MATAYO 15
15
1I bo ŋanina katogolo ti kuku zuna kilo ku Farisayo kilo druga ŋiŋiyu Yerusalema yu‚ druga pondra ku Yesuni‚ akulia adi‚ 2“Lotodiniki kolu kilo ko kokorozu togoleto ti temezi kilo gbandra ya? Kugbo ko nyonyosu‚ ko ani lalazu kenisi kase kilo.” 3Lepe druga piza ko adi‚ “Ta kokorozu kukuzu na Ŋun ku togoleto kasu kine gbandra ya? 4Ŋun kazu atazu kukuzu adi‚ ‘Sope so ku munyi seku ŋuti‚’ ’bo‚ ‘Ŋutu laga lo ’dadru monye seku ŋotelo ti lepe tuwani kaŋo.’ 5’Bo ta kulia adi‚ ‘Ku ŋutu le’de atakindra monye kuwa ŋote adi‚ Ŋo laga kodro ma ta rumbini kuwenilo, na atiki Ŋun‚ 6lepe aka sobu monye lonyeloni.’ Kuwade ta ’delakindra kulia ti Ŋun kine a ’busa ku togoleto kasu kine. 7Ta a katoŋulupa! lsaya kazu atrukokindro kulia kasu kine a na’bu ku lepe atazu adi‚ 8‘Kilo ŋutu de sobu na ku kutuzi ka’delo, ’bo teiliko kasiko kilo ku na pazo; 9ko teminizo na a ’busa‚ ti ko kilo togo’yu togolesi ti ŋutulu kine i piri na kukuzuki ti Ŋun’” 10Yesu druga lungu ŋutulu kilo kanyeni, druga takindra ko adi‚ “Yiŋeta‚ deneta kulia itro, 11ŋo lo lubo i kutu yulo ani kokorozu ŋutu uye, ’bo ŋo lo lupundro i kutunilo, nyelo kokorozu ŋutu.” 12Lotodiniki ti lepe kilo druga pondra, druga piza lepe adi‚ “Do adeni adi ku Farisayo kilo laga ayinga kine kulia de kulia ŋani kine a’doro kasiko i teiliko yu a naro ya?” 13Lepe druga teyitokindro ko adi‚ “Kade giri laga Monye lio lo ’dikolo aku ’udru kilo ko i’doto ku kukuri kine kaŋo. 14Kolokita ko‚ igbonaga ko a ka’dola ti kuwe laga ku konye a mudumudu kilona. Kugbo ka’dolani laga ku konye a mudumudulo lo ’do’ya kuwe lo ŋutu laga ku konye a mudumudulo, ko mure katru i’do’do i drili naga a mee kata.” 15’Bo Petero druga takindra lepe adi‚ “Trukoki yi kine kulia na guguma de.” 16Yesu druga piza ko adi, “Ta inga ’ba yo’yu itro ya? 17Ta aku de adi ŋo lo lubo i kutu yu ilo lu lubo i kubute druga lepe lupodru i piri naga doŋowe ya? 18’Bo ŋo lo lupundro i kutu kata yulo ŋiyu i teili yu, ’bo nye lo kokorozu ŋutulo. 19’Bo ŋiyu i teili kata yu, teili loro lo lupundro, rembu‚ towute, konye lopi‚ koko’ya kokorozu na ŋutulu ku kulia ti to’bure, momorozu itro. 20Kine kuliata de se na kokorozu ŋutulo‚ ’bo nyosu na nyei ku kenisi laga aku lalayi kilo ani kokorozu ŋutulo.” 21Yesu druga ŋiyoro yu de‚ i ’dotodru na mugu i ka na Turona ku Sidonana yu. 22Nyenaga noka naga a Kananatio na ŋiyu i lu go lo nu ka dena‚ alaiza‚ akulia adi, “Gbo’di ku ediyo ku na, Mata, Ŋiro lo Dawidilo‚ ŋiro niona ina sasanya koru ku dreri loro.” 23’Bo Yesu aku teyitokindro lepe kulia tro. Lotodiniki ti lepe kilo druga pondra i ma’yu na ’beri ku lepe adi‚ “Sonyoro lepe kaŋo‚ igbonaga lepe ina woŋoro kaya bonina.” 24Lepe druga teyitokindro ko adi‚ “Na sunye i kebilizi ti ketimito ti Isiraeli naga aliki kine ’du.” 25’Bo noka ŋanina druga pondra‚ druga ruguŋo ka ku Yesu i koŋoni‚ druga kulia adi‚ “Mata‚ loke na po!” 26Lepe druga teyitokindro lepe adi‚ “Ani gbo’da a na’bu i ’dumundra na nyosu na ŋazina i biriŋoki ’dioŋ” 27Nokana druga kulia adi‚ “A ’diri Mata, ’bo ’dioŋozi kilo ko nyosu nyosu na yeyeŋa naga na ’do’do ka i mesa na mata lasikonana.” 28Yesu druga teyitokindro lepe adi, “Nokana, rugo nonuna a druma. Ti konani konu yu be naga mo do nyadrina.” Ŋiro na lepena muguna druga koko’yu agbole ŋiyu i lu so de. 29Yesu druga ŋiyoro yu de, druga yeŋadru i suburi lo Galililo yu. Lepe druga kiyadru i mere ki yu, druga gbi’diki yu de. 30Mongoyo ti ŋutulu rodri kilo druga yeŋundra ku lepeni‚ ti ko azondra ŋutulu laga a babatratu kilo‚ ku laga ku konye a mudumudu kilo, ku laga a liwa kilo, ku laga ku kutuzi a ’diza kilo, ku ku’de ŋutulu rodri kilo, ’bo ko druga topirikindra ko ku lepe i mukuzini‚ lepe druga toruzo ko. 31Kuwade mongoyo kilo druga rambu ’beri koru‚ kugbo ko laga amedra ŋutulu laga ku kutuzi a ’diza kilo‚ kilo kukulia, ku ŋutulu laga a liwa kilo‚ kilo yeŋundra ku ’beri na’bu‚ ŋutulu laga a babatratu kilo kilo woroni woro‚ ku laga ku konye a mudumudu kilo kilo gbo’di memedra. Kuwade ko druga pudya Ŋun lo Isiraelilo. 32Yesu druga lungu lotodiniki kanye kilo kanyeni, druga kulia adi, “Na gbo ku ediyo ku mongoyona, igbonaga yi asaka kasi ko tinade luŋazi musala, ’bo ŋo lasiko lo nyenyei ’bayi ina. Na ani nyadru sonyodru ko ku mago, ka’bi ko ku ’do’dorotu i kiko yu.” 33Lotodiniki kilo druga piza lepe adi‚ “Ma yi riondru nyosu i diŋo katani de yeda naga na romoki ku mongoyo na ŋutulu laga rodri kilo dena ya?” 34Yesu druga piza ko adi, “ ’Diloto kasu kine muda ya?” Ko druga teyitokindro lepe adi‚ “Burio‚ ku somo lotritriki ku’de.” 35Yesu druga takindra mongoyona kukuzu adi ti ko gbi’dikini ka. 36Lepe druga ’dumundra ’diloto naga burio kine ku somo ŋani kilo‚ ku lepe laga atikindra iyete‚ lepe druga ŋoŋowuzu ko, druga tikindra lotodiniki kilo, lotodiniki kilo druga tikindra mongoyo kilo. 37Ko giri anyosu druga yiyimotu yiyimotu, ko druga pependra limbito ti ’diloto na ŋoŋoyi kine i gobela burio zore zore. 38Ko laga lo nyosu kilo lalia alifu iŋmani, ’bo wate kine ku ŋazi kilo aku kena. 39Lepe druga sonyodru mongoyo kilo, druga lubo i ki’bo kata yu, druga laŋadru utu i ka na Magadana ina yu.
હાલમાં પસંદ કરેલ:
MATAYO 15: KNT77
Highlight
શેર કરો
નકલ કરો
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
