MATAYO 8
8
1Kugbo Yesu laga akiyundra ka i mere ki yu, mongoyo ti ŋutulu rodri akekepodru lepe. 2’Bo ŋutu lo rima druga pondra, druga ruguŋo ka ku lepe i koŋoni‚ druga kulia adi‚ “Mata‚ ku do anyari‚ do roromoki toke’ya na.” 3Yesu druga riodru keni lonyelo i ’bo’yu na lepe‚ druga kulia adi‚ “Na anyari‚ gbo’di a lokiye.” Wuleŋa gele rima ti lepe kine druga lili. 4Yesu druga takindra lepe adi‚ “Gbo’di go‚ ku trutrukoki le’de ŋutu tro‚ ’bo utini ku kpene mugu ku ka’i’ilanilo yu‚ ku tiki ’doke laga ma Mose tazi kukuzu ŋaninalo a kpiye ku ŋutulu kilo yu.” 5Kugbo Yesu laga alubo Kaperinauma yu‚ druma lo katiyu kama gelelo druga pondra ku lepeni‚ i ma’yu na muga ku lepe‚ 6adi‚ “Mata‚ ŋiro lio lo kitalo lu ka ku tuwane kadi yu‚ mugu na lepena aliwa‚ muguna mimiye koru.” 7Yesu druga teyitokindro lepe adi‚ “Na iututu i toruzo na lepe.” 8Druma lo katiyu kama gelelo druga kulia adi‚ “Mata‚ na ani kpele adi do lupundro kuwe kadini‚ ’bo tane kulie ka’delo‚ ŋiro liolo itotoruwe. 9Na gbo ku druma lio lo yiŋi nalo itro‚ ku ku’de katiyu lo yinga na itro. Ku na takindra le’delo adi‚ ‘Uti’, lepe tutu, ’bo ku le’deloni adi, ‘Pondri’, lepe popondra, ’bo ku upiye lioloni adi, ‘Kone ilo de’, lepe kokondra.” 10Ku Yesu laga ayinga kine kulia de‚ lepe druga rambu mugu koru‚ druga takindra ŋutulu lo kepodru nye kilo adi, “Na takindra ta a ’diri, ’dibani ku Isiraeli kilo katani kpe, na aku rio rugo naga beti ina de. 11’Bo na takindra ta ŋutulu rodri iyeŋundra i lupundro na kolona yu‚ ku i ’doro na kolona yu‚ i gbi’diki i mesa kutu kasi Abarahama, ku Isaka‚ ku Yakobo i tumata na ’dikona katani‚ 12’bo ŋazi laga ti tumata kilo iririkozi kaŋo‚ i mude kata yu. Yu de gbiye ku ŋira na rubi nyena igbo’da.” 13Yesu druga takindra druma lo katiyu kama gelelo adi‚ “Uti konu kiko yu. Kulia kine ti gbo’dini konu yu beti naga mo do rugina.” I lu luŋa de lopunonilo atoruwe. 14Kugbo Yesu laga alubo ku Petero kadi yu‚ lepe amedra moke na Peterona nu ka ku yeyenga na mugu naga kamaka. 15Yesu druga ’bo’yu keni lo lepelo‚ ’bo mugu na lepe na kamakana druga koko’yu kaŋo‚ lepe druga ŋiŋiye i konakindra na lepe kita. 16Ku gbo’dini kotriana, ko azondra ku lepeni ŋutulu rodri laga ku dreria kilo. Lepe druga rikodru yukala kine ku kulie ’du, druga toruzo ŋutulu giri laga ku yeyengaki kilo, 17i torumokindro na kulia na ta kakeyoni Isaya adi, “Lepe a’dumara tomunye nikana druga ’dumadru tatuwa kaya kine kanye mugu.” 18Ku Yesu laga amedra mongoyo ti ŋutulu rodri kanye lagani, lepe druga takindra kukuzu i laŋadru i lu lozo. 19Nyenaga katogoloni le’de lo kukuzunalo apondra, druga takindra lepe adi, “Katogoloni, na ikekeporo do i pirito naga mo do utuni kine giri.” 20Yesu druga teyitokindro lepe adi, “Gbagbiya kilo gbo ku drilio kase, kpenya kine kine ku kadizi kase, ’bo Ŋiro lo ŋutulo ’ba piri na topirikini kuwe nanye.” 21Lotodinikita le’de druga takindra lepe adi, “Mata, koloro na inga ku na uti i nuga na monye liolo a nze.” 22’Bo Yesu druga takindra lepe adi, “Keporo na, kolokindri ti opuo kilo nugi opuo kase kilo.” 23Kugbo Yesu laga alubo i ki’bo kata yu, lotodiniki ti lepe kilo druga kepodru lepe. 24Druga kobuŋe naga a drumana aŋiye suburi ki yu‚ pio kine amuluzu ki’bona‚ ’bo ti Yesu lu i toto. 25Ko druga tu ku topurundro lepe‚ akulia adi‚ “Mata‚ ritu yi po! Yi kilo mamanakindra.” 26Lepe druga piza ko adi‚ “Ta laga ku rugo a natri kilo de‚ ta kuze gbandra ya?” Lepe druga ŋi‚ druga ringa kobuŋena ku suburilo, kana druga yiŋazi lili. 27’Bo ŋutulu ŋani kilo druga rambu ’beri koru‚ druga piza adi‚ “Ilo ŋutu de a ŋa, laga ma kobuŋena ku suburilo sobini kulia ti lepe kine de?” 28Kugbo Yesu laga ayenga i lu lozo‚ i ka na Gadara yu‚ ŋutulu mure laga ku dreria loro kilo ti kulu lupundro i gulomo yu‚ druga momora kasi lepe. Ko a ŋutu laga a riŋiko‚ kuwade le’de ŋutu aku romoki laŋadru i lu kiko de. 29Ko druga resa adi‚ “Ŋiro lo Ŋun ilo, kulia kaya kasi do kine a ti nyo ya? Do pondra inide i sasandru na yi ti luŋalo aku yeŋundra ya?” 30Ti mongoyo na wuriyo kulu i rata pazo ku ko. 31Dreria loro kilo druga ma’yu ’beri ku lepe‚ druga kulia adi‚ “Kugbo do laga rikodru yi kaŋo sonyoro yi i mongoyo na wuriyo kilona kata yu.” 32Lepe druga takindra ko adi‚ “Utita.” Kuwade ko druga lulupodru ku lubo i wuriyo kata yu‚ ’bo mongoyo na wuriyo kilona giri pu’dozi i du’budu’bu lo karelo‚ druga ku ’do’doro suburi kata yu‚ ko druga tatuwara i pio kata yu. 33Kayuku ŋani kilo druga wowoke kezi yu druga kekenadru kulia ŋani kine giri‚ ku kulia ti ŋutulu laga ku dreria loro kilo. 34Nyenaga ŋutulu giri laga kezi yu kilo druga lupundro i momora kasi Yesu, ’bo kugbo ko amedra lepe, ko druga ma’yu ’beri ku lepe adi ti lepe ŋiyoroni i ka nasena katani kaŋo.
હાલમાં પસંદ કરેલ:
MATAYO 8: KNT77
Highlight
શેર કરો
નકલ કરો
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
