Luke 6
6
1ရှိဥပုသ်အ့်ရှိရှိနွိုနား ကိုယ်တော်ယေရှုန တပည့်တော်အမ်နား တန်းခွို့ဖြတ်ကူးတွို့ ရေ့းဂျုံနွို့ထာ တပည့်တော်အမ်နား ခွို့တောက်အွေတွို ဂျုံထာ တောင်းကောက်အမ်နွို့ ကလွေတွို့တိနယောတဝ်းတို့ထာ ကလောင်းဂျုံဘို့ဘက်နွို့ စွေကြဘို့နွို့နဲ့။ 2ဖာရိရှဲတောင်ခိုင့်နောင်း ကိုယ်တော်နွို့ “ရွားရှိဥပုသ်စယ်မှ ပွို့နွို့နား ယို့ခွင်ဟိုကောနွို့ ရွားဘို့ယို့တဘို့နား” ဖြိုကြဘို့စနွို့ကိုးနဲ့။ 3ကိုယ်တော်ယေရှုနား “ဖရင်ဒါဝိဒ်န လို့ကု့လွမ်းဘက်အမ်နောင်း ဆောင့်ဘာ့ဆာနွို့နောင်း အမ်ယို့တတ်ထားပဒေနောင်း ခွို့ဖက်ဖူးကောကြဘို့ဟား။ 4အမ်နား ကွက်ထု့ယော့ကောင်ညာ့ဖြားနွို့ တာ့ပုရောဟိတ် ဘာ့ကပ်ဘို့တရားရားချိနွို့နု့ အမ်ကိုယ်တိုင်စွေစယ်မှကာ့ကော လို့ကု့လွမ်းဘတ်အမ်နောင်းလဲဉ်း အာပွို့မဲ့နဲ့” နွို့ဖြိုယော့နွို့ ဆက်တွို့ထာ ကိုယ်တော်နား 5“ဘာ့ကလုဲင်ကွန်ဖြားအို့နား ရှိဥပုသ်ကစာ့ကိုး” နွို့ဖြိုဘွတ်ဝဲ့စနွို့ကိုးနဲ့။ 6ရှိဥပုသ်အခြားနွို့ ကိုယ်တော်နောင်း ဓမ္မာရုံနွို့နား တန်းဘာ့ဟောကရီပလေနို့ လို့တိဖက်ဒုဗီးမဲ့လို့အ့်အာ့်ကွက်ဟိုဟောက်နွို့နဲ့။ 7ဗဟိုကြမဲ့ပွို့တာ့လွက်နွို့ ဖာရိရှဲန ဆာယာပါလိတ်ကျမ်းတောင်ခိုင့်နောင်း ရှိဥပုသ်နွို့ လို့အာ့်ကွက်ကွက်နွို့ တာ့မောင်ကုဟောက်နွို့နောင်း မောင်းယိုဇ်အကြောင်းပြချက် ရက်ထွိနိုင်းအောင် ကိုယ်တော်နား ဆုပ်ရေ့ကြဘို့ အ့်တာ့မေ့နွို့နု့နဲ့။ 8စနွိုလဲ ခွို့အမ်ယူကြံစည်စမွားနွို့ အမ်ငန်းမဲ့ကလို့ကလို့ခမ်း ကိုယ်တော်နား လို့တိဖက်ဒုဗီးနွိုနား “အောက်အိုတွို့ထာ လငွမ်းလို့နီးမေ့မေ့ အောက်မုဲင်စေး” နွို့ ဆောင့်မိန့်ဖြိုနောင်း လို့နွိုလဲဉ်း အောက်အိုမဲ့တနွို့ကိုးနဲ့။ 9နွို့ခေါင်း ကိုယ်တော်ယေရှုနား “ပွို့နွို့နု့ အို့မုဲင်းစဲအမာ့။ ရှိဥပုသ်ဇာ့နီးနား လိုလ့် ယို့ အ့်ကလို့ဟား၊ လိုလ်ယို့ကော အ့်ကလို့ဟား တာ့ကက်ကောလဲ အထက်လို့အာ့်ကွက်ကွက်နွို့ လိုလ့်ကယ်တင်ဟား၊ လိုလ့်ဗီဟောက်ဟား” နွို့မိန်တော်မူယော့ 10တာ့ဇာ့ပတ်ဝန်းကျင်မို့ဗဟို လို့နွို့နု့ လက်လှည့်ရေ့တွို့ထာ လို့တိဖက်ဒုဘာ့ဗီးနွို့နား “တိမို့နွို့ ဆံ့လေးဝဲ့စေး” နွို့မိန့် ဖြိုတိုထာ လို့ဇာ့နွို့နောင်းလဲဉ်း တိအမ်ဆောင်ဆံ့ဝဲ့နွို့နို့ တိအမ်နွို့နား နာ့အ့်ကလို့နွို့အတွိုန်း ကလုဲင်ကု့ဟောက်နဲ့။ 11ချန်နွို့နု့ ဖာရိရှဲဘို့ဘက်န ဆာယာပါလိတ်ကျမ်းဘို့ဘက်နောင်း နွက်ဆို့တွို့ထာ ကိုယ်တော်ယေရှုနား မောင်းယို့ဇာ့မားနွို့နား အချောင်းချောင်းတိုင်ပန်ကြဘို့နွို့နဲ့။ 12အ့်ရှိနွို ကိုယ်တော်ယေရှုနောင်း ကု့လောက်တွို့ကွေဗွေနွိုထာ ဗင်ဂို့ဂို့ တာ့ဖြားနွို့ ဝါးထာဆုတောင်းမနနဲ့။ 13ကိုယ်တော်ယေရှုနောင်း သေ့ဆောင့်လန်းနောင်း တပည့်တော်ဘို့ဘက်နွို့ တာ့အမ်နွို့ အ့်ဟက်အွေစုတွို့ထာ ကောင်ခွို့နွို့မှ သာဝက မာ့ကျင်အဲဉ်ကွက်နွို့နား ရွီးလေးတော်မူဟောက်။ 14တာခွို့နွို့နား ပေတရုနွို့ ကိုယ်တော်ပအာပို့မဲ့မာတ် ရှိမုန်န ဘာ့ကလုဲင်သွေအမ်း အန္ဒြ၊ယာကုပ်၊ယောဟန်၊ဖိလိပ္ပု၊ဗာသောလမဲ၊ 15မဿဲ၊သောမ၊ကွန်ဖြောက်အာလဖဲ ယာကုပ်၊လို့ခှိက်ကမာ့နွို့ဘာ့ဟက်မဲ့ ရှိမုန်၊ 16ကွန်ဖြောက်ယာကုပ် ယုဒနလောက်ဘတ်နား ကိုယ်တော်ယေရှုနွို့ လို့မောင်းဖောက်မဲ့သစ္စာ ယုဒရှကာရုတ်စာနိုကိုးနဲ့။ 17နွို့ခေါင်း ကိုယ်တော်ယေရှုနောင်း သာဝကဘို့ဘက်နအနုဲင်နုဲင် ကြွစန်းပိုကွေဗွေထာ ကွေကသေ့အိုန့်နွို့ မုဲင်မနကိုးနဲ့။ တာ့လွက်နွို့နား တပည့်တော်ဘို့ဘက်နအနုဲင်နုဲင် ဖြိုင်ယုဒ၊ မြိုဂျေရုဆလင်၊ တုရုန မြိုဇိဒုန် ဇာ့ဘာ့ဟိုတောင်ပါး မြိုဘို့ဘက်နွို့မှ လို့ဖုန်ကုန်ဘို့ဘက်နောင်းလဲဉ်း လောက်ပိုကြဘို့နွို့နဲ့။ 18ခွို့နွို့နောင်း ကိုယ်တော်ဘာ့ဟောဘာ့ကရီဘို့ဘက်နွို့ မောင်းနာအွေန အ့်ကစု့ရောဂါအေ့ဘို့ဘက် ဘာ့အ့်ကုသခံအွေနွို့နား လောက်ပိုကိုးနွို့နဲ့။ ကနံဆို့ဘာ့တာ့ဗောက်မဲ့ လို့ဘို့ဘက်နောင်းလဲဉ်း အ့်ကလို့လို့အ့်တွိုန်း ဗာပွန်ကု့ကြဘို့နွို့နဲ့။ 19တာ့ကိုယ်တော်နွို့မှ တန်ခိုးဘို့ဘက်လေတွို့ထာ အ့်ကစု့ရောဂါဘို့ဘက်နွို့ အ့်ဗာပွန်ဟောက်နွို့ခေါင်း လို့စေ့ကွက်နောင်းလဲဉ်း ကိုယ်တော်ယေရှုနား ခိုက်မာန့်နိုင်းအောင် ကြိုးစားကြဘို့နွို့နဲ့။ 20နွို့ခေါင်း ကိုယ်တော်ယေရှုနောင်း ဖက်တပည့်တော်နွို့ ဘို့နွို့လာ့ငါးထာ ခွို့နွို့နား “ဘာ့ဆန်းရဲမဲ့ပွို့နွို့နောင်း မင်ခံစွေကောင်းကျိုးနွို့နဲ့။ ရွားနွို့ပဒေကား ထာထနာတော်ဖြားနား တာဘွတ်ကိုးနွို့နဲ့။ 21ကိုယ်တော်ယေရှုနောင်း အခွပ် ဘာ့ဆာမဲ့ဘွတ်နွို့နောင်းလဲဉ်း မင်ခံစွေလောက်ဟောက်ကောင်းကျိုးနွို့နဲ့။ ရွားနွို့ပဒေကား ပွို့နွို့နား ထိထိထထ မင်စွေလောက်ဟောက်။ ကိုယ်တော်နောင်း အခွပ် လို့ဘာညှင်းမဲ့နွို့နောင်းလဲဉ်း မင်ခံစွေလောက်ဟောက်ကောင်းကျိုးနွို့ထာ ပွို့နွို့နု့ နွက်တူးတူးပျော်ပျော်န ဗွို့လောက်ဟောက်။ 22တန်ကွန်ဖြားခေါင်း ဘွတ်နွို့နု့ တာ့ဆိအိနွို့နောင်းလဲဉ်းဖုန်၊ တာ့ဝိုင်းပယ်နွို့နောင်းလဲဉ်းဖုန်၊ ဘာ့မင်စော်ကားခံဖြိုယော့နွို့ ဘာ့ဖြိုရိုက်စိုင်းဖြိုန ဘာ့ဗင်ခံနွို့ဖုန် မင်္ဂလာဟိုဟောက်။ 23တာ့ကလုဲင်ဇာ့နွို့နု့ နွက်တူးအားဗင် ခွံမ်ကြလောက်ဘို့။ ရွားနွို့ပဒေကား ရွှေမြို့တော်နို့ ပွို့လဘာမင်ဗင်ဆုနွို့နောင်း ကုန်းလွန်းလန်းဟောက်။ ကစာနို့တွိုန်း လို့ကစာ့ဟိုနောင်းလဲဉ်း ပရောဖက်နွို့နု့ နာ့နွို့အ့်တွိုန်း ယို့ကြဘို့” နွို့ခေါင်းနွို့နဲ့။ 24စနွို့လဲ လို့ဘာ့ချမ်းသာကြွယ်ဝနွို့နောင်း ဘာ့ကုန်းလွန်းမဲ့ဆန်းရဲဒုက္ခနွို့ မင်ဂျေလောက်ဟောက်။“ရွားနွို့ပဒေကား ပွို့ဘာ့ဗင်မဲ့ဇာ့ဘာ့ဟိုစေစေနွို့ကား ဘဝအခွပ် မင်ခံစွေတွို့နွို့ခေါင်း ကိုးနဲ့။ 25အခွပ်နွို့ ထိထောန လို့ဘာ့ဗင်ထို့စွေမဲ့နွို့နောင်း ဒုက္ခဆန်းရဲအကုန်အကန်းန ဗင်ခံစွေလောက်ဟောက်နွို့နဲ့။ရွားနွို့ပဒေကား ဘာ့ပါ့ဆာလွန်းနွို့ ဗင်ထွိဟောက်ဆန်းရဲဒုက္ခနွို့ခေါင်းနွို့ကိုးနဲ့။ အခွပ် လို့ဘာ့ကညေ့နွို့နောင်း ဒုက္ခဆန်းရဲအကုန်အကန်းန ဗင်ခံစွေလောက်ဟောက်နွို့နဲ့။ ရွားနွို့ပဒေကား နွက်ပေ့တွို့ထာ မင်ညှင်းလောက်ဟောက်။ 26အခွပ် တာ့ချီးမွမ်းဖြိုစနွို့ လို့ဘာ့ဗင်ခံနွို့နောင်း ဒုက္ခဆန်းရဲအကုန်အကန်းန ဗင်ခံစွေလောက်ဟောက်နွို့နဲ့။ရွားနွို့ပဒေကား လို့ကစာ့ပွို့နွို့နောင်းလဲဉ်း ပရောဖက်အ့်ယောင်အဆောင်နွို့နု့ နာ့ဇာ့နွို့တွိုန်း ချီးမွမ်းကြဘို့” နွို့ခေါင်းနွို့နဲ့။ 27စနွို့လဲ ကိုယ်တော်နား အခွပ် ဘာ့ကမ်းကြမဲ့ပွို့နွို့နု့ အို့ဖြိုလောက်ဟောက်။ ရန်သူနွို့ဘို့ဘက်နွို့ ခှိက်ကြဘို့။ လို့ဘာ့ရှိအိပွို့နွိုနား ကွေခွို့နွို့နု့ ယို့အာကြဘို့ကလို့လို့နေ။ 28လို့ပဟောက်ပွို့နွိုလဲဉ်း ဖြားအာကောင်းကြီးမင်္ဂလာအောင် ဆုတောင်းအာစေး။ လို့နှိမ့်စက်ကွေပွို့နွိုမေ့မေ့လဲဉ်း ဆုတောင်းအာစေး။ 29အ့်ကွက်ကွက်နား တာ့ပိုလ်ဗာ့မို့အ့်ဖက်နွို့နု့ လှည့်အာလောက်စေး အ့်ဖက်နေ။ အ့်ကွက်ကွက်နွို့ တာ့ကွေမို့ တာ့ညောင်းခရိုန်းမို့နွို့နု့ လွှတ်အာဝဲ့ ခရိုန်းကောင်ကလုံမို့နွို့။ 30သမွို့နွို့ လို့မေ့မေ့နွို့တာ့ပို့ညောင်း အမားမားနွို့နားလဲဉ်း အာပန်းဝဲ့စေး။ အာ့်ကွက်ကွက်နွို့ အမ်းအွေဘို့ ပစ္စည်းမွိုနွို့နု့ တာ့အမ်နွို့ ညောင်းဘက်ကောယော့။ 31သိုလ့်မို့နွို့ နု့ ဘာ့အ့်ဆောင်ယို့နု့အာ့တွိုန်း တကွေဘေ့လဲ ယိုအာကြဘို့နွို့နဲ့။ 32“လို့ဘာ့ ခှိက်မို့နွို့စယ် တာခှိက်နွို့ နု့ ဖြားနား မောင်းအာမွို့ကောင်းကြီးဇာမွား။ ရွားနွို့ပဒေကား လို့ယို့အပြစ်ဒုစရိုက်စယ် ခွို့နွို့နု့ တာ့ဘို့လို့ ဘာ့ခှိက်မို့နွို့ခှိက်အာ ဘက်လောက်ဟောက်ပွို့။ 33တာ့ကွေမို့ လို့ဘာ့ကလို့နွို့နား မို့နောင်း တာ့ကလို့ဘက်နိုင်နွို့နု့ တာ့ဖြားနွို့မှ မောင်းဗင်ကောင်ကြီးနွို့နု့ မို့လဆုန့်န။ ရွားနွို့ပဒေကား လို့ယို့အပြစ်ဒုစရိုက်ဘို့ဘက်နွို့စယ် နာ့နွို့အတွိုန်း ယို့ နိုင်ဟောက်။ 34ဗင်ဘက်ပလောက်လက်ဟောက်နွို့ ဆုန့်တွို့ထာ ဘေ့အ့်ကွက်နား ပွို့တာ့အာညောင့်မုဲင်း ဖြားနောင်း ပွို့နွို့နား ချီမွမ်းလောက်ဟောက်နွို့ ထုန်ကြဘို့ဟား။ လို့ယို့အပြစ်ဒုစရိုက်ဘို့ဘက်နွို့စယ် ဘာ့အာဘို့ပမာဏနွို့အတွိုန်း ဗင်ဘက်အောင် ခွို့အချောင်းချောင်း ဘာ့ညောင်းမားကြဘို့နွို့နဲ့။ 35ပွို့နွို့နား ရန်သူဘို့ဘက်နွို့ ဘွတ်တွို့ ခှိက်မေတ္တာထာ တာခွိုနွို့ ယို့ အာကောင်းကျိုးနဲ့။ ဗင်ဘက်နိုင်းအောင် ဆုပ်ရေ့ကောဘွတ်နား ညောင်းမားကြဘို့။ ဖြားနောင်း လို့ဘာ့ငန်းကောကျေးဇူးဘိုဘက်န လို့ဘာဆို့နွို့နားလဉ်း ဘို့ဘွတ်မေတ္တာနွို့ခေါင်း ပွို့နွို့ တာယိုဇာ့နွို့နု့ ဗင်တွို့အကျိုးကျေးဇူးကုန်းကန်းတွိုန်းထာ ဘာ့မြတ်ဘာ့ကုန်းထက်မေ့ ကွန်ဖြောက်ကွန်မြဖြားဘို့ဘက် ကလုဲင်လောက်ဟောက်။ 36အဖဖြားပွို့နွို့နောင်း ဘာ့သနားကြင်နာမှုန နာ့ဗင်ဗြောက်ဗြောက်နွို့ ပွို့နွို့နောင်းလဲဉ်း ဘာ့သနားကြင်နာမှုန နာ့ဗင်ဗြောက်ဗြောက် တကွေလို့အ့်ခြားဗင်လောက်ကြဘို့” နွို့ဟောဖြိုမနနဲ့။ 37“စနွို့ဖုန် တကွေဘေ့နား ဘာ့စီရင်တရားနွို့ လာ့ယို့ကြနဘို့၊ ဇာ့နွို့ထာ ဖြားဘာ့စီရင်တရားနွို့လဲဉ်း ပွို့လာ့မင်ခံကော။ တကွေဘေ့နွို့ ရက်ဝေဖန်လေတံလေအပြစ်နွို့လာ့ယို့ကြနဘို့၊ ဇာ့နွို့ထာ ဖြားဘာ့တံအပြစ်နွို့ လာ့ဗင်ခံကောနွို့နဲ့။ တကွေဘေ့ ခွှင့်လွှတ်ကြဘို့၊ တာ့ယို့ဇာ့နွို့နု့ ဖြားနောင်း ပွို့နွို့နား ခွင့်လွှတ်အာလောက်ဟောက်နဲ့။ 38တကွေဘေ့နွို့ အာပန်းကြဘို့။ ပွို့နွို့နောင်းလဲဉ်း ဇာ့ပွို့ဘာ့အာပန်းနွို့နု့ ဘာ့ဘို့ဘက်ဇာ့နွို့နား မင်အာပန်းခံဟောက်နွို့နဲ့။ ပွို့နွို့ တကွေဘေ့နွို့ ဘာ့အာပို့နွို့အ့်တွိုန်း မာ့ဗှုဒ်မချောင်းဗှုဒ်ဘို့ဘို့အောင် တမှိုက်ထို့စ်တွို့ထာ၊ ကဆနွို့လောက်ဗက်လေးနနွို့အောင် နာ့ထိုစ်ဘို့ဘက်နွို့ ဗင်လောက်ဟောက်။ နာပွို့တိုင်းပွို့ပဏနနွို့အတွိုန်း ပွို့နွို့နောင်းလဲဉ်း ဖြားနောင်း အာပန်းဘက်လောက်ဟောက်” နွို့ဟောဖြိုဟောက်နဲ့။ 39နွို့ခေါင်း ကိုယ်တော်နောင်း လို့ဇာ့နွို့နား ပုံဥပမာအမာ့န ဘာ့ဖြိုနွို့နောင်း “လို့လာ့ငါးရင်ကောအာ့်ကွက်နား အခြားလို့လာ့ငါးရင်ကောအာ့်ကွက်နွို့ အွမ်ခေါင်းနိုင်းရားနွို့နဲ့။ အံကွက်ကွက်နွို့ကား ကောင်ကသု့ဗုံ့နွို့ ကလို့စွမ်းနိုင်းဟောက်ကက်ကောဟား။” 40တပည့်တော်ပဒေနွို့နောင်း ကြထက်ဆာယာနွို့နားလာ့ဟိုကော။ စနွို့လဲ တပည့်နွို့ တာ့ကရီအာကြကြနွို့နု့ အမ်နား နာ့ဆာယာအမ်နွို့တွိုန်း ကလုဲင်ပိုလောက်ဟောက်နွို့နဲ့။ 41မို့နား ကောင်လာ့ငုဲင်းဗိုလ့်ပေ့မို့နွို့မှ ကဖဟ်အ့်ပေးဝဲ့နွို့ ရွားရင်ဟောက်နောင်း ဗွို့သတိနွို့ ကောင်လာ့ငုဲင်းမို့နွို့မှ ရီးတန်းထစ်ဟို့မဲ့နွို့ အမှားဘာ့ကုန်းနွို့ကား ဗွို့ကောသတိနွို့ လိုလ့်မန်းကော။ 42ကောင်လာ့ငုဲင်းမို့နွို့မှ ရီးတန်းထစ်ဟို့မဲ့ကဖဟ်နွို့ လာ့ရင်ကောနွို့၊ ဗိုလ့်ပေ့၊ ကောင်လာ့ငါးမို့နု့ ကဖဟ်အ့်ပေးဝဲ့နွို့ ထှက်လေးအာလောက်ဟောက် နွို့မောင်းဖြိုနိုင်းဇာ့မား။ လို့ဘာ့ယောင်ဆောင်လို့ကလို့နွို့၊ ကောင်လာ့ငုဲင်းမို့နု့နား တန်းထစ်ဟို့မဲ့ကဖဟ်နွို့ အွေတောဝ်ကြဘို့ငွမ်းနေ။ စနွို့ထာ ကောင်လာ့ငုဲင်းဗိုလ့်ပေ့မို့နွို့မှ ကဖဟ်အ့်ပေးဝဲ့နွို့ မောင်းအွေတောဝ်အာထာ ဆန်းဆန်းလန်းလန်းပွို့ရင်နိုင်းဟောက်နွို့နဲ့။ 43“အခွပ် ကိုယ်တော်ယေရှုနား ဆုပ်ထေ့ဘာ့ကလို့နား ပ္လေ့ ဘာ့ကလို့ကောနွို့ နာပ္လေ့ နိုင်းကောနွို့ ဆုပ်ထေ့ဘာ့ကလို့ကောနွို့လဲဉ်း ပ္လေ့ ကလို့နွို့ လာ့ပ္လေ့ နိုင်းကော။ 44ရေ့စ်တွို့ပ္လေ့ ထာ ခံမ့်ဆုပ်ထေ့နွို့နား ဖြိုနိုင်နိုင်းဟောက်နွို့နဲ့။ ဇာ့ဆုပ်ကလာ့နွို့ ပ္လေ့သင်္ဘောသဖန်းနွို့ နာ့တောက်နိုင်းကောနွို့ တောဆုပ်ကလာ့လဲဉ်း ပ္လေ့စပျစ်နွို့ လာ့တောက်ဗင်ကောနွို့နဲ့။ 45နာ့နွို့အတွိုန်း လို့ဘာ့ကလို့နွို့နား ကောင်နွက်နှလုံးအမ်နွို့ ဘာ့ကလို့ဇာ့နွို့စယ် ဘာ့ထှက်လေးဟောက်နွို့နဲ့။ လို့ဘာ့ကလို့ကောနွို့နား ကောင်နွက်နှလုံးအမ်နွို့ ဘာ့ကလို့ကောဇာ့နွို့စယ် ဘာ့ထှက်လေးဟောက်နွို့နဲ့။ ဇာ့တာ့သု့နွေပွို့နွို့မှ ဘာ့လေးပိုပနောင်နွို့နား နွက်ပွို့နွို့နု့ ဖော်ပလေမနနွို့နဲ့။” 46“ပွို့နွို့နား ပနောင်အို့ကား ငန်းကောနွို့နား ရွား အို့နွို့ ‘ကိုယ်တော်၊’ ‘ကိုယ်တော်’ နွို့ဟက်ကြဘို့နားနဲ့။ 47ပွို့တွို့တာ့အို့ထာ တရားတော်အို့နွို့ နာအွေတွို့ လို့ဘာ့လိုက်နာလွမ်းနွို့နား ကမွို့လို့တာ့မာ့မားပဒေနောင်း ပွို့နွို့နု့ အို့ဖြိုပလေလောက်ဟောက်။ 48လို့နီးနား ကွေကသေ့သန်းမှုနွို့ ကတု့စိုင်တွို့ရွီရွီထာ လို့ဆုပ်ညာ့နာ့ကမွို့ဟောက်နွို့နဲ့။ အွူဆောင့်ဒုတ်နွို့နု့ မြစ်ဆောင့်ဒုစွေယော့ဝဲ့နွို့နောင်း ညာ့နွို့နား ဆုပ်ပွို့တောင်တောင်တေတေနွို့ခေါင်း ကမိုက်ကောအောင် ခံနိုင်းကြင်ကြင်နွို့နဲ့။ 49စနွို့လဲ တရားတော်အို့နွို့ ကမ်းအွေယော့ လို့ဘာ့ယို့လွမ်းကောပဒေနောင်း ဘာ့ချကောကောက်ညာ့ လို့ဆုပ်ညာ့နာ့ကမွို့ဟောက်နွို့နဲ့။ အွူဆောင့်ဒုတ်နွို့နု့ မြစ်ဆောင့်ဒုစွေယော့ဝဲ့နွို့နောင်း ညာ့နွို့နား အ့်တိတွိုန်းရေ့ရ်ယော့ ဆို့ဆို့ရွားရွားဖျောက်လောက်ဟောက်” နွို့ဖြိုမနနဲ့။
હાલમાં પસંદ કરેલ:
Luke 6: dtpv-rv
Highlight
શેર કરો
નકલ કરો
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
