Zouao 3
3
Nicodemopa zome Zesoza ccauarrarrari
1Izarraeo potemaui zodeodeni zossede orraria onipa Nicodemo. Pouapa marinarra onini parizeoza rrehe narrari. 2Narraripa zomeraha Zesoza uati tauiuarrine ccarronarrari. Bacco narronazapa: —Mamaride, iape nauatoqquiri inapode. Tiape Deocca zossenirri ticcarronarraro madirra maride. Nauatoue pina arri ticcassa narrarope madirra Deo pouaza torrauissa tarrarina carrirrari. Pouaza Deo nouerazapa carri-rraraui −nade Nicodemo. 3Naraha Zeso Nicodemoza uati tarrari: —Parrissehera tiaza uati onana: Madirra Deocca cacaueheza torrauiuarrinepa tossonapomazana Deoza torrauitoui. Tossonapoma-rrarazapa Deocca cacaueheza torra-rrarauitoui –nade Zeso Nicodemoza.
4Naraha manaco Nicodemo uati tarrari Zesoza: —Madirra rradaui irreraha nerrecoma ineza pina erredeni inehe issonapomaniuarrine? Icca ami zauaniza ittizapomezape issonapoma taqui? −nade Nicodemo. 5Naraha manaco Zeso Nicodemoza uati tarrari: —Parrissehera tiaza uati onana: Madirra bodidenicca uimasiri touissorizezape madirra Deo Corimecca nauatonarraza toquerrenazapa Deocca cacaueheza toquerrenarrari. Naraha madirra nama quena-rrarazapa Deocca cacaueheza toquerrena-rraraui. 6Maqquiderre erredeni inauatorraripa madirra torrarrari. Naraha Deo Corimerrine nauatorraripa Poua Corime pouadeniza totorra narrari. Deo Corime pouadeniza torrarizazapa pina tossonapomarrarissa quena taui −nade. 7—Nazama tiaza uati onana. Ouattipe: Pina erredeni tossonezatissa tiquenapomarri onarrarozape uarro terrerarri. 8Deo Corimerrine madirra bodi zati torrezape pina rrorrodecca uimassa narraro. Rrorrodepe qqui inerrereraha rrorrode ponirrinina ahauato narraro. Rrorrodepe poni touini naniuarri tocca tani. Poni mouini naqui imitta tani. “Nerrecoma nanicca ccarronarraro?” teraha ssamo tinani. “Nerrecoma nani toccarraro?” ina tani. Deo Corimerrine madirra bodi nauatozati torraza naco qqui inarrararaha pocca madie zati torrani nauato inarraro −nade Zeso Nicodemoza.
9Naraha manaco Nicodemo Zesoza uati tapomarrari: —Narraro uimape nerrecoma narraro? −nade. 10Manaco Zeso poua cacomerade: —Tiape Izarraeo potemaui zodeodeni maride tirreraha narraro uima ssamo tinarraroqui? 11Parrissehera tiaza uati onana: Iape Deorrine madirra bodideni zati toquerrenaui nauatoqquiri inarraro. Arri madirracca madie zati torrani qqui inarraro naqui tiadeniza uati uati ihinaneraha timittemana-rrerarraro. 12Arri namicca icca madieccama tiadeni mari ocanabaqquiraha parrissa tiquenerrerani. Arri memeuarricca Deocca uima ponira tiadeniza uati oneza naqui parrissa tiquenerrerarrarorane −nade.
13—Nazama arra namicca madirra orrariapa memeuarri toccamacossarra canima-rraraui. Naraha arri Madirra Bedi orrarrarona ouape memeuarricca occaronarraro. 14Naza maittaranibote zama uamoni ssono carri, siba carri taniuarri icca madirra rrauirizapozapa Moize macca corime bronze inauatoza auaza que inanaui quenade. Madirrapa maccarrine rricauitouiraha macca corime que tauiuarri qqui quenazapa totocassiuauera narrari. Nazama arri Madirra Bedi orrarraroa oua naqui auaza oua que inanemanezape nema onanitoui −nade. 15—Nazama madirra bazima ouaza parrissa quenarraridenipa camittehe rriquerreranicca carrimana-zanapouiuarrine −nade Zeso.
Deo madirraza uati cauanari canarrari
16—Deopa madirraza uati cauanari canaui. Poua Bedi orrari naraha da inazapa bazima pouaza parrissa quenarraridenipa tocassiuauerauiuarrine. Camittehe rriquerreranicca naco carrimana-zanapouiuarrine. 17Deopa Poua Bedi madirra zauade zosse inarona-rrararrari. Madirra tonassiuauadera zosse inaronarrari −nade.
18—Nazama pouaza parrissa quenarraridenipa izauabaqqui-rrarauitoui. Naraha arra pouaza parrissa quena-rrararraridenicca uimape Deo Pouaza auato tarizaponi. Naraha Deo Attipa: “Occa erredeni ohorraride. Pouaza parrissa tiquenerrerezape ticcadeni uimape ouaza uaidira tani. Niza ticcadeni uima nema tizanapomanezape narrizoue rriquerreraniuarri tiquerrenanitoui” naui Deo −nade Zeso. 19—Nazama Deo Bediza parrissa quena-rrararraridenipa poccadeni uaidirehepe arrima narraro: Ssiuarrani arri namiza bacco naroneraha madirra motapa zizinizara uatideni uanaqquiri narrari. Pouadenipa uima uaidira tanicca ihinanemana nezape ssiuarranizapa uatideni uaneraqquiri narrariparra. 20Madirra motapa poua pouadeni tonauaidire-manazapa ssiuarraniza uattarroqquiri narrari. Pouadenipa ssiuarraniza uarrirrira canaha narraraui, poccadeni uima bazimaza auato tarraro noppineni. 21Naraha madirra parrisseheza madimanazapa ssiuarranitouira quenarrari. Pina Deocca zossenirrissa inanemanezape pouadeni zepe irririzarrarima auato taniuarrine −nade Zeso.
Zouaopa Zesocca uima ecomerapomarraro
22Nani zotodepe zama arobeni Zodeauarri Zeso toccazapa poua uatimadedeni iape pouaza rrauirrade. Naniza imadizana madirra passo dopaniza niqui izanabaqquirraride. 23Naraha Zouao naco oza Enouarri madirra passo dopaniza niqui izanabaqquirra narrari. Narrarope oza Sarimaza uarrira tani. Enozana passo zarra tanicca carri tarraro. Nauizana madirra rrarrauirrona narrari, Zouaocca passo dopani niqui narratoui. 24Zouaopa toponi cocoroza coro izimemana-rraraccazama nauiza madirrari.
25Nazapa Zouao uatimadedenipa zodeo orraria tezerre bodideni touissomanauiuarrinecca uima arrauarri uati arrauarri uati quenarrari. 26Nazapa Zouao uatimadedeni rraui torranizapa Zouaoza uati toquenade: —Ia Maride, maitta ueni Zorodao rrippeuarri tiaza bacco tarrari poua tauimari uati uati titinanarraripa madirra passo dopaniza niquide torraui. Bazima pouauarri rrarraui torra naui −quenade.
27Naraha Zouao pouadeniza uati tade: —Deopa madirra zepe irriuiuarrine pouaza da inerrerezape nama narraraui. Naraha Deo madirra zepe irriuiuarrine pouaza da inezape zepe irrie carriui −nade. 28—Naza ouatti timittemanade: Ouape Cristo-Mesia orrarrerani ohonanade. Deopa Zeso tezerrema oua cazosseporraride. 29Ouape pina zabisso amonerre carribote narrari poua tessessa onarraro. Cacarrireuiuarrinecca errete bacco tezape poua tesse naco pouatoui madirrari. Poua tessepa arra cacarrirerrari atti mittazapa uatize taui. Narraroa oua naqui Zesoza madirra toquerrenaza omittezape ouatizeri narraro. 30Zeso deni torrarrazanapoui nazapa bica tani. Oua arrimani orranini naqui bica tani, onarraro −nade Zouao.
Zesopa memeuarricca ccaronarrari
31Nazapa Zouao poua uatimadedeniza denima uati tarrari: —Memeuarri ccaronarraripa arra namiuarricca madirrassa narraraui. Pouapa deni torraui. Arrirraro namiccapa namicca. Arrirraro namicca uimara uati uati totoquena narrari. Memeuarri ccaronarraripa bazimaza deni torrarrari. 32Pouapa memeuarricca qqui tarrari, mittarrari naco ecomerarizarraro. Naraha madirra bazimapa pocca uatinarraza parrissaua quena-rraraui. 33Naraha poua attiza parrissa quenarrarina: “Rrehe, Deopa parrissehe rrinede” quenarrari. 34Pouana Deo icazosserrari, uati uati nanariza narrari. Narrarina Deo Atti uati tauissa tarrari. Deo Poua Corime pouaza da inerre narraro inaparrirenissa tarraro. 35Imehipa Bediza uati uana tarrari. Poua Bediza pocca nauatonarra uapima pouaza inanarraro. 36Nazapa Poua Bediza parrissa quenarraridenina camittehe rriquerreranicca carrimana-zanapouiuarrine. Naraha pouaza iboqquiri narraridenipa camittehe carrimana-rrarauitoui. Deo Pouana narrizoue rriquerreraniccaza inanabaqquiuitoui −naui nade Zouao Batista.
હાલમાં પસંદ કરેલ:
Zouao 3: KBNT
Highlight
શેર કરો
નકલ કરો
Want to have your highlights saved across all your devices? Sign up or sign in
2020 Impresso na Graafica da Biblia
