یوحنا ۱۷
۱۷
عیسا شأگردأنٚ رِه دوعأ کونه
1 او وخت کی عیسا خو گبأنَ تومأنَ کوده، آسمأنَ فأندرسته و بوگفته: «"پئر" هو وخت کی وأستی بأمؤ بی فأرِسه. تی پٚسرٚ بوزورگی و جلالَ نمأیأنَ کون کی اونم بتأنه او بوزورگی و جلالَ تٚرَه وأگردأنِه. 2 چونکی تو تومأمٚ دونیأ مردومٚ زٚندیگی ایختیأرَ اونَ فأدأیی؛ و اونم همٚتأ اوشأنی‌یَ کی اونَ بٚبخشِئی، همیشٚکی زٚندیگی بخشه. 3 و همیشٚکی زٚندیگی اَن ایسه کی تٚرَه، کی او ایتأ دأنه رأس‌رأسِی خودا ایسی و عیسایٚ مسیحَ کی اوسه کودی، بٚشنأسٚد.
4 «زیمینٚ سٚر هر چی‌یَ کی مٚرَه بیسپأرده بی، انجأم بٚدأم کی بأعیثٚ تی بوزورگی و جلال ببم.» 5 و هسأ، اَی پئر، در تی حوضور مٚرَه جلال بٚدٚن، هو جلالٚ اَمرأ کی پیشتر جٚه اَ دونیأ خلقت تی ورجأ دأشتیم.
6 من اوشأنَ کی مٚرَه بٚبخشِئی، تٚرَه بٚشنأسأنِم. اَشأن اَ دونیأ میأن ایسأبود و اَشأنَ تو مٚرَه بٚبخشِئی. اَشأن همیشٚک تی شین بید و تو اَشأنَ مٚرَه فأدأیی؛ و هرچی‌یَ کی اَشأنَ بوگفتم، ایطأعت بوکودٚد. 7 هسأ، دأنده کی من هر چی‌یَ کی دأرم، تی پیشکشیأنه. 8 هر چی مٚرَه فرمأن بٚدأیی، منم اَشأنَ فأدأم و اَشأنٚم قوبیل بوکودٚد و بٚدأنستٚد کی من جٚه تی ورجأ اَ دونیأ دورون بأمؤم و ایمأن دأرٚده کی تو مٚرَه اوسه کودی.
9 «من اَ دونیأ مردومٚ رِه دوعأ نوکونم بلکی اوشأنی رِه دوعأ کونم کی تو مٚرَه بیسپأردی، چونکی اوشأن تی شینیدی.» 10 هر چی کی می شین بٚبه تی شینم ایسه و هر چی کی تی شین بٚبه، می شینم ایسه. هنٚ وأسی، اَشأن می گولأز کودن و سربولندییٚده. 11 پور دِه بأقی نییٚه کی اَ دونیأیَ نٚهٚم و تی ورجأ اَیٚم، امّا اَشأن اَ دونیأ دورون ایسأده. پس اَی پئر کی موقدس ایسی، اوشأنی‌یَ کی مٚرَه بیسپأردی، تی پئری محبتٚ اَمرأ اَشأنَ قأیم بٚدأر کی هوطؤیی کی تو و من ایتأ ایسیم، اوشأنم کس‌کسٚ اَمرأ ایتأ بٚبٚد. 12 تأ او زمأتی کی اَشأنٚ اَمرأ ایسأبوم، می نأمٚ قودرتٚ اَمرأ کی تو فأدأ بی، اوشأنی جَا مورأقبت بوکودم. اَشأنَ جوری بدأشتم کی هیتأ جٚه بین نوشؤ، جغرز اونی کی جٚه بین شؤئؤن رِه اینتخأب بوبوسته بو، اونم اَنٚ وأسی کی موقدسٚ کیتأبأنٚ بینیویشته‌یأن انجأم بٚبه.
13 «و هَسأ، تی ورجأ اَیٚم. او وخت کی اوشأنی اَمرأ ایسأبوم، خٚیلی چیأن اوشأنَ بوگفتم کی می شأدی جَا لبألب بٚبٚد.» 14 تی حوکمأنَ اَشأنَ فأدَم. دونیأ اوشأنی جَا بیزأره، چونکی اوشأن اَ دونیأ شین نییٚده، هطؤ کی من نییٚم. 15 نخأیٚم اَشأنَ اَ دونیأ جَا ببری، بلکی خأیم کی اوشأنَ شیطان قودرتٚ جَا قأیم بٚدأری. 16 اَشأنٚم می مأنستَن اَ دونیأ شین نییٚده. 17 تی کلامَ کی رأستی ایسه اوشأنَ بأموج کی پأک و موقدسَ بد. 18 هوطؤ کی تو مٚرَه اوسه کودی اَ دونیأ میأن، منم اوشأنَ اوسه کونم مردومٚ میأن. 19 من همیشٚک اوشأنی اَمرأ بوم کی رأستی و پأکی میأن پیلّه بد.
20 «من فقد اَ شأگردأنٚ رِه دوعأ نوکونم، اوشأنی وأسییٚم کی اَ زمأتأنٚ پٚسی ایمأن اَوٚرٚده، دوعأ کونم کی اَشأنَ شهادتأنَ ایشتأوده و مٚرَه ایمأن اَوٚرٚده. 21 دوعأ کونم کی همٚتأن ایتأ بٚبٚد، هوطؤ کی پئر جأن، تو و من کس‌کسٚ اَمرأ ایتأ ایسیم؛ کی هطویی کی تو در منی و من در تو اَشأنٚم اَمی اَمرأ ایتأ بٚبٚد، کی اَطؤیی دونیأ مردوم ایمأن بأوٚرٚد کی تو مٚرَه اوسه کودی.»
22 «جلالی‌یَ کی مٚرَه بٚبخشِئی اَشأنَ فأدٚم، کی اوشأنم اَمی مأنستَن ایتأ بٚبٚد. 23 من در اَشأن و تو در من، کی اَطؤیی اَشأنٚم تومأم و کمأل کس‌کسٚ اَمرأ ایتأ بٚبٚد و دونیأ مردوم بدأنٚد کی تو مٚرَه اوسه کودی و بفأمٚد هَندر کی مٚرَه دوس دأری، اَشأنٚم دوس دأری. 24 پئر، خأهیش کونم اوشأنی کی مٚرَه ایمأن اَوٚرٚده، اَنٚ پٚسی می اَمرأ بئیسٚد کی جٚه نیزدیک می بوزورگی و جلالَ بیدینٚد. تو مٚرَه جلال فأدأیی، چونکی جٚه اَ دونیأ خلقتٚ پیشتر مٚرَه دوس دأشتی.»
25 «اَی پئر کی عأدیل ایسی، دونیأ مردوم تٚرَه نشنأسٚده، امّا من تٚرَه شنأسٚم و اَ شأگردأن دأنده کی تو مٚرَه اوسه کودی. 26 من تٚرَه اَشأنَ بشنأسأنِم و ایوأردِه هه کأرَ کونم کی او تومأنَ نوبوستٚنی محبتی کی تو مٚرَه دأری، اَشأنَ میأنم بوجود بأیٚه و منم در اَشأن بئیسٚم.»
હાલમાં પસંદ કરેલ:
یوحنا ۱۷: GLK_NT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2024 Transform Iran