Lucas 17
17
Utsaman mana pïtapis ishkitsinanpaq ñinqan
Mateo 18.6-7, 21-22; Marcos 9.42
1Tsëpikñam discïpulunkunata Jesús ñëqan: “Runa masinta utsaman ishkitsikoqkunaqa imëpis kanqam. Peru ¡allaw, pïtapis utsaman ishkitseq runa! 2Ñoqaman criyikamoqkunata utsaman ishkitseqtaqa mas allëqam kanman kunkanman mulinu rumita watëkur marman itarpuyaptin. 3¡Tsënö këkaptinqa paqtataq tsënö kankiman!
Runa masintsikta perdonananpaq yaćhatsinqan
“Runa masiki mana allita rurashuptiki llutallata rurëkanqanta tantiyatsinki. ‘Perdonëkallämë’ ñiyäshuptikeqa perdonayanki. 4Uk unaqllaćhö qanćhis kuti contrëki mana allita ruraskir qanćhis kuti ‘Perdonëkallämë’ ñiyäshuptikeqa perdonëkuyanki”.
Mas confiakoq kayänanpaq mañakuyanqan
5Tsëñam apostolninkuna Teyta Jesústa ñiyäqan: “Yanapëkayällämë mas confiakayämunäpaq” ñir.
6Teyta Jesúsñam ñëqan: “Näbuspa murunnö uchukllapis confiakïnikikuna kaptinqa kë sicómoro munti aćhata: ‘Ćhapëkipik llupikaskir marman patsë’ ñiyaptikipis cäsuyäshunkimanmi”.
Empliädu cuentalla Teyta Diosta cäsukushunpaq ñinqan
7“Mëqëkipapis empliädïki yapyanqanpik o mitsikunqanpik ćhämuptin manam ‘Uchï mikunëkipaq’ ñiyankitsu. 8Tsëpa rantinqam ñiyanki: ‘Yanukamïraq qaramänëkipaq. Mikur upur ushanqäyaq sirvimë. Tsëpikñam qamqa mikunki’ ñir. 9Tsënö mandayanqëkita rurëkaptinpis ¿acäsu tsë empliädïkita päyikuyankimanku? Manaćhari.
10“Tsënölla qamkunapis Teyta Dios ñiyäshunqëkita cumplir ñiyankiman: ‘Ñoqantsikqa Diospa sirveqnin karmi ñimanqallantsikta rurëkantsik’ ñir”.
Leprawan qeshyëkaq ćhunka runakunata kutikätsinqan
11Jerusalénman ëwëkarmi Samaria y Galilea provinciakunapa lindërun nänipa Jesús päsäqan. 12Uk takshalla markaman ćhäyänanpaq këkaptinmi leprawan qeshyëkaq ćhunka runakuna Jesúswan töpapäyänanpaq ëwayäqan. Manaraq pëman ćharmi largullapik 13qayakur ñiyäqan: “Teyta Jesús, ¡kuyapëkayällämë!”
14Pëkunata rikaskirñam Jesús ñëqan: “Rikäyäshunëkipaq cürakunaman ëwayë” ñir.
Ëwëkarllañam kutikaskiyäqan. 15Kutikäyanqanta tantiyaskirmi uk runallaña Teyta Diosta qayarar alabarëkar Jesús kaqman kutëqan.
16Ćhëkurñam urkunpis patsaman ćhanqanyaq Jesúspa ñöpanman pillatakïkur: “¡Päyillä, teyta!” ñëqan. Pëqa Samaria runam käqan.
17Jesúsñam ñëqan: “Leprapik kutikaqkunaqa ¿manaku ćhunkaq kayäqonki? ¿Mëtan wakin kaqqa? 18Kë uklä runallam Teyta Diosta päyikurnin kutimushqa”.
19Tsënö ñiskirñam tsë runata ñëqan: “Shärir ëwakï. Confiakamanqëkipikmi Teyta Dios kutikätsishöqonki”.
Teyta Diospa mandakïnin imë ćhämunanpaq kaqta tapuyanqan
Mateo 24.23-28, 36-41
20Uk kutim fariseukuna Jesústa tapur ñiyäqan: “Teyta Diospa mandakïnin ¿imëtan ćhämunqa?” ñir.
Jesúsñam ñëqan: “Teyta Diospa mandakïnin ćhämunanpaqqa manam ima señaltapis rikäyankitsu. 21Manam pïpis ñinqatsu: ‘Këćhöñam’ o ‘Washaćhöñam këkan’ ñir. Teyta Diospa mandakïninqa qamkuna kaqćhöñam këkan”.
Jesús kutimuptin imanö kananpaq ñinqan
22Tsëpikñam discïpulunkunata ñëqan: “Shamoq watakunaćhömi Runapa Tsurin#17.22, 30 Runapa Tsurinpaq parlarqa kikinpaqmi Jesucristo parläqan. uk unaqllapis mandakoq kanqanta rikëta munayanki, peru manam rikäyankitsu. 23‘Këćhömi’ o ‘Washaćhömi këkan’ ñiyäshuptikipis ama cäsuyankitsu ni rikaqpis ëwayankitsu. 24Relampagu watsityaptin ciëlupa uk kućhunpik uklä kućhunyaq atsikyanqanta llapan runakuna rikäyanqannömi Runapa Tsurin kutimuptin llapanpis rikäyanqa. 25Tsëkuna manaraq päsaptinqam kanan tiempu runakuna pëta ćhikirnin alläpa ñakatsiyanqa.
26“Noé kawanqan witsan runakuna kawayanqannömi #Génesis 6.5-8. Runapa Tsurin shamunan witsanpis kawayanqa. 27Arcaman Noé yëkunqan unaqyaqmi runakuna mikur, upyar y casarakur kayäqan. Tsënö këkäyaptinmi diluviu shamur llapan runakunata ushakätsëqan.
28“Tsënöllam Lot#Génesis 19.1-29. kawanqan witsanpis runakuna mikur, upyar, rantir, rantikur, murupakur y wasitapis shäritsir këkäyäqan. 29Sodoma markapik Lot yarqunqan unaqqam azufriyoq nina ciëlupik tamyamur llapan runakunata ushakätsëqan. 30Tsënöllam Runapa Tsurin kutimunqan unaqpis kanqa.
31“Tsë unaqqa wasi ananćhö këkaqkuna#17.31 Israel nacionćhömi tsë witsan wasita qatanqanpa rantinqa terrädu ananman tsaqllaskir mituwan llashtayaq. Tsë ananćhöñam awakuyaq, aqakuyaq y trïgutapis akrayaq. imëkantapis orqoq ama wasinman yëkuyätsuntsu. Ćhakraćhö këkaqkunapis wasinman amaña kutiyätsuntsu. 32¡Paqtataq Lotpa warminta päsanqannö qamkunatapis päsayäshunkiman!#Génesis 19.17, 26. 33Kawëninta salvëta munaqkunaqa kawëninta oqrayanqam. Kawëninta oqraqkunaqam kawëninta salvayanqa.#17.33 Kawëninta salvëta munaqkunaqa kikin munanqannölla kawaqkunam kayan. Jesucristo rëku kawëninta oqraqkunaqa Jesucristo munanqannö kawaqkunam kayan.#Mateo 10.39; Marcos 8.35; Juan 12.25.
34“Tsë paqasmi uk cämallaćhö ishkaq puñïkaqpik uk kaqta apanqa y uknintaña itaskinqa. 35Ishkaq warmikuna aqakïkaqpikmi uk kaqta apanqa y uknintaña itaskinqa. 36[Ishkaq runakuna ćhakraćhö arïkaqpikmi uk kaqta apanqa y uknintaña itaskinqa]”.
37Tsënö ñiptinmi tapuyäqan: “Teytë, ¿mëćhötan tsëqa kanqa?” ñir.
Jesúsñam ñëqan: “Mëćhöpis wañushqakuna itaranqanmanmi wiskulkuna qorikäyanqa” ñir.#17.37 Tsënö ñirmi Jesucristo tantiyatsëqan ñinqankuna mëtsëćhöpis tsënö päsananpaq kanqanta.
હાલમાં પસંદ કરેલ:
Lucas 17: qcgPB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
