Mateu 22
22
Cisimo ca ciuano ca Vulo
(Luka14:15-24)
1Kaha naua Yesu uahandekele kuli vakevo mu visimo nguendi, 2“Vumuene vua muilu vunapu kusetekesa ngue muene uje ualingile ciuano ca vulo vua munendi ua yala, 3kaha uatumine vangamba vendi mukusana vaje valaniene ku ciuano ca vulu, vuno honi kuvezileko. 4Kaha uatumine vangamba vakuavo naua nguendi, ‘Lekeni vaje vavanalania, Taleni njavuahesa laja viakulia viange, vangombe vange na vimuna vange vakuhindala vanavatsihi, kaha viuma vioshe vinavuaha laja, ijeni ku ciuano ca vulo!’ 5Vuno honi kuvahakeleleko mana, vaile kuavo, umo ku lihia liendi, mukuavo kumingoso yendi, 6vakuavo vakuatele vaje vangamba vendi nakuvayandesa mua mupi, kaha va vatsihile. 7Kaha muene uanienguele cikuma, kaha uatumine masualale vendi nakukavanongesa vaje vatsihile vangamba vendi nakukatsimika vinganda viavo. 8Kaha uahandekele kuli vangamba vendi nguendi, ‘Ciuano ca vulo cavuaha laja, vuno honi vaje valaniene kuvezile. 9Nankuma yemuye mu vimbango via vitapalo, kaha mukalanie voshe vaje vamukauana veje ku ciuano ca vulo’ 10Kaha vaje vangamba vaile mu vitapalo nakukungulula voshe vaje vavauanene, voshe vacili na vaje va vapi, kaha ije njivo ya ciuano ca vulo yashulile na vangezi.
11“Vuno honi omo muene uezile nakukovela mukumona vaje vangezi, uamuene ngeci yala umo kazalele vuzalo via ha vulo, 12kaha uahandekele kuli ikeye nguendi, ‘Kavusamba uakovela vati muno kuakuhona kuzala vuzalo vua ha vulo?’ Kaha uahonouele viakuhandeka. 13Ambahoni muene uahandekele kuli vaje vaka kukuasa vangezi nguendi, ‘Mukuteni ku mavoko na ku mikono, mutualeni hambanza mu milima, kuje vantu vaka lila na kulishumanga ku mazo avo.’”
14“Omuo vavengi vanavalania, vuno honi vavandende lika vavanahangula.”
Cihula ca Kufueta Lisimu
(Mako12:13-17; Luka20:20-26)
15Ambahoni Vafaliseo vaile nakutumba vutumbe ngeci vakamueseke navihandeka viendi. 16Kaha vatumine vandongisi vavo kuli ikeye hamo na Helonde nguavo, “Mulongisi tutantekeya nguetu u yala uavusunga kaha ukalongesa vingila via Njambi mu vusunga, cakuhona kuteua muntu hali uoshe, omuo kuuekutala muntu muafuilamo. 17Tuleke vika usinganieka? Nkuma cinapu lishiko kufueta lisimu kuli Sezale, indi kuahi?”
18Vuno honi Yesu uatantekeyele laja vupi vuavo kaha uahandekele nguendi, “Yeni vaka civembulu, vika honi munjesekela? 19Njimueseni vimbongo via lisimu.”
Kaha vamunehelele mbongo ya muuaya uaya. 20Kaha Yesu uahandekele kuli vakevo nguendi,
“Cihanga ceya eci?”
“Kaha lizina lieya vanasonekaho?” 21Vahandekele nguavo, “Via Sezale.” Ambahoni uahandekekele kuli vakevo nguendi, “Haneni viuma via Sezale kuli Sezale, kaha haneni viuma via Njambi kuli Njambi.”
22Omo vovuile eci valikomokelele cikuma kaha vamusezele vaile.
Cihula ca ha Kusanguka ku Vatsi
(Mako12:18-27; Luka20:27-40)
23Ha litangua lije vene Vasanduki vezile kuli Yesu, vaje vakatsiliela nguavo kuesi kusanguka kuvatsi. Kaha vamuhuile cihula nguavo,
24Mulongisi, Mosesa uahandekele nguendi, “Nga yala atsa kuakuhona kuseza vana, kaha uje muanaye napande kuambata uje ntuluue, linga asemeneko vana vaje vanapandele kusemenako muanaye. 25Ambahoni vapuile vatanu na vavali vamuanaye, kaha uakulivanga uambatele, kaha uatsile, kaha kasezele vana kaha uasezele uje mpueyendi kuli muanaye. 26Cuma cakulifua calingiuile kuli uamucivali na kuli uamucitatu, nakuli uje uamu citanu na vavali. 27Kumamanuisilo uje mpuevo uatsile. 28Kaha mukusanguka, nankuma, akapua mpuevo yeya ha vantu ava vatanu na vavali? Omuo voshe vamuambatele.”
29Vuno honi Yesu uavakumbuluile nguendi, “Yeni muapihisa, omuo kumutantekeya visoneka cipue nzili ya Njambi. 30Omuo mukusanguka ku vatsi kukukakala kuambata cipue kushombuesa, vuno honi vakapua ngue tungelo va muilu. 31Kaha ngue ha kusanguka kuvatsi, nkuma kumuatandele vije viahandekele Njambi kuli yeni nguendi, 32‘Yange Njambi ua Avilahama, na Njambi ua Isake, na Njambi ya Yakomba.’ Keti Njambi ua vaka kutsa, vuno honi Njambi ua vaka kuyoya.” 33Kaha omo vivunga via vantu vovuile eci, valikomokelele cikuma ha kulongesa cendi.
Lishiko Liakama
(Mako12:28-43; Luka10:25-28)
34Vuno honi omo Vafaliseo vevuile nguavo naholuesa Vasanduki, kaha valikunguluile hamo lika. 35Kaha umo uavo, uje uapuile muka kuimanena mashiko, uamuhuile cihula cakumueseka nguendi, 36“Mulongisi, nkuma lishiko muka liakama ku mashiko oshe?”
37“Kaha Yesu uahandekele kuli ikeye nguendi, ‘Ukazanga Muene Njambi yove na mutima uove uoshe, na muono uove uoshe, na mana ove oshe.’ 38Eli likelio lishiko liakama lia kulivanga. 39Kaha lia mucivali eli, ‘Zanga mukueni ngue muje muualizangela yove vavenia.’ 40Ha mashiko aua avali hakeho hanemana mashiko oshe na tunanguizi va Njambi.”
Cihula ca hali Kilistu
(Mako12:35-37; Luka20:1-44)
41Honi omo Vafaliseo valikunguluile hamo, Yesu uavehuile cihula, 42uahandekele nguendi, “Vika musinganieka hali Kilistu? Uapua Muna iya?” Vamukumbuluile nguavo,
“Muna Ndaviti.”
43Kaha Yesu uavehuile nguendi, “Capuile vati honi, nkuma Ndaviti” vamulongesele kuli Cimbembesi, linga amusane Muene, omo uahandekele nguendi,
44“‘Muene uahandekele kuli Muene yange nguendi,
Tumama ku livoko liange lia cilio,
noho njikahaka vitozi vove muintsi lia viliato viove’?
45Nga Ndaviti amusana nguendi Muene, nkuma akapua vati naua munendi?”
46Kaha naumo uahi uasele kumutava lizi, nankuma kuhuma ha litangua lije vene naumo uahi uesekele kumuihula cihula naua.
હાલમાં પસંદ કરેલ:
Mateu 22: nkn
Highlight
શેર કરો
નકલ કરો
Want to have your highlights saved across all your devices? Sign up or sign in
