یوحنا ۹
۹
عیسا ایتأ مأر بأوٚرده کورَ شفأ دِهه
1 ای وخت عیسا جٚه ایتأ جأ دٚوأرٚستأندوبو، ایتأ مأر بأوٚرده کورَ بیدِه. 2 شأگردأن اونی جَا وأورسئده: «اوستأد، چٚره اَ مردأی کور بودونیأ بأمؤ؟ آیا اونی گونأیأنٚ وأسیه، یا اونی پئر و مأرٚ گونأیأن وأسی؟»
3 عیسا جوأب بٚدأ: «نه اونی گونأیأنٚ وأسی و نه اونی پئر و مأر، بلکی اَطؤ بوبوسته کی خودا قودرت اونی دورون آشیکأرَ به. 4 هه موهلت کی بأقی نٚهأ من وأسی می وظیفه‌یَ کی می اوسه کوده کس مٚرَه فأدأ انجأم بدم. چٚره کی تأ شب زیأد نمأنسته و اونٚ دورون نشأ هیتأ کأر کودن. 5 تأ او زمأت کی اَ دونیأ میأن ایسأم، اونَ نور بٚخشم.»
6 او وخت خو فیلی‌یَ زیمینٚ سٚر فوکوده و اونی اَمرأ گیلٚ چأکوده، او مردأکٚ چومأنٚ رو وأسِه 7 و اونَ بٚفرمأسته: «بوشو سیلوحا حوض تی چومأنَ بوشؤر.» (کی عِبری زوأنٚ میأن به «اوسه کوده») او کورٚم بوشؤ و خو چومأنَ او حوضٚ دورون بوشؤسته و وأزٚ چومأنٚ اَمرأ وأگردسته.
8 همسأدأن و اوشأنی کی پیشتر اونَ ایتأ کورٚ گدأ شنأختیدی، کس‌کسٚ جَا وأورسئده: «اَن، هو کورٚ گدأ نییٚه؟» 9 ای عیده بوگفتٚده: هونه و ای عیده دِه بوگفتٚده: «نه، اَن اون نتأنه بٚبه. ولی خٚیلی اونَ مأنه.»
گدأ مردأی بوگفته: «من هونٚم.»
10 اونی جَا وأورسئده: «پس چی بوبوسته تی چومأن وأزَ بوستید؟»
11 جوأب بٚدأ: «ایتأ مردأی کی مردوم اونَ عیسا دؤخأدید، گیلٚ چأکوده و می چومأنٚ رو وأسِه و بوگفته بشم سیلوحا حوض و می چومأنٚ گیلَ بوشؤرم. منم بوشؤم و بوشؤستم و می چومأن وأزَ بوستٚد.»
12 وأورسئده: «اون هسأ کؤیَه ایسأ؟»
جوأب بٚدأ: «نأنٚم.»
13 پس اونَ فریسیأنٚ ورجأ ببردٚد. 14 او روجی کی عیسا گیلٚ چأکوده و اونَ شفأ بٚدأ شبّأت بو. 15 فریسیأن مأجیرأیَ اونی جَا وأورسئده. اونم بوگفته: «اون گیل چأکوده و می چومأنَ وأسِه و او وخت کی می چومأنَ بوشؤستم، وأزَ بوسته.»
16 بعضی جٚه فریسیأن بوگفتٚده: «اگه اَطؤ بٚبه، اَ مردأی جٚه خودا ور نییٚه، چونکی شبّأت روجٚ رِه کأر کونه.» البأقیأن بوگفتٚده: «چوطؤ اینفر کی گونأ کونه، تأنه اَجور موجیزه‌یأن بوکونه؟» پس اوشأنی میأن ایختلأف دکفته.
17 او وخت فریسیأن وأگردٚستٚده او مردأکَ کی پیشتر کور بو، بوگفتٚده: «تو خودت چی گی؟ اونی کی تی چومأنَ وأزَ کوده، کیسه؟»
جوأب بٚدأ: «می نظر اَنه کی اون وأستی ایتأ پیغمبر جٚه خودا ور بٚبه.»
18 قومٚ پیله کسأن کی نخأستیدی بأوٚر بوکونٚد کی اون کور بو، اونی پئر و مأرَ بٚخأستٚد. 19 و اوشأنی جَا وأورسئده: «اَن شیمی پٚسره؟ رأسته کی اون کور بودونیأ بأمؤ؟ پس چوطؤ اونی چومأن وأزَ بوستٚد؟»
20 اونی پئر و مأر جوأب بٚدأده: «هطؤیه، اَن اَمی پٚسرٚ کی کور بودونیأ بأمؤ. 21 امّا نه دأنیمی چوطؤ اونی چومأن وأبوستٚده و نه دأنیمی کی اَ کأرَ اونی رِه بوکوده. اونی جَا وأوٚرسید. چونکی اون ایتأ پیله مردأکه و تأنه همه‌‌چیَ بٚگه.»
22 اونی پئر و مأر، یوهودٚ پیله کسأنٚ ترسٚ جَا اَطؤ بوگفتٚده چونکی اوشأن بوگفته بود هرکی بٚگه عیسا هو مسیح ایسه، اونَ جٚه مملکتٚ تومأمٚ ایمتیأزأن محرومٚ کونٚد. 23 هنٚ وأسی بو کی اونی پئر و مأر بوگفتٚده: «اون ایتأ پیله مردأکه؛ اونی جَا وأوٚرسید.»
24 فریسیأن ایوأردِه اونی کی کور بویَ بٚخأستده و بوگفتٚده: «اَ شفأ وأسی خودایَ شوکر بوکون نه عیسایَ چونکی اَمأن خُب دأنیم کی عیسا ایتأ گونأکأرٚ آدمه.»
25 جوأب بٚدأ: «من نأنٚم اون گونأکأرٚ یا نه. ایچی‌یَ دأنٚم کی کور بوم ولی هسأ تأنٚم بیدینٚم.»
26 اونی جَا وأورسئده: «خُب، عیسا تی اَمرأ چی بوکوده؟ چوطؤ تی چومأنَ وأزَ کوده؟»
27 جوأب بٚدأ: «من ایوأر شٚمٚره بوگفتم، مگه نشتأوستیدی؟ چٚره خأییدی ایوأردِه بٚگم؟ مگه شومأنم خأییدی اونی شأگرد بیبید؟»
28 فریسیأن اونَ فأش و فلاکت بٚدأده و بوگفتٚده: «تویٚم اونی شأگردی. اَمأن موسا شأگردیم. 29 اَمأن دأنیم کی خودا موسا اَمرأ روبرو گب زِئی ولی دروأره‌یٚ اَ آدم، هیچی نأنیم.»
30 جوأب بٚدأ: «اَن خٚیلی عجیبه کی اون تأنه ایتأ کورٚ چومأنَ وأکونِه و شومأن اونی جَا هیچی نأنیدی؟ 31 همه دأنده کی خودا شیأدأنٚ دوعأیَ نشتأوه بلکی او کسی دوعأیَ ایشتأوه کی خودایَ پرستٚش بوکونه و اونی ایرأده‌یَ انجأم بٚدأ. 32 دونیأ سٚر گیفتنٚ جَا تأ هسأ هیوخت، هیکس بیأفته نوبوسته کی بتأنه مأر بأوٚرده کورٚ چومأنَ وأزَ کونه. 33 اگه اَ مردأی جٚه خودا ور نوبو، چوطؤ بتأنسته اَ کأرَ بوکونه؟» 34 اَشأن ایجگره بٚزِ‌ده: «تو سٚر تأ پأ گونأ جَا بودونیأ بأمؤیی، هسأ خأیی اَمٚرَه بأموجی؟» پس اونَ بیرونَ کودٚد.
کوری روحأنی
35 او وخت کی اَ خٚوٚر عیسا گوش فأرٚسِه، اونَ بیأفته و بٚفرمأسته: «آیا تو اینسأنٚ پٚسرَ ایمأن دأری؟»
36 جوأب بٚدأ: «آقأ جأن، بیگید اون کیسه، چونکی خأیم اونَ ایمأن بأوٚرٚم.»
37 عیسا بٚفرمأسته: «تو اونَ بید‌ِیی و اَسه تی اَمرأ گب زِئندره.»
38 بوگفته: «هطؤیه، اَی خوداوند، ایمأن دأرم.» و عیسایَ پرستٚش بوکوده.
39 عیسا اونَ بٚفرمأسته: «من اَ جهان دورون بأمؤم کی دأوری بوکونم کی کورأنٚ چومأنَ وأکونم و اوشأنی کی فیکر کونٚده دِئِندٚرٚد نیشأن بدم کی کور ایسٚد.»
40 ای عیده جٚه فريسيأن کی اویَه ایسأبود، بوگفتٚده: «آیا تی منظور اَنٚ کی اَمأن کوریمی؟»
41 عیسا جوأب بٚدأ: «اگه کور بید، گونأیی نأشتیدی؛ ولی هَسأ کی ایدعأ کونیدی تأنیدی بیدینید، گونأکأر مأنیدی.»
હાલમાં પસંદ કરેલ:
یوحنا ۹: GLK_NT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2024 Transform Iran