Lukah 1

Ta kawungana

1Teopiluh napapa-akang,

Na ɗangu natou nama kabu atingu patuliya ngaladukana nahawoluna hi Yehu namaʄaʄi ta paɗuada.#1.1 Ta joangada iata: nahawukuna na hilu Yunani da tidiʄiamakiha hi Lukah ʄaka hi Teopiluh, ʄiaɗinguka ʄia ʄellaha ngaladuka ɗa tou nama rangu ʄaka nama bahhaya na hurat ya. 2Toungu napapatomaɗa lahi iata, nama walingu ta tou ɗama ita wainya mata ta kawungana namaʄaʄi, ʄaka ta kamurina ɗuɗa ɗapatomanya na Lii Kalung. 3Ta ɗalu aku pangaɗanya ʄaka aku kahiraya namaʄaʄi waling ta kawungana ʄiaya hiku ɓotahuya aku paʄuru pamapitunya ta hurat lahi ama. 4Kam peanya ngaladukana napapeaka-panungang amapaɗeninguya.

Napeakaya nalara ʄaʄina hi Yohanih Pembaptih

5Ta ɗalu pareahana na raja Herodeh ta loaɗa Yudea, einya na imam#1.5 Imamʄiayak natou nama ta paɗuana hi Alla ʄaka na tourara. nama ngarang Hakaria nama walingu ta kaɓuangu imam Abia. Na ngara arweina hi Elihabet wallananya hi imam Harun. Hi Harun angwuana hi Muha. 6Na morikuɗa aɗa pla-araweingu mapaɗeninguha ta hagana hi Moiri Alla. Ɗa keri wali atiha ɗa lii-pareahana hi Moiri da eimang paheliɗa. 7Hida eingu anaɗa, kaɗang hi Elihabet nawotu ʄaka ɗuɗa langa lopahu kaweaɗaɗak.

8Einya nama hangina na laɗɗu‚ kaɓuangu Abia aɗa wolu taguɗa‚ kenananyaka hi imam Hakaria ana pahalakuya na tagu imamuna ta hagana hi Moiri. 9Napalanga dammaɗa ɗa pedi letuha waing lot, agearaya nama tama ta ɓei Umma Pingi Pahabayangu tou Yahudi.#1.9 Nahawiɗang ‘ɓei Umma pingi pahabayangu tou Yahudi’ ya ʄiayak na Ummana hi Alla nama tidihangipana nama einya ta kota Yerusalem. Ɗunnaka nama kena pedi hi imam Hakaria ʄaka natama ta ɓei Umma Pingi Pahabayangu tou Yahudi hina tunu mawou momar. 10Atanga tunu nama wou momaru, ɗa tou ɗangu ta haɓalihiɗ ɗa habayang. 11Aminyaka na malaikat#1.11 Nahawiɗang ‘malaikat’ ʄiayaka papaleawana hi Alla waling ta hurga. ana patekangu wikina lahi imam Hakaria, nadedi ta karaha lawanana ta padoung pingi patunu mawou momar. 12Ana itayaka, nakapoduk ʄaka namangeꞌat. 13Jiaɗinguka winanya na malaikat, “Abi mangeꞌatɗing‚ imam Hakaria! Hi Alla Ama, na ranggunyaka na habayangumu. Baar na araweimu hi Elihabet napa anang lakeaɗa moani, mu pangaranyaha, Yohanih. 14Ou enga egi atim ʄaka naɗangu ɗa tou nama egi ati ɗengagu anaʄaʄi na anam baaru! 15Jaka naʄaʄi tou ɓakul hawaina hi Moiri, da enga inungman wei mawuk, waling ta kabu inan nabinunya Hangahu Harri-Na hi Alla. 16Naɗangu natou Ihrael napa opa ɓalina ta hagana hi Alla, Moiriɗa. 17Naʄaʄi tou papata pedi lihu nyoangana hi Moiri, nakullihu ʄaka namadungu mearana hi nabi#1.17 Na nabiledi-liinanya hi Alla. Napakerana ʄiaya ‘nama kaaya napanou-Na hi Alla ʄaka hina patomanya ta tou.’ Elia. Na pamoiliha ɗama pa amang pa anang. Na opaha ɗa tou dama manudu lahi Moiri kaɗa manudu ɓali. Jaka ɗapangaɗanguɗa dama paɗening napatidi ɓaliɗaja ta pangaɗang nama manyakat. Jiayaka hina hadiaya ɗa tou ɗama tutu-tidi lahi Moiri.”

18Napatuturunya imam Hakaria ta malaikat, “Gikinoukanaka hiku peanya nama enga ʄaʄina? Nyouwa ku kaweaɗaka, ʄaka na araweigu na kaweaɗa ʄellaka.”

19Na malaikat nagapiya, “Ya nyouwa hi Gabrialuwa, papaleawana hi Alla waling ta hurga. Ɗunna ʄella nama paleawawa patomanya na lii kalung lahi ou. 20Jaka nahawigungu ya, enga ʄaʄina. Jiaɗinguka damu waigaka, ou peala mu kabangngaɗing, lapakung anaʄaʄi nahawigung.”

21Ɗa tou ɗama naɗinya hi Hakaria, ɗa hangotar ɗenganya gahi duku madeiya ana engang ta rongu ɓei Umma Pingi Pahabayangu tou Yahudi awiɗ. 22Ana tomaka palouhungu dana hilu panewi ɗenga majaha. Kabangngananyak waingu kawabakung ʄuananyaka. Wali nounak hiɗa peanya a eingu ha itana ta rongu ɓei Umma Pingi Pahabayangu tou Yahudi.

23Ana dukaka na rahi keranguna ta ɓei Umma pingi pahabayangu tou Yahudi, ɓalinanyaka hi imam Hakaria ta ummana. 24Dana madeimah, hi Elihabet na arweina ɗungananyaka, ʄaka lima wulana atidi engana ta umma. 25Hi wina, “Natulu-gatagaka hi Moiri ʄaka napoahiganyaka na makiigu.”

Napeakaya nalara ʄaʄina hi Yehu

26-27Ta ɗalu nammu wulana hi Elihabet waling ana ɗunganya, hi Alla napaleawaya hi Gabrial napapaleawana nama waling ta hurga, ta ana karaa nama ngarangu Maria ta koata Naharet ta loaɗa Galilea. Hi Maria tagu arweinanya#1.26-27 tagu arweina nahawiɗang ya na ihina, hi Maria ʄaka hi Yuhup langa papingu wikiɗa ta pata ʄiaɗinguka daɗi ɗapa oalimah. hi Yuhup. Hi Yuhup wallananya hi raja Daut. 28Natamaka hi Gabriel ta ummana hi Maria winanya, “Mori umma, ou ano napawoangu wei maringu, hi Moiri nahaɗiɗi pangalawu!”

29Ana rangunanyaka na panewina, kapoduk idinanyaka hi Maria. Napatuturungu ta atina, gana ikanyaka nahawinang. 30Na papaleawana hi Alla nou wina ɓali ʄellapah, “Abi mangeꞌatuɗing Maria, ou matutu-tidiwu ta hagana hi Alla. 31Mupakabu lapakungu mupa ananya nalakeaɗa moani, mupangaranya Yehu. 32Baaru naʄaʄi tou ɓakul, Ana Alla nama Reihi ʄaga. Lapakungu naʄaʄi ʄella raja toungu na ɓokuna hi raja Daut. 33Jiaya nama pareaha ɓoluya na wallana hi Yakub lapakungu piangu-piang, naparehana dama wolu ɗirana.”

34Nagapiya hi Maria, “Gikinoukan na pawimung anaʄaʄi? Ya nyouga daɗi eikaɗingu laagu.”

35Wina hi Gabriel, “Na Hangahu Harri napurung lahi ou, ʄaka na kuaha-Na hi Alla nama Reihi Jaga napa eina-hamawugu. Jiayaka baaru na lakeaɗa napapaʄaʄimu maharriya Ana Alla wiɗanya. 36Kam peanya: hi Elihabet na angu mahawam nammu wulla wainaka ana pakabu, nama langkaweaɗa dana hilu pa anamah nahawiɗang. 37Ta hagana hi Moiri da eimang dama mapiakung.”

38Manga nagapiya hi Maria, “Ya nyouwa, atanaga hi Moiri. Kana ʄaʄikaya nahatikimu lahi nyouwa.” Balinanyaka napapaleawana hi Alla nou, ɗujaknanyaka hi Maria.

Hi Maria ʄaka hi Elihabet

39Manga dana hilu maɗeimah, hi Maria halakunanyaka ta mahangina na paraingu nama eingu ta pinu paledi ta loaɗa Yudea. 40Tomaka ta padoung nou, na tama ta ummana hi imam Hakariah, ngiki ɗengananyaka hi Elihabet. 41Narangukiyaka na liina hi Maria, kagudiknanyaka na anan hi Elihabet nama eingu ta kabuna. Hi Elihabet binunanyaka Hangahu Harri, 42hina kawulangu, “Maria, mumarii-rikakingu ta joanga mawinni ngaladukaɗa ta pinu-tana! Namarii-rikakingu na ana papaʄaʄimu! 43Geara ikawaka nyouwa, na inana hi Moiri hina mai patomaga? 44Aku ranguya napangiki ɗengangumu, na anag ta kabugu nakagudik ana egi ati. 45Mumarii-malalangu, kaɗang muwainya nahawinagu hi Moiri enga ʄiaya namaʄaʄi!”

Gokugeila reaɗurawana hi Maria

46Manga wina hi Maria,

“Kuʄaʄi wuatu horu-hailanya hi Moiri.

47Na egi na atigu kaɗang hi Moiri Alla

nama pamanumarawa.

48Na namuwa mamilla!

Waling ya lapakung ta ana muri-ana muri ta haguꞌul pinu-tana

hiwiɗaga napapamarii-malalang.

49Kaɗang hi Alla nama harri

napatekanya nahawolu-Na nama ɓakul lahi nyouwa.

Maharriya nangara-Na.

50Napa awi-panamunguna hi Moiri

lapakung ta ana muri-ana muri

ta tou nama kahoru-karaɗa ta haga-Na.

51Waingu kuaha-Na napatekanya nahawolun nama ɓakul

napa iha-ihanya natou nama kataɗak

ʄaka nanyagarnanya napakabu atin.

52Na hapuruja ɗa raja walingu ta padou ngoɗu rajaɗ,

ʄaka na paʄagaya natou nama milla.

53Hi Alla nawoaja ngaladukaɗa nama kalung ta tou milla ʄenang abi ɗahilu karobang,

hina wurutuja ɗa tou poati hiɗa ɓali kalua.

54-55Natulunya na Ihrael na atan

kaɗang na namuya gananya napapatura-paʄaʄi-Na lahi Abraham,

ta apu-ɓokuda.

Napalanga ɓotahuna ana patekanya napa awi-panamunguna

lahi Abraham

ʄaka ta walla-wuana piangu-piang.”

56Akatutukayaka tillu wulana hi Maria ana engangu ta padouna hi Elihabet. Manga hina ɓali ta ummana.

Naʄaʄina hi Yohanih Pembaptih

57Tomananyaka na rahi pa anana hi Elihabet. Napa ananya na lakeaɗa moani. 58Ɗa lihi-ummana ʄaka ɗa oaliʄaʄina ɗaranguya na deaha atina hi Moiri lahi Elihabet, ʄaka ɗa egi ati ɗenganya.

59Ana tomaka walu laɗɗu na anarara, ɗuɗa amija aɗa keriya na hunatuna na anarara, keriya na pata tou Yahudi.#1.59 Na hunat ta anarara nama ahi walu laɗɗuna, keriɗanya na patana na agama tou Yahudi, ta Lii Dei ta Hurat ʄaʄi 17:9-14. Ɗuɗa ɗakabu ating kapangaranya Hakariah wiɗa, keriya nangara amana. 60Jiaɗinguka wina na inan, “Daꞌah! Pangaranyaha Yohanih.”

61Wiɗanya, “Da eimangu ta oaliʄaʄim nama ngarang Yohanih.” 62Ɗa wainya kawabak, aɗa tuturuya hi imam Hakariah. Geara wimukanyaka amu pangaranya na anamu.

63Hi imam Hakariah nakarei wat tuil manga natuliya, “Na ngarana, hi Yohanih.” Duɗa ɗakaɓarra ɗenga bollunya. 64Ta rahi nou ʄella hi imam Hakariah napanewi ɓali manga hina wuatu haliya hi Moiri. 65Ɗa lihi-ummaɗ ɗakaɓarra ɗenganya, ʄaka naɗangu natou nama lolukuya namaʄaʄi nou, hina majoꞌarung toma ta haguꞌul letin loaɗa Yudea. 66Ngaladukana nama rangu napatutur ta ati ɗaluna, “Ga paʄaʄi ikanaka baaru na lakeaɗa?” Kaɗang hi Moiri nama haɗiɗiya.

Hi Hakariah nawuatu haliya hi Moiri

67Na imam Hakariah na amana nalakeaɗa nabinunya Hangahu Harri-Na hi Alla. Hina peakaya na lii nama waling lahi Moiri, wina,

68“Maiyay iata kawuatu haliya hi Moiri,

Alla Ihrael!

Aminyaka ana patulu-pagatang

kata lika-loaga waling ta geꞌa.

69Na woada iata Raja nama Pamanumara

waling ta walla-wuana hi raja Daut, na ata-Na.

70Napaliinya ta nabi-nabi#1.70 Na nabiledi-liinanya hi Alla. Napakerana ʄiaya ‘nama kaaya napanou-Na hi Alla ʄaka hina patomanya ta tou.’ hanaɗug,

hi Moiri na woaya napatura-paʄaʄingun

71kana pahelada walingu ta geꞌada,

ʄaka ta limma tou ɗama huka-da ati.

72Na patekanya napa awi-panamunguna, ta ɓoku-apuda

ʄaka na namuya napaturanguna nama harri.

73Na pahaki ɗenganya hi Abraham, na ama bollud

74ʄaka napaturang ana palika-loagad walingu ta geꞌa,

abi hilu mangeꞌat ata wuatu haliya hi Moiri,

75ʄaka kata pa eginanya na ati-Na waingu pata morik nama murrah

ʄaka nama paɗening

ta ɗalu morikuda.

76Ou, aku anag, baar ɗatikiwu nabi waling lahi Alla Nama Reihi Jaga.

Ou nama moulu waling ta Raja nama Pamanumara#1.76 Hilu Wanukaka kak wiɗanya Raja nama Pamanumara.Na hilu ʄawa ‘Mehiah’ paɗekiya waling ta hilu Ibrani. Ta hilu Yunani ‘Karituh’ wiɗanya. Ɗama ɗubba ɗa hilu hei ɗahamearaɗ ɗa ihiɗ, nama wina, “Napahailangu ʄaʄi Raja.”

kam hadiananya na larangi-Na.

77Ou nama peakaya ta tou ɗangu

aʄiaya hi Alla nama poahi-poɗahuha ɗa doku-jala.

78Hi Alla napa awi ʄaka napa namung,

enga aminya ana pamanumarada,

toungu nahungana

na matalaɗɗu,

79ana pawahanya natou ɗangu,

nama enganaha ta makapetang ʄaka nama mangeꞌat.

Atounounaka, napamoili ɓalidaka

iata lahi Alla.”

80Na anana na imam Hakariah kii-ki matuananyaka ʄaka taba kullihunanyaka na waddin. Manga ana tutuka matuana, engangu nanyaka ta maraɗa karah, lapakung ana tomaya na rahi ana patekangu wikina ta tou Ihrael hina pahalakuya na ngidi ɗeitu ngidi tiɗuna.

હાલમાં પસંદ કરેલ:

Lukah 1: wnk

Highlight

શેર કરો

નકલ કરો