Matéus 28
28
Lipahye lí Yésus
(Mlk 16.1-8; Lúk 24.1-11; Yhn 20.1, 11-18)
1Ámbúh ɔlɔ́ ví évɛɛɓan ví Élōg-Yúda, Malía Magdála la nyɔ́ŋɔ́ Mālía bú kɛ̄ la miyɛ́ mí kítí mí ɔlɔ́ ví ɔ́sū ví nzamɛ́ á lí légɓe lí sɔŋ. 2Váŋ nɛ́ sí ya póghán la ŋguu. Áŋgɛl nyí Nyɔ́ŋ-Ɛsáŋɛ́ yu sɔ́lé á lóō, yú tínɛ́ ŋgɔg á miníŋglé mí sɔŋ la yɔ yu tɔ́ɔ̄ yɔ á lóō. 3Nyíŋ áŋgɛl ɛ ŋgí paa kaa njanjat, mbɔ́tí yɛ́ɛ̄ ki ɛg púú pɛ́ŋ ákaa mitámŋga. 4Ɓatát sɔŋ bú nát la woŋ nyaa nyí lɛ nɛ́ bú yéglé kaa mimbim. 5Ndí áŋgɛl yu nyɔ̄ŋ mpɔ́t, yu lāgá ɓondígá nɛ: «Miníh kɔnɔ́g ɓé woŋ. Mag yí nɛ́ miníg somo Yésus nyɔ́ a tōmlɛ́ á mbásá. 6A sē ɓé vá, átɔm nɛ́ a pāhye ákaa a lagléé. Sɔ́án miní légɓé ápah a mɓɛ́ á náŋɛ. 7Ámbúh náŋ, vóánɛ li kɛ miní lāgá ɓáyēge ɓɛ́ɛ́ nɛ: ‹A pāhye á póla ɓá ɓā wú, léɓyán, ag dúgu ɔ́sū, ag laaŋke ɓɛ́nɛ á Galiléa, wóŋ nɛ́ miní ŋga kɛ́ nyɛ́ lí ɛ́nle.› Náŋ nɛ́ mi mɓɛ́la nɛ́ mi lágá ɓɛ́nɛ.» 8Ɓondígá bú vóó li ɓógo á sɔŋ á sí ŋgandag woŋ la mivag. Bú nāŋgá m̀bíí li kɛ lí lí lɛgɛ lí ɓáyēge bí Yésus nyíŋ pɔ́l. 9Váŋ nɛ̄ Yésus a sɔ́ lí ɓoman la ɓɔ́, aá la ɓɔ́ nɛ́: «Ma táma ɓɛ́nɛ.» La ɓondígá bú sīŋglé nyɛ ɓɛɓɛ, bú úlɓán á li byee lí nyɛ mikoo, bú úúyɛ́ mísū á sí á li ɓégɛ lí nyɛ. 10La Yésus ɔ lāgá ɓɔ nɛ́: «Miníh kɔnɔ́g ɓé woŋ. Kɛnán miní lɛ̄gɛ́ élōgétāŋ nɛ́ bí kɛ̄ á Galiléa, wóŋ nɛ́ bí ŋga kɛ́ ma lí ɛ́nle.» 11Eceg bí ŋgí kɛ, ɓatát sɔŋ ɓɔ́g bú kɛ á tísɔn á li máŋlɛ lí ɓákanʼyɛ ɓatíi-nsúlé yé ɛ́sɛ yá loo. 12Ɛnɛ́ ɓákanʼyɛ ɓatíi-nsúlé ɓá kómān elɔŋ la ɓacɛ́ŋ bí lílōmɛ, bú tɔ́ɔ̄ á líɓomán, bú tí ɓatát sɔŋ puh mbáŋ mɔní, 13la nyí ndag nɛ́: «Miní lāgá voóm asɛ̄ nɛ́: ‹Ɓayége ɓɛ́ɛ́ ɓá sɔ́ díɓe la díɓe, bú yíí m̀bim wɛ́ɛ́ eceg bi ɓɛ́ɛ́ bi náŋɛ á ɔ́lɔ̄.› 14Ndí kíyáɓɛ́nɛ nyíŋ pɔ́l ya pám á míɔ̄ɔ̄ mí gɔ́mna licɛ́ŋ, ɓɛ́hɛ-mɛ̄n nɛ́ bi ŋga mɔ́mɛ nyɛ́. Biíg ɓɔŋ ki nyaa yɔ́ ɛ́sɛ nɛ́, tɔ jam líh teeŋgɛ́gɛ́ ɓé ɓɛ́nɛ.» 15Ɓatát sɔŋ bú nyɔ̄ŋ mɔní, la ɓɔ́ bú kɛ̄, bú ɓɔ̄ŋ mam ákaa ɓá máŋlɛ́ ɓɔ. Nyíŋ pɔ́l yu cámān á Élōg-Yúda yɔ́ ɛ́sɛ nɛ́-tɛ́ɛla lɛn.
Yésus ag óm ɓáyēge ɓɛ́ɛ́ á nsɔ́n
16Jéŋ jóom lí ɓáōmɓɛ la wa lú kɛ̄ á Galiléa, lú pám á lóō lí ɔ́kolá ápah Yésus a éé ɓɔ́. 17Eceg ɓá ɛ́n nyɛ, bú úlɓán á li ɓégɛ lí nyɛ, ndí, ɓatám á élɔŋ yáɓá bí ɓɛ́ɛ́la pendan. 18Yésus ɔ sīŋglé ɓɔ á ŋgwáāg, ɔ lāgá ɓɔ̄ nɛ́: «Ŋguu ɛsɛ̄ ya tíéɓɛ́ ma á sí la á lóō. 19Kɛnán á mílōm mísɛ, miní yáanɛ́ ɓot ɓayége ɓáma. Tíán ɓɔ́ nzóɓan á jóō lí Ɛ́sāŋɛ́, la Mɔɔ́n, la M̀búl Mpúán. 20Miní yéglɛ́ ɓɔ́ li naŋɛ lí mam mísɛ ma yéglɛ́ ɓɛ́nɛ. Á yé ŋga légɓe ma, mi lɛ élɔŋ la ɓɛ́nɛ ɔlɔ́ sig, nɛ́-tɛ́ɛla á lísūg lí biceg.»
હાલમાં પસંદ કરેલ:
Matéus 28: NTB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2023, CABTAL
