောဘေ့မှ ကုန်းမြတ်ထက်မဲ့ယောဟန်ကိုး” နွို့ ဖြိုမနနွို့နဲ့။ 29ကိုယ်တော်ဘာ့ဖြိုနွို့နု့ လို့ဘာ့အွမ်မေ့မေ့နွို့နား အလိုတော်ဖြားနွို့နု့ လိုက်နာကြဘို့ထာ တယောဟန်နွို့ ဘာ့ခံအွေဘို့အွူမင်္ဂလာ ဆောင်အွမ်ပနောင်နွို့ခေါင်း ဖြားနောင်း ဖြောင့်မက်ဟောက်နွို့ ဝန်ခံကြဘို့နွို့နဲ့။ 30စနွိုလဲ ဖာရိရှဲဘို့ဘက်န ဆာယာပါလိတ်ကျမ်းနွို့နား တာ့ယောဟန်နွို့ ခံအွေကောအွူမင်္ဂလာနွို့ခေါင်း တာ့ခွို့နု့နောင်း ဖြားဘာ့စီစဉ်ပွို့မဲ့ဇာ့နွို့နု့ ညောင်းပယ်လောက်ဟောက်ကြဘို့နွို့နဲ့။ 31နွို့ခေါင်း ကိုယ်တော်ယေရှုနား ဆက်တွို့ထာ “ဘာ့ကလုဲင်ခေတ်အခွပ်နောင်း ပွို့နွို့နား ကမွို့တတ်ထား၊ ခိုင်းနှိုင်းပွို့ကမာ့မွှားနွို့ပဒေနောင်း 32ပွို့နွို့နောင်း ကောင်ဆေနွို့ထို့တွို့ထာ‘အို့ဘာ့ဗက်ပလေပို့မဲ့ပွို့နွို့ထာဲကြကောဘို့။ပွို့ဘာ့ဆောင်ညှင်းသူမနနွို့လဲဉ်းပွို့ညှင်းကြကောဘို့’ နွို့အချောင်းချောင်းကလစ်မဲ့နွို့နား လို့ပေ့န တာ့မွို့ဟောက်နွို့နဲ့။ 33ရွားနွို့ပဒေကား ဆာယာအာအွူမင်္ဂလာယောဟန်နား အ့်စွေလဲဉ်းလာ့စွေကော၊ ဘာ့ပါမူးမဲ့ စပျစ်ဝိုင်နွို့လဲဉ်း ငွမ်းကောနား ကုမနနား ‘ယောဟန်နွို့ လို့ကနံဆို့တဗောက်မဲ့နွို့’ နု့ပွို့ဖြိုကြဘို့နွို့နဲ့။ 34နွို့နား ကွန်ဖြားနား စွေတွို့ထာမန်းနွို့လဲ ပွို့နွို့နား ‘ယေရှုနား ကလုဲင်လို့အစွေအငွမ်းကုန်းထာ လို့တန်အကောင့်နား၊ လို့ယို့အပြစ်ဒုစရိုက်နွို့န ဖွဲ့တွို့ဘို့ပေ့ထာ စွေမန’ နွို့ဖြိုပလောက်ကြဘို့။ 35စနွိုလဲ အသိဉာဏ်ပညာဖြားနွို့နောင်း ဖြောင့်မတ်မှန်ကန်ဟောက်နွို့ လို့ဘာ့ယို့လွမ်းဇာ့နွို့နောင်း သက်သေပလေစ်မန” နွို့ဟောဖြိုမနနနဲ့။ 36နွို့ခေါင်း မာတ်ဘာ့ဟိုရှိမုန်ဖာရိရှဲ အာ့်ကွက်နောင်း ကိုယ်တော်ယေရှုနွို့ တာ့ညာ့အမ်နု့ မောင်းစွေအ့်စွေနား ဖိမနနဲ့။ နွို့နား ကိုယ်တော်နောင်း တာ့ညာ့အမ်နွို့ ကြွကုတွို့ထာ မောင်းစွေနား ထုစ်မဲ့တာ့ပခုံနွို့နဲ့။ 37ချန်နွို့နု့ တာ့မြိုနွို့ လို့အပြစ်ဘာ့ဘို့ဘက်မဲ့ သမြအာ့်ကွက်နောင်း ဟိုဟောက်နွို့နဲ့။ သမြနွို့နောင်း ညာ့ဖာရိရှဲနွို့ ကိုယ်တော်ထုစ်တွို့ထာ စွေမနနွို့နောင်း ဆောင့်အွမ်ဟောက်နွို့န တန်ဖိုးဘာ့ကုန်းလွမ်းမဲ့ သန်းမှုးဂို့နဘာ့ယို့ပိုမဲ့ တကံမှု့ဟိန်းအ့်ပုလင်းနွို့ အွေတွို့ထာ တာ့လွက်နွို့ ပို့ဘို့မနနဲ့။ 38နွို့ခေါင်း သမြနွို့နောင်း တာ့ကောက်ကိုယ်တော်နွို့ ပို့တွို့ထာ မုဲင်ယော့ ညှင်းတွို့ထာ အွူလာ့ငုဲင်းအမ်နွို့န ကောက်ကိုယ်တော်နား အ့်စို့တွို့ထာ ကတောင်ဖုန်ညုပ်တောင်ဖုန်န ဆှက်ဂျောင်းအာနွို့နဲ့။ နွို့ခေါင်း ကောက်ကိုယ်တော်အ့်စုံနွို့ မှုတွို့ထာ တကံမှု့ဟိန်းန လှက်အာမနွို့နဲ့။ 39ချန်နွိုနု့ ဘာ့ဖိပို့မဲ့ကိုယ်တော် ဖာရိရှဲဘို့ဘက်နွို့နောင်း ကိုယ်တော်နွို့ ယင်ဟောက်ခေါင်း “လို့နီးနောင်း ပရောဖက်လမှန်နွို့နု့ လို့ဘာ့ခိုက်နွို့ ကမြအာ့်ကွက်နောင်း ကလုဲင်ကမြမာ့မားပဒေနောင်းနွို့ လိုလ့်ငန်းဟောက်။ လို့အပြစ်ဘာ့ဘို့ဘက်ကမြနွို့နောင်းလဲဉ်း လိုလ့်ငန်းဟောက်” နွို့ကောင်နွက်နွို့ စဉ်းစားမနနွို့နဲ့။ 40ကိုယ်တော်ယေရှုနွို့ အမ်နား “ရှိမုန်၊ အိုအမ်းလွိုဖြိုပို့အမားကိုးနဲ့” နွို့ ဆောင့်ဟောယော့နွို့ ရှိမုန်နား“ဖြိုစေး၊ ကိုယ်တော်” နွို့လျှောက်တံမနနွို့နဲ့။ 41စနွို့နား ကိုယ်တော်ယေရှုနားလဲဉ်း “တာ့လို့ အာ့်ကွက်ပေါင့်မှားဗေ့ ပိုက်ဆံနား အဲဉ်ကွက်နွို့ ပေါင်းမှားအာကြဘို့နွို့နဲ့။ အ့်ာကွက်နား ဒေနာရီဒင်္ဂါးထွန်ဖျား၊ အာ့်ခြားအာ့်ကွက်နား ဒေနာရီဒင်္ဂါး ထွန်ကျင် အ့်ကြွေးတံမနနွို့နဲ့။ 42နွို့ခေါင်း ခွို့နွို့နား ခွို့အားစပ်ဘက်နိုင်းကားခေါင်း ကစာ့အ့်ကြွေးနား ခွို့အဲဉ်ကွက်နွို့ အ့်ကြွေးနားမင်ဆက်ဘက်ကောဆောင်ဖြိုနွို့နောင်း ကွားနား ကစာ့အ့်ကြွေးနွို့ တံလိုလ့်ကျေးဇူးနား” နွို့မားမနနဲ့။ 43ချန်နွို့နု့ ရှိမုန်နားလဲဉ်း အထုန်အိုးနိုနို့ “လို့ပပေါင့်မားဗို့ထပ်ဗေ့နွို့နား တံလိုလ့်လောက်ဟောက်ကျေးဇူးကိုး” နွို့ဖြိုမနနဲ့။ ကိုယ်တော်ယေရှုနားလဲဉ်း “မှန်မန” နွို့ဟောဖြိုမနနွို့နဲ့။ 44နွို့ခေါင်း ကိုယ်တော်နောင်း လှယ်တွို့ဖတ်ကမြနို့ထာ ရှိမုန်နား “ယင်ရားကမြနီးဟား။ ညာ့မို့နွို့ အို့ဆောင်ကြွပိုညာ့မို့နွို့ မို့နား ကထေအာကောကောက်အို့အွူနွို့လဲဉ်း သမြနွို့နား ကောက်အို့နွို့နား ကထေအာတွို့အွူငုဲင်းနထာ ညုပ်ကတောင်အမ်န ဂျောင်းအောင်ဆှက်အာဟောက်။ 45စနွို့စယ်မှကကော မွိုနား အို့လပ်ကြွပို့နို့နား မို့ကမူးတို့ထလဲဉ်း ကြိုဆိုကားကြဘို့။ ဇာ့နွို့လဲ ကမြနွို့နား ကောက်အို့နွို့နား မတိုက်မတန်း ကမူးဝဲ့နွို့နဲ့။ 46မို့နား ကတောင်အို့နု့ တကံသံလွင်န လှက်အာကောနွို့လဲဉ်း သမြနွို့နား တန်ဖိုးဘာ့ကုန်းမဲ့ တကံမှု့ဟိန်းနွို့န ကောက်အို့နွို့ ဆှက်အာဟောက်နွို့နဲ့။ 47ဇာ့နွို့နား အို့ဘာဆောင်ဖြိုနွို့နား ကမြနီးနား အပြစ်ဘာ့ဘို့ဘက်နွို့ ဘာ့ဗင်ခွင့်လွှတ်ခံနွို့နား ခှိက်မေတ္တာသမြနွို့ကုန်းလွန်းလန်းနွို့ကိုးနဲ့။ လို့ဘာ့ခွင့်လွတ်ခံ အ့်နည်းနွို့နား အ့်နည်းစယ် ခှိက်မေတ္တာ ဘာ့ပလေစ်ဟောက်” နွို့ ဖြိုလောက်ဟောက်နဲ့။ 48နွို့ခေါင်း ကိုယ်တော်နွို့ သမြနွို့နား “အပြစ်ဒုစရိုက်မို့နွို့မေ့မေ့နု့နား ခွင့်လွှတ်အာယော့” နွို့ ဖြိုမနနဲ့။ 49ချန်နွို့နု့ တာ့ပခုံ ကိုယ်တော်န အနုဲင်နုဲင်ထု့စ်မဲ့ လို့တခြားဘို့ဘက်နား “အပြစ်ဒုစရိုက်စယ်မှ ခွင့်လွှတ်နိုင်းဟောက်နွို့ ဖြိုမနခေါင်း လို့နီးနား ကလုဲင်ကွား” နွို့အချောင်းချောင်း ဖြိုကြဘို့သက်သက်နွို့နဲ့။ 50စနွို့လဲ ကိုယ်တော်ယေရှုနား ကမြနွို့နု့ “ယုံကြည်ခြင်းမို့နွို့နား အမ်ကယ်တင်ဝဲ့မွို့ကိုးနဲ့။ ငြိမ်းငြိမ်းချမ်းချမ်းကု့စေး” နွို့ဖြိုမနနဲ့။
હાલમાં પસંદ કરેલ:
Luke 7: dtpv-rv
Highlight
શેર કરો
નકલ કરો
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
