PALABURU 6
6
Kajaʼa ntolino
6:1-8
1Butu teranga-ranganimo kasondo ntolino pai tesebumo ri sambawo lino, pai ndapoanasimo waʼa ana anu weʼa, 2waʼa ana mpue ala mangkita waʼa anaweʼa anu madolidi setu. Inceʼe painaka naporongo ntau seʼe waʼa anaweʼa anu napokono ntau seʼe. 3Inceʼe painaka ndatoʼo i mPue, “Bareʼe kupokono tolino da tuwu rantani masae-sae; tau seʼe podo awu ntana, anu sangaya-ngaya da mate. Montepuʼu seʼi-seʼi tinuwu ntau seʼe bareʼe da meruu ungka 120 ntaʼu.” 4#Pai. 13:33 Montepuʼu ungka ri tempo setu, reʼemo waʼa rakisasa ri lino. Tau seʼe setu inceʼemo muli waʼa anaweʼa ntolino anu molangkai pai waʼa ana mpue ala. Waʼa ntau rakisasa setu inceʼemo anu mewali waʼa ntau anu makoje anu bangke pai waʼa ntau anu tebambari ntongo ipiamo.
5 #
Mat. 24:37, Luk. 17:26, 1 Ptr. 3:20 Ndakita i mPue maʼaimo kojo kajaʼa waʼa ntau ri lino; pura-pura nawa-nawa ntau seʼe paka majaʼa. 6Moncosoi Sira madika tau seʼe ri lino. Maʼai kateloo ndayaa, 7painaka ndatoʼo, “Da kuopisaka tolino anu roo kupapewali setu, ewanceʼe seʼe waʼa ntonci pai waʼa mpinatuwu ntaninya, maka moncosoi kojo raya mampapewali tau seʼe.” 8Paikanya i Noho, siʼa mampakawongko taya i mPue.
Tuntuka i Noho
6:9-22
9-10 #
2 Ptr. 2:5
Seʼimo tuntuka i Noho. Ananya tatogo paka tuama, inceʼemo i Semu, i Yapeti pai i Kamu. I Noho bareʼe mowia sala, pai podo siʼa tau anu madago ri tempo setu. Siʼa tuwu ri pokenta pai Pue Ala. 11Paikanya pura-pura tau ntaninya paka majaʼa ri pangkita i mPue, ri mbeʼi-mbeʼi ntano ri sambawo lino reʼe pejeani. 12Ane ndapapowawo i mPue Ala lino seʼi podo waʼa njaʼa anu tongawa, maka pura-pura tau paka majaʼamo katuwunya.
13Inceʼe painaka ndatoʼo i mPue Ala ri Noho, “Roomo kubotusi da maʼopisaka pura-pura anu tuwu. Tau seʼe da kugero sangkani-ngkani pai lino, maka lino seʼi bukemo pai poruta ntau seʼe. 14Powiamo galamu sambaʼa duanga bangke, timaka kaju anu maroso; da nupowiaka waʼa lincu ri rayanya, da nusipiti pai da nupijaka damagi ungka ri rayanya pai ungka ri sambalikunya. 15Duanga setu 133 meteri karatenya pai, 22 meteri kabininya, pai 13 meter kayombunya. 16Da nupeatani duanga setu, dikaka tuke 44 sentimeteri ri oyo ata pai rindinya. Da nupowia tatogo ntapi joia duanga setu, pai da nudika sambaʼa tuke ri apanya. 17Yaku da mampapesambori ue ri wawo lino da naka opi wuwunya anu moʼinosa. 18paikanya pai siko da kupareʼe pojanji. Peʼulayamo ri raya duanga setu sangkani-ngkani pai rongomu pai waʼa anamu pai waʼa rongo ntau seʼe. 19-21Papesua ri raya duanga setu sambaʼa laki pai sambaʼa tina ungka ri pura-pura ngaya ntonci pai ngaya mpinatuwu anu ntaninya, da bareʼe teʼopisaka pura-pura.” 22#Ib. 11:7 Nawianaka i Noho pura-pura anu ndasongkaka i mPue Ala siʼa.
હાલમાં પસંદ કરેલ:
PALABURU 6: LAIPMF
Highlight
શેર કરો
નકલ કરો
Want to have your highlights saved across all your devices? Sign up or sign in