मत्ती 2

बुद्धिमान मनैनके दान

1जब हेरोद रज्वा यहूदिया प्रदेशमे राज करतेहे, तब येशूक जलम यहे प्रदेशके बेथलेहेम गाउँमे हुइलिन। वहे समयमे पूरुव देशसे तोरैयँक अध्ययन करुइया बुद्धिमान मनै यरुशलेम शहरमे आके पुँछे लग्लाँ, 2“उ लरका कहाँ बताँ, जे यहूदिनके राजा बनक लग जल्मल बा? काकरेकी हम्रे हुँकार जलमके बारेम पता देहुइया तोरैयाँहे#2:2 तोरैयाँ उ समयमे मनै यी मानिँत कि जब कौनो रज्वा अथवा खास मनैयक जलम हुइत, तब एकथो तोरैयाँ देखा परत और उ तोरैयाँ जलम हुइल मनैयक तोरैयाँ होजाइत। पूरुव ओहोँर अपन देशमे देख्ली, और हुँकार आराधना करे आइल बती।” 3यहूदिनके रज्वक जलमके बारेम सुनके हेरोद रज्वा बेचैन होगिल, और ओकर संग यरुशलेम शहरके बहुत्ते मनै फेन बेचैन होगिलाँ। 4तब् हेरोद रज्वा सक्कु मुख्य पुजारीनहे और जनतनके सारा यहूदी कानुनके गुरुनहे जुटाके पुँछल, “ख्रीष्टके जलमके बारेम पवित्र शास्त्र का कहत कि ख्रीष्टके जलम कहाँ हुई?” 5ओइने हेरोद रज्वाहे कलाँ, “ख्रीष्टके जलम यहूदिया प्रदेशके बेथलेहेम गाउँमे हुई। काकरेकी परमेश्वरके अगमवक्ता मीका बहुत आघे लिखल रहे ज्या परमेश्वर कले रहिँत:

6‘ए यहूदिया प्रदेशके बेथलेहेम गाउँक मनै!

तुहुरिन्के गाउँ यहूदिया प्रदेशमे बहुत महत्त्वपूर्ण बा,

काकरेकी तुहुरिन्के थेनसे एकथो मनैया आई, जे शासक बनी,

ऊ मोरिक इजरायलके मनैनहे गोठाला हस रेखदेख करी।’”

7तब् जल्मलक लरकक उमेर जानक लग हेरोद रज्वा उ तोरैयँक अध्ययन करुइया बुद्धिमान मनैनहे अल्गे बलाके ओइन्से तोरैयाँ देखा पर्लक ठिक समय पता लगाइल। 8ऊ असिक कहिके तोरैयँक अध्ययन करुइया बुद्धिमान मनैनहे बेथलेहेम गाउँमे पठाइल, “जाऊ और मजासे उ लरकक् खोजी करो। उहिहे भेटैबो ते मोरिक थेन अइहो और महिन्हे सक्कु बात बतैहो जोन तुहुरे देख्बो। ताकि मै फेन जाके उहिहे आराधना करे सेकुँ।” 9-10तब् रज्वक बात सुनके ओइने अपन देश घुमगिलाँ। डगरमे ओइने वहे तोरैयाँ देख्लाँ, जोन तोरैयाँहे ओइने पूरुव ओहोँर अपन देशमे देखल रहिँत। जब ओइने उहिहे देख्लाँ ते ओइने गजब खुशी होगिलाँ। उ तोरैयाँ ओइन्के आघे-आघे गैल, और लरका रहल घरक सोझे जाके उ तोरैयाँ रुकगिल। 11तब् घरक भित्तर जाके ओइने लरकाहे हुँकार दाई मरियमके संग देख्लाँ ते ओइने घोपत्या होके हुँकार आराधना करलाँ। तब् अपन सुरकैना ठैली खोलके हुँकिन्हे सोन, सुगन्धित धूप और मूर्र तेलके #2:11 सुगन्धित धूप और मूर्र तेलके मूर्र इजरायल देशमे फेन मिले। यी एकथो दोसुर मेरिक मीठ बास अइना चिज हो, जिहिहे मूर्र कहिजाजाइत, अथवा यिहिहे एकथो रुख्वामेसे निकर्लक खास मेरिक बिरुवा फेन कहिजाजाइत।दान चह्रैलाँ। 12तब् हेरोद रज्वक थेन फिर्ता ना जाँइत कना सपनामे चेतावनी पाके ओइने हेरोद रज्वाहे बिना बतैले दोसुर डगर ओहोँरसे अपन देशमे घुमगिलाँ।

मिश्र देशमे भग्ना

13तोरैयँक अध्ययन करुइया बुद्धिमान मनै अपन देश फिर्ता गैलाँ ते परमेश्वरके एकथो स्वर्गदूत सपनामे योसेफके थेन देखा परल। और ऊ असिक कहल, “उठो, छुटिमुती लरकाहे और हुँकार दाईहे अपन संग लेके मिश्र देशमे भागजाऊ। और मै तुहिन्हे नै कहतसम वहैँ रहहो। काकरेकी, हेरोद रज्वा लरकाहे मुवाइक लग हुँकार खोजी करता।” 14तब् ऊ उठ्के छुटी लरका और हुँकार दाईहे अपन संगे लेके मिश्र देशमे रात्तिहीँ चलगिल। 15और हेरोद रज्वा नै मुअत सम् ओइने मिश्र देशमे पलिरलाँ। ताकि परमेश्वरके उ वचन पूरा होए, ज्या ऊ होशे अगमवक्तक माध्यमसे बहुत समय आघे कहल रहिँत, “मै अपन छावाहे मिश्र देशमेसे बलैनु।”

हेरोद रज्वा छुटी लर्कनहे मर्वाइल

16तब् तोरैयँक अध्ययन करुइया बुद्धिमान मनैनके उहिहे धोखा देहल बात हेरोद रज्वा पता पागिल और ऊ रिसेलेके चुर होगिल। ऊ ओइन्के जनैलक समय थेनसे दुई साल और उहिसे छुटी सक्कु लरकनहे मुवैना आदेश देहल जेने बेथलेहेम गाउँमे और ओकर आँजरपाँजरके ठाउँमे रहिँत। 17तब् अगमवक्ता यर्मियक माध्यमसे परमेश्वरके कहल वचन पूरा होए कहिके यी हुइलस,

18“रामामे#2:18 रामामे रामा कना एकथो असिन ठाउँ रहे, जहाँ दाऊद रज्वक खानदान रहिस। मनै एकथो जन्नी मनैयाहे रुइत सुन्लाँ,

राहेल#2:18 राहेल राहेल याकूबके जन्नी रहे। अपन लरकनके लग टोँटा फारफारके रुइतेहे।

सुफ्लैलक ऊ नै मानतेहे,

काकरेकी आब ओकर सक्कु लरका मुगिलिस।”

मिश्र देशसे फिर्ता

19योसेफ, मरियम और यनके लरका येशू अभिनसम मिश्र देशेमे रहिँत। हेरोद रज्वा मुके सेकलमे परमप्रभुक एकथो स्वर्गदूत सपनामे योसेफके थेन मिश्रमे देखा परल और असिक कहल, 20“उठो, लरका और हुँकार दाईहे संगे लेके इजरायल देशमे जाऊ। काकरेकी हेरोद रज्वा और ओकर मनै मुसेक्लाँ जेने लरकाहे मुवाई खोजतिहिँत।” 21ऊ उठल और लरका और हुँकार दाईहे संगे लेके मिश्र देश छोरके इजरायल देशमे चलगिल। 22पर जब योसेफ यी सुनल कि अर्खिलाउस अपन बाबा हेरोदके ठाउँ यहूदिया प्रदेशमे राज करता, ऊ वहाँ जैनासे डरागिल और फेनदोस्रे सपनामे परमेश्वरसे चेतावनी भेटाके ऊ गालील प्रदेशमे चलगिल। 23ऊ जाके नासरत कना गाउँमे बैठगिल। ताकि उ वचन पूरा होए जोन परमेश्वरके अगमवक्तनसे कहिगिल रहे: “हुँकिन्हे नासरत गाउँमेसे अउइया कहिजाजाई।”

હાલમાં પસંદ કરેલ:

मत्ती 2: DVGNT

Highlight

શેર કરો

નકલ કરો