POTETALA WA'A NCURO 4
4
I Peturu pai i Yohane ri suara waʼa Majalisi Agama
4:1-22
1Ntongo mompaupa i Peturu pai i Yohane pai waʼa ntau setu, nalempomo waʼa ntadulako ntadu mpanyomba pai tadulako nto pojaga Banua i mPue sangkani pai waʼa nto Saduki madadu i Peturu pai i Yohane. 2Majaʼa raya ntau seʼe maka i Peturu pai i Yohane mampaguru waʼa ntau sondo anu mantoʼo i Yesu membangu muni ungka ri kapate. Inceʼe sambaʼa katongawanya tau mate da ndapatuwu muni. 3Inceʼe painaka nasoko ntau seʼe suro radua setu nepa nawunca ri raya ntarunggu. Paikanya ua mawengimo, i Peturu pai i Yohane ndadikamo njairia rantani bangke reme. 4Paikanya waʼa ntau anu mangadongemo pompaguru waʼa ncuro setu, maria anu meaya. Painaka kakoteranga-rangani imba ntau seʼe, da reʼemo alima ncowu tau imbanya.
5Bangke reme tepasambakamo ri Yerusale waʼa ntadulako Majalisi Agama sangkani pai waʼa ntadulako nto Yahudi pai guru agama. 6Momberata tau seʼe pai tadu mpanyomba Bangke i Hanasi pai Kayapa, i Yohane, i Alesande pai waʼa ntau muli i ntadu mpanyomba bangke. 7Ndakenimo i Peturu pai i Yohane mancuaraki waʼa ntau seʼe, nepa meoasi tau seʼe, “Ewambeʼi jayanya ndipampakaʼosa tau pungku setu? Pai roso ngkuasa ungka ri ncema ndapampowia setu?”
8I Peturu nakuasai Inosa mPue Ala, mesono siʼa natoʼo, “Ee komi waʼa ntadulako nto Yahudi pai waʼa anggota Majalisi Agama! 9Kami da ndibotusi sandeme seʼi ua mancuru powia mami anu madago mantulungi tau pungku pai ua da rayami maincani ewambeʼi painaka osa tau setu. 10Mewali da ndipaincani, pai pura-pura to Isaraeli sangaya-ngaya da naincani, tau seʼi toamo mekakore ri suarami madondemo koronya ua roso ngkuasa ungka ri Yesu Kerisitu to Nasare setu. Komi mampaku ri kaju ndapanggo i Yesu setu, paikanya i Pue Ala mampatuwu muni Sira. 11#Pol. 118:22 I Yesumo seʼi anu ndatoʼo Ncura Magali ewa seʼi,
‘Watu anu nasepimo waʼa mpande,
inceʼemo anu mewalimo watu nono ntongonya.’
12Podo ua i Yesu Kerisitu tau da tesorepaka. Maka ri sambawo lino seʼi bereʼe sako sambaʼa tau ri oyo ntolino anu marata kuasa ungka ri Pue Ala, anu da mancorepaka kita.”
13Jingki raya waʼa anggota Majalisi Agama mangkita kaloʼe pai kakoje i mPeturu pai i Yohane. Lawi naincani ntau, tau radua setu podo waʼa ntau biasamo seʼe pai bereʼe sikolanya. Paikanya naendo ndayamo ntau seʼe tau radua setu anaguru i Yesu. 14Bareʼemo naincani ntau seʼe mantoʼo bara nunjaa-njaa, maka tau anu napakaʼosa setu njau mekakore ri suara ntau seʼe sangkani-ngkani pai i Peturu pai i Yohane. 15Inceʼe painaka napokau ntau seʼe i Peturu pai i Yohane da mesuwu ungka ri kareʼe mpogombo setu, roo setu mogombo tau seʼe. 16Natoʼo ntau seʼe, “Ewambeʼi da tapangkuja waʼa ntau seʼi? Pura-pura tau ri Yerusale maincanimo tanda ngkuasa anu ndapojingki seʼi, napowia ntau seʼe radua. Bareʼe da takoto mangancapu. 17Paikanya da naka neʼemo tebaanaka ri waʼa ntau, moruana taekasi tau radua setu da naka neʼemo napau-pauka tau kono toʼo i Yesu.”
18Roo mogombo tau seʼe, napapesua muni suro radua setu, nepa natoʼoka tau seʼe. Montepuʼu seʼi-seʼi bareʼemo maya komi da mantoʼo-ntoʼo, bara mompaguru kono toʼo i Yesu.
19Paikanya mesono i Peturu pai i Yohane, “Ndinawa-nawa mpodago nunjaa anu monco ri suara mPue Ala. Da malulu songkami bara da malulu songka i mPue Ala. 20Maka kami bareʼe da kakoto mampeʼontoka da mampau-mpau nunjaa anu roo kakita pai kadonge ngkalio mami.” 21Bereʼe jaya narata waʼa Majalisi Agama da mahuku i Peturu pai i Yohane. Paikanya naekasi ntau seʼe suro radua setu, nalapa nepa napokau malai, maka maeka raya ntau seʼe ri tau sondo anu maunde-unde i Pue Ala ua mangkita anu ndapojingki setu. 22Tau anu ndapakaʼosa setu yabimo opompuyu ntaʼu tinuwunya.
Waʼa ntau meaya merapi koje ndaya ungka ri Pue
4:23-31
23Ri karoonya ndalapa i Peturu pai i Yohane, mewalilimo suro radua setu njoʼu madadu waʼa yununya, pai natuntuka tau seʼe pura-pura anu natoʼo waʼa ntadulako ntadu mpanyomba pai waʼa ntadulako nto Yahudi ri tau seʼe radua. 24#Pa. 20:11, Neh. 9:6, Pol. 146:6 Butu nadonge ntau seʼe, napasintuwu ntau seʼe rayanya mekakai ri Pue Ala, merapi tau seʼe ri Pue Ala, natoʼo, “Pue, komimo anu mampapewali yangi, tana pai ue sangkani pai waʼa banganinya. 25#Pol. 2:1-2 Pai Inosami komi roo mompau ri waʼa ntau piamo mami i Daudi inceʼe anamayunu-Mi nditoʼo,
‘Wenu painaka waʼa ntau, anu bareʼe maincani i Pue, majaʼa rayanya,
wenu painaka waʼa banca da mampareʼe tetala anu bereʼe yowenya?
26Waʼa mokole ri lino mompatikali da moʼiwali,
pai waʼa ntadulako mompasanjuyu
da maewa i Pue pai Mokole Tadungkadago.’
27 #
Mat. 27:1-2, Mrk. 15:1, Luk. 23:1, 7:11, Yoh. 18:28-29 Maka lawi i Herode pai Pontiu Pilatu roo momberata pai waʼa ntau anu bareʼe maincani i Pue sangkani pai waʼa nto Isaraeli ri kota seʼi. Tau seʼe momberata da maewa i Yesu ana-Mi anu mepoʼinaya anu magali setu, anu roomo ndipatongko mewali Mokole Tadungkadago. 28Tau seʼe mompasanjuyu da mawianaka mengaya-ngaya, anu roomo ndipakanoto riunya setu da mewali. Pai komi mampakanoto setu silulu pai kuasa pai pepokono-Mi ngkalio-Mi. 29Seʼi-seʼi Pue, yosa ndipangkita ewambeʼi napaekasi kami. Ndipasoaka tempo ri kami waʼa mbatua-Mi seʼi da mampobambarika Nuntu-Mi ri kabareʼenya maeka. 30Ndipelae kami da naka kakoto mampakaʼosa tau majuʼa pai mantuju waʼa tanda ngkuasa anu napojingki ndaya ntau mangkita, mamponono roso ngkuasa ungka ri toʼo i Yesu, Ana-Mi anu magali setu.”
31Roo mekakai ewanceʼe tau seʼe, monjuamo banua kareʼe mpeari ntau seʼe. Tau seʼe pura-pura napesuamo Inosa mPue Ala, pai natepuʼumo mompau ri kakoje ndaya mampetumbu Nuntu ungka ri Pue Ala.
Katuwu sangkani-ngkani
4:32-37
32 #
Pwn. 2:44-45
Pura-pura tau meaya setu tuwu siwia raya pai ponawa-nawa. Bereʼe mau sambaʼa tau ungka ri tau seʼe anu maepe nunjaa anu napotumpu podo anunya ngkalionya. Mpengaya-ngaya anu naporeʼe ntau seʼe, napake sangkani-ngkani. 33Pai kuasa anu bangke waʼa ncuro setu mangancani kono katuwu muni i Yesu. Inceʼe painaka ndadonco i mPue Ala tau seʼe. 34Bereʼe mau sambaʼa tau ungka ri oyo ntau seʼe anu mampomakura bara nunjaa-njaa. Maka anu mampotumpu tana bara banua, napobalu tana bara banua ntau seʼe; nepa olinya nakeni ntau seʼe 35napepombaika ri waʼa ncuro. Nepa doi setu ndatila-tilaka ri sambaʼa-sambaʼa tau da mampoyoweka. 36-37Ewanceʼemo woʼu powia i Yusu. Siʼa woʼu napobalu tananya, nepa doi olinya nakeni napepombaika ri waʼa ncuro. I Yusu seʼi, siʼa sambaʼa tau muli i Lewi ungka ri Kiperu; waʼa ncuro mampapotoʼo woʼu siʼa i Baranaba (posokinya Topompalindo).
હાલમાં પસંદ કરેલ:
POTETALA WA'A NCURO 4: LAIPMF
Highlight
શેર કરો
નકલ કરો
Want to have your highlights saved across all your devices? Sign up or sign in
