Lucas 13
13
Utsankunapik arrepentikuyänanpaq ñinqan
1Tsëćhömi runakuna Jesústa willayäqan: “¡Galilea runakuna templućhö sacrificiuta rupëkätsiyaptinshi Pilato kaćhanqan soldädunkuna wañutsiyashqa!” ñir.
2Tsënö willayaptinñam Jesús ñëqan: “¿Qamkuna yarpäyanki tsë wañoq runakuna wakin Galilea runakunapikpis mas utsayoq kayanqantaku? 3Manam utsayoq kayanqanpiktsu wañuyäqan. Qamkunaqam utsa rurëta mana dëjaskir pëkunanö wañuyanki. 4Tsënömi Jerusalénćhö Siloé törri ućhur ćhunka pusaq (18) runakunata wañutsëqan. ¿Qamkuna yarpäyanki tsë wañoq runakuna Jerusalénćhö täkoq marka masinkunapik mas utsayoq kayanqantaku? 5Manam utsayoq kayanqanpiktsu wañuyäqan. Qamkunaqam utsa rurëta mana dëjaskir pëkunanö wañuyanki”.
Mana wayoq hïgusman iwalatsinqan
6Hïgusman iwalatsirmi Jesús ñëqan: “Uk runapash üvas ćhakranćhö hïgusnin kañaq. Tsëshi hïgus pallaq ëwar ni ukllëllatapis tariñaqtsu. 7Ćhakran cuïdaqtañash ñiñaq: ‘Kimsa watañam kë hïguspa wayïninta pallaq shamurpis manam ni ukllëllatapis tarëqötsu. ¡Tsinan höra mutuskiy! Mana wayoqtaqa ¡imapaqtan ćhakräćhöpis katsishun!’ ñir. 8Ćhakran cuïdaqñash ñiñaq: ‘Teytë, mä uk wata shuyäshunraq. Entërunpa ashpipaskirmi wanun ićhapäshaq. 9Tsënö ruraptëćhari wayunqa. Mana wayuptinqa mutuskinkićhari’ ñir”.#13.9 Israel runakunata hïgus aćhaman iwalatsirmi Jesús yaćhatsëqan.
Turmukashqa warmita Jesús kutikätsinqan
10Uk säbadu amë unaqćhöñam qorikäyänan wasićhö Jesús yaćhatsikïkäqan. 11Tsëćhömi shapshi turmukätsinqan warmi këkäqan. Pëqa mana derechakëpam ćhunka pusaq (18) watanña tsënölla kaköqan. 12Tsënö këkaqta rikarmi Jesús qayëkur ñëqan: “Warmi, kutikashqañam kanki”.
13Tsënö ñir yatëkuptinmi tsë warmi tsinan höra derechakaskir Teyta Diosta alabäqan.
14Säbadu amë unaqćhö Jesús kutikätsishqa kaptin qorikäyänan wasićhö mandakoq runa piñakurnin runakunata ñëqan: “Soqta unaqmi këkan runakuna aruyänanpaq. Alliyta munarqa tsë unaqkunaćhö shayämunkiman. ¡Imanartan säbadu amë unaqćhöraq shayämunki!” ñir.
15Tsëñam Jesús ñëqan: “¡Anan shonqu yaćhaq tukoq runakuna! Säbadu kaptinpis ¿manaku törïkikunata y ashnïkikunata paskaskir yakötsiyanki? 16Kë warmeqa Abrahampik miraq castantsikmi. ¡Allaw! Ćhunka pusaq (18) watam Satanás turmuyëkatsir ñakatsishqa. Tsënö ñakëkaptinqa ¿manaku säbadućhöpis kutikätsëman?”
17Tsënö ñiptinmi ćhikeqninkunaqa alläpa pinqakuyäqan. Wakin runakunaqam kushikuyäqan Jesús almirëpa allita ruranqankunata rikar.
Näbuspa murunman iwalatsinqan
Mateo 13.31-32; Marcos 4.30-32
18Mastam Jesús ñëqan: “Teyta Diospa mandakïninta ¿imamanraq iwalatsëman? ¿Ima iwalatsikïwanraq tantiyatsëman? 19Teyta Diospa mandakïninqa näbus muruta uk runa wiltanman murunqannömi. Eqarkamur atunyaptinmi rämankunaćhö pichukunapis qeshwankuna rurayan”.#13.19 Tsënö ñirmi Jesús ñëqan: “Uchuk murullapik näbus eqarkamur wiñanqannömi Teyta Diospa willakïnin mëtsëmanpis ćhanqa”.
Lebadüraman iwalatsinqan
Mateo 13.33
20Tsënöllam yapë ñëqan: “Teyta Diospa mandakïninta ¿imamanraq iwalatsëman? 21Tsëqa imëka levadüranömi. Tantata rurananpaq ishkë arröbanö maćhkaman levadürata warmi itaptinmi mäsaqa chumaq poqun”.#13.21 Tsënö ñirmi Jesús ñëqan: “Tsë levadüra uchuklla këkar mäsata poqutsinqannömi Diospa willakïninpis mëtsëman ćhanqa”.
Kićhki punkuman iwalatsinqan
Mateo 7.13-14, 21-23
22Tsëpik Jerusalénman Jesús ëwarñam markakunapa y allqakunapa yaćhatsikur päsäqan. 23Tsëćhömi uk runa tapöqan: “Teytë, ¿pöcoqllaku salvakuyanqa?” ñir.
Jesúsñam ñëqan: 24“Imanöpapis kićhki punkupa yëkuyë. Atskaq yëkïta munarpis pöcoqllam yëkuyanqa”.
25“Wasiyoq punkunta wićhqakaskamuptinmi waqtapik tucakur ñiyanki: ‘Teytë, punkïkita kićhapëkayämë’. Peru wasiyoqñam ñiyäshunki: ‘Qamkunata manam reqseqtsu. ¡Mëpikraq kayankipis!’ ñir. 26Tsëmi ñiyanki: ‘Qamwanmi miköqontsik y upöqontsik. Markäkunaćhöpis yaćhatsëqonkim’ ñir. 27Pëñam ñiyäshunki: ‘Qamkunata manam reqseqtsu. ¡Mëpikraq kayankipis! ¡Utsasapa runakuna, ñöpäpik witikuyë!’ ”
28“Tsënö ñiyäshuptikim kirïkikunatapis ućhurraq alläpa waqayanki. Tsë höram Abrahamta, Isaacta, Jacobta y profëtakunata Teyta Diospa mandakïninćhö këkaqta rikäyanki. Qamkunaqam yëkïta puëdiyankitsu. 29Mëtsë nacionkunapikpis qorikëkurmi Teyta Diospa mandakïninćhö mikuyanqa. 30Tsë höraqa qepaćhö kaqkunam puntaćhö kayanqa. Puntaćhö kaqkunañam qepaćhö kayanqa”.#13.30 Tsënö Jesús ñëqan humildi kaqkuna ciëluman yëkuyänanpaq y orgullösu kaqkuna mana yëkuyänanpaq kanqantam.
Jerusalén runakunapaq Jesús llakikur waqanqan
Mateo 23.37-39
31Tsë unaqmi fariseukuna Jesúsman ćhëkur ñiyäqan: “¡Këpik sas ëwakï! Herodesmi wañutsiynikita munëkan”.
32Jesúsñam ñëqan: “Tsë atoqta willayë: ‘Uk ishkë unaqllañash shapshikunata runakunapik Jesús qarqunqa y qeshyaqkunatapis kutikätsinqa. Warantinllañash llapan rurananpaq kaqkunata ushanqa. 33Imanö kaptinpis kë unaqkunash Jerusalénman ëwanqa. Jerusalénpik ukläćhöqa profëtakuna manash wañuyanmantsu’ ”.
34Tsëpikñam Jesús ñëqan: “¡Ay, Jerusalén runakuna! ¡Qamkunaqa Teyta Diospa profëtankunata unëpikmi wañïkätsiyanki! ¡Pë kaćhamunqan willakoqkunatapis rumintsäyankim! Chipshankunata wallpa älan rurinćhö oqllaqnö wamrëkikunata atska kuti qoriyta munaptëpis manam munayäqonkitsu. 35Tsënö kayanqëkipikmi Jerusalénpis templupis tsunyëkar qepanqa. Manam yapë rikäyämankiñatsu hasta: ‘¡Teyta Diospa shutinćhö shamoq runa alabashqa këkullätsun!’#Salmo 118.26. ñiyanqëkiyaq”.
હાલમાં પસંદ કરેલ:
Lucas 13: qcgPB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
