Johana 1

Ghore ya Umana

1Hambiri ya kuumbo urumengu, Ghore oluo, na Ghore oluwanyo na Mlungu, na Ghore oluo ni Mlungu mwenyi. 2Kufuma kudyowa Ghore oluwanyo na Mlungu. 3Vindu vose vanadeilo kwa iye, na sikweo na iye, kindu chingi sichideilo ichi chideilo. 4Amweni kwake koluo umana, nagho umana gholuo ni mlangazi ghwa wandu. 5Mlangazi ghwalangaza kizeni na kiza sichidimagha kughuisa.

6Koluo na mundu etumilo kufuma kwa Mlungu, na izina lyake ni Johana. 7Ojile kughorera wandu ighulu ya mlangazi, eri wandu wose wadumuse kwa iye. 8Iye seluo mlangazi, ela ojile kwa undu ghwa kughorera wandu gha mlangazi. 9Mlangazi wa fulo emlangazagha kila mundu, oluo ukujagha urumenguni.

10Naye Ghore oluo urumenguni, nagho urumengu ghodeilo kwa iye, ela urumengu sighomumanyile kungi. 11Ojile kele isanga lyake, nawo wandu wake siwamhokere kungi. 12Ela wose wamuhokere, wekedumusa kwa izina lyake, kawahawa udimo ghokala wana wa Mlungu. 13Awa wavelo, si kwa bighati hata si kwa kushaya kwa muli hata kwa kushaya kwa mdamu, ela wavelo kufuma kwa Mlungu.

14Naye Ghore kakala mdamu na kukalanya nesi, kejula mbazi na fulo; tikaona ubwaa ghwake, sa ubwaa ghwa Mwana mumojori afumile kwa Aba.

15Johana kamushuhudia, keghamba, “Uyu niye nimughorere kamba, ‘Ukujagha nyuma yangu aniisile imi, kwani oluo hambiri yangu.’”

16Na kufuma kwa ungi ghwa mbazi yake, itose tapata mbazi kwa mbazi. 17Kwani Sheria yanajile kufuma kwa Mlungu kwa ngila ya Musa; ela mbazi na fulo ikeja kwa ngila ya Jesu Kristo. 18Sikwesi mundungi amwonile Mlungu lyingi! Sala Mwana Mwenyi uyu ewo lagaeni kwa Aba, niye amumanyisa.

Ushuhuda ghwa Johana Mubatizi

(Matayo 3:1-12; Marko 1:1-8; Luka 3:1-18)

19Nagho ughu nigho ushuhuda ghwa Johana, ilyi Wayahudi wemutumilile wakohani na Walawi kufuma Jerusalemu kumkotela, “Uwe nuwe ani?” 20Naye kaghora mwazi saleghile, “Imi simi Masihi ungi.” 21Nawo wakamkotela, “Nuwe ani? Nuwe Elija?” Naye kaghora, “Simi ungi.” Wakamkotela, “Ndamu nuwe tondolo?” Naye katumbulila, “Hata.” 22Nawo wakamuza, “Nuwe ani? Tighorere eri tiwahawe matumbulilo awa watitumile. Wakughora uwe mwenyi nuwe ani?” 23Naye kawatumbulila,

“Imi nimi lwaka lwa mundu mumoju ekemagha kireti,

‘Ghororeni ngila kwa undu ghwa Bwana.’

Selyi tondolo Isaya aghorire.”

24Nawo awa wandu wetumilo ni Wafarisayo. 25Nao wakamkotela, “Ndamu kudani ubatizagha, ikakala suwe ungi Masihi, ango Elija, ango tondolo?” 26Johana kawatumbulila, “Imi nabatiza na meji; ela uwo mumoju kimusi ghati yenyu simomumanyagha. 27Uyu ekujagha nyuma yangu, hata imi sifweni kufungula mkoa ghwa kilatu chake.” 28Agha ghose ghanadeikile Bethania, chambuko cha Jordani andu Johana eluo kebatizila.

Mwana wa ng'onzi wa Mlungu

29Ikesho lyake Johana kamwona Jesu kemjila, kaghora, “Loleni Mwana wa ng'onzi wa Mlungu, uyu efunyagha kaung'a za urumengu! 30Uyu niye neghorire, ‘Ukujagha mundu nyuma yangu aniisile imi, kwani oluo hambiri imi sevelo.’ 31Imi mwenyi semumanyile anduangi, ela kwa undu ghwake nanajile kubatiza kwa meji, eri amanyikane kwa wandu wa Israeli.”

32Nao Johana kamshuhudia keghamba, “Naona Roho keselela sa iringo kufuma mlunguni, na kukala ighulu yake. 33Imi mwenyi semumanyile kungi, ela uyu anitumile kubatiza kwa meji kanuza, ‘Uyu umwonagha Roho kemselelela na kumkalila ighulu, uyu niye ebatizagha kwa Roho wa Kuela!’ 34Nemi naona na kushuhudia kamba uyu ni Mwana wa Mlungu.”

Wairimi wa hambiri wa Jesu

35Ilyo ikesho lyake sena, Johana oluo kimusi na wairimi wake waili; 36naye aghenda amwona Jesu keita, kaghora “Loleni Mwana wa ng'onzi wa Mlungu.” 37Walye wairimi waili wasikila selyi aghorire, wakamwirima Jesu. 38Jesu kaghaluka na kuwaona wekemwirima, kawauza “Nini mwahada?” Nawo wakamuza, “Rabi” (kutambula kwake Mwalimu), “Wanakalagha hiyo?” 39Naye kawauza, “Njuuni muone.” Nao wakaghendanya wakaona andu akalagha; nawo wakasindanya naye msenya ghulya, kwani yeluo sa saa ikumi.

40Mumoju wa walye waili wamusikile Johana keghora na kumwirima, oluo Andrea wakwawe Simoni Petro. 41Naye kamhada Simoni wakwawe, kamuza, “Tamwona Masihi” (kutambula kwake Kristo). 42Naye kamghenza kwa Jesu. Jesu kamlola, na kumuza, “Uwe nuwe Simoni mwana wa Johana uitogho Kefa” (kutambula kwake Petro ango iwe)

Jesu kuwapang'a Filipo na Nathanieli

43Nao ilyo ikesho lyake Jesu kaghenda Galilaya. Naye kamwona Filipo na kumuza, “Niirime!” 44Naye Filipo oluo mundu wa kufuma Bethsaida, muzi ghwana Andrea na Petro. 45Filipo kamwona Nathanieli, kamuza, “Tamwona uyu awandiko ni Musa kele chuo cha Sheria na awandiko ni wana tondolo, Jesu wa Nazareti, mwana wa Josefu.” 46Nathanieli kamuza, “Yadimika kindu chingi chaloli kufuma Nazareti?” Filipo kamuza, “Njuu uone.” 47Jesu aghenda amwona Nathanieli keja, kaghora hung'u ighulu yake, “Mzighaneni, Mwisraeli wa fulo, Amweni kwake sikwesi ndimi ingi.” 48Nathanieli kamkotela, “Wanimanya ije?” Jesu kamuza, “Hambiri Filipo sekupang'ile, ngelo uwo isi ya mtini, Imi nekuonile.” 49Nathanieli kamtumbulila, “Mwalimu, Nuwe Mwana wa Mlungu, Nuwe Mzuri wa Israeli!” 50Jesu kamtumbulila kamuza, “Wadumusa kwa kukala nakuza, nekuonile isi ya mtini. Ujeona malagho mabwaa kuisa agha.” 51Naye kawauza, “Fulo namuza mujeona mlunguni kwafunukuka, na malaika wa Mlungu wekejoka na kuselela kwa Mwana wa Mdamu.”

હાલમાં પસંદ કરેલ:

Johana 1: SAGALLANT

Highlight

શેર કરો

નકલ કરો