Yohané 4

Yésu mba nzwi Samaria

1Ngelaṅ Tshùaben lèn ndù ba Férésia ju' ndù Yésu tshwèt ngù ghazi'te nu i yàme, mbèn nke nyu' benntùn ntse ntshùa Yohané là, 2là tu wul i Yésu lo ke nyu' benntùn ntse, là ghazi'te nu i, 3a tum Yudéa mbèn njam mà Galiléa. 4A lo bwô ndù a tshùa netèt Samaria.

5Ndùlala #Net. 33.19; Yosh. 24.32a kum ntùm mo' ngô Samaria, lén se Sikar, mbaṅ nà ze Yakob na' mfà mén i là. 6Tôntse Yakob lo be yen dù' là. Yésu z'a zin mbot là tswe nsi bwe, mbaṅ ntse. A na' mb'a nguan njagnyam. 7Mo' mènnzwi se' netu' ntse, Yésu tshob yi ndù: Fà mén ntse me, me nu.

8Nummbe ghazi'te nu i lo nèn ntùm ngô jun jujù. 9Là #Esd. 4.1-5; Néh. 4.1,2nzwi Samaria tshob yi ndù: Numke wù z'o b'a ze Yuda là bètt'àm ntse, me ze me b'a nzwi Samaria l'à? (Nummbe ba Yuda mba ba Samaria lo ke be tamte num sàm ju). 10Yésu bùnte ntshob yi ndù: O lo ndèn ju ze Nsi num mfà là, mbèn ndèn mèn z'a tshwèt ntshob wù ndù: Fà mén ntse me, me nu là, kà mbu' mbu yi yu tu, mb'a fà ntse yôg wù.

11A tshob yi ndù: Tshùaben, o ke' ghù ju netu' ntse yi, tôntse bèn nèn nsi neshu; o lo' men ntse yôg l'à yà? 12O b'a mèn ndùb ntshùa tà yag Yakob z'a na' mfà sen tôntse li bag là ké? Tu wul i lo nu ntùm bwe, bon tse mba nyàm tse. 13Yésu bùnte ntshob yi ndù: Mba we lo z'a nu men ntse li là, ntù i nsi bèn kù; 14là mèn z'a nsi nu ntse mi me nsi fà yi là, ntù i ke nsi bèn kù mo' yoṅ i, là ntse mi me nsi fà yi là nsi tù' lagntse num i, se ntse nsi tum bwe num yôg matmat là. 15Mènnzwi là tshob yi ndù: Tshùaben, fà men ntse là me ndù kà ntù àm bèn nekù, mba ndù kà me bèn nese' nsen ni, netu' ntse. 16Yésu tshob yi ndù: Nèn ntsiaṅ ndu o, nse' nsen ni. 17Mènnzwi là bùnte ntshob ndù: Me ke' ghù tshàm ndu. Yésu tshob yi ndù: O tshob mebwô netshob ndù: me ke' ghù tshàm ndu; 18nummbe o lo ghù du tàn, mba z'o ghù ndonni là ke' b'a ndu o; num ndùlala o tshob nenùne. 19Mènnzwi là tshob yi ndù: Tshùaben, me yen ndù o b'a ngatshob ntshob Nsi. 20Tà tshag lo ke ngamte Nsi num mbat li, bin nke ntshob ndù Yérusalém bèn mbe dù' z'a bwô neghamte Nsi bwe là.

21Yésu tshob yi ndù: Mènnzwi, bam me ndù ngelaṅ ku'u, ze bo ke nsi bèn ghamte Tà num yen mbat li, ke mba Yérusalém lo là. 22Bin lo ke ngamte ju ze bin ke' lèn nà; bag nke ngamt'a ju ze bag lèn nà; nummbe yôg fe à ba Yuda. 23Là ngelaṅ bwe nku'u, ndù a ku' ndonni ze ghaghamte Nsi tse nenùne, nsi ghamte Tà ntùm Ywèt mba ntùm nenùn nà, nummbe a b'a lèn tshen ghaghamte Nsi là tse Tà num ndiag là. 24Nsi b'a Ywèle, a bwô ndù ben tse bo ke ngamt'é là ke ngamt'é ntùm Ywèt mba nenùne.

25Mènnzwi là tshob yi ndù: Me lèn ndù Mésia tshwèt nse' ze bo ke ntsiaṅ i Kristô là; ngelaṅ ze yen mèn nà nsi se' là, a nsi soṅ yag njoṅ nu fa. 26Yésu tshob yi ndù: Me b'a yi, me ze me tshwèt ntshob wù là.

27Mb'a ke nke' ntshob là, ghazi'te nu i se', ntshàm neshu mb'a tshwèt ntshobte bo mènnzwi là. Là sàm mèn ke tshob ndù: Ke z'o tshwèt mbètte yi à? Ke ndù: A nu ke ze bin yi tshwèt ntshob à?

28Ndùlala mènnzwi là faṅ tentse i, nèn ntùm ngô, ntshob benntùn ndù: 29Bin se' njen mo' mèn z'a soṅ àm njoṅ tshu fa tse me ghù là, mo' ndù a b'a Kristô! 30Bo tum ntùm ngô nèn mbaṅ i. 31Ngelaṅ mènnzwi là nèn nà, ghazi'te nu i nke nde't'é, ntshob ndù: Rabbi, jù ju.

32Là, a tshob bo ndù: Me ghù jujù ze me jù, ze bin ke' lèn nà. 33Ndùlala ghazi'te nu i nke ntshob bo bo ndù: Mo' ndù mo' mèn se' mfà jujù yi.

34Yésu tshob bo ndù: Yàm jujù b'a ndù me ghù nekô mèn z'a tum àm nà, mba ndù me nsi miagte fa' se. 35Bin ke' be tshob ndù: A tù' maṅwù kuà netsho' tshu ku' ké? Tshù, me tshob bin ndù: Bin bù' miag min ndôte ntùm nà njene, tshu netsho' à fôge, a bwô netsho' tshu. 36Mèn z'a num ntsho' tshu là num nkwé ntsho'fa', nke ntse'te ntàm num yôg matmat, ndù mèn z'a ywit là mba mèn z'a tsho' là tamte ntsiaṅte. 37Nummbe men tshob li b'a nenùn nsen ni ndù: Mo' mèn b'a ngaywit, mo' mèn be ngatsho'. 38Me lo tum zin netsho' tshu dù' ze bin na' mbe ke fa' là, tsemo' ben lo fa'a, là bin tsho' ntùm fa' sobe.

39Là ba Samaria yàm tse bo be ntùm yen ngô là là, bam i, ntshùa num ntshob mi mènnzwi tshob bo, nkwé nta yi là, ndù: A soṅ àm njoṅ tshu fa tse me ghù là. 40Ngelaṅ ba Samaria kum mbaṅ i là, bo le't'é ndù a ghô bo à bo. A ghô bwe lé'njù bàa. 41Benntùn yàm yàm bèn mbame, ntshùa num ntshob mi. 42Bo nke ntshob mènnzwi là ndù: Bag ke' bèn mbam à nda' num mb'o lo ntshob là. Nummbe mba bag ju' yag tu, ndèn ndù yen mèn ni b'a kua' ngayôg njù.

Neyate mén tshe'mfen

(Luk. 7.1-10; 17.5)

43Là tshen lé'njù bàa là lo be tshùa, a tum yen dù' là, nèn Galiléa. 44Nummbe #Mat. 13.57; Mark. 6.4; Luk. 4.24tu wut Yésu lo kwé nta ndù bo ke' be nyàmte sàm ngatshob ntshob Nsi ntùm ko' ngô i. 45Ndùlala, #Yoha. 2.23ngelaṅ z'a kum Galiléa là, ba Galiléa lo' i mba bo na' njen njoṅ tshu fa ts'a na' ngù mà Yérusalém mum lé'njù jùa là, nummbe mba bo lo nèn mum lé'njù jùa.

46Ndùlala, #Yoha. 2.1-11a bèn nse' Kana dù' z'a ghù ntse tù' ndu' là. Mo' tshe'mfen lo be bwe ze mén i ke ngon Kapernaum nà. 47Yen mèn nà be ju' ndù Yésu fe Yudéa nse' Galiléa, nèn mbaṅ i, nde't'é ndù a swe' nèn njate mén i yi, nummbe a tù' nekwù. 48Yésu tshob yi ndù: A be ze bin ke' yen nsa mba tshu netshàm nà mba bin ke bame. 49Tshe'mfen tshob yi ndù: Tshùaben, swe' kà mén àm kwù. 50Yésu tshob yi ndù: Nène, mén o yôge. Yen mèn nà bam ntshob mi Yésu tshob yi là, nène. 51Là, mb'a be num manze nke nswe' là, ghafa' tse se', mbumte boa yi, ntshob ndù mén i yôge.

52A bètte yub nyam ze mén to' netswe mebwô là. 53Ndùlala tàab lèn ndù a b'a num yen nyam nà ze Yésu lo ntshob yi ndù: Mén o yôg là. A bam, yi, mba njoṅ tunndà i fa. 54Yen ni b'a mbatte nsà bàa ze Yésu ghù ngelaṅ a fe Yudéa nse' Galiléa là.

હાલમાં પસંદ કરેલ:

Yohané 4: BMa

Highlight

શેર કરો

નકલ કરો