Roca 24
24
Zeso nauatonirrari
Mateo 28.1-10; Maraco 16.1-8; Zouao 20.1-10
1Semana torrapomanicca uada taidecca domico izamassana amonerredenipe Zeso noccobiriuarri qquide rraui torranipomarraro. Aua marriconi marroni bica tarraro narroremanaporre narraro iaqquemanarraro. 2Bacco toquenezape qqui toquenanerre tonoccobiripe touaberre narraro. Siba imenipe parrimaraniuarrina uitterre narraro. 3Neza rraui torrezimeza qqui toquenaraha Zeso assirepa poza narrararrari. 4Nezape bodinideni uatomaneza: —Nerrecoma narrari? −quenarraro. Nanarra madirra pamaha eterorideni ssiuarra tarraro ponideni uinoriniza auatome-manarrari. 5Nezape cappinemananissa teza ponideni pitoniza rrassi, tocattezemana, namiza panonideni bacco tarraro. Narrarideni pamaha ponideniza uati toquenarrari: —Nerrecotoui Zeso qquide arriuarri rraui tirrarronarraro? Parra zoqquemanariui narraridenina pouadeni noccobiriza pozemana taui. Naraha Zesopa camittemaniza madiui −quenarrari. 6—Tibodideni uatomanirri. Zama arobeni Carireauarri timadimanapoza tiadeniza pocca uima uati uati nanarra napode. 7Poua attipa: “Ouape Madirra Bedi orrarraroa niza zotode madirra orraria oua ccaccorazapa uimasiri sseqquiri narrarideni zepedeniza orranitoui. Aua porimacossaniza oua inanazoqque-mananitoui. Oua ppa izemaneraha uada pama torrari neza onauatoninitoui” napode poua atti −quenarrari.
8Nezape Zeso atti bodinideni uatome-manarraro. 9Tonoccobiriuarri rrauiniza ozauarri bacco nanimanezape Zesocca zozosse tabaqqui 11 quenarrarideniza uima uati toquenarraro. Zesocca madirra motadeniza naqui uati narizemanarraro. 10Ponideni oninipe Maria Madarenauarricca, Zouana, Maria Tiaco imeni quenarraro. Amonerre onihideni naqui ponideniza carrimemanarraro. 11Naraha Zesocca zozosse tabaqqui uima mittemanazapa pouadeniza rriza tarraro, pina ponideni bodini tossamorrarossa narraro. Ponideni attiniza parrissa quena-rrararrari.
12Naraha Pedoropa nama naha Zeso noccobiriuarri rroppa tarrari. Bacco tazapa tonoccobiri bodiuarri tocattezima nanarra Zeso assire rrorrore naqqui eteroa pozerre nanira qqui tarrari. Nazapa Pedoro pocca ozauarri bodi uatoa toccanirrari.
Emao rrauiza
Maraco 16.12-13
13Narraro ssiuarraza Zeso uatimadedeni pamaha oza capamema narraro onini Emaouarri touedarrari. (Arri Zerozareza marri 3ʼza tiqquezape marri 6ʼza Emao bacco tinani.) 14Nazapa narrarideni pamaha narraro rraui touedarraria Zeso tauimari uauatiti zanaporrari, arri uima bazima mittemanarrari, arra pouadeni qqui toquenarraricca uima uauatiti zanaporrari. 15Rrauiza arrauarri uati arrauarri uati zanapomananarra Zeso naco pouadeniza bacco tazapa bazima rraui torrarrari. 16Narraripa Zeso pouaraha pouaza noccodeni rriza tarrari. 17Nazapa Zeso pouadeniza uati tarrari: —Nerreco uimara arriuarri uati arriuarri uati tizanapomanarraro rraui motta? −narrari. Nazapa ba nanarra panodeni tozaui narrari.
18Narrari madirra pamarrarideni orraria Creopa pouana Zesoza uati tarrari: —Tia naqui Zerozareuarri Pascoacca erretetoui timadiraha uima zati ssamo tinarraroqui? Arri Zerozarecca uima zati bazima nauatoqquiri ineraha tiaha ssamo tinani orrari tarrarorane? −narrari.
19—Naraha uimape nerrecoma narraro? −narrari Zeso. Naraha Creopa poua tesse tezerre uati toquenarrari: —Zeso Nazaretiuarricca pouaza uima inanemanarraro tauimarinipe arrima narraro: Pouapa Deo Atti cacomerarride rabote. Deocca dacoreherrine pocca marinarra bica tarraro. Deocca dacoreherrine canauatori canarizarrari naco bica tarrari. Madirra bazimaza, Deoza naco pocca uima bica tade. 20Naraha dada toqquimade taminedeni, ia zodeodeni icca taminedeni quenaza Zeso zoqqueuiuarrine rromanodeniza da iquenarrari. Pouadenina izauemanaui zotodepa aua porimacossaniza coba izanemanaza inanazoqque-manarrari. Nama inanemanade. 21Naraha Izarraeo potemaui zodeodeni iape icca zamaza iara imadiniuarrine arra “Zeso pouarrinena icca cacauehe torrapomaniuarrine” inarraro ibodiza. Naraha poua uatiauicca uadape rridapanape uadari 3 nani. 22Naraha iaza amonerre queriqquimanarrarodenirrine uarro icanirerraro. Ponidenipe ssiuarraricosseza Zeso cauauiuarri rraui torrarraro. 23Naraha poua assire qqui quena-rraraui. Nazama amonerredenipe rrauiniza uati nanimanarraro: “Deocca zozosse tabaqqui memeuarricca qqui inabaqquipa. Iaza attidenipa: ‘Zesopa nauatoniui’ quenaparra” quenarraro. 24Nazapa itesse pamaha touedarrari Zeso cauauiuarri. Pouadeni naco pina arri amonerre ponideni attinidenissa nehe qqui toquenaraha Zesopa qqui quena-rraraui −quenarrari Creopadeni.
25Nazapa Zeso uati tarrari: —A, tiadenipe ssamomo tinarraro! Deo Atti cacomeraqquiri narraridenicca marinarra dozo iquenerre narronaponi narraro nemanehe Deo Atti dozo naniza dozo naporraro titimittemana neraha nerrecotoui parrissa tiquenaniuarrine tibodideni narroqquiri nani? 26Deo Atti dozo naniza arrirraro uima auato tarraro: Narraroa arri madirra Tonassiuauade Cristo-Mesiatoui imadirraro ocasserani auauitoui, madirracca uaidirehe manaconi torrauiuarrine. Ocasserani aua-rraraza zoqque-rrarazapa Deocca deni torrehe pouaza auato-rreranitouiraha. Parrissa narrizoue imeni ocasserani auaza zoqquezapa nauatoniza Imehiuarri toccamacossanirrari. Nazapa pocca Abi Deo pocca deni torrehe pouaza inanarraro −narrari Zeso.
27Nazapa Deo Atti dozo nanicca pouadeni bodi uatome-manauiuarrine mari icanabaqquirrari Zeso. Taidepa Moizecca marinarraza Cristo-Mesia tauimari dozo naniza Zeso poua tauimari pouadeni mari icanabaqquirrari. Deo Atti cacomeraqquiri narraridenirrine poua tauimari dozo narronemanarraricca dozonirri naqui mari icanabaqquirrari.
28Oza capamema narraro Emao bacco toquenaza Creopadeniza Zeso attipa: —Rrehe, arriza tibomanarri. Ouape denima occani −narrari. Poua atti nama nazapa tossoniqquimauitouiraha 29Creopadenipa Zeso pouatoui quenaza pouaza uati toquenarrari: —Iaza tiboccarri. Marri toccaui, zomebote nani −quenarrari.
Nazapa pouadeniza iborrari Zeso. Pouadenizama ozaza toqquezimarrari. 30Nazapa rripemanauiuarrine rrassi tariza Zeso pao idiza Deoza uati tarrari: —Rrehe Abi Deo, tiaza etizerraro. Ticca danirri iaza bica tinanarrari, inarraro −narrari. Pao icanarobeza pouadeniza da inarizarrari. 31Nanarra noccodeni ssire-re naza Zeso rrizera nimananirrari. Naraha amazati amossi narrari. 32Nazapa pouadenira uati tocanirerrari: —Nerrecotoui pouapa rrauiza qqui inarronaraha inocco rriza tapa? Iaza uati uati narronaza Deo Atti dozo nani ia mari tocanabaqquiza ibodi etizepa −quenarrari.
33Nazapa uassinarra totememanaza Zerozareuarri touedanirrari. Bacco tanimanazapa Zesocca zozosse tabaqqui 11 quenarrarideni pouadeni tesse tezerre queriqquimanauiuarri touedezimarrari. 34Queriqquimanarraridenipa arra uedezimarrarideniza uati toquenaporrari: —Zesopa parrissa nauatonirrari! Simao attipa: “Qqui onaui” napa −quenarrari.
35Manaco Emaouarri touedarrarideni poccadeni uima uati nanimanarrari. Arra rrauiza Zeso pouadeniza uati uati zanaporraricca uima uati, ozaza Zeso pao icanarobeza pouadeniza da inarizaza noccodeni rrizera narrari naco uati toquenarrari.
Zesopa pocca zozosse tabaqquiza auatomarrari
Mateo 28.16-20; Maraco 16.14-18; Zouao 20.19-23
36Arra Zeso qqui toquenarraricca uima uimahaha canaraha naui nocconiza Zeso auatomarrari. Pouadeniza: —Nirra, ticappinemana-rrerarri. Deocca biquehera tiadeniza torrana −narrari Zeso.
37Naraha uarro quenaza bodidenipa: —Corime uitiderra! −quenaza cappinemanarrari. 38Naraha Zeso pouadeniza uati tarrari: —Nerrecotoui ticappinemanarraro? Nerrecotoui tibodideni tossamorraro, pina ouaza parrissa tiquerani naua? −narrari. 39—Rrari, ouamori qqui, ozepe qqui tiquenarri. Ouape oua. Ouime bara tiquenarri, nezana nauatoto tinaniuarrine. Arri icorimepe ime cappira, tone cappira naui neraha ouape ouime ocarri, otone ocarri nani qqui tiquenani −narrari Zeso. 40Nazapa poua zepe noue, poua amori noue narrari.
41Nazapa uatizemanaraha pouadeni bodipa: —Parrissa, Zeso nauatonirrarico? −quenarrari. Nazapa nauatoqquiri nauiuarrine Zeso pouadeniza uati tarrari: —Arriza orripaniuarrine ticarrimanaqui? −narrari.
42-43Nazapa pouaza aba ibanaui bobi da iquenaza pouadeni zepecca idizapa cattomama canaraha rriparrari. 44Nazapa pouadeniza uati tarrari: —Arri uima ouaza torrarrarope pina tiadeniza occarizaponi uati onaporrarossa narraro torrarraro. Narrarope Deo Atti dozo naponiccassa narraro. Arri Moize otauimari dozo inaporrarope narrarossa narraro. Deo Atti cacomeraqquiri narrarideni naco otauimari dozo iquenaporraro. Arrie rrirriridedeni naco otauimari dozo iquenaporraro. Narraro bazimape maittaccazama dozo iquenerre narronaponi narraro. Narrarossa narraro Deorrine ouaza torrarraro −narrari Zeso.
45Nazapa Deo Atti dozo naponicca mittemanauissa tauiuarrine bodideni acco icanabaqquirrari. 46Poua atti naco: —Rrehe, Deo Atti dozo nanizape otauimari. Narraroa arri madirra Idinide Cristo-Mesia quequenanarrari ccarronazapa ocasserani imeni inauananitoui. Madirra inanazoqque-manaza ppa izemanaraha uada 3 naza nauatoniuitoui. 47Narraro poua tauimari ecomerarize-manezape madirra bodideni cacarriqquimere-manauiuarrine naco uati toquenauitoui. Nazapa madirra pouadeni bodi cacarriqquimere-manaza: “Occa uimasiri onebona” quenazapa Deo poccadeni uimasiri peperri inananitoui. Narraro uima bicanipe madirra bazima mittarizemanauiuarrine Cristo-Mesiapa pocca zozosse tabaqqui mari narizemanauiuarrine zosse inarizabaqquiuitoui. Taidepa Zerozareza mari icanabaqquimanauitoui, zotodepa zama bazimaza maride rraui torrarizauitoui. Narrari Cristo-Mesiapa oua. Otauimari maridepa oua occa madirra zosse onabaqquiuiuarrine −narrari Zeso. 48—Nazama tiadeni occa zozosse tabaqqui tiquerrenarrarope oua Cristo-Mesia orrani nauatoqquiri tiquenani. Ozoqqueraha onauatonini parrissa tinoccodeniza qqui tiquenarraro. Nema nezape otauimari tecomerarizemanarri. 49Neraha taidepe Zerozareza timadimanaccarri. Niza occa Abi Deo uati taporrarissa narrari ouana tiadeniza zosse onaronauitoui. Narrari Deo Corimena tiadeniza torrarizauitoui. Pouapa Deo memeuarri madirraricca dacorehe tibodideniza inanarizanitoui. Nezana otauimari mari tarizemananiuarrine −narrari Zeso.
Zeso toccamacossanirrari
Maraco 16.19-20; Atos 1.9-11
50Nazapa Zeso poua uatimadedeni oza pananiza iaqquenabaqquirrari. Oza capamema narraro onini Betania touarriraniza domo uarrari. Nauiza poua uatimadedenitoui pocca Abi Deoza uati tarrari. Poua zepe memeuarri da tamacossaza: —Rrehe Abi, arrarrarideni tecauabaqquirro. Ticca biquehe pouadeniza tinanarizarri −narrari. 51Pouadenitoui Deoza uati uati tanarra toccamacossanirrari. Imehi Deo memeuarri iaccamacossanirrari. 52Nazapa poua uatimadedeni attidenipa: —A, Zesopa bica taui! Deni torraui! −quenarrari. Nazapa Zerozareuarri uatizemaneri tanimanarrari. 53Uarrirriraza Deoza dada toqquimauarri quequeriqquimana zanaporrari. Deoza uatizemanaza rriri rriri quenarrari. Poua Atti mimittemana narrari, Pouaza uati uati zazanapomana narrari.
હાલમાં પસંદ કરેલ:
Roca 24: KBNT
Highlight
શેર કરો
નકલ કરો
Want to have your highlights saved across all your devices? Sign up or sign in
2020 Impresso na Graafica da Biblia
