Matyo 3
3
Yoane Ngaŋ Nga Nkyi a Sóŋ Anu a Ŋwi ə
(Mar 1:1-8; Alu 3:1-18; Yoa 1:19-28)
1A bé a nkfu məwa lá, Yoane Ngaŋ Nga Nkyi, a yén a mu mɨkɨghonɨ mɨ Yudiya ntiʼ mbiʼnɨ ɨ sóŋə́ anu a Ŋwi ɨwu ə. 2Wɛrə a sóŋ ngə́, “A nɨ bəŋ mɨntəm ɨmən a nye mɨbvu ɨmən mbɨ́ʼ ngə́ Nɨfɔ nɨ Ŋwi tiʼ tsɛʼ abó ə.” 3Ntom Ŋwi Asaya kə́ ngamə lá mbɨ́ʼ a Yoane a nkfu za ɨ sóŋnɨ́ ngə́:
“Ŋwɔn tse a tɔ́nkə́ a mu mɨkɨghonɨ ngə́,
‹Kyaŋtɨnə ndómnji a mbó Maʼmbyí ɛ;
ngɨ abɔʼ zə tɛmnɨnɨ á wɛrə a tsa ɨwu ə!› ”
4Yoane a wə́gɨ́ ɨtsɛʼ tsa bɨ ghɨ́nɨ́ nɨ ɨnyɔŋ aŋaŋuʼə, nkɨ nkorɨ ɨkɔbɨ ngobɨnyam atɨŋnɨ zɨə. Mɨdzɨ ɨmyi bé ngwemnɨ abɔʼnɨ ɨnwu ɨfúʼ afɔn ə. 5Ɨbɛn ló a Yerosalɛm abɔʼnɨ mbuʼ Yudiya tsum nkwiʼtɨ ɨtóm tsa tsɨ tsínɨ́ a kárɨ́kɨ́ Mɨzam Yorɨdan ngɛn wəmbo ə. 6Bo fɨ́ʼtɨ́ mɨbvu ɨma nɨ mɨntsu ɨma ntiʼ nkwarɨ nkyi wəmbo a Mɨzam Yorɨdan ə.
7Mbáʼ Yoane a zɛ́nɨ́ ɨnɔ bə Farisao abɔʼnɨ bə Sadukai yiŋənə a mbó zɨ a nkwarɨ nkyi lá, wɛrə a sóŋ a mbó bo ngə́, “Bɨŋ mɨnyo! A kwantɨ ɨwa nkwantɨ awən ngə́ á nɨ lɛʼ ɨnɨŋ ngɨ́ʼ za Ŋwi a mɨ tsagɨ lá le? 8A nɨ ngɨ̌ ɨnu tsa tsɨ diʼnɨ ngə́ nɨ bəŋnə mɨntəm ɨmən a nye mɨbvu ɨmɨŋ ə. 9A nɨ keʼ kɨ ngwiʼtɨ ngə́ nɨ chi lɛʼ ɨnɨŋ ngɨ́ʼ Ŋwi a ntsǎ a ndzum adzaŋ za nɨ sóŋnə́ ngə́ Abraʼm a nɨ ta ɨwən wu kɔ́ʼɔ́nguʼ ə. Mbɨ́ʼ ngə́ Ŋwi a chi lɔgɨ ngɔʼ tsenə ɨ bənkɨ a nye ɨbɔ bɨ Abraʼm ə! 10Ndzam ɨ tsinə abó a ngwarɨ atɨ atsum a nye mɨngaŋ ɨmyi ɛ; atɨ atsum za ka a nkónə́ ayi mɨntam mə shiʼnɨ, bɨ mɨ warɨ ɨ maʼ a mu ɨmugɨ ə. 11Ma ghǎ nkyi a mbó bən lá nɨ nkyi ngəŋ a ndiʼə ngə́ nɨ bəŋnə mɨntəm ɨmən a nye mɨbvu ɨmɨŋ ə, lá ŋwɔn wa a yenə a ndzum me a mɨ ghanɨ nkyi a mbó bən nɨ Azhwi zə Fɛmnɨ abɔʼnɨ ɨmugɨ ə. A tsa aghan be tɨsɨŋə; ka ma byi nyam nkuʼnɨ aghan a ntiʼtɨ ngobɨ ɨchi ɛ. 12Wɛrə a tsi nɨ asəŋ a fɛgɨ ɨdzúm azhi, a fɛ́gɨ́ nchwi ɨzhi tsum ɨwu ə. Wɛrə a ghɨ́ ma lan, a mɨ tiʼ ghotɨ nchwi ɨzhi a mu ntaŋ mɨdzɨ ɨyi, lá ɨ tɔn ntsaʼ tsa a mu ɨmugɨ nɨnkoŋ ə.”
Yeso a Kwarɨ Nkyi ɛ
(Mar 1:9-11; Alu 3:21-22)
13A bé a nkfu məwa lá, Yeso a ló a Galili ngyen a mbó Yoane a Yorɨdan ngə́ á Yoane a gha nkyi a mbó zɨə. 14Lá Yoane a kə́ ndɔ́btɨ́ ngɨə á Yeso a kwebtɨ ntəm ɨyi, ntiʼ soŋ ngə́, “Ma be kwarɨ nkyi be a mbó gho lá o bə mbaŋnɨ ngyén be a mbó me le?”
15Lá Yeso a chwɨ́gɨ́ wəmbo ngə́, “Nyɛʼtɨ á be adzaŋ məwa tɨtsɔŋnɨ ə. Mbɨ́ʼ ngə́ a ndóm məwen, tɨ mɨ ghɨ atsum za Ŋwi a lɔnə ghe.” Ma lan, Yoane a tíʼ mbémtɨ́ a ngá nkyi wəmbo ə.
16Tsɛʼ mbáʼ Yeso a bínɨ́ nkwárɨ́ nkyi lá, ɨ fu a mu nkyi wa. Fɔməbvurə tíʼ ŋáʼnɨ́ wəmbo, a ze azhwi a Ŋwi a shiʼə ngyíŋə́ tso bvugɨrə-fɨkon ɨ shiʼ ntɛm wə ɨnye ə. 17Nji zɨ tse tíʼ ndo a fɔməbvurə, ɨ soŋ ngə́, “Mɔn wen a nɨ mɔn ɨghan wa ma kɔŋnɨ tsɛʼ nkə, a ghɨə ɨnye ɨzə bɔŋənə ghe.”
હાલમાં પસંદ કરેલ:
Matyo 3: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2023, CABTAL
