Luke 9
9
1Sui nia ailia mai akwala ma ro wane nia ne toleda keki ofu, ma ka falea sukwaia ma inotoa ifada fafia spirit taa ki sui bana, bia uria faamaruki lana mataia ki. 2Ma nia ka arasida kau uria ṉata la sulia tooa tha God, ma faamaruki lana toa matai ki. 3Ma nia ka soree isada, Musi ṉalia ta si do uria laea kamulua, ta kubau mado ta wai ka ai, mado berede, mado malefo; ma musi tooni ana ro tooni ki. 4Ma atona bana ta biu na muki kotho iei, muki to i kula eri, ma muki too i kula eri muki lae. 5Ma ni tei bana na kai lalakwee thathagoni kamulua, si maṉa na muki lae faisia toaa susu eri, muki tagaraṉai nia gegeona theegano faisia lofo aemulua ana faamamane la suli kera. 6Ma keka lae nada, ma keka tatha i la toaa faekwa ki, keka ṉata sulia si faaroṉoa lea, ma keka kwaifaamaruki asi kula eki sui boo.
7Ma tha Heroda ṉa kiṉa e roṉoa si do eki sui bana na nia e ilia: ma manatana ka nai rua, uria tei toa kera sorea na tha Jone e tatae faisia toa mae ki; 8Ma tei toa kera sorea na tha Elaeja e fula fatai mai; ma tei toa lau kera sorea tee wane ana porofeta inao ki mai e tatae lau. 9Ma tha Heroda ka sorea, Tha Jone nau ku sigilia naa gwauna: ma ni tei nai nia, na nau ku roṉoa si do una eki suli nia? Ma nia ka rofe uria riki lana.
10Ma aposela eki, si maṉa na kera oli mai, keka faaroṉo nia asi do eki sui na kera ilia. Ma nia ka talai kera, keka lae talitoodalua uria fanua kwasi ana tee toaa susu na kera alaṉia ana Betheseida: 11Ma toa eki si maṉa na kera thaitoomana keka lae iburiana: ma nia ka thathagonida, ma ka ṉata isada sulia tooa tha God, ma ka faamarukia toa na kera rofea faamaruki lada. 12Ma si maṉa na thato kai abalili naa, akwala ma ro wane eki keka fula, keka soree isana, Arasia kau malului wane nai, fasi keki lae uria toaa faekwa ki ma fanua kakali ki mai, keki teo si mada iei, ma keka ṉalia ada tei faṉa: uria na kulu ni kunei la fanua kwasi. 13Ma nia ka soree isada, Kamulua muki fale iada. Ma keka sorea, Kamilia e ai lau ta do, talitoona lima fa bisikete ma ro gwa ia mili alua; mado e ai miki lae, mika usia faṉa ifana toa nei ki sui boo. 14Uria adalua fuliṉana lima tooni wane. Ma nia ka soree isana toa nia ne toleda, Muki adea keki teoreri ana ofu la ki, fuliṉana too lima akwala ki. 15Ma keka ilia boo, keka adea kera sui boo keka teoreri. 16Sui nia ka ṉalia lima bisikete eki bia ro gwa ia eki, ma ka lio alaa uri thalo, ka foa uria fufuṉu, sui ka oea; ma ka falea ifana toa ne toleda keka alua inaofana malului wane eki. 17Ma kera faṉa, ma kera sui boo keka abusu: ma kera gwea oretana faṉa ne teo iada, tee tafulu nanado ma ro nanado.
18Ma lalae mai, si maṉa nia kai foa banitei, toa nia ne toleda kera to bi nia: ma nia ka soetooda, ka una eri, Toa eki keki sorea nau ni tei? 19Kera luua, keka sorea, Wane ni babataesi na tha Jone; ma tei toa lau keka sorea, tha Elaeja; ma tei toa lau kera sorea, tee wane ana porofeta inao ki mai e tatae lau. 20Nia ka soree isada, Ma ni kamulua muki sorea nau ni tei? Tha Pita e luua, ka sorea, Ṉa Christ tha God. 21Ma nia ṉata fifi isada, ka faaroṉoda kesi faaroṉo asi do eri isata wane; 22Ka una eri, Kaluwane imole kai to ana taa la oro ki e ai si ei boo, ma ulunao ki bia wane inoto ni foa ki bia wane ni kekeda ki keki lalakwatania, ma keka thau ṉi nia, ma nia kai tatae ana ula fa boṉi. 23Ma nia ka soree isadalua sui, Mada sa ta wane kai thathamii lae iburiaku, nia kai sorea nia dora ani nia i talaana, kai ṉalia ’ai rarafolo nia ta fa boṉi si ei, ma kai lae iburiaku. 24Uria ni tei bana ne thathamia kai faamarukia maṉona, maṉona kai aana; ma ni tei bana na kai faaaana maṉona inunufaku, nia boo kai faamarukia. 25Uria na si ta na ta wane kai ṉalia ana adomi lana, mada sa nia kai toda fanua nei iano ni sui bana, ma kei faaaana mado kai dolaṉai nia i talaana? 26Uria ni tei bana na kai seenoni suli nau ma sulia bae laku, Kaluwane imole kai seenoni lau boo suli nia, si maṉa na nia kai lae mai ana inotoa nia i talaana, ma inotoa ṉa Maka, ma angel abu ki. 27Ma nau ku faaroṉo kamulua e mamana, Tei wane keki to bada ana toa na keki takwe kunei, ne ai dodoloa keki thaitoomana maea, keki rikia tooa tha God, sui keka bii mae.
28Ma lalae mai fuliṉana kwalu fa boṉi iburiana si ṉata eki, nia ka talaia tha Pita ma tha Jone ma tha Jemesi bi nia, ma ka tae uri tolo kai foa. 29Ma si maṉa nia kai foa, seena maana ka eeta naa, ma tooni nia ka kwakwaoa, ka faarora maada. 30Ma rikia fasi, ro nonii wane keko ṉata bi nia, na tha Mosesi ma tha Elaeja; 31Ro wane na kero fula fatai mai ana inotoa, ma keko ṉata sulia mae lana na nia kai ilia ka sui i Jerusalema. 32Ma tha Pita ma ro wane na kero ni bi nia keka kulua ana biṉa la: ma lalae kera tharai lea naa, keka rikia inotoa nia, ma ro wane na keko takwe bi nia. 33Ma lalae mai, si maṉa keko lae nadaroa faisi nia, tha Pita ka soree isatha Jesus, Wane Inoto ae, e lea iakulua kuki to kunei: ma miki kasia ulu ooba ki; ta do ifamu, ta do ifatha Mosesi, ma ta do ifatha Elaeja: e ai si thaitoomana bana si do nia sorea. 34Si maṉa nia kai sorea si do eki, si datha e lae mai, ka nunufida: ma keka mau si maṉa na kera kotho i la datha. 35Ma liṉana si ṉata la e too mai la datha eri ka lae mai, ka una eri, Kaluwane liliothaua nau fu nia: muki roṉoa ṉata lana. 36Ma iburiana liṉana ṉata la, kera rikia tha Jesus talitoona. Ma keka bona bada, ma kesi faaroṉoa ta wane afa boṉi eki ata si ana do eki na kera rikia.
37Ma lalae mai, afa boṉi iburiana, si maṉa na kera sifo naa faisia gwa tolo eri, toa oro keka toda ani nia. 38Ma rikia fasi, ta wane ana toa eki e ’ai, ka una eri, Wane ni kwaifamanatai ae, ku ṉata kwaitakoi isamu oki lio uria kaluwane nau; uria ni nia tee fa wela nau eri bonaa: 39Ma lio fasi, spirit kai thauṉi nia, ma nia ka ’ai fatonada; ma do eri ka logetai nia nia ka botofufuru, ka thaumala iana, ka fi nia si maṉa na kai lae faisi nia. 40Ma nau ku ṉaṉata kwaitakoi isana toa oe noki toleda sa keka arasia; ma keka dora ana ili lana. 41Ma tha Jesus e luua, ka sorea, Kamulua unii wane na musi fitoo ma muka lae eeta, ta fita fa boṉi lau kwai to isamulua, ma kwa doanita iamulua? talaia mai kaluwane oe kunei. 42Ma si maṉa nia kai lae u mai, spirit taa eri ka u ania, ma ka logetai nia. Ma tha Jesus ka sorea spirit taa eri, ma ka faamarukia wela eri, ma ka oli fafi nia isana maka nia. 43Ma kera sui kera tona ana inotoa baita tha God.
Ma si maṉa na toa eki sui bana keka kwele bada asi do eki sui boo na tha Jesus e ilia, nia ka soree isana toa nia ne toleda, 44Muki alua si ṉata eki i aliṉamulua: uria na Kaluwane imole toto keki falea i abana imole ki. 45Ma kera kesi thaitoomana maalutana si ṉata eri, ma kera thaufunia faisida, fasi kesi thaitoomana: ma keka mau ana soetoona lana uria si ṉata eri.
46Sui oli susuu la ka fula i maalutada, sulia ni tei iada kai baita ka tatha. 47Ma tha Jesus, uria ne thaitoomana si lio ni manatada, ka tolea tee kali wela, ka alua i ninimana, 48Ma ka soree isada, Ni tei bana na kai thathagonia kali wela nei ana thataku kai thathagoni nau: ma ni tei bana na kai thathagoni nau kai thathagoni nia ne arasi nau mai: uria na wane ne faekwa asia i maalutamulua, nia ana kai baita.
49Ma tha Jone e luua, ka sorea, Wane Inoto ae, kamilia mili rikia tee wane kai arasia spirit taa ki ana thatamu; ma mika lufia, uria ne ai si lae iburiamilia. 50Ma tha Jesus ka soree isana, Musi lufia: uria na wane ne ai si firu bi kulu kai adomi kulu.
51Ma lalae mai, si maṉa na fa boṉi eki karaṉia kai fula naa fasi keki tae fafi nia, nia ka alu ṉado ana maana kai lae uri Jerusalema, 52Ma ka arasia wane ni ṉaliṉata ki inaona maana: ma keka lae, keka fula i la toaa faekwa toa i Sameria, fasi keki ra asi do ki maasi nia. 53Ma kesi thathagoni nia, uria na maana e ’uria sa nia kai lae uri Jerusalema. 54Ma si maṉa na ro wane nia ki ne toleda, tha Jemesi ma tha Jone, kero rikia, keko sorea, Lord ae, o thathamia meki sorea era kai sifo mai faisia thalo lo, kai faafunuida, ’uria lau boo tha Elaeja e ilia? 55Ma nia akele, ka soreda, ma ka sorea, Mosi thaitoomana manatana Spirit na kai too ani kamaroa. 56Uria na Kaluwane imole e ai si fula uria labatai lana maṉona imole; e fula uria faamaruki lana. Ma keka lae nada uria ta toaa faekwa lau.
57Ma lalae mai, si maṉa na keki lae sula tale, tee nonii wane ka soree isana, Lord, kwai lae iburiamu atona bana si kula noki lae uria. 58Ma tha Jesus ka soree isana, Fokisi ki adalua malau ki, ma thaaro nei mamatalea ki adalua nui ki; ma Kaluwane imole e ai ana ta si kula fasi ka reriṉania gwauna iei. 59Ma nia ka soree isata wane lau, Lae mai iburiaku. Ma nia ka sorea, Lord, alamatai nau kwai lae kwai alua fasi maka nau inao. 60Tha Jesus ka soree isana, Oki akwasia toa mae ki keka alua wane kera ne mae; ma oko lae oko faaroṉo faladoa ana tooa tha God. 61Ma tee wane lau ka sorea, Lord, nau kwai lae iburiamu; sui oki alamatai nau kwai lae totonao kwai alulu ana toa nai biu nau. 62Ma tha Jesus ka soree isana, E ai ta wane, ne alua naa abana isana do ni ra, ma ka lio buri, si farana tooa tha God.
હાલમાં પસંદ કરેલ:
Luke 9: MLU1949
Highlight
શેર કરો
નકલ કરો
Want to have your highlights saved across all your devices? Sign up or sign in
British and Foreign Bible Society 1949, 1951
