Rut 1
1
Elimeleke room muda ois aldeia Belem rae Israel la ni Moabe
1-2Muna faklau ba nei hei daot ni rae Israel, teor ubu room fe ukun roo Israel.
Ni tempu la-ura, nei roo iid gala Elimeleke. Ura Efrata ana, ois aldeia Belem ni rejiaun Juda. Ura ni hina gala Noemi.#1:1-2 Ni teor Ebreu, gala Elimeleke signifika "Nai fe Daot" nor gala Noemi signifika "hua-lala seneda". Room nei ana maen ubu ruu, gala Malon nor Kilion.
Ni tempu la-ura meit, rae beil tuu ni rejiaun Juda. Ura fe Elimeleke room fois telo room aldeia, oid la hela hurhuur ni rae Moabe, ni soloog Jordaun ni seri la leol sae. 3Mahee ni la-ura Elimeleke maet, fois bael ni hina nor ni ana room mesa. 4Ni fonori maa, room haah hiin ois rae Moabe. Malon haah hiin iid gala Rut. I Kilion haah hiin iid gala Orpa. Mahee arfiil room hela ni la-ura kal man toon saguul soub, 5Noemi ni ana maen ubu ruu meit maet telo. Room maet fois bael room ina mesa: ba nei maen iid, ba nei ana, i ba nei bei-ana.
Noemi nor Rut suil siil la Belem
6Arfiil Noemi hii hela bael ni rae Moabe, ura fliik dega, "NAI Maromak anoin Ura ni artuub ni rejiaun Juda, i ni la-ura nei siil namaa soub." Deislaa Noemi nor ni hiin heu ubu ruu teut namhati naa fois rae Moabe oid suil siil la Noemi ni hela hati muna. 7I Noemi nor ni hiin heu ubu ruu to fois bael ni hela hati ni rae Moabe, oid suil siil la rejiaun Juda.
8Mahee arfiil room lolai soub, Noemi tafaar la ni hiin heu ubu ruu dega, "Manuri lea! Kerkoed faklau iim ubu ruu suil siil la iim ina room lea. Deislaa iim atuud soub iim hua-lala kode la au ana baefe maet soub, nor meit ma au. Ura fe au tuug la NAI Maromak oid atuud meit Ni hua-lala kode la iim. 9Oid NAI Maromak nee la iim iid-ida maen selu baefe hua-lala kode, manura iim leob mori nor seneda." I Noemi muma room ubu ruu, i room meit sero makaas.
10Mahee room ubu ruu ataan, "Tais, au kai! Aem akar toom iit lea, oid la mori futu nor iit artuub room."
11Mahee Noemi ataan, "Au ana dobe room! Iim suil lea soub! Ba nei tubu kiid, se iim toom au. Au mai soub, au hii ba eot deis ana maen oid ada-airuu kaben nor iim. 12Fedu manura iim ubu ruu man au ana rasik soub, mahee kode faklau iim suil lea. Deislaa au mai soub, manura iim ba leob anoin au hii lai siil maen. Au rasik ba anoin iid ura soub. Se ni hoda uri, au lai maen i eot ana maen seer deis, iim anoin sabiid? 13Iim anoin iim naa ganaan aan sergaa raat tuu i kaben nor room, ka? Tais! Be fun la iim ba ganaan deis, depois iim kaben muun nor roo selu. Ura susar, doloo ka tais? Mahee au hua-lala muit nor felu faklau iim ni. Deislaa au anoin NAI Maromak rasik fe kastigu au. Kerkoed iim balikan toom deis au."
14Toom ma room ubu teul sero makaas deis loi. I Orpa muma ni kai i toil oid suil. Mahee Rut koof tama ni kai.
15Noemi dega la ura, "Fei la! Orpa suil soub la ni artuub room nor suil la ni luli room. Mansaba fe o ba suil futu nor ura?"
16Mahee Rut ataan,
"Baleob bruis, au kai ba leob ruu au suil.
I au kai ba leob obriga au fois bael au kai mesa.
Deislaa au akar mori toom manhati nor au kai.
Au kai la ni bae, au meit la ni la-ura.
Au kai hela ni bae, au meit hela ni la-ura.
Au kai ni artuub hii sai meit au artuub.
I au kai ni Maromak hii sai meit au Maromak.
17Ada-airu au kai maet ni bae, au meit maet ni la-ura.
Roo tan au kai ni bae, roo tan meit au ni la-ura.
NAI Maromak leob kastigu au,
se au keet lolo ois au kai.
So maet lea man leob hae iit ruu."
18Arfiil Noemi fei Rut akar tus-tuus toom ura, ura ba kase deis.
19I room ubu ruu lolai manhati raat ni aldeia Belem.
Arfiil hiin ubu ruu too raat ni la-ura, roo meit heleeh nor room. Hiin room ni aldeia too tuug la loor oid dega, "La-ura kai Noemi, ka?"
20Mahee ura ataan la room dega,
"Iim ba leob haah deis au Noemi,
deis gala Noemi dega 'hua-lala seneda'.
Kerkoed iim haah au Mara
deis gala Mara dega 'hua-lala felu'.
Deis NAI Maromak baefe forsa tus-tuus fun soub au mori sai felu tus-tuus.
21Muna, au sai ois uri,
au lima benu, nei au mane nor ana ruu.
Mahee agora NAI Maromak oid au suil,
nor lima mamu.
Deis mansaba iim haah au 'Noemi',
se NAI Maromak kastigu au?
Deis Ura fe forsa tus-tuus.
I Ura fe ruu susar ma au."
22Iid uri fe istori arfiil Noemi suil ois rae Moabe nor ni hiin heu Rut, roo Moabe too. Room ubu ruu raat ni Belem, natoon ni tempu doo trigu.
હાલમાં પસંદ કરેલ:
Rut 1: BMGM
Highlight
શેર કરો
નકલ કરો
Want to have your highlights saved across all your devices? Sign up or sign in
© 2023 Wycliffe Bible Translators Inc