M. Mattayo 21

1NAŴO akapanamile ku Yerusalemi nofwika ku Betefage, ku lupiri lwa Elaya, pamene apo Yesu etuma asambili aŵiri 2eŵauzya, Nkoyani ku munzi woteezyana namwe, lombalomba mukaŵone bulu womangiwa na mwana wake pamo naye: ŵamangululeni mze naŵo kwangu. 3Kati muntu akanena kantu kwanu mkati, Asikuru oŵasaka; ninga lomba pano apa aŵatumizye. 4Lomba ichi chitetyo kuti lisilizike ilo linenewa na muŵirizi uyo lakuti,

5Muuzyeni mwana mwanakazi wa ku Zioni,

Ŵona, Mfumu yako ikuza kwako,

Yosisikanya nokwera pali bulu,

Na pali kabulu kamwana ka nyama ya viya.

6Naŵo asambili echiyochita nga ni umo mwechiŵauzizya Yesu, 7ewera na bulu na mwana wake, eikapo minjira yaŵo pamulu paŵo; naye enkalapo. 8Nipo anyinji a mliumba ilo eyanzika minjira yaŵo pa njira; ŵambi esamvula misambo ya vimiti eiyanzika mula mnjira. 9Naŵo maumba ŵotangulila na aŵo ŵokonkerera ekuwa kuti, Hosanna ku mwana wa Davide. Woŵirikila ni uyo akuza mzina la Asikuru; Hosanna kumulu ngako. 10Naye akaloŵe mu Yerusalemi mzinda wonse wikafima mtima wichiti, Ni ŵani uyu? 11Maumba ŵala echiti, Uyu ni muŵirizi, Yesu, wa ku Nazarete wa mGalilaya.

12Nipo Yesu eloŵa mchipupilo cha Mlungu noŵakaŵizya kunja ŵonse aŵo ositisya na osita makweo mula mchipupilo, eŵang'onomola matebulu a aŵo osintanisya ndalama na vilimba vya aŵo ozisitisya nkunda; 13enena naŵo, Kwilembewa, Nanda yangu ize yoitiwa nanda yosengeramo, sembe mweo muichisya chikwe cha njivi. 14Echiza kwake mula mchipupilo ŵotulika menso na ŵopunduka mendo, naye eŵapozya. 15Sembe apo akuru a ansembe na alembi pechiviŵona vyozizwisya vyechichita, na ŵana ŵenzokuwa mchipupilo ŵenzekuti, Hosanna ku mwana wa Davide, echipya mitima 16echiti kwake, Mkumvwa kansi chamene chakunena aŵa? Naye Yesu eŵanenera, Inde: mkaliyopenda kansi, Kufumila mkanwa mwa malucheche na ŵonyonka mwiwamizyatu malumbo? 17Nipo eŵasiya efuma mu mzinda, echiya ku Betaniya eswako kulakwa.

18Lomba mmawa mwake penzowerera soti ku mzinda echimvwa njala. 19Lomba akaŵone chiku mmbali mwa njira echiya mwamene, efwanga muliye na kantu muli yeve, mwenze matepo ŵekaŵeka; enena naye, Chiku asatwalapo pali weo chitatikile lero mpaka maŵero. Nipo lomba pano apa chiku efota. 20Naŵo asambili akaŵone teti ezizwa echiti, Uyu chiku wafota syani maluŵilo? 21Yesu eyasuka enena naŵo, Lezee numuuzyani, Kati muŵe na mvwano ŵosakaikakaika, ntemti mchite ichi chachitika pali chiku cheka yai, sembe kati mzemti kuli ulu lupiri, Uuliwe nopozewa mu mmana, chize chichitiwe. 22Na vintu vyonse vimti mokonsha posenga kochetekera mze mvipokere.

23Nipo yeve akaloŵe mchipupilo akuru a ansembe na akaruakuru a ŵantu echiza kwake penzosambizya echiti, Muchita ivi na upinguzi wanji? soti ni ŵani empani upinguzi uyu? 24Naye Yesu eyasuka eŵanenera, Nane soti nimkonsheni lizu limo: mkaniuzya ili nane ninga nimuuzyeni upinguzi wotyani unuchitira nawo ivi vintu. 25Nga ubatizo ula wa Yohana wifumila kuni? ni kumulu kansi kano ku ŵantu? Naŵo ekonshana ŵekaŵeka echiti, Kati tititi, Ni kumulu, yeve aati kwasu, Nga pamuliyommvwila? 26Sembe kati tititi, Ni ku ŵantu, tuliyopa liumba; pakuti ŵonse omchisya Yohana ni muŵirizi. 27Naŵo emyasuka Yesu echiti, Situziŵa seo. Naye soti eŵanenera Kansi nane ntenimuuzyani upinguzi wotyani unuchitira nawo ivi vintu. 28Nga mweo mulinga tyani? Muntu enze na ŵana aŵiri; echiza ku wotatika echiti, Mwanawe, nkoya ukachite mulimo lero mmunda wa mipesya. 29Yeve eyasuka echiti, Ntenupangwa neo: sembe pavuli pake eliyarusya mtima echiya. 30Nipo echiza ku wakaŵiri enena tetila. Yeve eyasuka echiti, Nikuya, ŵata: naye aliyekuya. 31Ni yuni wa aŵa aŵiri echita chipangwilo cha awisi? Echiti, Ula wotatika. Yesu echiti kwaŵo, Lezee nunena namwe kuti amsonko ŵala na akachenche akumtangulilani kuloŵa mu ufumu wa Mlungu. 32Pakuti Yohana echiza kwanu mnjira ya chilungamo, namwe muliyommvwila: sembe amsonko ŵala na akachenche emmvwila: namwe pamene pemwichiŵona kuyarusya muliyoliyarusye mitima pavuli pake kuti mummvwile.

33Imvwani linganizyo liyakene: Enzepo muntu mwine wa ng'anda wamene ezikila munda wa mipesya, euzungulusya lusito, ekumbamo chokandiramo mvinyu, emanga ndala, euyapuzisya ku ŵolima na kuya ku charo chimbi. 34Naye ikafwikile nyengo yakupya etuma akapolo ŵake ku ŵolima ŵala kuyopokako vyotwala vyake. 35Naŵo ŵolima ŵala eula akapolo ŵake, umo emnyata, muyake empaya, muyake empozera myala. 36Soti etuma akapolo ŵambi anyinji kupula aŵo ŵoyamba: naŵo eŵachitila tetila. 37Sembe pavuli pake etuma mwana wake kuli ŵeve echiti, Akamlemekezye mwana wangu. 38Sembe ŵolima ŵala akamuŵone mwana enena ŵeka na ŵeka, Uyu ni mpyani; tiyeni natimpaye noula upyani wake. 39Naŵo emuula empoza kunja kwa munda nompaya. 40Nga uyo mwine wa munda wa mipesya akawera azachitenji ku ŵolima ŵala? 41Ŵeve emnenera, Azaŵacheneke chiŵichiŵi ŵantu ŵala ŵaŵi, nouyapuzisya munda ula ku ŵolima ŵambi amene ati azamuwezezye vyotwala pa nyengo zya vine. 42Yesu enena naŵo, Kansi mkaliye nopendamo mmalembo,

Mwala uyo wechikana aŵo omanga ng'anda,

Wamene uyo wichishiwa mutu wa mngondya:

Ichi chifuma kwa Asikuru,

Ni chozizwika mmenso ŵasu?

43Chifukwa chake ni panumuuzyani, Ufumu wa Mlungu uzolondewe kuli mweo nopewa ku mtundu upeleka vyotwala vya wine. 44Uyo ati azawe pa mwala uyu azanyenyekenyenyeke: sembe uyo uuti uzoponere uzomfuntulefuntule nga ni kafuche. 45Akuru a ansembe na Afarisayo apo pechimvwa malinganizyo ŵake eziŵa kuti onena ŵeve. 46Nipo pechisakomkata eŵayopa maumba, pakuti emchisya kuti ni muŵirizi.

હાલમાં પસંદ કરેલ:

M. Mattayo 21: MA23

Highlight

શેર કરો

નકલ કરો