Genese 8
8
Ma haa karia leipe
1Kahara, Noa, kai ovokake eharu oaria, kai are i vevaea ureve hareho pekahavape la loalula eharu oaria, Aualari iki le kelavape. Aualari meahaiapo akea ve mea paraeape, kai ma le oavape. 2Ahea ma koru ve pekape la ma le kokaukape; kaia akea leia ve la okiape kara kokaukape, kai kaia ve la lai le haerapape; 3kahara, meahaiapo akea ve la ma hare oaria le oavape. Hare 150 karia leipe la hoa ma hoavi ipi maea leipe. 4Papare 7 ve hare 17 la hare, vevaea Ararata la kela akea ve haiavape. 5Ma aeka oavi aiai papare 10; la papare ve oropa hare, kela oaria ve hohori hihika leipe.
6Hare 40 karia leipe hoa, Noa are karikipe vevaea ve harihu ura hapape, 7are hapa mea paraeape; la hapa au hiki veaveape aiai ma meahaiapo ve oavai karia le leipe. 8Kahara, aireaki are huva haroapo paraeape, ehovea ore leikive, ma meahaiapo ve overa oavai la, aka āre la. 9Aka huva haiavaki ita au koaraila, laelave are helari ae vevaea aeka le hoaupe, ehovea ma meahaiapo au hiki havuopape. Laelave Noa mai avihorapai huva mai paeai vevaea ureve avi kihoaupe. 10Are hare 7 la karipe, kai aeka huva vevaea mahokaea ve paraeape; 11huva hailaea hoa kihoaupe; are olive koro āre haroapo areve ape buravi avikepe; kahara, Noa ore le leipe ma meahaiapo ve le oavai. 12Are aeka hare 7 karipe, aireaki huva aeka le paraeape; are areve leia aireaki helari au ekeila.
13Kahara, hitolo 601 ve oropa ve papare ve oropa hare la, meahaiapo akea ve la ma oavape; Noa vevaea ve la haro hareavi ovohae eavape, meahaiapo ve oropape kakarara le leipe. 14Kahara, papare orahoka ve hare 27 hoa, meahaiapo kakarara leilai. 15Aualari Noa oharo maria maeape: 16“Vevaea ve kihoahukaila; a i ave uva ila, kai akoremari i ereve uavila ila hoa haroapo kihoahukaila. 17A i hareho apealula la ovokake eharu oaria kara aikihoahukakive, aivau eharu oaria, ori, boromakau, meahaiapo ve hai loalula eharu oaria kara. Ere va meahaiapo ureve mere eravahaeai maeakoko leivahaeakilai.” 18Laelave Noa i areve uva i akoremari i akoremari ve uavila ila hoa haroapo le hoahukape: 19aeka, animala oaria, kai hai loalula eharu oaria, kai ori oaria, ovokake eharu oaria, lalava lalava ila, vevaea ve kihoahukape.
20La hoa, Noa Iehova ve arura haha ukape. Are veveroro ila la animala i ori ila ve haroapo haroapo la arura haha akea ve aeroavape, Aualari ve meru ve. 21Iehova la muo veveke koape hoa, are iki ureve mariape: “Ara aireaki meahaiapo ve o heaha e va ka, ehovea haela ve, ehovea areve iki ureve, areve āre hoa aiai haela leiki hoa va heaha hiki. Ara va aireaki hoa ovokake eharu hai ka lei va ka, ara oropa leipe la mai hovea. 22Meahaiapo aeaki hoa, hae aporaki hoa, iele ikaeaki hoa, vevehere i ahea ila hoa, hitolo hoa i maura hoa ila, hare i oroa ila karia leivahaea va ka.”
હાલમાં પસંદ કરેલ:
Genese 8: ORO
Highlight
શેર કરો
નકલ કરો
Want to have your highlights saved across all your devices? Sign up or sign in
Published by the British and Foreign Bible Society 1963-1972