Jean 2
2
Diwela o Cana
1Bilumbu bibeji binovioga bamavaga mulambu o Cana o yiari yiGalilee. Nguji Jesus amaba vana 2na Jesus na badukitsi bandi bamanengulu o mulambu wandi. 3Malamu manosuka, nguji Jesus amamutsingula rie: Besaa na malamu.
4Jesus amamuwivula rie: Mugetu diambu yi divu va gari jetu nagu? Diweru diami disakatola.
5Nguji andi amatsingula basalitsi rie: Duvaga adi odutsingula.
6Avana vamaba bisanga bisiamunu abi baJuif bamasalisa udugusu migaga miogu. Yisanga yisanga yimaba na magumidunana vo kama na magumabeji mambuta. 7Jesus amabatsingula rie: Basanu bisanga mamba.
Bamabibasa levilevi.
8Mbana Jesus amabaruma rie: Mateyianu na mabeyianu ombu fumu mulambu.
Bamadivaga. 9Ava fumu mulambu amanuina mamba amamakaluga malamu asamajaba agunyi malamu meni mamarugasana (tumba basalitsi abamayetega mamba bamajaba). Amanengila yiwela-mugetu, 10amamutsingula rie: Mutu uotsu olegaba malamu maboti mbana pa abamanengulu bamanu puela obagabila amagaa maboti. Tumba ndeʼ gutsisueganga malamu maboti te na diweru diedidi!
11Anana Jesus amavayila yimaga yitega o Cana o yiari yiGalilee. Amalasa bundumba buandi na badukitsi bandi bamamuvayila yitu.
12Adina dinovioga Jesus amagabuga o Capernaum. Nguji andi na baana banguji bandi na badukitsi bandi bamayetsana yika mua bilumbu guna.
Jesus ukota ekoti o Ndagu Nsambi
(Matt 21.12-13; Marc 11.15-17; Luc 19.45-46)
13Diweru difeta aji baJuif benengili Paque dimatola na Jesus amawenda o Jerusalem. 14Amakota o Ndagu Nsambi na amarasuna basumbisitsi babangombi na babindombu na bamabembi na basansitsi bambongu batsana va batavula bogu. 15Anovaga mukasa uminsiyi amababinga jogu botsu o Ndagu Nsambi na bindombu na bangombi wandi. Amapansa mbongu tsibasansitsi na amagudiga batavula. 16Mbana amatsingula basumbisitsi bamabembi rie: Magusulianu vava, duyavaga Ndagu Taji ami ndagu muteti!
17Badukitsi bandi bamarangimina yiri dimasonugu rie: Aa, Nsambi duyitsu duNdagu agu duvu nderi muji o gari murima ami.
18BaJuif bamamuwivula rie: Tulasi yilimba ayiutujabisa yiri guna musuga uvaga nana guivayili.
19Jesus amabagabusila rie: Pansanu Ndagu ejiji na yiotsu ayi bilumbu birieru biusukila nyumuejirunga. 20BaJuif bamavosa rie: Jetu tumamana magumana na bilima bisiamunu urunga Ndagu ejiji na ndeʼ gumuejirunga mu bilumbu birieru buandi?
21Tumba Ndagu Nsambi aji Jesus amavosila jimaba jidunyuru duandi. 22La dibandu ava amarambuyila o dufu badukitsi bandi bamarangimina yiri amadivosa na bamavayila Bisonu na mambu maJesus yitu.
23Ava Jesus amabila o Jerusalem o feta Paque batu banolaba bimaga bipuela abi amavaga bamamuvayila yitu. 24Ne nana Jesus asamabasunsila murima mu mbari amajabanga botsu. 25Asamaba na nsala yiri bomutubulila bifu bibatu mu mbari jaʼ beni amajabanga mirima miogu.
હાલમાં પસંદ કરેલ:
Jean 2: PUU1992
Highlight
શેર કરો
નકલ કરો
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
