Lucas 21

Waktsa viüda ofrendata ćhuranqan

Marcos 12.41-44

1Tsëpikñam templućhö Jesús rikaskëqan ofrenda winakuyänanman rïcu runakuna Teyta Diospaq ofrendata itëkäyaqta. 2Tsënöllam rikäqan uk waktsa viüdapis ishkë uchushaq pöcu valorniyoq qellëta itëkaqta. 3Tsëta rikëkurmi Jesús ñëqan: “Rasuntam ñiyaq: Kë waktsa viüdaqa llapanpikpis mas atskatam itashqa. 4Wakinkunaqa putsullankunatam qoyäñaq. Kë viüdaqam tsëllaña kawakunanpaq këkaptinpis kapunqan kaqta itëkuñaq”.

Templuta ućhutsiyänanpaq kaqta willakunqan

Mateo 24.1-2; Marcos 13.1-2

5Templu perqaraq rumikuna chumaqlla kanqanta y templu chumaq adornashqa kanqanta parlayaptinmi Jesús ñëqan: 6“Kë llapan rikëkäyanqëkitam ankat ućhutsiyanqa. Manam ni uk rumillapis perqarëkar qepanqatsu”.

Manaraq kutimuptin imanö kananpaq Jesús ñinqan

Mateo 24.3-28; Marcos 13.3-23

7Tsëñam Jesústa tapuyäqan: “Teytë, ¿imëtan ñinqëkinö kanqa? Tsënö kananpaq ¿ima señaltatan rikäyäshaq?” ñir.

8Jesúsñam ñëqan: “Paqtataq pïpis waqtarnikikuna llullëkätsishunkiman. Atskaqmi shutëćhö shamur ñiyäshunki: ‘Ñoqam Cristo kä’ y ‘Kë patsa ushakanqañam’. Tsënö ñiyäshuptikipis ama criyiyankitsu. 9Guërra kanqanta y wañutsinakï kanqanta wiyarpis ama mantsakäyankitsu. Ñöpataqa tsëkunaraqmi päsanqa. Tsënö päsaptinpis kë patsaqa manaraqmi ushakanqaraqtsu”.

10Mastam Jesús ñëqan: “Uk nacionmi uk nacionwan guërrata rurayanqa y uk marka runakunam uk marka runakunawan wañutsinakuyanqa. 11Mëtsëćhö terremötu kaptinmi kë patsapis alläpa kuyunqa. Mallaqnëpis y pestipis mëtsëćhömi kanqa. Ciëlućhöpis mantsëpaq señalkunam rikakämunqa.

12“Tsëkuna manaraq päsaptinmi qatikaćhar prësu tsariyäshunki. Qorikäyänan wasikunaman apëkur juzgarmi carcelmanpis wićhqatsiyäshunki. Ñoqaman criyiyämunqëkipikmi nacionpa reyninkunaman y autoridäkunaman prësu apayäshunki. 13Tsënöpam willakïnëta pëkunatapis willayanki. 14Tsëćhö imata parlayänëkipaqpis ama yarpaćhakuyëtsu. 15Ñoqam imata parlayänëkipaqpis tantiyatsiyashqëki. Tsëmi ćhikiyäshoqnikikuna ni imañiytapis puëdiyanqatsu.

16“Qamkunapa contrëkikunam shäriyanqa mamëki, papäniki, öqikikuna, castëkikuna, y yanasëkikunapis. Tsënöpam wakikikunataqa wañutsiyäshunki. 17Ñoqa rëkum pïmëpis ćhikiyäshunki. 18Tsënö kaptinpis Teyta Dios manam dëjayäshunkitsu. Manam ni uk aqtsëkikunallapis oqrakanqatsu. 19Imëka ñakëkunata päsarpis ñoqaman criyikamurqa salvashqam kayanki.

20“Jerusalénta soldädukuna kirkurkur tsapashqata rikarmi ushakänanpaqña kanqanta musyayanki. 21Tsënö këkaqta rikar Judea markakunaćhö täkoqkuna irkakunapa ëqir ëwakuyätsun. Jerusalénćhö täkoqkunapis ëqir ëwakuyätsun. Ćhakrakunaćhö këkaqkunapis ama kutiyätsuntsu. 22Tsë unaqkuna alläpa castïgu kaptinmi Teyta Diospa palabranćhö ñinqankuna llapan cumplinqa. 23¡Allaw, tsë unaqkunaćhö qeshyaq warmikuna y chuchïkaq wamrayoq warmikuna! Entëru Israel nacionta Teyta Dios castigaptinmi alläpa ñakayanqa. 24Wakintam espädawan wañutsiyanqa y wakintañam mëtsë nacionkunapa prësu apayanqa. Teyta Diosta mana cäsukoq runakunam Jerusalénta munëninkunaćhö tsararäyanqa hasta Teyta Dios ñinqan tiempu ćhämunqanyaq.

Jesucristo kë patsaman kutimunanpaq kanqan

Mateo 24.29-31; Marcos 13.24-27

25“Imëka señalkunam kanqa rupëćhö, killaćhö y qëllurkunaćhöpis. Kë patsaćhö mar alläpa akatëkaćhëkaptinmi runakuna mantsakëwan ni ima rurëtapis puëdiyanqatsu. 26Qëllurkuna kuyoqta rikarmi kë patsata imapis päsananpaq kanqanta yarpar runakuna alläpa mantsakëwan desmayakäyanqaraq. 27Tsëpikñam runakuna rikäyanqa Runapa Tsurinta#21.27, 36 Runapa Tsurinpaq parlarqa kikinpaqmi Jesús parläqan. pukutëćhö chipipikyarraq alläpa poderniyoq shamïkaqta.#Daniel 7.13. 28Tsë ñiyanqaqnö llapanpis cumpleqta rikar valorta tsarirnin kushikuyë. Tsëkunata rikarmi musyayanki ñakëkunapik Teyta Dios salvayäshunëkipaq kanqanta”.

29Tsëñam iwalatsikïpa yaćhatsir Jesús ñëqan: “Hïgus aćhata y wakin aćhatapis rikäyë. 30Raprankuna qeshllimoqta rikarmi usya tiempu qallarinanpaqña kaqta musyayanki. 31Tsënöllam willanqaqkuna päsanqanta rikar musyayanki Teyta Diospa mandakïnin ćhämunanpaqña kanqanta. 32Rasuntam ñiyaq: Kanan tiempu runakuna manaraq wañuyaptinmi llapan tsë ñinqaqkuna cumplinqa. 33Ciëlupis kë patsapis ushakanqam. Ñoqa ñinqäkunaqa manam ushakanqatsu. Llapanmi rurakanqa.

34“Paqtataq mana yarpashqata Runapa Tsurin shamurtaq tariyäshunkiman utsata rurëkäyaqta, maćhashqata y imëkayoqpis kayänallëkipaq yarpaćhakur ćhukru shonqu këkäyaqta. 35Imëka trampanömi kë patsaćhö llapan runakunatapis tsë unaqkuna mana yarpashqata tsarinqa. 36Tsënö kananpaq këkaptinqa imë hörapis Teyta Diosman mañakur listullaña këkäyë. Tsënöpam shamunanpaq ñakëkunapik ëqir Runapa Tsurinpa ñöpanćhö kushishqa kayanki”.

37Unaqpam templućhö Jesús yaćhatseq y paqaspañam Olivos irkanman ëwaq tsëćhö qepänanpaq. 38Jesús yaćhatsinqanta wiyayänanpaqmi ällaqllaña atskaq runakuna templuman ëwayaq.

હાલમાં પસંદ કરેલ:

Lucas 21: qcgPB

Highlight

શેર કરો

નકલ કરો