Kejadian Uram 6
6
Ninyi aryi Er Imtamnyi li tenen dinyi asi kunuramnyi deyok
6:1-8
1A talak ara ato kuboka ninyi yaldakde baramnyi. Ani, tukwetam nirya ninyi yubwa ilinto yaldakoka, kam nerabwe ilinto nebtabakde baramnyi. 2Ato kuboka ninyi sirik nermabwe ara urasin teleb-teleb nerabwe akwe nerdaramnyi. A deyok aryi Er Imtamnyi mabwe#6:2 Ibrani uram ara, “Er Imtamnyi mabwe,” eboka sekyi. A nang ara, “Unato kun nang,” tenen nun bita kum bingnub. Ton nang ara, “A nang ara Er Imtamnyi uram erbana nang kuramnyi,” tenenung. Ba, yuk nang ara, “A nang ara minob kuramnyi mikib weik nang kuramnyi,” tenenung. Bok, yuk nang ara, “A nang ara Er Imtamnyi uram kekeramnyi nang kuramnyi,” tenenung. aryi diramnyi uca, a nerabwe asi sun kanyi kuramwe. Ura, sun kanyi kubne to kuboka a kam nerabwe asi dororamnyi. 3Ba, Er Iya Erebdobnyi biryi ato ebmou, “Ninyi sirik ara tub ab ining ab bonung akiryi sun kam kunkwaming talak ara kwalina 120 baryi demang kwalinkwaming. Ati, Ni isin ara ninyi sirik nong umbura dam iya kum kubkwande. Eda, tiya kunmaci ani, kum dandobci ura, dinkwaming,” ebmou. 4A talak ara tukwetam ninyi ara weika koukwe ninyi neramnyi. Ani, o talak kubde baramnyi talak ababyi weika koukwe ninyi neramnyi. A nang ara mikib weik nang kuramnyi asi yuk nang aryi sun si weik ereramnyi. Ato kuramnyi talak ara Er Imtamnyi mabwe aryi ninyi sirik nermabwe, kam nerabwe asi doboka mi deirdongoramnyi.
5Ura, Er Iya Erebdobnyi biryi diramwe uca, tukwetam ninyi ara yu kanya akwe boboka ordaramnyi.#Mat. 24:37; Luk. 17:26; 1Ptr. 3:20 6Ato kuramnyi ba, Er Iya Erebdobnyi biryi, “Se, ninyi yala ara talyi kikniboka tukwetam kam deiranse,” tenebmou. 7Ura, A deyok aryi Er Iya Erebdobnyi biryi ato ebmou, “Ninyi ab, kamyoa tukwe dam yibarande dinyi ab, imtam langlang eryibarande dinyi ab nirya kikniboka, tukwetam a kabdeibsa nirya kum dandeibokwan,” ebmou. 8Uca, Nuh bira Er Iya Erebdobnyi biryi teleb tenen dinyi akwe kunuramwe deyok aryi Er kanyi deiamwe.
Nuh deyok
6:9-22
9-10Nuh bira ato kubde yanamwe. Nuh bira er mabwe winiryi sal akwe deiamwe. Er mabwe si ara Sem ab, Ham ab, Yafet ab deiamwe. A talak kuramnyi ninyi kankan ara Nuh bisi telebto dinyi akwe kununanyi nun kuramwe. Ani, Nuh bira Er Iya Erebdobnyi ab uram tonkwa sisingnandei. 11A talak ara Er Imtamnyi urasin dam aryi tukwetam ninyi nirya yu kanya akwe boboka malya limdon ordaramnyi. 12Ura, Er Iya Erebdobnyi biryi diramwe uca, tukwetam ninyi kuramnya nirya ara teleb dinyi ton kum kuramiryi, yu kanya akwe boboka ninyi malya limdon ordaroramnyi.
13Ura, Er Iya Erebdobnyi biryi Nuh bisi ato ebmou, “Tukwetam lulungdur dinyi kiknibse dinyi nirya ara malyito akwe kubdanin yibanungci, tukwetam asi malyi kimnung ati, kamyoa yuk-yuk dinyi babyi, ninyi babyi, tukwe ab tonkwa kum dandeibkun. 14Ati, kanci co si gofir aryi weik me deici yiban aia kiknibdum. A me deici yiban aia kiknibkwamarim ara ai yuk-yuk wiliboka-wiliboka kiknibkwandum. Ukubminyi ura, baitam babyi aitam babyi ara co iya aryi denebkwandum. 15A me deici yiban aia kiknibkwamarim ara ato kuboka dobkwandum. Cangtam kiklina ara 133 meter baryi kikliboka sekwandum. Ba, dina-dina barwetam ara 22 meter baryi kikliboka sekwandum. Ba, im dubtam ai dang-dang ara 13 meter baryi 13 meter baryi kikliboka sekwandum. 16Ukuboka me deici yiban aia kiknibminyi ura, aruma dobkwandum. Ani, im dubtam aruma kan abilinga kan ara kiklina tentok kikliboka lobdeibkwandum. Ani, bisik bublan ara dinatam barwetam kuboka botobkwandum. Tonda, a aia dukoka winiryi yangabkwandum. Ara, youkwa ai ton, noutam ai ton ani, im dub ai ton yangabkwandum. 17Akai me deici yiban aia dobkwamarim ara talya kuma. Eda, ilila me karebnyi ba, tukwetam kamyoa babyi, lulungna kum kurande keica babyi, utotoa nirya isin daksekwamang. 18Ucab, kan tentok ara minob uram ebkatabdeibkwankin. Ara, me deici yibarande aia dobmarim ai umbura wekdobkwandum. Ara, kan ab, kan ner ab, kan mabwe ab, kan mabwe nerabwe ab ara akai umbura wekdobkwandarur. 19Ani, tonda tukwetam kururci isin nebneb erande kamyoa nirya yim ton ner ton boboka dongobkwandum. A dongoryankwamarim dinyi ara kan ab tonkwa kam kubkwandum dinyi dongoryankwamarim. 20Ara, maka yala nirya ab, bisam yala nirya ab, kamyoa mundu tang deib anda kurura nirya yim ton, ner ton akiboka kan dam wengyankwanung. Ba, anda kamyoa nirya kan ab kam kubkwandum. 21Ani, sun ninyi yina ab, sun kamyoa yala yina ab ababyi minob boboka dongobkwandum,” ebmou. 22Ato ebmou ura, Er Imtamnyi biryi ersi ebdeibmou to nirya dangbisina kum uca, kunuboka sirya memebmou.
હાલમાં પસંદ કરેલ:
Kejadian Uram 6: MTG
Highlight
શેર કરો
નકલ કરો
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)