लुका 7
7
रोमि कप्तानको खान्धुर
(मत्ति ८:५-१३)
1इसु द्याङगेलाइहेङ धिरपालि दोतेङ कफर्नहुम भारि हानिहि। 2इन्ता रोमि कप्तानको ओसाभारापाङ दायाका कामत्या मासाअ्धेतेङ सिलितोम्का हिघाहि। 3इसुको बारेता हिङतेङ इङको कप्तान इसु लोतेङ काङको कामत्याहेङ एल्पाप्याको दोअ्तेङ बिनइ पालि यहुदि आगुवागेलाइहेङ वाकोता दिङगिल्हि। 4इङको आगुवागेलाइ इसुकोता लोतेङ बिनइ पातेङ दोअ्हि, “मास्टर, रोमि कप्तानको कामत्याहेङ एल्पापिनु रेम्का जेन्धावा। 5हाइदोनु वा केलाइको जात्याहेङ माया पातेङ केलाइको भाअ्सिङ एलोङ कचहरिसाअ् बुङ धामपिका हि।” 6इसिका बिनइ हिङतेङ इसु एम्बालाइदोफाङ हानिहि। साअ् भेर्पा थुकालिलोलाउ कप्तान ताइको सानाइतिगेलाइहेङ इसुकोता इसिका बानाल पिगिल्हि, “प्रभु, तु: मापा, नासेहेङ ताइको साअ्लिता चुमपुलि सोबाइका का मान्थुघा। 7का ताइमिङ बुङ नाङको भेर्पा लोलि सोबाइका मान्थुघा। कालाउ ना हुकुम खिनिङ पि, काङको कामत्या एलावा। 8का ताइमि बुङ बारा हाकिमगेलाइको बसता हिखा। काङको बसता बुङ पलटन हिखे। एमिहेङ ‘हाने’ दोअ्खा वा हानेखे, भेनाङहेङ ‘लोउ’ दोअ्खा वा लोखे। कालाउ ताइको कामत्याहेङ बुङ ‘एसा पा’ दोअ्खा वा एन्साङ पाखे।”
9इदोइ काथा हिङतेङ इसु भारभुसाइहि कालाउ ताइमिहेङ पिताइका द्याङगेलाइको हुलभारि खाङतेङ वा दोअ्हि, “का नेलाइहेङ दोअ्ताङका, इङको झोको बारा खान्धुर पाका द्याङ ते का इस्राएलिगेलाइको माझाता बुङ निङनाङ मान्थुघा।” 10इङको बानाल चुमाका सानाइतिगेलाइ साअ् घुरिलाउ इङको कामत्या ते एल्तेङ हिघाहि।
इसु रान्दिको चानहेङ सिन्हुपाका
11एनि न्हेनि न्हुअ्सो इसु नाइन दोअ्का पुरता हानिहि। वाको चात्यागेलाइ रो हेन्जाङ द्याङगेलाइ बुङ वाको दोसा हानिहि। 12इसु पुरको द्वारता थुकालिलोलाउ एमि सिकाद्याहेङ फातेङ मालामिगेलाइ हानेघाखे। सिका द्याङ ते एमि रान्दिको एलोङ खिनिङ चान हिघाहि। इङको रान्दिदोफा मालामि हानिका पुरको हेन्जाङ द्याङगेलाइ बुङ हिघाखे। 13रान्दिको तु: तिङलाउ इसुको मनता दाया पोङघातेङ वा रान्दिहेङ दोअ्हि, “माखार!” 14कालाउ आगाता हानेतेङ इसु सिकाको मान्चाउलि चाःतेङ रोकेलाउ मालामिगेलाइ जाअ्हि। कालाउ इसु सिकाहेङ दोअ्हि, “ओइ वाजान का नासेहेङ हुकुम पिखा ल्हो!” 15उदोङघरि सिका वाजान ल्होतेङ योम्हि रो काथा पालि तेङहि। इसु इङको वाजानहेङ वाको आमाइहेङ पिहि।
16परमेस्वरको इसिका बारा सरबङ तिङतेङ झाराङ भारभुसाइतेङ वाकोदोफा थिहि कालाउ परमेस्वरको परसङसा पातेङ दोअ्हि, “एमि बाराका आगाधुइका केलाइको माझाता देखाल पिका हि। परमेस्वर ताइको जनगेलाइहेङ बान्चेपालि लोका हि।” 17इसु इङको वाजानहेङ बान्चेपाका बानाल यहुदिया कालाउ इङको चारबितिङको गोताङ माउजागेलाइता फाइलिहि।
युहन्ना इसुको बारेता काथा गेलि दिङगिल्का
(मत्ति ११:२-१९)
18चिभुअ्लि पिका युहन्नाको चात्यागेलाइबुङ इसुको पाका इदोइ गोताङ काथा वासेहेङ हिम्पाहि। कालाउ युहन्ना ताइको न्हेमि चात्यागेलाइहेङ काइतेङ, 19प्रभु इसुकोता एसा दोअ्तेङ हिअ्लि दिङगिल्हि, “केलाइको आस पाका मुक्तिपिका ख्रिस्ट ना दोङ हिना बे केलाइ भेनाङको दामा खानाङ?” 20कालाउ एम्बालाइ इसुकोता लोतेङ हिअ्हि, “केलाइको आस पाका मुक्ति पिका ख्रिस्ट ‘ना दोङ हिना बे, केलाइ भेनाङको दामा खानाङ? इदोइ काथा चिभुअ्लि पिका युहन्ना केलाइहेङ हिअ्लि दिङगिल्हि।’”
21इङकोङ बेला इसु हेन्जा द्याङगेलाको रोग बिमारगेलाइ रो मासान खोअ्कालाइहेङ एल्पाहि। हेन्जा मिँ मातिङकालाइ बुङ तिङलि दोअ्का जेङहि। 22इसु युहन्नाको चात्यागेलाइहेङ दोअ्हि, “नेलाइ जेदोङ तिङका रो हिङका हिसुन्हा हानेतेङ इङकोङ काथा दोङ युहन्नाहेङ दोअ्पिसु: मिँ मातिङकालाइ तिङलिदोहि, तेलि मादोकालाइ तेलिदोहि, रोग्यागेलाइ सुचि जेङदोङ खे, न्हातोङ माहिङकालाइ हिङलिदोहि, सिकालाइ सिन्हुदोङखे रो पिर गरिबगेलाइ परमेस्वरको रेम्काबानाल हिङलि निङदोङखे।#यसैया ३५:५-६; यसैया ६१:१ 23काङको बारेता साङखा मापाका द्याङ जातिङको आसिस निनावा!”
24युहन्नाको चात्यागेलाइ हानेकान्हुसो इसु द्याङगेलाइहेङ युहन्नाको बारेता दोअ्हि, “नेलाइ उदादाङका थामेता हाइ खाङलि हानिका हिघासुन्हा? हाइ भेर्माता हेङघालाइ न्हाका नालेहेङ? 25हाइ रे रेम्का धाबा लागाइका द्याङगेलाइहेङ? रेरेम्का धाबा लागाइका द्याङ ते राजमहलता खिनिङ हिखे। 26जातिङको दोअ्सु, नेलाइ हाइ खाङलि हानिका हिघासुन्हा? हाइ आगाधुइकाहेङ? एइ, जातिङको दोअ्नु ते नेलाइ आगाधुइका खान्तेङ बुङ बारा एमिहेङ तिङका हिसुन्हा। 27हाइदोनु युहन्नाकोङ बारेता धरम किताबता परमेस्वर एसा दोअ्का हि:
‘खाङ, ना खान्तेङ लाम्फा का काङको सादेलचरगेलाइहेङ दिङगिल्दोङखा।
कालाउ वा नाङको दामा त्यार पाप्यावा।’#मलाकि ३:१
28“का नेलाइहेङ दोअ्खा, बेबाल द्याङसो जेङकालाइ युहन्नाखान्तेङ बारा द्याङ हासु मान्थु। कालाउ सादेलको सारभिता जाइ झाराङखान्तेङ म्हुइका हि, वा युहन्नाखान्तेङ बुङ बाराका जेनावा।” 29कालाउ युहन्नाको काथा हिङतेङ द्याङगेलाइ रो पोत ल्होपाकालाइ परमेस्वरको हुकुम ठिक हि दोअ्तेङ युहन्नासो चिभुअ्लि र्हुहि।#मत्ति २१:३२; लुका ३:१२ 30कालाउ फरिसिगेलाइ रो धरम मास्टरगेलाइ ओबालाइको भाअ्सिङ परमेस्वरको योजनाहेङ काम मालागिका दोअ्तेङ युहन्नासो चिभुअ्लि मार्हुहि। 31इसु दोअ्हि, “इन्सिका द्याङगेलाइहेङ का हासु दोफा दाज्याङका? एम्बालाइ हिसिका हि? 32एम्बालाइ ते हातेता योम्तेङ एसापा काथा पाका जामालाइ भाइका हि। एम्बालाइ ताताइमिता एसापा दोअ्खे:
‘केलाइ नेलाइको भाअ्सिङ बासुलि धुइपापिलाउ बुङ नेलाइ मान्हासुन्हा।
केलाइ बिलाउना पातेङ ले लेलाउबुङ नेलाइ माखारसुन्हा।’
33“अङगुरको निघार बुङ माआम्का, उम बुङ माचाका युहन्ना लोहि। नेलाइ वासेहेङ ‘मासान खोअ्का द्याङ’ दोअ्सुन्हा। 34द्याङको चान चातेङ आम्तेङ लोहि कालाउ वासेहेङ नेलाइ ‘इङको दुअ्का, जाँर्ह्या, पोत ल्होपाकालाइ रो कुकरमिगेलाइको सानाइति’ दोअ्तेङ फतुर लागाइखेना। 35परमेस्वरको आकिल निङकालाइ दोङ आकिलहेङ उचित ठहर्हाइखे।”
इसु कुकरमि बेबालहेङ माफपिका
36सिमोन दोअ्का एमि फरिसि इसुहेङ दिलिमा उम चालि काइपुहि। कालाउ इसु इङको फरिसिको साअ्ता हानितेङ उम चालि योम्हि। 37इङको पुरको एमि कुकरमि बेबाल इसु फरिसिको साअ्ता चालि लोका हि दोअ्का हिङहि। वा एलोङ रेम्का सिङमरमरको सिसिता जाङका आतर चुमतेङ इङको साअ्ता थुकालिलोहि।#मत्ति २६:७; मर्कुस १४:३; युहन्ना १२:३ 38वा न्हुअ्पाहासो लोतेङ इसुको खोकोइ भेर्पा जाअ्तेङ खारलि तेङहि रो मिसिय्हाँसो ह्याअ्का मितिसो इसुको खोकोइ झापिहि। कालाउ वाको खोकोइ ताइको पुसिङहोइ योअ्तेङ चुमाइतेङ आतर होपिहि।
39इदोइ तिङतेङ इसुहेङ चालि काइपुका फरिसि मन मन्ताङ दोअ्हि, “इसु जातिङको आगाधुइका हिनु ते वासेहेङ साइका बेबाल हिसिका कुकरमि बेबाल हिघाहि दोअ्तेङ गेधावा।” 40एन्सालाउ इसु इङको फरिसिहेङ दोअ्हि, “सिमोन, नासेहेङ का एलोङ काथा दोअ्लि गोइका हि।” वा दोअ्हि, “मास्टर, हुकुम ज्याको।” 41इसु दोअ्हि, “हिङ, एमि साहुको न्हेमि आसामि हिघाखे। एमि नासाइ रुपाको टाका कालाउ भेनेङ न्हेकुरिते रुपाको टाका रिन र्हुका हिघाखे। 42एम्बालाइ हासुबुङ र्हुका रिन तिरिलि मादोनाङसिङ साहु न्हेमिकोङ रिन मिनाहा पापिहि। एला दोअ्, हासु साहुहेङ हेन्जा माया पाङ?”
43सिमोन दोअ्हि, “काङको ठहरता हेन्जा रिन मिन्हा निङका।” इसु दोअ्हि, “ना ठिकदोङ दोअ्न्हा।” 44वा बेबालभारि घुरितेङ सिमोनहेङ दोअ्हि, “यासिहेङ खाङ! का नाङको साअ्ता लोघा, ना कासेहेङ खोकोइ झाका चिसुदाङ मापिन्हा। कालाउ या ते काङको खोकोइ मितिहोइ झापितेङ ताइकोङ पुसिङहोइ योअ्पिहि। 45ना कासेहेङ चुमाइतेङ स्वागत मापान्हा। कालाउ या ते लोकासोङ काङको खोकोइता चुमाइदोङखे। 46ना काङको पुसिङता चुइति बुङ मालागाइपिन्हा। कालाउ या ते काङको खोकोइता जाङका आतर होपिहि। 47या हाइपालि एसा पाहि दोअ्तेङ का नासेहेङ दोअ्खा, याको हेन्जाङ कुकरमिगेलाइ माफ जेङलिदोहोइ। इङकोखातिर या कासेहेङ हेन्जा माया तिम्पाहि। आतुइसा कुकरम माफ जेङका द्याङ आतुइसा माया पाखे।” 48कालाउ इसु इङको बेबालहेङ दोअ्हि, “नाङको कुकरम माफ जेङलि दोहोइ।” 49इन्ता चालि योम्का द्याङगेलाइ ताताइमिता दोअ्लितेङहि, “कुकरम माफ पाका या हासु?” 50इसु इङको बेबालहेङ दोअ्हि, “नाङको खान्धुरसो नासेहेङ बान्चेपाहि। एला सुबिस्तासो हाने।”
હાલમાં પસંદ કરેલ:
लुका 7: DHIM
Highlight
શેર કરો
નકલ કરો
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
