मर्कुस 1
1
बप्तिस्मा बयो युहन्नाको प्रचार
(मति ३:१-१२; लुका ३:१-१८; युहन्ना १:१९-२८)
1परमेस्वरको चोः,#१:१ परमेस्वरको चोः कुनय-कुनय सङ्सकरनलमहाङखे इ “परमेस्वरको चोः” त तोओ सब्द लेखओ नाःल। येसु ख्रिस्तको बारेहाङ पेओ खबरको सुरु एतहाइति स्याउना। 2यसय्या अगमबक्ताको कितापहाङ परमेस्वरइ एतदाह्य्ति तोसास्यावो मुना—
“योउ, ङाइ ङाको खबरदुतकाय नाङसय ङ्हा ल्होक्नाङ,
र ओउइले नाङको ल्याम तयार जाह्ङ्नउ।”#मला ३:१
3“ओउखे सुमा याक्मालो थाउहाङ हिह्ति नोःओ हाउनय खेना,
‘प्रभु वाङ्साखेओ ल्याम तयार जाह्ङ्नु,
ओउ वाह्साखेओ ल्यामलम धेङ्ताक्नु।’”#यस ४०:३
4ओउतझ्यान्ते मान्तालमकाय बप्तिस्मा बइधय सुमा याक्मालो थाउहाङ युहन्ना थालाङ वाङा। ओउइ मान्तालमकाय “निङइ लयइ जाह्ङो पापलमको पस्ताप जाह्ङ्ति बप्तिस्मा लेःनु, अनि परमेस्वरइ निङको पापलम छेमा जाह्ङ्सास्याउना” त दाह्य्ति प्रचार जाह्ङाकान। 5यहुदियाको जुदा छेत्र र यरुसलेम सहरसय नाःतो मान्तालम युहन्नाकाय योलाङ र ओउको कुरा साइलाङ वाङाकाय। जब ओउमयइ ल-लयको पापकाय चिःति पस्ताप जाह्ङाकानि, अनि युहन्नाइ ओउमयकाय यर्दन खोलाहाङ बप्तिस्मा बयाथास।
6युहन्नाइ उतको मेःनसय जाह्ङो नाय लावसतो, र कन्धनिहाङ छालाको पेति तोङ्सतो,#२राजा १:८ अनि ओउइ राय्क्न्याःम र बनको तुःम्खुदु जेःउतो। 7युहन्नाइ मान्तालमकाय एतदाह्य्ति प्रचार जाह्ङाकान, “ङासय लोन्हे कुनय यातचाक वाङ्सास्याउधय मुना, ओउखे ङासय महान् खेसास्याउना। ङापाय खुःङ्ति ओउको जुत्ताको तुनुला फान्सामा ज्योङल। 8ङाइपाय निङकाय तिःको बप्तिस्मा बइनेनाङ्स, तर ओउइपाय निङकाय पबित्र ग्वालामको बप्तिस्मा बइसास्याउलेना।#१:८ ओउइपाय निङकाय पबित्र ग्वालामको बप्तिस्मा बइसास्याउलेना इको मानेखे परमेस्वरको ग्वालाम निङभित्र याक्सा स्याउलेना त दाह्य्ति तोओ खेना।”
येसुको बप्तिस्मा र परिछ्या
(मति ३:१३—४:११; लुका ३:२१-२२; ४:१-१३)
9यात दिन येसु गालिल छेत्रको नासरत त तोओ मयो सहरसय वाङ्सास्यावा, अनि युहन्नाकसय यर्दन खोलाहाङ बप्तिस्मा लेःसास्यावा। 10तिःसय बाहिर ग्ल्युह्ङ्ति वाङ्नातासले येसुइ लाङका फोलो र धुकुर वाःको रुपहाङ पबित्र ग्वालाम लयकताङ वाङ्सास्याउधयमुओ च्यउसास्यावा। 11अनि लाङकासय एतताह्ङो हाउनय वाङा, “नाङ ङाको राप्तो चोः खेतेना। ङा नाङकुस आन आसओ मुनाङ।”
12ओहाङसयको रेह्न्तोले पबित्र ग्वालामइ येसुकाय सुमा याक्मालो थाउहाङ लात्ति आःल्सास्यावा। 13अनि येसु ओहाङ चालिस दिनसम्म मुसास्यावा, र ओउतोक बेलाहाङ सय्तानइ येसुकाय परिछ्याहाङ पारआथय। ओहाङ येसु बन पसुलमकुसि मुसास्यावा, तर लाङकादुतलम वाङ्ति येसुको सेवा जाह्ङाकानि।
येसुइ प्लय जना लाःङ वारो मान्तालमकाय लयको चेला स्याउलाङ गोत्सास्यावो
(मति ४:१२-२२; लुका ४:१४-१५; ५:१-११)
14युहन्नाकाय पक्रति झेलकनहाङ काओको लोन्हे, येसु गालिल छेत्रहाङ आलाक्तिको परमेस्वरको पेओ खबर#१:१४ परमेस्वरको पेओ खबर कुनय सङ्सकरनलमहाङखे “परमेस्वरको राज्यको पेओ खबर” त दाह्य्ति तोओ मुना। प्रचार जाह्ङ्सा फाःङाकान। 15येसुइ तोसास्यावा, “परमेस्वरइ बाचा जाह्ङ्सास्यावो समय वाङ्तिखायो मुना, र रेह्न्तोले परमेस्वरइ राजा स्याउति राज्य जाह्ङ्सास्याउलेना।#मति ३:२; ४:१७ निङइ लयको पापको पस्ताप जाह्ङ्नु र परमेस्वरको पेओ खबरहाङ बिस्वास जाह्ङ्नु।”
16यात दिन येसु गालिल समुन्द्रको किनार स्याउति वाह्धय मुतोकहाङ, येसुइ निसचाक लाःङ वारो मान्तानिस सिमोन#१:१६ सिमोन अध्याय ३:१६ पदहाङ सिमोनकाय येसुइ पत्रुस त दाह्य्ति मय्ङ्सास्यावा। अनि लोन्हे नाःतो पल्त सिमोनकाय पत्रुस त दाह्य्ति तोओ मुना। र ओउको हउ अन्द्रियासकाय लाःङ वार्धयमुओ च्यउसास्यावा। 17येसुइ ओउनिसकाय तोसास्यावा, “ङाकाय गुह्ल्ति वाङ्ज, निङ्जिइ ङाः चुम्ति हुमोलेखा गतहाइति मान्तालमकाय ङाको चेला स्याउसाकाय हुम्सा परना त दाह्यो कुरा ङाइ निङ्जिकाय स्यान्नेनाङ्ज।” 18ओउत साइनातासले ओउनिसइ वार्लाःङ फेआक्तिको येसुको लोन्हे गुह्ल्ति वाहाकाच।
19अनि मइतोकाय उताङ वाह्ति आलापछि येसुइ जब्दियाको चोःनिस याकुब र युहन्नाकाय च्यउसास्यावा। ओउनिसखे लयको दोङगाहाङ च्युःङाक्तिको लाःङ ताक्धय खेचतो। 20अनि येसुइ ओउनिसकायमा लयकताङ वाङ्साको लागि रेह्न्तोले गोत्सास्यावा, र ओउनिसखे लयको आपा जब्दियाकाय केहि कामदारलमकुस दोङगाहाङले फेआक्तिको येसुको लोन्हे गुह्ल्ति वाहाकाच।
येसुइ यातचाक दुस्त ग्वालामइ ङाःयो मान्ताकाय स्याक्ताक्सास्यावो
(लुका ४:३१-३७)
21येसु र ओउको चेलालम कफर्नहुम त तोओ मयो सहरहाङ आलाकाय, अनि यहुदि धोओ दिनको समय दाहापछि सभाकिमभित्र पोकाक्तिको येसुइ स्यानराय बइसा सुरु जाह्ङ्सास्यावा। 22येसुको स्यानराय सायो मान्तालम येसुइ स्यानो तरिका च्यउति ग्याह्ङाकाय, धइतिदाह्य्सा येसुइ अरु धर्मगुरुलम लेखा खेल, तर ताह्ङो अधिकारकुसि स्यानुतो।
23अचानक सभाकिमभित्र मुओ यातचाक दुस्त ग्वालामइ#१:२३ दुस्त ग्वालाम इकाय ग्रिक भासाहाङ, “असुद्ध ग्वालाम” त दाह्य्तिमा चिःसा खाइना। ङाःयो मान्ता हिह्सा फाःङाकान, 24“अ नासरतको येसु, नाङ निकसय दोह ते चाहसास्याउना? दोह नाङ इहाङ निकाय म्हेत्ताक्लाङ वाङ्सास्यावो या? ङाइ नाङकाय तह्य्नेनाङ— नाङ परमेस्वरको पबित्र मान्ता खेसास्याउतेना।”
25येसुइ ओउ दुस्त ग्वालामकाय थत्ति तोसास्यावा, “ङइमात मुअ, र ओउ मान्ताकसय बाहिर ग्ल्युह्ङ्ति पाह्य।”
26दुस्त ग्वालामइ ओउ मान्ताकाय ल्याःउ-ल्याःउ त रिह्ङ्ताकाथय, अनि माहा जोक्तो हिह्ति ओउकसय ग्ल्युह्ङ्ति पाह्या। 27अनि ओउ च्यवो जुदा मान्तालम माहा जोक्तो ग्याह्ङ्ति लयमयले एतदाह्य्सा फाःङाकानि, “इ गतताह्ङो नया खालको जिःङकालि स्यानराय खेना? इ मान्ताइपाय अधिकारकुसिले दुस्त ग्वालामलमकाय आग्या जाह्ङ्नउ, र ओउमयइमा इको आग्या पालन जाह्ङ्लेनानि।”
28अनि येसुइ जाह्ङ्सास्यावो कामलमको बारेहाङ गालिल छेत्रको वरिपरि रेह्न्तोले भयभय त स्यावा।
येसुइ नाःतो रोगि-बिरामिलमकाय स्याक्ताक्सास्यावो
(मति ८:१४-१७; लुका ४:३८-४१)
29याकुब र युहन्ना दोहि लयको चेलालमकाय लाताक्तिको येसु सभाकिमसय ग्ल्युह्ङ्ति सरासर सिमोन र अन्द्रियासको किमताङ आल्सास्यावा। 30सिमोनको आय अयोझ्यान्ते न्हापहाङ एङ्तिमुओ खेतो, येसु ओहाङ दाह्नातासले किमको अरु मान्तालमइ इ कुरा येसुकाय तोआथय। 31येसु ओउ बिरामिको द्याङ्तो आल्सास्यावा, र ओउको क्रुतहाङ चुमाक्तिको च्योक्ताक्सास्यावा। अयोइ ओउकाय फेआथय, र ओउइ च्योकाक्तिको जेःगालम तयार जाह्ङ्ति ओउमयको सेवा-सत्कार जाह्ङाकान।
32राह्मसय न्याम ब्लक्ति भ्याआपछि, मान्तालमइ नाःतो बिरामिलम र लानइ ङाःयो मान्तालमकाय येसुकहाङ लात्ति वानाकानि। 33येसुकाय योसाको लागि सिमोनको किमको दह्य्लो बाहिर कफर्नहुम सहरको जुदा मान्तालम हुमाकाय। 34येसुइ नाःतो खालको रोगइ ङाःयो मान्तालमकाय स्याक्ताक्सास्यावा र नाःतो लानलमकायमा रुःन्ति ल्होक्सास्यावा। ओउ लानलमइ येसु सु खेसास्याउना त दाह्यो कुरा चिःओझ्यान्ते, येसुइ ओउमयकाय नोःसा अनुमतिले बइसास्याउल।
येसुइ गालिल छेत्रहाङ प्रचार जाह्ङ्सास्यावो
(लुका ४:४२-४४)
35स्याह्ङ्लो बिहान न्याम थोङ्माखाले सइबर च्योक्ति येसु सुमा नाःमालो एकान्त थाउताङ आल्सास्यावा, र ओहाङ प्राथना जाह्ङ्सास्यावा। 36तर सिमोन र ओउको होयालमखे येसुकाय बोःङ्लाङ आलाकाय। 37अनि ओउमयइ येसुकाय क्रुसापछि एतदाह्य्ति तोआकानि, “जुदा मान्तालम नाङकाय बोःङ्धय मुनय।”
38तर येसुइ ओउमयकाय तोसास्यावा, “नि इहाङ वरिपरिको अरु गाउलमहाङमा आल्सा परनातहि। अनि ङाइ मान्तालमकाय परमेस्वरको पेओ खबर प्रचार जाह्ङ्साले परनाङ, धइतिदाह्य्सा इ कुराको लागिले ङा वाङो खेनाङ।”
39ओहाङसयको येसु सभाकिमलमहाङ आल्ति प्रचार जाह्ङ्धय, र लानलमकाय रुःन्ति ल्होक्धय गालिलको जुदा थाउको यात्रा जाह्ङ्सास्यावा।
येसुइ कोह्र्चाइ ङाःयो मान्ताकाय स्याक्ताक्सास्यावो
(मति ८:१-४; लुका ५:१२-१६)
40यातचाक कोह्र्चाइ ङाःयो मान्ता येसुकहाङ वाङा, र येसुको ङ्हा खुःङाक्तिको लयकाय स्याक्ताक्ति बइसाको लागि बिन्ति जाह्ङ्धय एत दाह्या, “अ प्रभु, यदि नाङ चाहसास्याउना त खेया, ङाकाय स्याक्ताक्ति सुद्ध जाह्ङ्सा#१:४० स्याक्ताक्ति सुद्ध जाह्ङ्सा यहुदि धार्मिक नेम-कानुन अनुसार कोह्र्चाइ ङाःयो मान्ताखे असुद्ध स्याउतो। ओउतताह्ङो रोगइ ङाःयो मान्ताखे मन्दिरहाङ पोक्सा स्यावाक्ल, अनि ओउ गाउहाङ याक्सामा दोःआक्ल र ओउइ अरु रोग नाःमालो मान्तालमकाय धिन्सामा स्यावाक्ल। खाइतेनाचि।”
41एत साइति येसुइ ओउकाय योःन्सास्यावा, र लयको क्रुत ओउकहाङ झाम्ति तोसास्यावा, “ङा चाहनाङ, नाङ पेतो स्याक्ति सुद्ध स्याउतेपा।” 42ओउच्युक खेरले कोह्र्चाइ ओउकाय फेआथय, र ओउ स्याक्ति सुद्ध स्याउमाआ। 43ओहाङसयको येसुइ ओउकाय बिदाइ जाह्ङ्धय दर्कति तोसास्यावा, 44“लउ, इ कुरा सुकायमा तोलाम, बरु पुजारिकहाङ आल्ति लयकाय छ्यान्स र परमेस्वरइ मोसा दुवारा बइसास्यावो नेम-कानुनहाङ तोओलेखा भोक बयु र जुदा मान्तालमइ नाङ स्याक्ति सुद्ध स्यावो कुरा चिःपानानि।”#१:४४ यहुदि धार्मिक नेम-कानुन अनुसार ओउत ताह्ङो रोगइ ङाःयो मान्ताकाय स्याका या स्याक्ल या त दाह्य्ति पुजारिइ मात्र जाचसा स्याउतो। यदि ओउ स्याका त खेया अरु सेल मान्तालमकहाङ आल्सासय ङ्हा, ओउइ परमेस्वरइ मोसा दुवारा बइसास्यावो नेम-कानुन अनुसार भोक बइसा परतो (लेबि १४:१-३२)।
45तर ओउ मान्ता पाह्या, र जुदा थाउहाङ आल्ति नाःतो मान्तालमकाय ओउ कुरा ल्हाक्ति छ्यानाकान। अनि मान्तालमको नाःतो हुलइ येसुको वरिपरिसय घेरओझ्यान्ते येसुकाय सहरताङ आल्साले दुक्तो स्यावा। ओउतझ्यान्ते येसु सुमा नाःमालो एकान्त थाउताङ आल्ति मुसास्यावा, तर ओहाङमा मान्तालम वरिपरिसय येसुकहाङ वाङाकाय।
હાલમાં પસંદ કરેલ:
मर्कुस 1: CHEP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
