Matyo 11
11
Bɨlo bɨ ntom ba bɨ Lónɨ́ a mbó Yoane Ngaŋ Nga Nkyi ɛ
(Alu 7:18-35)
1Mbáʼ Yeso a mɛ́tɨ́nɨ́ a ngá ntɨgə tsen a mbó bɨyɛʼ ɨbyi ba nɨghúm ntsɔb bá lá, wɛrə a ló adiʼ məwa ngɛn a ndiʼə ɨ kɨ soŋnə anu a Ŋwi a mu ntáʼmbagə tsa tsɨ tsínɨ́ ɨ fátə́.
2Mbáʼ Yoane Ngaŋ Nga Nkyi a tsínɨ́ atsáŋ ndzuʼ mbɨ́ʼ ɨnu tsa Kristo a kɨ́nə́ ngɨə lá, a tyígɨ́ bɨyɛʼ ɨbyi bə tse wəmbo ə. 3Bo yén mbítɨ́ a mbó Yeso ngə́, “Soŋ awɨgɨ ə, lá nɨ gho wa Yoane a sóŋnɨ́ ngə́ a ghɨ yen lá kə bɨgɨ ntsiŋə a ŋwɔn adaŋ le?”
4Yeso a chwɨ́gɨ́ ngə́, “Bənə ngɛn soŋnə a mbó Yoane anu za nɨ zúʼnə́ nkə́ ndzě ghe: 5bɨfɨgɨ bɨŋə ndzě ɨdiʼə, bɨtə́ngórə́kuʼ bɨŋə ntɛ̌m ɨ shiʼnɨ, ɨtɨchwen bɨŋə shwétə́#11:5 Ɨŋwaʼnɨ tsɨ mɔʼɔ soŋ be ngə́, ‘‘Mɨghɔ mɨtsum ma mɨ wɛmnɨ mbəmnye ŋwɔn mɨ shwetə’’ ghe ghe, ɨkfo ɨtú bɨŋə ndzǔʼ ɨnu, bɨkfú bɨŋə nzhwémnə́, bɨ kə sǒŋ Nkən wu Shiʼnɨ a mbó ɨfúm ə. 6Ŋwi a mɨ gha nɨdorɨ nə wi a mbó ɨbɛn ba ka bɨ mə́ŋnə́ awa aghə!”
7Mbáʼ bɨyɛʼ bɨ Yoane Ngaŋ Nga Nkyi kɨ́nə́ ndǒ adiʼ wa ɨ kwɛn awa lá, Yeso a ghám mbɨ́ʼ a Yoane a mbó ɨnɔ ɨbɛn wa ngə́: “Nkfu za nɨ ghɛ́nɨ́ a mbó Yoane Ngaŋ Nga Nkyi a mu mɨkɨghonɨ lá, nɨ kə́ ngwíʼtɨ́ ndze ake? Azəŋ a ngyɛn á nchíʼnə́ a mu kɨfɛrɨ le? 8Nɨ lánɨ́ ngɛn lá a ndzé ake le? A ŋwɔn wa a wɛgɨnɨ ɨtsɛʼ mɨsom le? Ɨbɛn ba bɨ wɛ́gɨ́nə́ awa adzaŋ məwa, bɨ chyɛ̌ lá a ntɔ́ʼ ə! 9Soŋnə aghə, nɨ ghɛ́n lá a ndzé ake le? Ntom Ŋwi le? E tsɛʼ a nkənu ə, nɨ zɛ́n a ŋwɔn wa a tsanɨ ntom Ŋwi ə. 10Mbɨ́ʼ ngə́ aŋwaʼnɨ a Ŋwi a ghám lá mbɨ́ʼ a Yoane Ngaŋ Nga Nkyi ngə́: ‹Ŋwi a sóŋ ngə́, ma mɨ tsagɨ Ntom ɨzan a mbyi gho á ɨ ŋaʼ ndóm a mbó gho ghe.› 11Ma sóŋə́ awən tsɛʼ a nkənu ngə́, Yoane Ngaŋ Nga Nkyi a tsa a ŋwɔn tsum wa a kwɛ́nə ntsi atuəshe. Lá ŋwɔn wa mbáʼ a kɨgɨnɨ ntsa a ŋwɔn tsum a mu Nɨfɔ nɨ fɔməbvurə a tsa a Yoane ghe. 12Nchwuʼnɨ nkfu za Yoane a sóŋnɨ́ nkən ɨyi ɨ kɔʼ kuʼ ɨtfúʼ mbyi ɨ sɨŋə, bɨ kwɛ́ʼtɨ́ mbaŋ fɨlam a nye Nɨfɔ nɨ fɔməbvurə, ngaŋ fɨlam kə ntiʼə ndɔ́btɨ́ nkuŋə a mu nɛrə nɨ adaʼ ə. 13Ɨ kɔʼ kuʼ a nkfu Yoane, ntóm Ŋwi ɨtsum abɔʼnɨ Nyɔngɔŋ Mǒse kə́ ngamə mbɨ́ʼ Nɨfɔ məna; 14be nɨ ndǒ ɨ nɨŋ mɨntəm ɨmən a nye nkən wa, Yoane a lá Alaja wa bɨ sóŋnɨ́ ngə́ a láʼ yen lá. 15Zuʼnə, mbáʼ be nɨ tsi nɨ ɨtoŋnɨ ə!
16Tɨtsɔŋnɨ, be ma fɨʼnɨ ɨbɛn bɨ tɨtsɔŋnɨ lá bo bɨ ake le? Bo fi ɨbɔ bə bɔrɨ ba bɨ tsinɨ a samnɨ mɨtan ə. Táʼ bagɨ a tɔnkɨnə a mbó bagɨ wu mɔʼɔ ngə́, 17‹Bɨgɨ búʼ mɨkom mɨ nɨzɔ́ʼ a mbó bən, lá nɨ keʼ awən bɨŋə! Bɨgɨ zɔ́bɨ́ mɨnkyi mɨ nɨvwo a mbó bən, lá nɨ keʼ awən bugə!› 18Yoane Ngaŋ Nga Nkyi a yén lá, nchigɨ nji tsə ntsaʼtɨ Ŋwi, nkeʼ mɨluʼ kɨ no. Ŋwɔn tsum a sóŋ ngə́, ‹A tsi nɨ dzɨŋ a mu ɨnye zɨə!› 19Mɔn Ŋwɔn a ghɨnə ngyén, ndzɨ mɨdzɨ nkɨ no mɨluʼ, nɨ soŋ ngə́, ‹Zɛnə a mba wiŋ ə! A nɨ ndánɨdzɨ nkɨ mbe abarə a mɨluʼ, mbe ɨson bɨ bɨkwárɨ́ bɨ ashɛbɨ bo ngaŋ ngɨ mɨbvu bə mɔʼɔ ghe!› Lá bɨ zhyɛ̌ a zóŋ Ŋwi lá a nye ɨnu tsɨ kuʼnɨnɨ tsa ɨbɛn ghɨnə ghe.”
Ntáʼmbagə tsa tsɨ sé Nɨŋ Mɨntəm ɨma a nye Kristo ghe
(Alu 10:13-15)
20Ɨbɛn ba bɨ tsínɨ́ a mu ntáʼmbagə tsa Yeso a ghɨ́nɨ́ ɨnu tsɨ yerɨnɨ-yerɨnɨ tsə ghaʼnɨ ɨwu lá, bɨ sé bəŋ mɨntəm ɨma a nye mɨbvu ɨma, ma lan, Yeso a tíʼ nkagɨ ɨbɛn bɨ ntáʼmbagə mətsa ə. 21“Wei ngɨ́ʼ zɨ ngwi a nye bɨŋ ə, a Chorəzɨn! Wei ngɨ́ʼ zɨ ngwi a nye bɨŋ ə, a Bɛtɨsaida! Ɨnu tsɨ yerɨnɨ-yerɨnɨ tsa bɨ ghɨ́nɨ́ a nye bən, bɨ bé ghɨ a tsɛrə lá a Taya bo Saidɔn, muŋ ɨbɛn ba ɨwu, ɨ lɔgɨnɨ a lɔʼkwam, bɨ wəgɨnɨ ɨtsɛʼ adzə́ŋnɨ nkɨ fuʼ ɨtumbəm ɨtsa nɨ abvu, a ndiʼə ngə́ bo bəŋnə mɨntəm ɨma a nye mɨbvu ɨma ghe! 22Ma sóŋə́ awən tsɛʼ a nkənu ngə́ Ŋwi a lo kó a mɨlɨŋnɨ wu ngwi a Njwi Nɨsáʼ a nye Taya bo Saidɔn ɨ tsa awɨŋ ə. 23A mbó bən nə Kabɛrɨnaum! Nɨ kə́ ndǒ ntsɔʼ ɨtumbəm ɨtsən ɨ kɔʼ ghɛn nɨ tsɛrə a fɔməbvurə le? Bɨ ghɨ zhwíbɨ́nɨ́ awən a mu ɨmugɨ nɨnkoŋ ə! Ɨnu tsɨ yerɨnɨ-yerɨnɨ tsa bɨ ghɨ́nɨ́ a nye bən, bɨ bé ghɨ a tsɛrə lá a nye bə Sodom, muŋ tsɨ bvurɨ ntsi ɨ kɔʼ kuʼ sɨŋə ghe! 24Nɨ tsi nɨ njiɛ tsɛʼ a nkənu ngə́ Ŋwi a lo diʼ akômɨlɨŋnɨ zə wi a Njwi Nɨsáʼ zɨ be a mbó bə Sodom ɨ keʼ a mbó bən be!”
A nɨ Yen a mbó me Ntsi nɨ Ashwetɨ a Ntəm ə
(Alu 10:21-22)
25A nkfu məwa Yeso a sóŋ ngə́, “Tarɨ, Maʼmbyí, gho wa o tsinɨ nɨ fɔməbvurə abɔʼnɨ atuəshe! Ma gha a mɨya a mbó gho mbɨ́ʼ ngə́ o diʼnə a mbó ɨbɔ bə bɔrɨ ɨnu tsa o lwɛʼnɨ a mbó ba bɨ kwaʼtɨnɨ ngə́ bo nɨ bə zóŋ abɔʼnɨ bə ayigɨnɨ ə. 26Eŋə, a Ta ɨghan, nə nɨ adzaŋ za o kɨ́nə́ ndǒ ngə́ á ghɨ fúə.
27Ta ɨghan a ghanə ɨdzúm ɨtsum a mbó me ghe. Ka ŋwɔn tse a zhi ayi a Mɔn ntsa a Tarɨ, ŋwɔn tse a keʼ kɨ nji a Tarɨ ntsa a Mɔn abɔʼnɨ ba Mɔn a zarɨnɨ taŋ ɨ kyɛʼ a ta ɨyi a mbó bo ghe.
28Bən ba nɨ byɛʼnɨ ɨbyɛʼ tsɨ dɨrɨnə, nɨ kɨ nkan, á nɨ yen a mbó me á ma gha ashwetɨ a ntəm a mbó bɨŋ ə. 29A nɨ kwarɨ ɨnu tsa ma diʼnə, ngyɛʼ anu a mbó me, mbɨ́ʼ ngə́ ma bɔnɨ nkaʼ nkə́ ntsɛ́gɨ́nɨ́ ntəm; nɨ mɨ tiʼ tsi nɨ ashwetɨ a ntəm ə. 30Mbɨ́ʼ ngə́ ɨnu tsa ma diʼnə awən nɨ tsɛrə tsɨ waŋnɨ a njíɛ, abyɛʼ za ma mɨ gha a mbó bən ngə́ á nɨ byɛʼ a yaŋə.”
હાલમાં પસંદ કરેલ:
Matyo 11: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2023, CABTAL
