João 16
16
Jesus Hinkaklexyawaklu Salewaktshi Hinatshripa Piranapni
1Jesus wane pnute wan-tshina:
— Xyekaka nunkakhi hma malixyawakanupa.
2Hanjihohnewakapjikaka hkochpajikolupa hixa hiyrun-koxa rapokpapkolutanu hiylaxikowaka Hoyakalu halukanru hkamhahoxinwa.
3Xyekaka hkamhinhina hixa klu tshinanu hi rimatluna Nuru Hoyakalu, hi hitako rimatna.
4Seyni xyekaka nunkakhi, rakanhinipa xyekaka, hixa hichinikanru xyekaka nunkakakanaxyahi. Hiyrunu Jesus wan-tshina:
— Seyni mitshikananu xyekaka hi nunkakatkahi klu tshinanu hix-yehi nwawa.
5Seyni xawakni nyokanatjeru nwaka nyanu. Seyni hixa hi satukna hepomhano: “Hanhe pyanu?”
6Hiyrun-koxa xyekaka nunkajyahi tshinanu, hixa wamonuwhajita tsru potuko.
7Seyni halikaka nunkakhi, kihlepotlu nyinripa klu tshinanu nma yaknuklunupa hapnanuhchinikankaklewatatshri hi hapokanu; seyni nyinipa nyokanatanru hix-yehi.
8Seyni rapojinipa Hiwejikaluru, wale hichinikkakanna xye tshijne hajene hektuntshi pirana, potukalu pirana hiyrun-koxa hikolukanuwnalu pirana.
9Hektuntshi tshinanu hjihyehitkanna klu tshinanu hi ralixnona.
10Potukatlewlu pirana tshinanu hjihyehitkona klu tshinanu Nuru Hoyakalu yehi nyanutka. Hi hetanutkano.
11Hikolukanuwnalu klu tshinanu xye tshijne yokanatatshri hikolukanuwnatka.
12— Waneyno pimri pirankaka nunkajyawakapmakhi seyni hixa hi himukata hakotletlu xawakni.
13Seyni runinpatka Hiwejikaluru halikakalutu, waleko kosekanhi ptowru piranako halikaka piranaya. Klu tshinanu hi waleko hihchinikanu runkakletanu seyni runkakletanru ptowruka hjemlerutka, runkakletanru hinatshripa pirana.
14Hiwejikaluru halikakalutu hita hpoyahnutanu. Hita hinkakle runkakanhi.
15Ptowruka Nuru himwaleru hitanni. Wale tshinanu wane ntshinatkahi, Hoyakalu Hiwejikaluru nunkakle psoluka runkakanhi.
16— Xekoyakapa hi hetanno seyni hi howukchini hetanutnakno.
17Hiyáhoni satkaka wanna hasrukkalune wla htshinkakna:
— Klunernihe xye pirana htshinatkawu? “Xekoyakapa hi hetanno seyni hi howukchini hetanutnakno?” Hiyrunu xye, “Nuru Hoyakalu nwaka nyiywaka tshinanni”?
18Hiyáhoni wla htshinna:
— Hi wimatjemlu klunerukta raluka tshinreta wla htshinini, “Xekoyakapa”.
19Seyni rimata Jesus xye pirana raluk-hepomhaletluna hiyáhoni wla htshinatkana:
— Hixlahe hepomhakaka hixkakluko klu ntshinatkahi xye hima tshinanu, Xekoyakapa hi hetanno seyni howukchiniyaka hetanutnakno?
20Halikaka, halikaka ntshinhi. Hixa wamonuwatanu, htshiyahpotutanu seyni pimrine xye tshijne hajene poyikowatanu. Hixa wamonuwatanu seyni hwamonuwle hiprotakanu, himuwlupatkani.
21Suxo honra mturu tshino tjemini, tkaheknanuwata klu tshinanu rapokatka topapkolu. Seyni hajeyri tali matuwhenrexinixka, hi tuchinikanretatkalu katshinolukananu tpoyikowata satu mturu xye tshijne tmatkajini tshinanu.
22Hiyáhoni xawakni hwamonuwata seyni netanutnakhi hiyrunuko waneya himuwatanu. Hiyrun-koxa himuwle hike yineru himukata kochtsheklexyahi.
23— Hinatshri hohnepa hike pirana hijhayehitanutkano. Halikaka, halikaka wla ntshinhi, Kluneruktako hanjixinri Nuru Hoyakalu hita hiwaka tshinanu, renekanhi.
24Haté xawakni hike hanjitawano. Hanjirewatanu, hyoptoxyawakaplu himuwle hike mmahaxyawakanupa.
Jesus Tokanu Hinhale
25— Xyekaka pirana nunkakhi yapkaklu piranayma seyni hinatshripa hohne hi yapkaklu piranayma niynumatanhi. Wale hohnepa Nuru Hoyakalu piran-yehi nekhipotutanhi.
26Wale hohne hinatshripa hita nhiwakayma hanjirewatanu. Hiyrunu wane ntshinhi wale hohnepa hi Nuru Hoyakalu nanjitanu hixa tshinanupa.
27Klu tshinanu wale, Nuru Hoyakaluko hichinikhi klu tshinanu hixa hichinikno hita hiyrunu klu tshinanu halixno Nuru Hoyakalu yehi hichpajikatshrino.
28Nuru Hoyakalu nunya. Xye tshijne hapokatshrino. Waneyapa xye tshijne nuchpajini. Nuru Hoyakalu nwaka nyanu.
29Waneya rasruklene wla tshinru:
— Xawakni halikaka pekhixnawa puchinikanretler-potuko. Hi yapkaklu tsonu ptshina.
30— Ha xawakni wimatyi pixa ptowru potuko himatatshriyi. Hi rujhalu yine hepomhiywakyi. Hiyáhoni walixyi Hoyakalu yokanreryi pixyawaka.
31Waneya Jesus hepomhana, wla htshinna:
— Halikaklahe halixno xawakni?
32Hetanu rapokpapkolutanu, rali hapoklepapkolutatka hipalaxyawakapa hixa satkakhi waleko hyawakle yanu, hita hichomtanu. Seyni hi hichotkalurno halikaka klu tshinanu Nuru Hoyakalu hitaymalutni wale.
33Xyekaka pirana nunkakatkahi kihle hchinikanurunephi hita tshinanu. Xye tshijne salewnikatshinephi. Seyni kihle hchinikanurunephi klu tshinanu xye tshijne namtakakatka.
હાલમાં પસંદ કરેલ:
João 16: mpdBiblia
Highlight
શેર કરો
નકલ કરો
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
