Luke 5
5
1အ့်ရှိရှိနွို့ ကိုယ်တော်ယေရှုနောင်း အံန်းဂင်္နေသရက် နွို့နား တန်းဘာမုဲင်နွို့နု့ လို့ဖုန်ကုန်းနွို့နောင်း နှုတ်ကပါတ်တော်ဖြားနွို့ အ့်ကမ်းအောင် တောကစာအမ်နွို့ စုလောက်ပိုကြဘို့နွို့နဲ့။ 2နွို့ခေါင်း ကိုယ်တော်နောင်း တာ့စားအံန်းနွို့ဘာ့တုတ်ဘို့မဲ့ တောင်းလွီခမ်းဒေါင်ဖျောင်အံတန်နွို့ ရင်ဟောက်နွို့နဲ့။ လို့ဒေါင်ဖျောင်နောင်းလဲဉ်း ဆန်းတွို့ကွေတောင်းလွီထာ ပိုက်ခမ်းဒေါင်ဖျောင်ဘို့ဘက်နွို့ ကထေကြဘို့နွို့နဲ့။ 3ချန်နွို့နု့ ကိုယ်တော်ယေရှုနောင်း တောင်းလွီအဲဉ်တန်နွို့မှ ဒက်တွို့ကွေတောင်းလွီရှိမုန်ထာ တောင်လွီနွို့ တာ့စာ့တန်းနွို့မှ အ့်ခွာတွို့နည်းနည်းထာ ဖြိုလေမနနဲ့။ နွို့ခေါင်း ကိုယ်တော်နောင်း ကွေတောင်လွီနွို့ ဒတ်တွို့ထာ ထုစ်ယော့ လို့နွို့နား ဟောပလေစ်ကရီပလေစ်မနနဲ့။ 4ဆောင်ဟောပလေစ်ကရီပလေစ်ယော့နွို့ ကိုယ်တော်နောင်း ရှိမုန်နား “ဖက်အွူဘာ့ကရွှိနွို့ တောင်လွီနွို့ ခတ်ကု့ယော့ မောင်စက်ဖျောင် ပိုက်ခမ်းဒေါင်ဖျောင်မို့နွို့ ချဝဲ့နွို့” နု့ဖြိုမနနဲ့။ 5စနွို့လဲ ရှိမုန်နားလဲဉ်း “ကိုယ်တော်၊ အေ့နီးနွို့ မင်ဂို့ဂို့ ပံပံပေါပေါ ကြိုးစားမနလဲဉ်း ဖျောင်အ့်ကွက်မှ ဗင်ကော။ ဇာနု့လဲ ကိုယ်တော်ခိဟောက်နွို့ခေါင်း ပိုက်ခမ်းဒေါင်ဖျောင်နွို့ အေ့ချလောက်လောက်ဟောက်အခွပ်” နွို့ဖြေမနနဲ့။ 6ကိုယ်တော်ဘာ့ဖြိုနွို့အတွိုန်း ပိုက်ခမ်းဒေါင်ဖျောင်ဘို့ဘက်နွို့ ဆောင့်ချနွို့နု့ ခွို့နွို့နောင်း ပိုက်ဘို့ဘက် မောင်ဇရေစ်အောင် စက်မာန့်ကြဘို့ ဖျောင်ဘို့ဘက်နွို့နဲ့။ 7စနွိုခမ်း ခွို့နွို့နောင်း တအခြားကွေတောင်းလွီဘာ့ဟိုမဲ့ လို့ဒေါင်ဖျောင်ဘို့ပေ့အမ်နွို့နု့ ခွို့နွို့နား ကူညီနိုင်းအောင် ပလေစ်တွို့တိထာ ဟက်ဝဲ့နွို့နဲ့။ လို့ဇာ့နွိုဆောင့်လောက်ကြဘို့ယော့ တောင်းလွီအဲဉ်တန်နောင်း ဖျောင်ဘို့ဘက်နွို့ ဆောင့်ထို့နား တောင်လွီအမ်ဘို့ဘက်နောင်လဲဉ်း ကလုဲင်မဲ့မောင်းမြှုပ်နနွို့နဲ့။ 8အဖြစ်အပျက်ဘို့ဘက်နီးနွို့ ဆောင့်ထွိနွို့ ရှိမုန်ပေတရုနောင်း တာ့ကောက်ကိုယ်တော်ယေရှုနွို့ ထောက်ဝါးတွို့တောင်ကို့ထာ “ကိုယ်တော်၊ အို့နား ကလုဲင်လို့အပြစ်ဒုစရိုက် ဘို့ဘက်နွို့ခေါင်း အို့နွို့ ကံလွန်ဝဲ့နွို့” နု့ဖြိုမနနဲ့။ 9ဘာ့ဖြိုစနွို့နောင်းနား ရှိမုန်နအနုဲင်နုဲင် ဘာ့ကလုဲင်ဘို့ပေ့အမ်နွို့ ဘာ့ကလုဲင်ကွန်ဖြောက်ဇေဗေဒဲအဲဉ်ကွက် ယာကုပ်န ယောဟန်နွို့နောင်း ဘာ့စက်မာန့်ဖျောင်နွို့နား ဗေါက်ဗက်လွန်းဟောက်ခေါင်း အံ့ဩမဆန်း ကလုဲင်ကြဘို့နွို့နဲ့။ 10ကိုယ်တော်ယေရှုနားလဲဉ်း ရှိမုန်နား “လာ့ရန။ မို့နား စတွို့အခွပ်ထာ ဆက်မို့ဒေါင်ဖျောင်နွို့ အစုတွို့လို့ထာ အ့်ကု့လွမ်းတပည့်ဘက်အို့ အ့်ကလုဲင်အောင် မင်ယို့ဟောက်” နွို့ဖြိုမနဲ့။ 11နွို့ခေါင်း ခွို့နွို့နောင်းလဲဉ်း တောင်းလွီဘို့ဘက်နွို့ ပန်းဒက်ယော့ကွေကသေ့နောင်း ဇာ့ဘာဟိုနွို့ ကံတောဝ်းတွို့ထာ ဘက်ကိုယ်တော်နွို့ တန်လွမ်းကြဘို့နွို့နဲ့။ 12နွို့ခေါင်း ကိုယ်တော်ယေရှုနောင်း တန်းဘာဟိုမြိုအ့်မြိုနွို့ အ့်ကစုရောဂါဘာ့ဗောက်မဲ့ ကဖြောက်အ့်ကွက်ဟိုဟောက်နွို့နဲ့။ အမ်နောင်း ဆောင့်ရင်ကိုယ်တော်န ဘလောင်းဘလျက်တွို့ငွမ်းနွို့ထာ “ကိုယ်တော်၊ ကိုယ်တော်တာ့လိုလ့်နွို့နု့ အ့်ကစုရောဂါနွို့ အ့်ဗာနိုင်းဟောက်နွို့ခေါင်း အကစုရောဂါအို့နွို့ ကု့အာစမ်း” နွို့ ဖြိုမနနဲ့။ 13ချန်နွို့နု့ ကိုယ်တော်နောင်း လို့နွို့နား ခိုက်တွို့တိအမ်နထာ “အို့လို့ဟောက်၊ ဗာစေး” နွို့ဆောင့်ဖြိုနွို့နု့ အတိတွိုန်း အကစုရောဂါလို့နွို့ ဗာပွန်ကု့ဟောက်နွို့နဲ့။ 14နွို့ခေါင်း ကိုယ်တော်နွို့ အမ်နား နာနွို့ရောဂါဗာပွန်ကု့နွို့ ဆောင့်ကွေမှ လဖြိုကောအောင် ဆောင်ဖြိုယော့နောင်း “တာ့ပုရောဟိတ်နွို့ ကု့တွို့ထာ သိုလ်မို့သိုလ်မို့ ပလေစ်စေး။ တာ့ယော့နွို့ ရောဂါမို့ဘာ့ဗာပွန်နွို့ တာ့လို့နွို့ အ့်ကလုဲင်သက်သေအောင် မောရှေပညက်ကျမ်းနွို့ ဘာ့ဖြိုဗွို့နွို့အတွိုန်း ဘာ့ပူဇော်အမှုနွို့ ကု့တာ့ယို့စေး” နွို့ဖြိုမနနဲ့။ 15စနွို့လဲ ကတမ်းကိုယ်တော်နောင်း နှံနောကု့တာ့မားမားငန်းကောနား လို့ဘို့ဘက်နွို့နောင်း ကိုယ်တော်ဘာ့ဟောဖြိုပလေစ်ဘို့ဘက်နွို့ မောင်းနာအွေန လို့ဘာ့မန်တူးကောနွို့ဗင်ဗာပွန်အောင် စုပိုကြဘို့နွို့နဲ့။ 16စနွို့လဲ ကိုယ်တော်နောင်း ဗွေကန္တာရနွို့ ကွက်သိန်းသိန်း အဆူးဆူး ကုလောက်ဆုတောင်းမဲ့အ့်မြဲကိုးနဲ့။ 17အ့်ရှိနွို့ ကိုယ်တော်ယေရှုတန်းဘာ့ဟောကရီအာမဲ့နွို့နု့ တဘိုမေ့မေ့နွို့မှ ဖြိုင်ဂါလိလဲ၊ ဖြိုင်ယုဒ၊ ဗဟိုမဲ့မြိုဂျေရုဆလင် တာ့တဘို့နွို့မှ ဘာ့ဗွို့မဲ့ ဖာရိရှဲဘိုဘက်န ဆာယာပါလိတ်ကျမ်းဘို့ဘက်နောင်းလဲဉ်း တာ့မေ့တာ့လွက်နွို့ ထု့စ်တွို့ထာမန်မဲ့ကြဘို့နွို့နဲ့။ ဖြားနောင်း ကိုယ်တော်နွို့ အ့်ကစုရောဂါလို့ဘို့ဘက် အ့်ဗာပွန် တန်ခိုးနွို့နား အာတော်မူဘို့နွို့နဲ့။ 18ချန်နွို့နု့ လို့တောင်ခိုင့်နောင်း လို့လေဖြတ်အာ့်ကွက်နား ကွေတဖက်နွို့ တံကု့တွို့ထာ ကောင်ညာ့နွို့ ရိပ်ကု့တွို့ထာ ငွမ်းကိုယ်တော်နွို့ မောင်းချနား ကြိုးပမ်းကြဘို့နွို့နဲ့။ 19စနွို့လဲ လို့ဖုန်ကုန်းဘို့ဘက်ဟိုမနခေါင်း ကောင်ညာ့နွို့ ထွိကောခမ်းကွက်ကညွမ်းနား ကွေခေါင်ညာ့နွို့ ဒက်တွို့ထာ ခွာတွို့ခေါင်ညာ့ထာ ကောင်ဗလလို့ဘို့ဘက်ဗဟိုမဲ့ ငွမ်းကိုယ်တော်ယေရှုနွို့ တဖက်တောင်းလိနအနုဲင်နုဲင် ပလွတ်ကလို့ကြဘို့ဖြေးဖြေးထာထာကိုးနဲ့။ 20လို့စားနွို့ အ့်ယွမ်အမ်းအပန်ဘာ့ကုန်းနွို့ ကိုယ်တော်ယေရှုဆောင်ယင်နား “ဘို့ပေ့၊ အပြစ်မို့နွို့နား ခွင့်လွှတ်အာတွို” နွို့ဖြိုမနနဲ့။ 21ချန်နွို့နု့ ဖာရိရှဲဘိုဘက်န ဆာယာပါလိတ်ကျမ်းဘို့ဘက်နောင်း “ကွားကိုးရား စော်ကားမဲ့ ဖြားနွို့နား လို့နီးနွို့ သိုလ်အမ်သိုလ်အမ် အ့်ထုန်မဲ့ဖြားကိုဟား။ တာလိုလ်တွို့ဖြားနွို့ ဆောင်ကွေမှ အပြစ်နွို့နု့ ခွင့်လွှတ်အာနွို့ လာ့ယို့နိုင်းကော” နွို့စဉ်းစားကြဘို့နွို့နဲ့။ 22စနွို့လဲ ကိုယ်တော်ယေရှုနောင်း လို့ဇာနွို့ နာနွို့ ထုန်ကြဘို့နွို့နု့ ငန်းဟောက်ခေါင်း လို့ဇာနွို့နား “ရွားပွို့ ရက်တွေးလေးအတွေးဇာ့နွို့နား။ 23‘အပြစ်မို့နွို့နု့ ခွင့်လွှတ်တွို့’ နွို့ဆောင်ဖြိုန ‘အောက်တွို့ထာ ကု့ကညွမ်းနေ’ နွို့ဘာ့ဖြိုနွို့န မွှားနား မာန်းဌားဟောက်နား။ 24စနွို့လဲ လို့ကွန်ဖြားနား ဗဟိုမဲ့ကမ္ဘာလောကကသေ့ကုန်းနီး အပြစ်မေ့မေ့နွို့ ခွင့်လွှတ်အာနိုင်းအခွင့်အာဏာဟိုဟောက်ပဒေနောင်း ပွို့ငန်းအောင် အို့ပလေစ်လောက်ဟောက်” နွို့ဖြိုယော့တွို့၊ လို့လေဖြတ်နွို့နား “အို့ဖြိုလောက်ဟောက်၊ အောက်စေး၊ အွေတွို့တဖက်မို့ထာ ယန်းစေးညာ့မို့နေ” နွို့ဖြိုမနနဲ့။ 25ဆောင်ဆို့ဖြိုတို့စနို့န အချောင်းချောင်း လို့နွို့နောင်း ငွမ်းလို့ဘို့ဘက်နွို့ အောက်အိုတွို့ထာ အမ်ဘာ့တာ့လန်တီမဲ့တဖက်အမ်နွို့ ဆောင့်တန်အွေယော့နောင်း ချီးမွမ်းတွို့ကျေးဇူးဖြားထာ ယန်းကု့ညာ့အမ်နို့နု့နဲ့။ 26လို့ဖုန်ကုန်းဘို့ဘက်နောင်းလဲဉ်း အံ့သြရရောတွို့ထာ “ထူးဆန်းအံ့ဩဖွယ်အမှုအရာနွို့ လို့ရှိနီးနု့ အေ့ရင်မာန့်ဘက်တွို့” နွို့ဖြိုယော့ကြဘို့ ကျေးဇူးဖြားနွို့ ချီးမွမ်းကြဘို့နွို့နဲ့။ 27ဆောင့်ကလုဲင်ယော့နွို့ ကိုယ်တော်ယေရှုနောင်း တလွက်နွို့မှ လေးပွန်ယော့ မာတ်ဘာ့ဟိုလေဝိ လို့တန်အ့်ကောက်အာ့်ကွက်နောင်း ဆောင့်တန်အကောင့်န ကောင်ခွက်နွို့ ထု့စ်မနနောင်း ဆောင်ရင်နွို့နု့ “ကု့လွမ်းဘက်အို့နီး” နွို့ ဖြိုမနနဲ့။ 28နွို့ခေါင်း လေဝိနောင်းလဲဉ်း ဇာ့ဘာဟိုနွို့နု့ ဘို့ပွို့တွို့ထာ တန်လွမ်းကြဘို့ဘက်ကိုယ်တော်နွို့နု့နဲ့။ 29နွို့ခေါင်း လေဝိနောင်း ဘာကုန်းလွန်းမဲ့ ပွီးအစွေအ့်ငွမ်းကုန်းနွို့ န ညာ့အမ်နွို့နု့ ကိုယ်တော်န တပည့်တော်နွို့နား ခံမဲ့ဧည့်နွို့နဲ့။ အခြား လို့တန်အကောင့်ဘို့ဘက်န ဧည်ထည်ဘို့ဘက်နောင်းလဲဉ်း ပွီးစွေခို့ခါနွို့ ခွို့နအနုဲင်နုဲင် ထု့စ်တွို့ထာ စွေကြမဲ့ဘို့နွို့နဲ့။ 30ဖာရိရှဲဘို့ဘက်န ဆာယာပါလိတ်ကျမ်းဘို့ဘက်နား တပည့်တော်ကိုယ်တော်နား “ခွို့နွို့နု့ လို့တန်အကောင့်နီး၊ လို့ယို့အပြစ်ဒုစရိုက်ဘို့ဘက်န ရွားအနုဲင်နုဲင်စွေမဲ့ကြဘို့နား” နွို့ ကာရကြဘို့နွို့နဲ့။ 31ကိုယ်တော်ယေရှုနား ခွို့နွို့ ဘာ့ဖြေအွမ်နွို့နောင်း “လို့ဘာ့ကျန်းမာနွို့ လိုလ့်ကောဆာယာ လငန်။ လို့ဘာ့မှန်တူးကောနွို့စယ် လိုလ့်ဆာယာလငန်ကိုး။ 32တာ့လို့ဖြောင့်မက်နွို့ အို့ပွို့ပိုဟောက်ကက်ကောနွို့လဲ လို့ယို့အပြစ်ဒုစရိုက်နွို့နု့ အ့်ဗင်နောင်တအောင် အို့ပွို့ပိုကိုး” နွို့ဖြိုမနနဲ့။ 33နွို့ခေါင်း ဖာရိရှဲဘို့ဘက်ဘက်န ဆာယာပါလိတ်ကျမ်းနွို့နားလဲဉ်း ကိုယ်တော်ယေရှုနား “ယောဟန်န တပည့်တော်အမ်နွို့နား ဆောင်တွို့အ့်စွေထာ ဘာ့ဆုတောင်းနွို့ အ့်ဆူးဆူးပ်ယို့ကြဘို့နွို့နဲ့။ တပည့်ဖာရိရှဲဘို့ဘက်နွို့လဲဉ်း နာ့စနွို့အတွိုန်း ယို့ကြမဲ့ဘို့နွို့နဲ့။ စနွို့လဲ တပည့်မို့နွို့ကား စွေမဲ့ကြဘို့ထာ နာ့လိုတခြား ရွားဆောင်ကောအ့်စွေနား” နွို့မားကြဘို့နွို့နဲ့။ 34ကိုယ်တော်ယေရှုနား “လို့ဘာ့ပွို့ပွီးမင်္ဂလာနွို့နား သတိုးသားနအနုဲင်နုဲင် အ့်ချန်ဘာ့ဟိုနွို့ ဆောင်နိုင်းရားအ့်စွေဟား။ ဇာ့နီး ဆောင်ကွေမှ လာ့ဆောင်နိုင်းကော။ 35စနွိုလဲ သတိုးသားနွို့ တာ့ခွို့နွို့နု့ ဘာ့ဟက်ကုမဲ့ အ့်ချန်တလောက်နွို့ လို့နွို့နား လာ့စွေလာ့ငွမ်းကောနား ဆောင်ကြလောက်ဘို့အ့်စွေ” နွို့ဖြိုစနွို့ကိုးနဲ့။ 36နွို့ခေါင်း ကိုယ်တော်နောင်း ခွို့နွို့နား ဖြိုပလေပုံဥပမာအ့်မာ့နွို့ “ဆောင်ကွေမှ ဆိုက်သိုက်တာ့လူနောင်း လု့အ့်ကမေ့န လာ့ဖာကကြကောဘို့။ တာ့ဖာနွို့လဲဉ်း စိတ်ကမေ့နွို မင်ပမ်းဇာရေစ်တွို့ထာ ဆိုက်သိုက်နား ခရိုန်းကမေ့နွို့ လာ့ရေစ်လွမ်ကော။ 37ဇာ့နွို့နား စပျစ်ဝိုင် အ့်ကမဲနို့ ကောင်ဗုဒ်ကိုသိပ်နွို့နား ဆောင်ကွေမှ လာထို့ကြကောဘို့။ တာယို့စနွို့နု့ စပျစ်ဝိုင် အ့်ကမဲ့နို့ ဗုဒ်နွို့ အ့်ပလောက်နိုင်းဟောက်ခေါင်း စပျစ်ဝိုင်နောင်းလဲဉ်း ယွဉ့်တွို့ထာ ဗုဒ်ကိုနောင်းလဲဉ်း ဖျောက်ကု့လောက်ဟောက်နွို့နဲ့။ 38ဇာနွို့နား စပျစ်ဝိုင်အ့်ကမဲနွို့ ကောင်ဗုဒ်ကိုကမဲ့နား မင်ထို့ဟောက်။ 39စနွို့လဲ စပျစ်ဝိုင်အ့်သိပ်နွို့ လို့ဘာ့ငွမ်းယော့စေ့ကွက်နား စပျစ်ဝိုင်အ့်သိပ်နား မန်းကလို့ဟောက်နွို့ဖြိုတွို့ထာ စပျစ်ဝိုင်အ့်ကမဲ့နွို့ လာ့ဆောင်ငွမ်းကော” နွို့ဖြိုဝဲ့ကိုးနဲ့။
હાલમાં પસંદ કરેલ:
Luke 5: dtpv-rv
Highlight
શેર કરો
નકલ કરો
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
