San Lucas 22
22
Muquen la xchapic te ya stsaquic te Jesuse
(Mt 26.1-5,14-16; Mr 14.1-2,10-11; Jn 11.45-53)
1Nopolix yorail a te q'uin Pascua#Ex 12.1-27; Dt 16.1-8. sbiil te ya swe'ic wajetic te ma ba yich'oj levadurae. 2Te jwolwanej-sacerdoteetic soc te jts'ibojometique, yacalic ta sleel ta muquen te bit'il ya xju' ya smilic te Jesuse, yu'un ja' ya xi'ic te lume.
3Ja'uc me to, och Satanás ta yo'tan te Judas te Iscariote yan sbiile, te ja' jtul ta slajchaytululic te jnopojeletique. 4Ba sc'opon te jwolwanej-sacerdoteetic soc te jwolwanejetic yu'un te jcanan-temploe, ba yalbey yaiyic te bit'il ya xju' ya yac'bey ta sc'abic te Jesuse. 5Bin nax yo'tanic yu'un, soc la xchapic te ya yac'beyic taq'uin. 6Lec la yaiy te Judase. Jich jajch' sle te bi ora ya xju' ya yac'bey ta sc'abic ta bay ma xyaiyic stojol te lume.
Xjajch'ibal te Xch'ul Mesa yu'un te Cajwaltic
(Mt 26.17-29; Mr 14.12-25; Jn 13.21-30; 1 Co 11.23-26)
7Ta yorail te q'uin te ja' ya swe'ic a te waj te ma'yuc levadura yich'oje, la sta sc'aalelal te ya smilic te alal chij swenta Pascua. 8Jich te Jesús la sticun bael te Pedro soc te Juane. Jich la yalbey:
—Baan chajbanbotic te we'elil swenta q'uin Pascua —xi'.
9La sjojc'obeyic:
—¿Banti ya ac'an ya jchajbantic? —xiic.
10La yal te Jesuse:
—Te c'alal ya x'ochex bael ta muc'ul lum, tey me ya awilic jtul winic te xcuchoj sq'uib ta beele. Ts'aclinaic bael ta banti nail ya x'oche. 11Jich me xawalbeyic te yajwal nae: “La yal tel te Maestroe: ‘¿Banti ay te jtsal ana ta bay ya xwe'on soc te jnopojeletic cu'un ta swenta te q'uin Pascuae?’ xi' me,” ya me awutic. 12Jich me ya yac'beyex awilic jun muc'ul jtsal na ta bay xcha'cajal te chajbanbilixe. Tey me xachajbanic a te jwe'eltique —xi'.
13Bajt'ic, jich c'o staic te bit'il albotic yu'un te Jesuse. Tey la xchajbanic a te we'elil swenta q'uin Pascua.
14C'alal la sta yorail te we'ele, te Jesús la snajc'an sba ta mesa soc te jpuc-c'opetic yu'une. 15Jich la yal te Jesuse:
—Ayix c'aal te bayal sc'anoj co'tan te ya joinex ta we'el swenta in q'uin Pascua to te ma to xc'ax jwocole. 16Ya calbeyex, te ma ba ya jwe' xan ta yan buelta, ja' to c'alal ya xc'ot ta pasel ta ba ay ta ajwalinel te Diose —xi' te Jesuse.
17Soc la stsac ta sc'ab te vasoe, la yalbey wocol Dios yu'un. Soc la yalbey te jnopojeletique:
—Ila, melaic ta uch'el ta apisilic. 18Ya calbeyex, ta ora bael to ma ba ya cuch'ix te ya'lel ts'usube, ja' to teme tal ta ajwalinel te Diose —xi'.
19Soc la stsac ta sc'ab te waje. La yalbey wocol Dios yu'un. La xet' soc la yac'bey te jnopojeletique. Jich la yal:
—Ja' jbaq'uetal in to, [te ya cac' ta lajel ta awentaic. Jich me xapasulayic swenta jna'jibal awu'unic —xi'.
20Ja' nanix jich la spas soc te vaso te c'alal lajix yo'tanic ta we'el. Jich la yal:
—Ja' in ya'lel ts'usub to, ja' te jch'ich'el te ya yich' malel ta awentaic, yu'un jich ay yip ya xc'ot a te yach'il tratoe.#Jer 31.31-34.]
21“Ja'uc me to, te winic te ya yac'on ta c'abale, pajal ay jc'ab ta we'el soc ta mesa.#Sal 41.9. 22Melel te Nich'anile puersa ya xc'ot ta pasel jich te bit'il albil sc'oplale. Ja'uc me to, ¡ya me yil swocol te winic te ya x'ac'awan ta c'abale! —xi' te Jesuse.
23Jich caj sjojc'obey sbaic te mach'a a te ya x'ac'awan ta c'abale.
Te mach'a muc' sc'oplal ya xc'ote
24Te jnopojeletique, jajch' stij sbaic ta c'op yu'un te mach'a muc' ya xc'ot yu'unic ta spisilique.#Mt 18.1; Mr 9.34; Lc 9.46. 25Ja'uc me to, jich albotic yu'un te Jesuse:
—Te muc' ajwaliletic ta balumilal, tulan ya yac' sbaic ta stojol te lume.#Mt 20.25-27; Mr 10.42-44. In te mach'atic tulan yat'el yich'ojic ta stojol te lume, “Bayal yutsil yo'tanic”, xi' sc'oplalic yu'un te slumale. 26Ma me jichuc xapasic te ja'exe. Te mach'a ya sc'an muc' sc'oplal ya xc'ot ta awolilique, jich me ac'a yac' sba te bit'il mach'a ma'yuc sc'oplal xujt'uque. In te mach'a ya xmandalaje, jich me ac'a yac' sba te bit'il abate.#Mt 23.11; Mr 9.35. 27¿Mach'a me ya awaiy te cajal sc'oplale? ¿Ja' bal te mach'a ya snajc'an sba ta we'el ta mesae, o ja' te mach'a ya sc'ases te we'elile? ¿Ma bal ja'uc te mach'a nacal ta mesae? Te jo'one jich ayon ta awolilic te bit'il jc'asesej-we'elile.#Mt 20.28; Mr 10.45; Jn 13.12-15.
28“Te ja'exe spisil ora ayex ta jts'eel te c'alal ayon ta woclajele. 29Jich yu'un te jo'one ya me cac'beyex awat'elic ta ajwalil jich nix te bit'il yac'ojbon cat'el ta ajwalil te Jtate. 30Jich me ya xwe'ex soc ya x'uch'ajex ta jmesa te c'alal ayonix ta ajwalinel te jo'one. Ya me xnajc'ajex ta bay muc'ul nactijibaletic ta chajbanwanej ta stojol te lajchaychajp israeletique.#Mt 19.28.
Jesús la yal te ya xmucot ta yo'tan te Pedroe
(Mt 26.31-35; Mr 14.27-31; Jn 13.36-38)
31“Simón, Simón, aiya awaiy stojol. C'anbilatix yu'un te Satanase, yu'un ya xchijch'anat jich bit'il trigo. 32Ja'uc me to, la jc'anbeyix Dios te ma ba jc'axel ya xch'ay xch'uunjel awo'tan ta jtojole. Te c'alal la asujt'esix awo'tan ta jtojole, ac'beya me yip yo'tanic uuc te awermanotaque —xi'.
33La yal te Simone:
—Cajwal, jun co'tan ya joinat ta chuquel soc ta lajel —xi'.
34Te Jesús la yalbey:
—Pedro, ya calbat awaiy, te ma to x'oc' mut yo'tic a, te ya amucon ta awo'tan oxeb buelta te ya awal te ma x'ana'bon jbae —xi'.
Yorailix te yiljibal yo'tanique
35Te Jesús la sjojc'obey te jnopojeletique:
—Te c'alal la jticunex bael, te ma ba la awich'ic yawil ataq'uinic, abolsaic, axanabic,#Mt 10.9-10; Mr 6.8-9; Lc 9.3; 10.4. ¿ay bal falta la awaiyic? —xi'.
—Ma'yuc —xiic.
36La yal te Jesuse:
—Yan ta ora to, teme ay ataq'uinique, ich'aic bael, soc uuc teme ay abolsaique. Te mach'a ma'yuc spuñal, ac'a xchon te sc'u'e, ac'a sman spuñal a. 37Ya calbeyex te puersa ya xc'ot ta pasel te bila ts'ibubil jilel ta bay Sjun te Diose: “La sjoin ta ajtayel te jmulawiletique”,#Is 53.12. te xie. Ya me xc'ot ta pasel spisil te bit'il ts'ibubil jilel jc'oplale —xi' te Jesuse.
38La yal te jnopojeletique:
—Cajwal, ilawil, ay quich'ojtic cheb puñal —xiic.
La yal te Jesuse:
—Tic' a me to —xi'.
Jesús la sc'opon Dios ta Getsemaní
(Mt 26.36-46; Mr 14.32-42)
39Jich loc' bael te Jesuse. Bajt' ta bay Wits Olivailtic, jich te bit'il c'aem ta spasele. Joinot bael yu'un te jnopojeletique. 40Te c'alal c'ot tey a te banti bajt'ique, jich la yalbey:
—C'oponaic Dios, swenta yu'un ma ba ya xyalex ta mulil yu'un te il-o'tantayel yu'un te pucuje —xi'.
41Bajt' xan jich spimil te bit'il ya jch'ojtic bael te tone. Tey la squejan sba ta sc'oponel Dios a. 42Jich la yal:
—Jtat, teme ya sc'an awo'tane, ya xju' ya aq'uejbon bael in woclajel to, ja'uc me to, ma me ja'uc ya jpas te sc'anjel co'tane. Ja' me ya jpas te sc'anjel awo'tane —xi'.
[ 43Ta ch'ulchan chicnaj tel ch'ul abat te tal yac'bey yip yo'tane. 44Te bit'il bayal ay ta woclajel te yo'tane, la yac' xan puersa ta sc'oponel te Diose. Te xchiq'ue ja' pajal soc ch'ich' te xt'ulajan coel ta lume.]
45Te bit'il laj yo'tan ta sc'oponel te Diose, tejc'aj jajch'el. Tal ta bay te jnopojeletic yu'une. Wayajtiquix yu'un mel-o'tan la sta. 46Jich la yalbey yaiyic:
—¿Bistuc te wayexe? Jajch'anic, c'oponaic Dios, swenta yu'un ma ba ya xyalex yu'un te yiljibal awo'tanique —xi' te Jesuse.
La xchuquic bael te Jesuse
(Mt 26.47-56; Mr 14.43-50; Jn 18.2-11)
47Yac to ta c'op a te Jesús, tal tsobol ants-winiquetic. Ja' neel tel yu'unic te Judas sbiil te jtul ta slajchaytulul te jnopojeletique. Noptsaj tel ta bay te Jesuse, soc la sbujts'iy. 48Te Jesús la yalbey:
—Judas, ¿swenta bal bujts'iyel te ya awac' ta c'abal te Nich'anile? —xi'.
49Te sjo'tac te Jesuse la yilic te bila yac ta c'oel ta pasel ta stojole. Jich la sjojc'obeyic:
—Cajwal, ¿ya bal cac'beytic puñal? —xiic.
50Ay jtul ta spisilic te la sbojbey loq'uel swa'el xchiquin te yabat te muc' sacerdotee. 51Jich la yal te Jesuse:
—¡Coma aba! ¡Tiq'uix a! —la yut.
Soc la spicbey xchiquin te abate, jich lecub. 52Soc la sc'opon te mach'atic talemic ta jtsacawaneje, ja' bi ja' te jwolwanej-sacerdoteetic, soc te jwolwanejetic yu'un te jcanan-temploe soc te principaletique. Jich la yal:
—¿Yu'un bal j'elec'on te tal atsaconic soc apuñalic soc ate'ic? 53Melel jujun c'aal la joinex ta templo.#Lc 19.47; 21.37. Ma ba yal ac'abic ta jtojol. Ja'uc me to, la staix yorail te ya xju' awu'unic soc yip te ijc' q'uinale —xi' te Jesuse.
Pedro la smuc ta yo'tan te bit'il ya sna'bey sba te Jesuse
(Mt 26.57-58,69-75; Mr 14.53-54,66-72; Jn 18.12-18,25-27)
54Jich la stsaquic te Jesuse, soc la yiq'uic bael ta bay sna te muc' sacerdotee. Te Pedro nam ts'ajc' la yil bael. 55Te jtsacwanejetique la snup'ic c'ajc' ta bay yolil yamac'ul sna te muc' sacerdote soc la snajc'an sbaic ta sc'atinel. In te Pedro la sjoin ta naclej uuc. 56Ay jtul criada te ilot yu'un te nacal ta sc'atinel c'ajc' tey a. Naliybot sit yu'un. Jich la yal:
—In winic to, ja' sjoy sba soc uuc te mach'a chucule —xi'.
57Ja'uc me to, te Pedro la smuc ta yo'tan. Jich la yal:
—Me'tic, ma jna'bey sba te mach'a ya awale —la yut.
58Ta patil ilot xan yu'un jtul winic, te jich albot yu'une:
—Te ja'ate ja' jnopojelat yu'un uuc —xi'.
La yal te Pedroe:
—Tatic, ma jo'ocon —xi'.
59Ay niwan jun ora ta patil te ay mach'a albot xan sc'oplal yu'une:
—In winic to, puersa ja' sjoy sba soc, melel galilea-winic uuc —xi'.
60La yal te Pedroe:
—Tatic, ma jna' stojol te bila ya awale —la yut.
Yac to ta c'op a te oc' te mute. 61Te Cajwaltic la sujt'es sba ta yilel te Pedroe. Jich la sna' te Pedro te bila albilix yu'un te Cajwaltique: “Ma to x'oc' mut yo'tic a, te ya amucon ta awo'tan oxeb buelta”, te xie. 62Jich loc' bael. Bayal la yoq'uetay sba yu'un.
La slabanic te Jesuse
(Mt 26.67-68; Mr 14.65)
63Te winiquetic yacalic ta scanantayel te Jesuse, la slabanic soc la smajic. 64La smacbeyic sit ta pac'. La spac'beyic ta majel sit yelaw. Jich la sjojc'obeyic:
—Ala caiytic te mach'a la smajate —la yutic.
65Soc bayal to xan bila la yalbeyic ta swenta stoybac'optayel.
Tejc'anot Jesús ta stojol Muc'ul Tsoblej
(Mt 26.59-66; Mr 14.55-64; Jn 18.19-24)
66Ta sacubel q'uinal la stsob sbaic ta Muc'ul Tsoblej te principaletic yu'un te lume soc te jwolwanej-sacerdoteetic soc te jts'ibojometique. La yiq'uic tel ta stojolic te Jesuse. Jich la sjojc'obeyic:
67—Albotic caiytic: ¿ja'at bal te Cristoate? —la yutic.
La yal te Jesuse:
—Manchuc teme ya calbeyexe, ma yu'unuc ya ach'uunic. 68Soc teme ay bila ya jojc'obeyexe, ma yu'unuc ya asujt'esbonic, soc ma yu'unuc ya acoltayonic bael. 69Ja'uc me to, te Nich'anile, ya me snajc'an sba ta swa'el sc'ab te Dios te Spisil ya xju' yu'une —xi'.
70Spisilic la sjojc'obeyic:
—¿Yu'un bal ja'at Snich'anat te Diose? —la yutic.
La yal te Jesuse:
—Jichon te bit'il la awalique —xi'.
71La yalic ta spisilic:
—¿Bistuc xan yan testigoetic cu'untic? Melel la caiytiquix stojol te ja' nix la yal sba stuquele —xiic.
હાલમાં પસંદ કરેલ:
San Lucas 22: TZOXCH
Highlight
શેર કરો
નકલ કરો
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
