LUKASI 24
24
Pembangu i Yesu
24:1-12
(Mat. 28:1-10, Mrk. 16:1-8, Yoh. 20:1-10)
1Ri eo Minggu, mowuro-wuro mpodago, waʼa mbeʼa setu njoʼu ri dayo mangangkeni waʼa rampa anu roomo napatoka ntau seʼe. 2Kajela ntau seʼe ri dayo, narata watu anu ndadampoka dayo tetadulimo. 3Nepa mesua tau seʼe ri raya dayo setu, paikanya bareʼe narata watangkoro i Yesu njairia. 4Sindara tau seʼe njau mekakore njairia seʼi pulimo raya manawa-nawa anu mewali setu, tingkarasaka radua tau anu morengko mengkido-ngkido mekakore mosu ri tau seʼe. 5Maʼai kojo kaeka ndaya ntau seʼe, nepa metutu tudu ri tana, sindara setu tau anu radua setu mompau ri tau seʼe natoʼo, “Wenu komi mampepali tau tuwu ri oyo ntau mate? 6#Mat. 16:21, 17:22-23, 20:18-19, Mrk. 8:31, 9:31, 10:33-34, Luk. 9:22, 18:31-33 Sira bareʼemo reʼe ireʼi. Sira membangumo! Da ndiendomo nunjaa anu roomo ndatoʼoka komi ri sindara Sira ntongo ri Galilea, 7inceʼemo ‘Ana Manusia sangaya-ngaya da ndapepombaika ri tau masalaa, nepa ndapaku ri kaju ndapanggo, pai ri eo anu katatogo Sira da membangu.’ ”
8Tekaendomo waʼa mbeʼa setu wuwunya anu ndatoʼo i Yesu. 9Butu mewalilimo tau seʼe ungka ri dayo setu, napaumo ntau seʼe pura-pura anu mewali setu ri suro anu sampuyu pai sambaʼa pai pura-pura anaguru anu ntaninya. 10Waʼa mbeʼa anu mampetumbu pura-pura anu mewali setu ri waʼa anaguru i Yesu, inceʼemo: i Maria Madalena, i Yohana pai i Maria ine i Yakobu, pai waʼa mbeʼa anu ntaninya anu sangkani-ngkani pai tau seʼe. 11Paikanya waʼa ncuro setu mancawanga ndaya waʼa mbeʼa setu podo mampau anu bareʼe monco. Bareʼe naaya ntau seʼe pasimbaju waʼa mbeʼa setu. 12Paikanya meoko i Peturu liu-liu molonco njoʼu ri dayo. Kajelanya njairia mobonggo siʼa mampeole raya dayo, anu nakita podo ayapa sompu anu njau njairia. Jingki kojo raya i mPeturu, nepa mewalili siʼa maria ngayamo pompeoasi anu reʼe ri rayanya kono nunjaa anu tepewalimo setu.
Ri yae njaya njoʼu ri Emau
24:13-35
(Mrk. 16:12-13)
13 #
Mrk. 16:12
Ri eo setu seʼe, reʼe radua anaguru i Yesu ntongo mpelinja njoʼu ri lipu sambaʼa anu mampotoʼo Emau, tempo-temponya sampuyu pai sambaʼa kilometeri ungka ri Yerusale. 14Seʼi melinja napasimbaju ntau seʼe kono pura-pura anu tepewalimo setu. 15Ntongo mompasimbaju tau seʼe mantoʼo parata ndaya ncambaʼa seʼe, jela i Yesu ngkalio-A melinja sangkani-ngkani pai tau seʼe. 16Nakita ntau seʼe i Yesu, paikanya reʼe sangaya anu mampapopuʼu painaka bareʼe naincani ntau seʼe Sira. 17Nepa ndatoʼo i Yesu, “Nunjaa anu ndipasimbaju ri yae njaya seʼi?”
Meʼonto tau seʼe tongawa ri lio ntau seʼe kasusa ndayanya. 18Sambaʼa ri oyo ntau radua setu anu mampotoʼo i Keleopa, meoasi ri Yesu natoʼo, “Bara jamo Komi ngkalio-Mi tau mencua ri Yerusale anu bareʼe maincani nunjaa anu mewali njairia wawaseʼi?”
19Meoasi i Yesu ndatoʼo, “Nunjaa anu mewali?”
Mesono tau seʼe natoʼo, “Anu mewali ri Yesu, tau ungka ri Nasare setu.” “Sira sambaʼa nabi. Waʼa mpau-A pai waʼa mpowia-A makuasa kojo – madago ri pangkita mPue Ala, ewanceʼe seʼe ri pangkita ntau pura-pura. 20Waʼa ntadulako ntadu mpanyomba pai waʼa ntadulako bancata mampepombaika Sira da ndahuku mate pai tau seʼe mampaku ri kaju ndapanggo Sira! 21Ntanoka kami mampomata-mata Siramo anu da mangalapasaka to Isaraeli! Pai sandeme seʼi reme katatogo ungka ri katepewalinya setu. 22Seʼi woʼu bara tesangkuja weʼa ungka ri oyo mami mangajingkiti kami. Mowuro-wuro mpodago tau seʼe njoʼu ri dayo, 23paikanya bareʼe narata ntau seʼe watangkoro-A njairia. Nepa mewalili tau seʼe natoʼo tau seʼe mangkita malaʼeka, pai waʼa malaʼeka setu mantoʼo i Yesu tuwumo. 24Pai bara tesangkuja tau ungka ri oyo mami anu njoʼu ri dayo, pai marata nunjaa anu natoʼo waʼa mbeʼa setu lawi ewanceʼe kojo, podo bareʼe nakita ntau seʼe i Yesu.”
25Nepa ndatoʼo i Yesu ri tau seʼe, “Komi lawi tengo! Malengi gaga komi da mampoaya monco pura-pura anu roomo natoʼo waʼa nabi! 26Ara banya ndatoʼo Mokole Tadungkadago setu sangaya-ngaya da mangaepe riunya kapari setu, nepa narata peawanya?” 27Roo setu ndatotoraka i Yesu tau seʼe nunjaa anu teʼuki ri raya Ncura Magali anu kono koro-A, montepuʼu ungka ri waʼa ncura i Musa pai sura waʼa nabi.
28Sindara setu tau seʼe mosumo ri lipu da kanjoʼu ntau seʼe, i Yesu mowia ewa da melinja mpaliu, 29paikanya nataʼamaka ntau seʼe natoʼo, “Ndipeʼonto ri kareʼe mami,” seʼi mosumo da mawengi pai tekarupumo woʼu. Mesuamo i Yesu ri banua kareʼe ntau seʼe da sambengi njairia. 30Ri tempo mpotunda mangkoni sangkani-ngkani pai tau seʼe, ndatima i Yesu roti, ndaunde i Pue Ala, ndaripu-ripuka pale-A roti setu, nepa ndawaika tau seʼe. 31Nepa menaa mata ntau seʼe mangkita i Yesu. Paikanya Sira payamo ncoroba bareʼemo nakita mata ntau seʼe. 32Napombetoʼoka ntau seʼe, natoʼo, “Ara banya ewa da mesongke paepe ndayata, sindara Sira mompasimbaju pai kita ri yae njaya, mantotoraka bangani Ncura Magali ri kita?” 33#Mrk. 16:13 Liu-liu meoko tau seʼe malai mewalili ri Yerusale. Njairia narata ntau seʼe anaguru i Yesu anu sampuyu pai sambaʼa setu ntongo mompasambaka sangkani-ngkani pai anaguru anu ntaninya. 34Natoʼo ntau seʼe, “Lawi monco i Pue tuwu muni! Sira mampapamaramo koro-A ri Simo!”
35Radua anaguru i Yesu anu nepa jela setu, mampau anu napomberataka ntau seʼe ri tongo mpelinja ntau seʼe pai ewambeʼi kayosa mpaincani ntau seʼe i Pue ri sindara Sira maripu-ripu roti.
I Yesu mampapamara koro-A ri waʼa anaguru-A
24:36-49
(Mat. 28:16-20, Mrk. 16:14-18, Yoh. 20:19-23, Pwn. 1:6-8)
36Ntongo inceʼepa anu napau-pau ntau seʼe, tingkarasaka i Yesu ngkalio-A mekakore ri tongo-tongo ntau seʼe, ndatoʼo, “Karodo ndaya ri komi!”
37Tesaluntengku pai maeka raya ntau seʼe, maka nasarumaka tau seʼe mangkita angga. 38Paikanya ndatoʼo i Yesu, “Wenu painaka maeka komi? Wenu painaka meumba kabata-bata ndayami? 39Ndipeole paleku pai ndipeole witiku. Da ndipaincani, Yaku ngkalio-Ku inceʼi! Pejamamo pai peole mpodago, maka angga bereʼe sanga pai wukunya ewa anu ndikita ri Yaku seʼi.” 40Seʼi mompau i Yesu ndatujuka tau seʼe pale pai witia. 41Pai ri sindara bareʼepa nakoto ntau seʼe maaya, nakeni ngkaʼai ngkawongko ndaya pai jingki ndaya, meoasi i Yesu ri tau seʼe ndatoʼo, “Bara reʼe pangkonimi ireʼi?” 42Nawai ntau seʼe ri Sira sampuʼa bau ndasole. 43Ndatima i Yesu bau setu, nepa ndakoni ri suara ntau seʼe.
44Roo setu ndatoʼoka tau seʼe, “Inceʼimo waʼa anu roo Kupapaincanika komi sindara Yaku ntongo sangkani-ngkanipa pai komi, kakononya waʼa anu roo teʼuki kono Yaku ri raya waʼa Ncura i Musa, Waʼa Nabi, pai Ngayu, sangaya-ngaya da mewali.”
45Ungka lairia ndaloka i Yesu nawa-nawa ntau seʼe da naka naratandaya bangani Ncura Magali. 46Nepa ndatoʼoka tau seʼe, “Ri raya Ncura Magali lau ndaʼuki i Mokole Tadungkadago sangaya-ngaya da mangaepe pari pai sangaya-ngaya da membangu muni ungka ri kapate ri eo anu katatogo. 47Ewanceʼe woʼu ri raya ntoʼo Mokole Tadungkadago setu sangaya-ngaya da ndapobambarika ri mpengaya-ngaya banca, tolino sangaya-ngaya da majea, pai i Pue Ala bareʼemo mangkitanaka salaa. Pai bambari setu sangaya-ngaya da ndapobambarika montepuʼu ungka ri Yerusale. 48Komimo anu mewali sabi ri pura-puranya setu. 49#Pwn. 1:4 Pai Yaku ngkalio-Ku da mampakatu ri komi nunjaa anu roo ndajanji i mPapa. Paikanya komi sangaya-ngaya da mopea mpaliu ri kota seʼi rantani kuasa ungka ri Pue Ala mangkuasai komi.”
I Yesu ndaoretaka ndeki suruga
24:50-53
(Mrk. 16:19-20, Pwn. 1:9-11)
50 #
Pwn. 1:9-11
Roo setu ndapoyunu i Yesu tau seʼe mesuwu ungka ri kota, kalawa ngkanjoʼu ntau seʼe siwia pai kalawa lipu Betania. Njairia ndaokotaka pale-A, nepa ndadonco tau seʼe. 51Sindara mpawianaka-A inceʼe, teoretakamo Sira ndeki suruga, tepogaʼamo pai tau seʼe. 52Tau seʼe metutu manyomba ri Sira, nepa mewalili ri Yerusale maʼai kawongko ndaya ntau seʼe, 53pai bareʼe bali-bali paunde-unde ntau seʼe i Pue Ala ri Banua i mPue.
હાલમાં પસંદ કરેલ:
LUKASI 24: LAIPMF
Highlight
શેર કરો
નકલ કરો
Want to have your highlights saved across all your devices? Sign up or sign in
