Genese 13
13
Aberamo i Lota ila oki lahua lahua auvahaeaki
1Aberamo Aigupito hakurepape, are i uva i eharu oaria ila hareho. Lota kara are i hareho diho hoa hoaupe. 2Aberamo va avai haela le leipe, boromakau oaria, kai silver i gold ila. 3Kahara, are diho hoa hakurepai Betela leia hahi leipe, aiai are overa elare kovo ita avape la ita, Betela i Ai ve aru hihi, 4aiai are overa arura haha ukape; leia Aberamo Iehova ve rare itavape. 5Lota Aberamo ila hoaupe; are mamoe oaria i boromakau i kovo uvi oaria ila. 6Laelave, erealila la ita hoa haroapo apeakive hovea au laila, ehovea erealila ve eharu maeakoko leivahaeape; erealila hareho apeakive hovea au laila. 7Aberamo ve boromakau kiva haela i Lota ve boromakau kiva haela ila hahari avahaeape. La hoa Kanana haela i Perisi haela ila la ita apearoape.
8Kahara, Aberamo Lota maeape: “Elavaila hahari leivahaea v'arekaea; elavaila ve boromakau kiva haela kara hahari kalaivahaelue, ehovea elavaila va apavara. 9Ita eapapo ave oropa ve aea va ka ha? Elavaila oki lahua lahua aukive, heroe. A va mai keva ukai hoauki, ara va mai ore ukai hoaukilai; aka a va mai ore ukai hoauki, ara va mai keva ukai hoaukilai.” 10Lota ovohae iupepe; are ovohae eavape, Ioridana ita heheapa mekakure, ma hoho oaria ila, Iehova Aualari ve oru ita hovea hovea, Aigupito ita hovea, Soara ve ukai ve; ma va oropa hoa, Iehova Sodoma i Gomora ila aireaki hai ka leipe. 11Laelave, Lota Ioridana ukai ve la ita heheapa ikivere lei avape, Lota kauri ukaki ve hahi leipe, laelave erealila oki lahua lahua loape. 12Aberamo Kanana ita aeaveape; Lota la ita heheapa la karikara ukai ve hoaupe. Are areve kovo ita Sodoma leia avape. 13Sodoma haela va mai heahaha oaria haela. Ere Aualari oropa ve mai hahaeae oaria leivahaeape.
14Iehova Aualari Aberamo maeape, Lota arero overa hakurepape la hoa, “Ave ovohae iupeki, ovohae mekari eavaki, paipai hoa i diho hoa ila, kauri ukai i hurava ukai ila; 15a ovohae eavaki la ita oaria ara aro aiarakilai, ave meavohula oaria kara, aiai aireaki hoa haiapo. 16Ara ave meavohula kekele mahuvu hovea hovea leikilai; laria, a va kekele mahuvu ve numera ore la leikilava, a va ave meavohula ve numera kara ore leikilai hovea. 17Urou, la ita eapapo heaikiapo i huraha ila loa veaki, ehovea ara arero aro avarakilai”. 18Laelave Aberamo kovo uvi hareavape; are iki Mamere ve havuhu kora leia aeaveape, Heberona la ita maeamaea. Leia are Iehova ve arura haha ukape.
હાલમાં પસંદ કરેલ:
Genese 13: ORO
Highlight
શેર કરો
નકલ કરો
Want to have your highlights saved across all your devices? Sign up or sign in
Published by the British and Foreign Bible Society 1963-1972