Kejadian 14
14
Yu nengdi Abram er mi Lot tep tomopra dubeipa, Abramdi lyepu upu
1Abramda Hebron mutu bena kuramu taruda, ton tara nimi deiyo nengdi, yuk tara nimi deiyo neng tep, yu kupupa podarami. Sun ila nimi deiyo neng sida ake. Ada, Sinar mutu taleamu ngebo Amerafel cap, Elasar taleamu ngebo Ariok cap, Elam mutu taleamu Kedolamer cap, Goim mutu taleamu ngebo Tidal cap, sun yuma kikiman buluprapidi, yuk mutu neng tep porbei. 2Sun porbei mutu neng sida ake. Ada Sodom mutu taleamu ngebo Bera cap, Gomora mutu taleamu ngebo Biresa cap, Adma mutu taleamu ngebo Sinab cap, Seboim mutu taleamu ngebo Semeber cap, Bela mutu (tonda er si Soar mutu) taleamu ngebo cap tep porbei.
3Uda sun Bera cap, Biresa cap, Sinab cap, Semeber cap, Bela mutu taleamu ngebo cap, sun yumadi, ‘Yuk tara taleamenge deiyo neng tep, kikiman porbenkamep’ tenen, Sidim ban mutu bulupi. (Sidim ban mutu, er si ton Ua Laut Mokon mutu ton si perami). 4Asi pepmasen nimi deiyo neng yumada, Elam mutu taleamu deiyo ngebo, Kedolamer er amutarapu kuramipane, keteng tamun 12 konum kupupa, keteng tamun 13 deiki di, er upu tapra yanipidi, ‘Popkup’ tenen, porbei.
5-6Keteng tamun tiga belasnge (13) neitamai di Kedolamer cap, er tara kepropi nesala cap, Asterot-Karnaim mutu kikiman buluprapidi, acapu sun Erepait nesala tep popbisipi. Tonda, Ham mutu neitamai di sun Susit nesala tep popbisipi. Tonda, Syawe-Kiryataim mutu neitamai di, sun Emim nesala ton popbisipidi, ange utopu sun Hori nesala peda popbisipi. Ada, mutu gun mutu, Seir mutu di gonga kepra, popbisipmaiyanen, mo pio gum mutu, er sida El-Paran mutu popbisipidi, gawal daki. 7Ukupi dingeda, tamuprapidi, En-Mispat mutu neitamai (ton er sida Kades mutu) beidi, sun Amalek nesala popbisipidi, sun Amalek nesala taleami tara, ban-ban yuma dalupra dopropi. Ange utopu, Haseson-Tamar mutu kurami nesala, Amori nesala peda popbisipi.
8Uda, Kedolamer cap, er tara kepropi nesala cap, sun yumadi ukupi pangeda, sun yuk mutu taleami deiyo nengdi, ‘Kedolamer cap, er nyapsilip cap popbisipkamep’ tenen, Sidim ban mutu bei. Ada, sun ila nimi deiyo neng, Sodom mutunge cap, Gomora mutunge cap, Adma mutunge cap, Seboim mutunge cap, Bela mutunge cap, (ada Soar ton perami mutu) sun yumadi, ‘Kedolamer cap, er tara kepropi nesala cap popbisipkamep’ tenen, bari kepropidi, ketenepi.
9Kedolamer, er tara keproi nimi deiyo nengda ake. Ada Goim mutu taleamu ngebo Tidal cap, Sinar mutu taleamu ngebo, Amerafel cap, Elasar mutu taleamu ngebo, Ariok cap tep, ‘Popbisipkup’ tenen, ketenepi. Ada ila nimi deiyo neng dumbari di, yuk ila nimi deiyo neng pamu bari tep, ‘Popbisipkup’ tenen, ketenepi. 10Uda, Sidim ban mutu neitamaida, pio paleramser tu, mirin bentalai weik kupka cadi, popdanmaipane, sun Sodom mutu neng cap, Gomora mutu neng cap, ‘Anengdi poptapkuseng’ tenen, kware kupupa, sepdara banmaipane, ton nengda mirin tu paleramsernge neitamai saki. Ton nengda, sepdara banmaiyanen, mutu gon kwamu mutu inipra bei.
11Ange tep nengeda, sun dumbari nimi deiyo nengdi, Sodom mutu cap, Gomora mutu cap kurami nesala yuma taleami bunga yuma cap, sun ketenepra deiami jen keca yuma cap, dopropidi dubei. Akeca yuma dopra, amutu tapra yukai bendopi. 12Tonda, aneng dipu, Abram er mi Lot cap, Lot taleamu keca yuma cap, dalupra dopropidi, dubei. Ada, Lotda, Sodom mutu neitamai kuramnga cadi, er keca peda dopra bei.
13Uda, ange yuma ukupipane, tenpu ngebo tomopterepipa, inipra bendopu ngebo, ange yuma epra kael kepka cadi, Ibrani ngebo Abram, er damai yana lap peryau. Abram kuamngaida, ada Amori ngebo er sida Mamredi taleamupa, ila tekamu co kwamngai kuramu. Mamreda, ada Eskol cap, Akner cap sun weit bo kuramu. Sun yumada, Abram er tara konum keproi atep, Abram tep, ‘Nun nai kurure,’ tenerami.
14Inipra beu ngebodi, Abram tep, “Kan mi tomopidi, dubei adano,” pepra lap pepupa, Abram gekepudi, erdi peteramu nesala, denge weik 318 neng, er nyapsilip tep, kongpepu. Ada, ‘Ne mi Lot lyepra dopropkup’ tenen, bisi banmaiyanen, mutu si Dan mutu bei. 15Bisi banmaipane, alukunda neitamaida, Abramdi peipupa, er cap porbanmai nengdi neitamai bokrapidi, “Sun dumbari nimi deiyo neng cap, sun nyapsilip cap tep, dana-dana tara di popso,” peipupa, porbei. Porbanmaiyanen, Damsyik mutu deiki tara, mutu si Hoba mutu bei.
16Ukupra popbisipmaiya deiki di, sun dumbari ila nimi deiyo nengdi, upula dopropi keca yuma, Abram cap er nyapsilip capdi, ka tamupra dopropi. Tonda, er mi Lot cap, Lot er keca yuma cap, yu nengdi upula dopropi nerapu cap, yuk nesala cap, ange yuma Abramdi ka tamupra dopropudi, er damai tamupra dubeu.
17Abramdi, yu ngebo Kedolamer cap, er tara keproi nimi deiyo neng cap yuma, konum popbisipudi, er damai tamupra bisi banmau tarada, Syape ban mutu neitamai banmaupa, Sodom mutu taleamu deiyo ngebo yanmaupa, sun antapdarei. (Syape ban mutuda, er si ton Nimi Deiyo Ngebo ban mutu ton perami). 18Amendada, Salem mutu taleamu ila nimi deiyo ngebo, er sida Melkisedekdi jen keca, er sida roti cap, anggur mokon kange yawaramrenge cap dopra, ‘Abram karepkun’ tenen, duyau. Melkisedekda, Allah dana tara, nimi dana tara, neitamai antamdana deiyo ngebo kuramu. Akeca-keca yuma talepra, pio deiki tara kuredi, Ila Eremna Ngebo, nun nai Allah tep pel doramu.
19Melkisedekdi Abram tep, ‘Allahdi angebo meliprepa, pio teleppu kunkamre’ tenen, telep upu pepra deipudi, aupu ton pepu. “Akeca-keca yuma talepra, pio deiki tara kuredi, Ila Eremna Ngebo, nun nai Allahda,#14:19 Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sundi, ‘Akeca-keca yuma talepra, pio deiki tara kuredi, Ila Eremna Ngebo, nun nai Allah,’ tenena tep, ‘Elyon’ seki. Sun kael kemna tep, angeda konum jenek kupra sekmepu. erda akeca-keca cap, im deiki cap, tuai mutu yuma cap, ketekepra deipu. Nun nai Allahdi, kan Abram tep, pio telep kweipkamkere. 20Nun nai bo Allah, akeca-keca yuma talepra, pio deiki tara kuredi, Ila Eremna Ngebodi meliamkeupa, kandi animi deiyo neng, sun yu neng yumada, konum popra bisbisa kapmaumume. Allah er puto deiki di aneng konum popra bisipmarume.” Melkisedekdi Abram tep pepu. Upepupa, Abramdi, er ka tamupra dopra duyanmau keca yuma neitamai bokrapudi, Melkisedek tep, 10 persen#14:20 Sepuluh persen (10%) peramenge ngeda, ada meteka di bokra karenunga tep, penunge. Sepuluh ribu dingeda, seribu karenunge. Seratus ribu dingeda, sepuluh ribu karenunge. Ada, ‘Allahdi akeca yuma kareserura tep, er gispal dopkup’ tenen, akeca bokra karenunge. talipu karepu.
21Karepupa, Sodom mutu taleamu nimi deiyo ngebodi, Abram tep upepu. “Kandi tamupra duyanmarem keca neitamai bokra, ne tep anesala yuma karepneo. Bunga kecapuda, kandi ayuma dopropkurume,” pepu. 22Upepu dinin, Abramdi Sodom mutu taleamu deiyo ngebo tep tamupra pepu. “Gume. Ne nai bo Allah Yahweh,#14:22 Allah – Acada, Ibrani upu deiki di, Allah er si tep, ‘Allah Yahweh’ tonda ‘Elyon’ pepra seki. Aupu ‘Elyon’ deiyoda, ‘Akeca-keca yuma talepra, pio deiki tara kuredi, Ila Eremna Ngebo, nun nai Allah,’ tenena tep, ‘Elyon’ seki. Sun kael kemna tep, angeda konum jenek kupra sekmepu. akeca-keca yuma talepra, pio deiki tara kuredi, Ila Eremna Ngebo, im deiki cap, mutu cap yuma, Ketekemna Deiyo Ngebo tep upepsi.
23Sodom mutu talere ngebo, er keca tamupra duyanyopda, er keca tenpunge peda men dopropkamne. Ada erdi, ‘Nedi karepmemesi keca deiki di, Abramda isomka ngebo kurure,’ pepra, ‘Kange erepra peprur’ tenen, metek keca peda pio men dopropkamne. Ada, opkal win tapu do, yantang er sida sandal, geten tapu do, tenpu metek keca peda, pio men dopropkamne. Sodom mutu keca dopropnyopda, Allah kandi mali kupra deipnetume,” upepra deipsi.
24Nedi Allah tep upepsa tep nengeda, kan keca neitamai di bokra, pio men dopropkamne. Ne melimna nengdi jepmai keca cap, kandi, ‘Abram er jen talepra melimna neng tep karepkun kecada aca,’ tenepmarum keca cap, akecapu karepnemempa, ne melimna neng sun sida, Aner cap, Eskol cap, Mamre cap karenkamne. Sun doronada telep dinin, yuk kecada pio gume.
હાલમાં પસંદ કરેલ:
Kejadian 14: KNTOT
Highlight
શેર કરો
નકલ કરો
Want to have your highlights saved across all your devices? Sign up or sign in
©2022 Wycliffe Bible Translators, Inc