Yʉanɨ 4
4
Ɔɔ Yeso ɓʉyakanaka nʉ 'ʉtʉ Ɓasamalɨa
1Ɓafalisayɔ ɓa꞉kɔ ɨsaʉ ɓɔ Yeso akʉnyɨa nʉ ɓakpataka ɓaja nadɨndɨ kʉɓaa Yʉanɨ, nʉ a tiga naɓɔ kʉ kuɓatiso. 2(Ʉna tɔ, Yeso mambɨnyɔngɔ ambikinye kuɓatiso ɓombi, ɨkyɛmɨngana tʉkʉ ɓakpataka ngiɓangɔ ɓi꞉nye naɓɔ kuɓatiso.) 3Kʉ ɓwanɨ, iya Yeso a꞉kɔ moni ngikʉnanɨ ɓi꞉nye kʉyaka engo, ambʉʉngwa anʉ Yudɛa ambʉtʉa kʉ anʉ Galilaya. 4Kʉsa nani, yi꞉nye kʉta ɓɔ ʉɓaa ɨngbaa akʉ gɨpa ʉ Samalɨa.
5Kija Yeso a꞉ɓʉya akʉ gʉlʉ mʉngana wʉ Samalɨa ino ɓɔ Sikali. Gʉlʉ ngiinanɨ i꞉nye tinene nʉ ɨgʉa ngia Yakɔbɔ a꞉nzo jɛnɛ mwana angɔ Yɨjɛfʉ. 6Ɨkɔ ngia yɨ Yakɔbɔ yi꞉nye kʉ ananɨ. Tiga tine tine nʉ 'usoti, Yeso ambundokono nʉ kɨnda, ambʉka kuwulo anambamba ʉ ɨkɔ ngiinanɨ.
7'Ʉtʉ Ɓasamalɨa mungono wambʉka kʉtʉka mepo nanɨ. Yeso ambumusigio ɓɔ: « Nanzo‑zʉ mepo kɔɔ mʉmwɛ. » 8Ati ngiinanɨ ɓakpataka ɓi꞉nye ɓʉseni kʉkʉa idyo akʉ gʉlʉ. 9Kija 'ʉtʉ ʉ Ɓasamalia ngiinanɨ a꞉tisio Yeso ɓɔ: « Wʉ꞉nata‑zʉ mepo ɨkyɨkyɨɓʉmʉ tanɨ, ɔwɛ ngia wa 'Uyuda, ɛmɛ 'ʉtʉ Ɓasamalɨa? » (Jʉ Ɓayuda nʉ Ɓasamalɨa ɓambakakɔnɔ.)
10Gʉ Yeso nayɔ ɓɔ: « Wʉmbɨeni piɛ apɛpɛ ngia wʉ Asʉɓɨɨ, nʉ anɨ iya anɔwɛ kusigio ɓɔ: ‹ Nanzo mepo kɔɔ mʉmwɛ ›, ambʉ́ ɔwɛ kʉ wʉmʉta ɛyɔ mepo, nʉ ambʉ́ ɛyɔ unanzo mepo ngika kaanzo ʉɓɨɨ. » 11Kija moi ngiinanɨ a꞉musigio ɓɔ: « Makʉʉɓɨɨ, ɔwɛ wambʉkɔmʉ gʉkʉ nʉ ɨkɔchɔ ngia watʉka nayɔ mepo akʉ ɨkɔ yɛɛ ɗu ngia, wa꞊nyɨa tiga nʉ mepo ngika kɔɔ munze ʉɓɨɨ gbanɨ? 12Kuku ngiʉndɛsʉ Yakɔbɔ a꞉tinzo ɨkɔ ngiakɛ. Ɛyɔ makʉɔngɔ i꞉nye mwa kʉ ɨkɔ ngiakɛ. Ɓana ɓangɔ nʉ ɓanama ngiɓangɔ ɓi꞉nye mwa kʉ ɨkɔ mɨngana ngiakɛ. Ajʉ wakʉna ɓɔ ɔwɛ wa 'ʉja kʉɓaa Yakɔbɔ ɓiɛ? »
13Kija Yeso a꞉mutisio ɓɔ: « Mombi ngia a꞊mwa mepo ngikakɛ, aɓio ɓata tʉkʉ nʉ taa yɨ mepo. » 14Ɨkyɛmɨngana, mombi ngia a꞊mwa mepo ngika ɛmɛ ma꞊munzo, ka꞊nɨtanaka tiga ɨkpakpa yɨ ɗei ngia yɛɛ nze ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 15Moi ngiinanɨ ambumutisio ɓɔ: « Makʉʉɓɨɨ, nanzo mepo ngikʉnanɨ ambʉ mɔɔɓio sina tii ɓata nʉ taa yɨ mepo, nʉ mambʉsɨa tiga‑zʉ kʉka kʉtʉka mepo aka. »
16Yeso ambumutisio ɓɔ: « Sa kusoko aɓaʉ nambʉka nayɔ aka. » 17Moi ngiinanɨ ambumutisio ɓɔ: « Mambʉkɔmʉ nʉ gue. » Kija Yeso a꞉musigio ɓɔ: « Wʉchwakɔmʉ ɓʉʉ ɓɔ wambʉkɔmʉ nʉ gue. » 18Jʉ wʉpaachɨkana nʉ ɓʉgue ɓɔkɔ, nʉ gue ngia nanayɔ ɨtakɨ‑takɨ ngiakɛ ambʉkɔmʉ aɓaʉ. Wʉyaka moni kingono. 19Kija moi ngiinanɨ a꞉musigio ɓɔ: « Makʉʉɓɨɨ, makʉna ndʉ wa ɨgbɛ yɨ Asʉɓɨɨ. » 20Ɓakuku ngiɓʉndɛsʉ Ɓasamalɨa ɓi꞉nye bibiso Asʉɓɨɨ akʉ ɨkpangba ngia, ɨkyɛmɨngana inu Ɓayuda naasigo ɓɔ mʉa ngua ɓʉkwanana‑ɔɔ kubibiso Asʉɓɨɨ wa tʉkʉ anʉ Yelusalɛma.
21Yeso ambuɓutisio ɓɔ: « Moi ngia, nabaya ɛmɛ, jʉ wati wakʉka ʉwa na꞊bibiso‑ɔɔ Tidoo, chʉkɔmʉ tii ekoo ʉ ɨkpangba ngia, nʉ chʉkɔmʉ anʉ Yelusalɛma kʉ ɓwanɨ. » 22Inu Ɓasamalɨa naabibiso Asʉɓɨɨ nambikinye nayɔ kʉmbɨa, ɨkyɛmɨngana isu Ɓayuda kaamubibiso nʉ kaamʉmbɨa mbɨaa. Jʉ ɓʉhɨa ɓa꞉ʉngwa ɔɔ Ɓayuda. 23Ɨkyɛmɨngana, wati wakʉka, nʉ wati nguʉnanɨ wa tiga ʉkɛ uwa ɓombi ngiɓa ɓaabibiso Tidoo akʉ ɓingono, ɓa꞊mubibiso ɨngbaa akʉ 'ʉtʉma nʉ ingono. Jʉ Tidoo aakʉnda ikanzi yɨ ɓombi ngiɓa ɓaamubibiso ndʉ ananɨ. 24Asʉɓɨɨ a 'Ʉtʉma, ɓombi ngiɓa ɓanayɔ kubibiso ɓʉkwanana nayɔ kubibiso ingbaa akʉ 'ʉtʉma nʉ ingbaa akʉ ɓingono. 25Kija moi ngiinanɨ a꞉mutisio ɓɔ: « Makʉmbɨa ɓɔ Masɨa akʉka, iiya ɓaamusoko ɓɔ Klisito. Ati ngia a꞊ka‑ɔɔ a꞊tɨngakanakisio tiga moni kʉ muɓomu. » 26Yeso ambumutisio ɓɔ: « Mombi ngiinanɨ ya tʉkʉ ɛmɛ ngia kakʉyaka nɔwɛ akɛ. »
27Kʉ nɨma ngiinanɨ, ɓakpataka ɓambʉtʉa. Yambʉbʉmbangɨa tiga kʉna Yeso kʉyakanaka nʉ moi. Ɨkyɛmɨngana, mombi gʉkʉ mʉngana a꞉ɓukuokɔmʉ moi ngiinanɨ ɓɔ: « Wakʉkʉnda ɨmanɨ? » Nʉ chʉkɔmʉ ɓambuɓukuo Yeso kʉ ɓwanɨ ɓɔ « Jʉtanɨ nakʉyakanaka nayɔ? » 28Tiga nanɨ moi ambʉsɨa tii ɨkɔchɔ yɨ mepo tʉkʉ ananɨ, ambʉsa akʉ gʉlʉ kʉɓɨa ɓombi ɓɔ: 29« Ikeni, kuneni gue mʉngana iya ʉ꞉ngaka moni ngika ma꞉kyɨa. Ambʉkɔmʉ tɔ Masɨa ɓiɛ?. » 30Kija ɓombi ɓa꞉ʉngwa akʉ gʉlʉ ɓambʉsa kʉgbʉka Yeso.
31Ati ngiinanɨ ɓakpataka ɓambumusigio ɓɔ: « Mʉpananakɨa, ambʉ́ wʉdyanana tiga‑zʉ mwana ʉ ɨkyɛmɛ. » 32Ɨkyɛmɨngana, ambuɓutisio ɓɔ: « Idyo ngia makʉdya engo inu nambʉkɔmʉ nayɔ kʉmbɨa. » 33Kʉ ɓwanɨ, ɓakpataka ɓambufaniso tiga ɓokono ati ʉndaɓʉ ɓɔ: « Ya tanɨ, ajʉ mombi ʉ꞉mɨkyɨa nʉ idyo ɓiɛ? »
34Yeso ambumutisio ɓɔ: « Idyo ngiisɛmɛ ya tʉkʉ kʉkyɨa ɓʉkʉnda ɓʉ Mombi ngia a꞉natʉma, nʉ kʉndaniso kuu ngia a꞉natʉma kʉkyɨa engo. » 35Iya naahʉna‑ɔɔ masɔɔ, ajʉ nambakayaka‑zʉ ɓɔ yitukuo muyi ɓʉgɨna kʉɓʉya aka ɓaabʉa‑ɔɔ masɔɔ ɓiɛ? Ɨkyɛmɨngana, ɛmɛ maninu kusigio ɓɔ: « Zoneni waja nɨkʉʉ, kangeni matɨnɨ, masɔɔ ka tiga mʉwɛ, kakusiɓo tii tʉkʉ nakɔ kʉbʉa. 36Mombi ngia akʉbʉa masɔɔ ngikʉnanɨ ʉnyɨa nʉ ʉkʉa wɔngɔ nyɨaa, nʉ masɔɔ kɔngɔ ka꞊munzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. Kʉ ɓwanɨ, mombi ngia akʉhʉna masɔɔ nʉ iya akʉbʉa engo, ɓa꞊kwa ɨgyagya tii tʉkʉ ɨzɔ. 37Jʉ ungbagu ngua wa kingono ɓɔ, mombi mʉngana akʉhʉna masɔɔ, iya wɔmɔ akʉbʉa engo. » 38Ɛmɛ ma꞉nɨtʉma kʉbʉa masɔɔ ngika na꞉gisokɔmʉ angu ekoo ɔngɔ. Ɓombi ɓɔmɔ ɓa꞉giso angu kʉkyɨa kuu yɛngɔ, inu nambʉka tʉkʉ kʉdyɨa kuu ngiindaɓʉ.
39Amati ʉ gʉlʉ ngiinanɨ, Ɓasamalɨa ɓaja ɓa꞉baya Yeso tʉkʉ aka ekoo nɨkɔ ɨsaʉ ngia moi ngiinanɨ a꞉ɓʉɓɨa akʉ ɓingono kusigo ɓɔ: « Ʉ꞉nangakɨa moni ngika ma꞉kyɨa kʉ muɓomu. » 40Tiga ati ngia Ɓasamalɨa ɓa꞉ka‑ɔɔ anambamba angɔ, ɓambʉmʉndɨanɨa ɓɔ ɓuɓio‑zʉ ɨzɔ naɓɔ ananɨ. Kija Yeso a꞉kyɨa nanɨ makwaa kapɨnɨ. 41Kija ɓombi ɓa꞉baya Asʉɓɨɨ ɓaja nadɨndɨ, ati ngia ɓa꞉kɔ‑ɔɔ moni ngika i꞉nye kʉpanɨa engo. 42Ɓambusigio moi ngiinanɨ ɓɔ: « Ɨtakɨ‑takɨ ngia kambʉkɔmʉ kʉbaya tʉkʉ aka ekoo ʉ moni ngika wʉ꞉tɨɓɨa, ɨkyɛmɨngana ya tʉkʉ aka ekoo moni ngika isu ɓakʉɓɔngɔ kʉ꞉kɔɔ, nʉ kʉ꞉mbɨa kingono ɓɔ a Muhiiso wʉ ɨtaka. »
Yeso u꞉hiiso mwana ɔɔ gue wʉ ngama ʉ ɓasʉda
43Mbise ʉ makwaa kapɨnɨ ngikʉnanɨ, Yeso ambʉsa anʉ Galilaya. 44Ɛyɔ makʉɔngɔ ambʉɓɨakɨa akʉ ɓingono kusigo ɓɔ: « Ɨgbɛ yɨ Asʉɓɨɨ yambakakyɨa nʉ ɨbɨba andaɓʉ. » 45Ati ngia a꞉ɓʉya‑ɔɔ anʉ Galilaya, ɓombi ɓʉ ɨkʉmbʉ ngiinanɨ ɓambʉmʉjananɨa nʉ ɨgyagya, jʉ ɛɓɔ ɓi꞉nye ɓuseni kʉ akʉ ʉmbɔ wʉ Pasɨka anʉ Yelusalɛma, nʉ ɓa꞉na moni kʉ muɓomu ngika a꞉kyɨa akʉ wati wʉ ʉmbɔ nguʉnanɨ.
46Kija ɓa꞉tʉa kʉ anʉ Kana amati ʉ gɨpa ʉ Galilaya akʉ a꞉nicho‑ɛɛ mepo kʉnɨtanaka vinyo. Na anʉ Kapelenaumu, yi꞉nye nʉ ngama ʉ ɓasʉda mʉngana iya mwana angɔ ɔɔ gue i꞉nye nʉ kweso. 47Iya ngama ʉ ɓasʉda ngiinanɨ a꞉kɔ ɓɔ Yeso ʉʉngwa anʉ Yudɛa kʉka anʉ Galilaya, ambʉsa nayɔ kʉna. Kija a꞉mukikilikio ɓɔ ambʉ́ ʉsa‑zʉ anʉ Kapelenaumu nayɔ kuhiisio mwana ngia i꞉nye nʉ kweso tinene kʉtɨnɨa 'ʉtʉma.
48Kija Yeso a꞉musigio ɓɔ: « Inu nunenikɔmʉ tʉkʉ ɓakɔkɔ nʉ ɓamoni ɓɔɔ ɨkyɨkyɨɓʉmʉ, nambʉkʉbaya ɨngbaa yɨ moni gʉkʉ ɗɛkɛkɛ. » 49Kija ngama ʉ ɓasuda ngiinanɨ a꞉mutisio ɓɔ: « Makʉasɛmɛ, ambʉ́ wʉɓʉya‑zʉ tʉkʉ andɛmɛ, pɛɛ ngia mwana ngiasɛmɛ a꞊tɨnɨa‑ɔɔ 'ʉtʉma. » 50Yeso ambumutisio ɓɔ: « Tʉa andɔɔ, mwana asɔɔ a kʉkʉʉ! » Gue ngiinanɨ ambʉbaya moni ngika Yeso a꞉musigio, ambʉsa. 51Ati ngia i꞉nye tiga‑ɔɔ kʉtʉa, ɓambujunukio nʉ ɓabayo ngiɓangɔ nɨngbaa ɓambʉmʉɓɨa ɓɔ: « Mwana asɔɔ a tiga kʉkʉʉ! » 52Ambuɓuɓukuo ɓɔ: « Mwana ʉ꞉hɨa ati tɨmanɨ? » Ɓambumutisio ɓɔ: « Yi꞉nye bɛ saa ʉmalɨanɨka mbise ʉ 'usoti, ati ngia vɛvʉ ya꞉mʉngwa bɛ‑ɔɔ. » 53Ɨsɛ ʉ mwana ngiinanɨ ambutunguo kusigo ɓɔ wati nguʉnanɨ ʉwɔ tʉkʉ ʉwa Yeso a꞉musigio bɛ‑ɔɔ ɓɔ: « Mwana asɔɔ a tiga kʉkʉʉ. » Kija gue ngiinanɨ nʉ 'ufini nguangɔ kʉ uɓomu ɓa꞉baya Yeso.
54Yi꞉nye tiga kɔkɔ wʉ nɨsɨ kapɨnɨ ngia Yeso a꞉kyɨa kʉʉngwa aka i꞉nye ʉngweni‑ɔɔ anʉ Yudɛa kʉsa anʉ Galilaya.
હાલમાં પસંદ કરેલ:
Yʉanɨ 4: BudKoya
Highlight
શેર કરો
નકલ કરો
Want to have your highlights saved across all your devices? Sign up or sign in
© 2021, Wycliffe Bible Translators, Inc.
