Lukas 22

Nkùnkù num Yésu

(Mat. 26.1-5; Mark. 14.1-2)

1Lé'njù jùa bàn keko', ze bo ke ntsiaṅ ndù Pasa là ghebte. 2Ghale'te Nsi tse ndùbndùb mba ghalèn ṅwa'ni Nsi nke ndiag kua' mba bo zwi Yésu yi là, nummbe bo lo ke mbwôg benntùn.

Mba Yuda ghù ndàm num Yésu là

(Mat. 26.14-16)

3Satan tsho ntù Yuda ze bo ke ntsiaṅ i ndù Iskariot, mo' mèn netèt tse ntshob bàa gham nà. 4Yuda nèn ntèt ghale'te Nsi tse ndùbndùb mba kam ba soyé bo à bo nabte mat mb'a nsi fà Yésu bo là. 5Tshen ben ni tsiaṅte, nabte nefà nkàb yi. 6A bam, nke ndiag manze mebwô z'a nsi tshùa bwe kà fà i bo, bwoṅ benntùn ke lèn nà.

Jujù Pasa. Jujù nelàne

(Mat. 26.17-25; Mark. 14.12-21)

7Lé'njù bàn keko' z'a bwô ndù bo zwi bon njùmbwe Pasa num ju nele'te Nsi là se'. 8Yésu tum Pétro mba Yohané, ntshob ndù: Bin nèn nabte jujù Pasa, ndù bag bin jù. 9Bo tshob yi ndù: O kô ndù bag nabt'é à yà? 10A bùnte bo ndù: Bin nsi be tsho ntùm ngô, bumte bin à mén mandum ndù a ket tshaṅ ntse, bin tam njam i, nèn nkum ndà z'a tsho bwe là, ntshob tà yen ndà là ndù: 11Ngatswite tshob wù ndù: To'ndà ze me jù Pasa bwe bag à ghazi'te nu àm nà b'a yà? 12Tu wul i nsi la'te to'ndà ndùb bin mfe tù, ndù a nabte kua' mebwô; a b'a bwe là ze bin nsi nabte njoṅ tshu fa là. 13Bo nèn, njen ju ze Yésu tshob bo là be ndaṅndaṅ; mbèn nabte jujù Pasa.

14Ngelaṅ ku', Yésu tswe téblé boa ghantum tse. 15A tshob bo ndù: Ntùm nekù ntù, me kô kua' nejù Pasa li bag à bin, kà njôg njen nge'. 16Nummbe me tshob bin ndù: Me ke nsi bèn jù i, tà nkum ngelaṅ z'a nsi bèn bumte ntùm nufen Nsi là. 17A lo' ntu' ndu', nde'te Nsi ntshob ndù: Bin ko là ngabte netèt bin. 18Nummbe me tshob bin ndù: Me ke bèn nu ndu' mi a fe ntùm nkùa là, tà nkum ngelaṅ ze nufen Nsi se' là.

19A bèn ndo' bàn, nde'te Nsi, mbe'te mfà bo, ntshob ndù: Yen ni b'a wul àm ze bo fà num bin nà, [bin ke ngù yen ni, nke nkwimt'àm yi. 20Jujù be mi, a fà ntu' ndu' bo be ndaṅndaṅ ntshob ndù: Yen ntu' li b'a kàn nswe ntùm lem tshàm tse bo fètte num tu bin nà.]

21Tshù, bag ngaswèn àm tshwèt ntshag mbu num téblé. 22Mén mèn ke nèn à mba Nsi tshob là; là, nge' tu mèn yen nà ze bo nsi tshùa num i kà swèn i là. 23Ghazi'te nu i to' nebètte netèt bo, mèn z'a be a ghù yen nu là là.

Mèn ndùb b'a we

(Mat. 20.25-27; Mark. 10.42-44)

24Bo #Mat. 18.1; Mark. 9.34; Luk. 9.46soṅte ntshob netèt bo nelèn mèn ze be bo lo' i mba mèn ndùb là. 25Yésu #Mat. 20.25-27; Mark. 10.42-44tshob bo ndù: Fenfen ngô num ntô i, ben tse bo ghù ngù' num i là, bo nke ntsiaṅ yub ben ndùbndùb. 26Là #Mat. 23.11; Mark. 9.35mba bin nà, kà bin ghù be ndaṅndaṅ, a bwô ndù mèn ndùb netèt bin lo' wul i mba metsit mèn nà, mèn z'a tshwèt ntô là be mba mèn z'a tshwèt mfa' là! 27A #Yoha. 13.12-15zit mèn be mèn ndùb à, mèn z'a be num téblé, ke mèn z'a tshwèt mfa' l'à? Ke mèn z'a be téblé là ké? Là me be netèt bin à mba mèn z'a tshwèt mfa' là!

28Bin lo ghô me, bag à bin fènte ntùm tshàm laṅte. 29Me lé' nufen Nsi bin, mba Tàa na' ndé' me yàm nà. 30Bin #Mat. 19.28nsi jù bèn nu num téblé sàm, ntùm nufen sàm; bin nsi tswe num ndiaṅfen, ke tsho'te ntsha tunndà ba Israél ntshob bàa gham.

Mba Pétro nsi gha Yésu là

(Mat. 26.30-35; Mark. 14.29-31; Yoha. 13.31-38)

31Simon, Simon, Satan lo lon zin num neke'te zin mba bo be nke'te ngefet là; 32là m'a le'te Nsi num tu o ndù kà bamntù o bot. Ngelaṅ ze tu wul o nsi kaṅ ntù o là, o ghù fèt tsho ghù tànntù. 33Simon tshob yi ndù: Tshùaben, me b'a manze nenèn ndàtsha mba nekwù bag wù. 34Yésu tshob ndù: Me tshob wù, Pétro ndù: Kù'ngab ke nsi tô sènni ke be ndù o gha àm yoṅ tat ndù o ke' lèn àm.

35A #Mat. 10.9-10; Mark. 6.8-9; Luk. 9.3; 10.4tshob ghazi'te nu i ndù: Ngelaṅ ze me tum zin ke mfe', ke bàm, ke nketo' là, bin lo bwoṅ ju ké? Bo tshob ndù: Nga. 36A bèn ntshob bo ndù: Là ndonni, mèn z'a ghù mfe' là lo'o, be ndaṅndaṅ mba mèn z'a ghù bàm nà. A bwô ndù mèn z'a ke' ghù ṅwi là swèn kummbaṅ se, ndo' njun ṅwi yi. 37Nummbe #Es. 53.12me tshob bin ndù a bwô men ntshob mi bo na' nkite ndù: Bo yab i netèt ba fimntshu là bumte num àm. Nummbe njoṅ nu fa ts'a tshwèt nse' num àm nà, tù' nebumte. 38Bo tshob yi ndù: Tshùaben, tshù ṅwi li bàa. A bùnte bo ndù: A ku'u.

Gétsémané

(Mat. 26.36-46; Mark. 14.32-42; Yoha. 18.1-2)

39Yésu tum nèn num mbat nten mb'a be ze matnu là. Mba ghazi'te nu i tam njam i. 40A kum num yen dù' là, ntshob bo ndù: Bin le'te Nsi ndù kà bin tsho ntùm laṅte. 41Tu wul i kù'te mbaṅ bo, nèn nguan ma' loṅ, nkwim ntunkekwi' mi nsi, nde'te Nsi, 42ntshob ndù: Tà, a be z'o bam nà, o lo' yen ntu' li nèn yi ngùanesà mbaṅ àm. Là kà bam ndù yàm nekô bumte, là yu nekô. [ 43Mo' Angél fe kamànyam, ṅwage, mfà neta yi. 44Yésu to' nema' ntsho bo vù, nde'te Nsi neta; ze'ni a ke ntum num i là, tswe mba lem nà, nke ntshùmte nsi.] 45A be miagte nele'te Nsi, ndo mbèn njam mbaṅ ghazi'te nu i, njen yub ndù bo tshwèt nzi ntùm nenywine. 46A tshob bo ndù: Numke bin nke nzi à? Bin lo nsi, mbèn nde'te Nsi ndù kà bin tsho ntùm laṅte.

47Ngelaṅ z'a ke nke' ntshob là, mo' bwoṅ benntùn ṅwag ndù mèn ze bo ke ntsiaṅ i ndù Yuda, mo' mèn netèt tse ntshob bàa gham nà kwé mbwe bo, nkù'te nse' mbaṅ Yésu nyô nge' mi. 48Yésu tshob yi ndù: Yuda, o lo' à nenyô nge' kà swèn Mén mèn yi ké? 49Benntùn tse boa Yésu na' mbe là be yen nu z'a nsi se' là, ntshob yi ndù: Tshùaben, bag wat yub ké? 50Mo' mèn netèt bo lab ngafa' nkam ngale'te Nsi, nkeb toṅ i ze zwim. 51Yésu bùnte ntshob ndù: Bin tsine! Nkwag toṅ i, njat'é. 52Ntshob ghale'te Nsi tse ndùbndùb, kam ghabéb Ndà Nsi mba ghakwé mbwe tse bo se' nelo' i là ndù: Numke bin ntum ndo' ṅwi mba nzwit mba me b'a fimntshu l'à? 53Njoṅ #Luk. 19.47; 21.37lé'njù fa, bag à bin lo ke mbe ntùm Ndà Nsi, bin ke nyit mbu num àm, là, a zin nyam ni, mba neta njame.

Yésu mbwe Kaïfa. Mba Pétro gha Yésu là

(Mat. 26.57-58,69-75; Mark. 14.53-54,66-72; Yoha. 18.12-18,25-27)

54Bo tshùb Yésu ndo' i nèn yi ntùm ndà ngale'te Nsi ze ndùb. Là Pétro nke mbwe Yésu tà ngùanesà. 55Bo kwé'te mbwôg tètla', ntswe mbaṅ bwe, mba Pétro tswe netèt bo.

56Mo' ngafa' ze mènnzwi yen mba Pétro tswe nsi mbaṅ mbwôg là, ndôt'é kua' mebwô, ntshob ndù: Mba yen mèn ni lo be bo yi. 57Là Pétro gha Yésu, ntshob ndù: Mènnzwi, me ke' lèn i tshàm. 58A be ghubte, mo' bèn njen Pétro, ntshob yi ndù: Mba wù yu b'a mo' mèn yub. Pétro tshob ndù: Mandum, a ke tse me. 59A be tshùa nguan ta' nyam, mo' bèn nse' ntshob ndù: Kua' nenùne, mba yen mèn ni lo be bo yi, nummbe a b'a ze Galiléa. 60Pétro bùnte ndù: Mandum, me ke' lèn ju z'o tshwèt ntshob là. Be ngelaṅ mbile, a ke yoṅ miagte netshobe, kù'ngab tô. 61Tshùaben kaṅ wul i njam ndôte Pétro. Pétro kwimte ntshob mi Tshùaben tshob yi ndù: Kù'ngab nsi be tô sènni ndù o à gha àm yoṅ tat là, 62ntum njù, nkua' neshu.

63Benntùn tse bo ke mbéb Yésu là, tshabt'é, ndab i, 64nkut miag mi kam nzwe, nke mbètt'é ndù: Tshobe, we z'a lab o à? 65Bo tshabt'é kua' mà yàme.

66Njù be làne, ghakwé mbwe ntùm ngô, ghale'te Nsi tse ndùbndùb mba ghalèn ṅwa'ni Nsi tse'te, ngù bo lo' Yésu, nse' yi ntùm yub ndàntsha, 67ntshob yi ndù: A be z'o b'a Kristô là, o tshob bag! A bùnte bo ndù: A be ze me tshob bin nà, mba bin ke nsi bame. 68A be ze me bètte zin nu là, mba bin ke nsi bùnte. 69Fe ndonni, Mén mèn nsi tswe num bag bu neta Nsi ze zwim. 70Bo tshob njoṅ yub fa ndù: Ndùlala o b'a Mén Nsi ké? A bùnte bo ndù: A bin bèn ntshob ndù me b'a yi. 71Là bo tshob ndù: Be bèn ndiag kwénta numke? Nummbe mba be ze be ju' à be kua' ntshu i.

હાલમાં પસંદ કરેલ:

Lukas 22: BMa

Highlight

શેર કરો

નકલ કરો