Kejadian 16
16
1Allahdi Abram tep, “Kandi deipmempa, dadeipdanen bankameng nyapuda, amutu karepkamane,” pepra deipu dinin, Abram er ner Saraida, you ner kwamnga tep, sun nyapu men deiamrei. 2Sun mi gum tep, Saraidi utenepu. “Ne pel melimna ner, Mesir mutu ner, er sida Hagar dopra, ne akengebo tep karepnepa, sun butene dipu nun mi deipseretenge,” tenepu. Utenepudi, Abram tep pepu. “Abramo, nun nai bo Allah, er si Yahwehdi men meliamneua cadi, neda you nerpu kunune. Atep ne melimna ner dopropmemdi, sun kikiman kurerumpa, anerdi nun mi deipsetue,” pepra moropupa, Abramdi, “Jo, ukupkamepe,” pepu.
3Ange tep nengeda, Abram er ner Saraidi, er pel melimna ner Hagar dopra, Abram tep karepupa, Abramdi aner dopu. Anerda Mesir mutu ner kuramu. (Ange yuma kupu taruda, Abramdi Kanaan mutu yau taru dinin, nukrap keteng tamun morokyo, sepuluh tahun konum kupupa, Abramdi aner Hagar dopu). 4Uda, Abramdi aner er sida Hagar cap, kikiman kuramreipa, anerdi mundu doupu. Mundu doupudi, kael kepu dingeda, er deiyo ner Sarai tep tulum kupupa, ‘Anerda, tali nere’ tenen, mali kange doupudi, malye peramu.
5Hagardi Sarai tep malye peramupa, Saraidi Abram tep upepu. “Uo, anerdi mali penereyada, deiyo kan dia. Ne dipu, ‘Kan cap, ne akengebo nyangdana telepe pua,’ pepra aner tep go karepsi dinino, ukuda er mundu doupmar taru di, ‘Aner Sarai ne songe’ tenepnere. ‘Aner ne songe’ tenen, mali penmanerada, kan deiyo. Atep nengeda, nun nai bo Allah, er si Yahwehdi kan tep upu bokeipkeredi, wenepkamker ja,” pepu.
6Saraidi Abram tep upepupa, Abramdi tamupra pepu. “Gume, ne nero, Hagarda, kan pel melimna nerpu kurura cadi, ‘Aner tep ukupkamne’ tenepremtopu, angepu kupkamreme. Wenepkamrem do, gum do, kan kange ja,” pepu. Abramdi upepka tep, Saraidi Hagar tep mali upu pepra, wenemnapu kuramudi, ikin keca weik, er nong deiki deriramu. Ukuramnga tep, Hagardi mali kange doupra, sun tapra bura sakotepu.
7Hagardi yuk mutu bena kunmaupa, Allah er si Yahwehdi dokotepu im deiki pel dona ngebo, malaikatdi epetepupa, bura mutu dinin, Syur mutu ban bisi piriman, me bungna damai bukmaupa, epu. 8Epudi, antapdareipa, im deiki pel don ngebo malaikatdi pepu. “Hagaro, Sarai er pel melimna nero. Dan mutu di yanmarem do? Tonda, dan mutu ‘Benkaman’ tenen, bisi banmarem do?” pepra asipetepu. Asipetepupa, Hagardi, “Gume, ne deiyo ner Sarai tep tapra, ‘Yuk mutu benkaman’ tenen, banman adano,” pepu.
9Hagardi upepupa, Allah er si Yahwehdi dokotepu malaikatdi tamupra pepu. “Gume, kan deiyo ner damai tamupra bememdi, er amngaipu bukra, er upu gekepra, dipru bouna dipu kunkamrume. 10Tonda, ne puto di melipkenepa, kandi deipmempa, dadeipdanen kunkameng nyapuda, pio weik kupmengepa, kandi men nuktume,” pepu. 11Upepkopda, Allah er si Yahwehdi aupu ton dukdongopra pepu. “Kan nai bo Allahdi, ‘Anerda kange mun kange doupra ikin kurure’ tenen, konum kael kepmakera tep, kanda mundu douamemyane, mi deipmemnyopda, er sida Ismael pepra deipkamreme. (Ibrani upu deikida, Ismael deiyoda, ‘Allahdi gekesere’ tenen, perami).
12Dinino, kandi deipkamrem mida, dipru boun kupra, yuk nesala tali kuramengtopu men kunkamre. Tali bura tara kuramre keledai bisamdi, nimi upu gekena gum dipapu, balila weik kuramretopu kunkamre. Kan midi yuk nesala yuma tep, sun upu men gekepredi, doryankamre taru neitamai dakuryopda, er cap, yuk neng cap, telep kupra kikiman men kunkamenge. Ange utopu, yuk nengdi er tep, ‘Angebo nun song’ tenen, mali kange doupra tenedankamenge. Tonda, er pe yala neng peda, mali kange doupra, malipu tenedankamenge. Tenpu kange doupra, telep kupra men kudankamenge.” Amalaikatdi Hagar tep pepu.
13Sun upu talepdareia tep nengeda, ataru di dipra ortaru yumada, Hagardi, Allah er si Yahweh tep, “Ne tupa dinerur Allah,” pepra, si sipena utopu peamu. Aupu peamu deiyoda, Hagardi, “Gume, ne tupa dinerur Allahda, nedi ton epmasi,” peramnga cadi, aupu peamu. 14Tonda, sun antapdarei mutu, me bungna kupkaida, yuk neng yumadi ame bungna si tep, “Ber-Lahai-Roi me bungna” pepra si perami. (Ibrani upu deikida, aupu deiyoda, ‘Pio Gam Kuna Deiyo Ngebodi, ne dinerur ngeboda, er me bungna aca’ tenen, perami). Sun antapdarei me bungnada, tupa akurura cadi, Kades mutu atara, Beret mutu ortara daneitamaida, tupa embarura cadi tupa kurure.
15Ange-ange yuma kupka cadi, amenda taru Hagardi er mi deipudi, Abram karepupa, Abramdi ami er si tep, “Ismael,” pepra karepu. 16Hagardi, er mi Ismael deipu taruda, Abram keteng tamun denge weik, 86 tahun konum wisi deipu.
હાલમાં પસંદ કરેલ:
Kejadian 16: KNTOT
Highlight
શેર કરો
નકલ કરો
Want to have your highlights saved across all your devices? Sign up or sign in
©2022 Wycliffe Bible Translators, Inc