পত্থম 5
5
আদম বংশর্ কধা
1ইবে অলঅ আদম বংশগুনোর্ কধা। মানুচ্ সৃট্টি গুরিবার অক্তত্ গোজেনে তারে তা নিজো ধোক্ক্যেন গুরি বানেল; 2সৃট্টি গুরিলো মরদ আর মিলে ইজেবে আর তারারে বর্ দিলো। সৃট্টির সময়োত্ তে তারা নাঙানি দিলোদে মানুচ্। 3একশ ত্রিশ বজর বয়জত্ আদমর্ এক্কো পুয়ো জর্ম অলঅ। পুয়োবো বারেদি আর ভিদিরেদি রিনি চেলে তা ধোক্ক্যেন্ ওইয়্যে। আদমে তা নাঙান্ দিলো শেথ। 4শেথর জর্মানার পরেদি আদমে আরঅ আস্তোশত্ বজর বাঁজি এলঅ। এ ভিদিরে তার আরঅ ঝি-পুয়োর জর্ম ওইয়োন্। 5নয়শঅ ত্রিশ বজর বাঁজি থানার পরেদি আদমে মুরি গেলঅ।
6শেথর একশঅ পাঁচ বজর বয়জত্ তার পুয়ো ইনোশর জর্ম অলঅ। 7ইনোশর জর্মানার পরেদি শেথে আরঅ আস্তোশঅ সাত বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 8নয়শঅ বার বজর বাঁজি থানার পরেদি শেথে মুরি গেলঅ।
9ইনোশর নব্বই বজর বয়জত্ তার পুয়ো কৈননর জর্ম অলঅ। 10কৈননর জর্মানার পরেদি ইনোশে আরঅ আস্তোশ পনর বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 11নয়শঅ পাঁচ বজর বাঁজি থানার পরেদি ইনোশে মুরি গেলঅ।
12কৈননর সত্তুর বজর বয়জত্ তার পুয়ো মহললেলর জর্ম অলঅ। 13মহললেলর জর্মানার পরেদি কৈননে আরঅ আস্তোশ চোল্লিশ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 14নয়শঅ দশ বজর বাঁজি থানার পরেদি কৈননে মুরি গেলঅ।
15মহললেলর পাচছোট্টি বজর বয়সত্ তার পুয়ো যেরদর জর্ম অলঅ। 16যেরদর জর্মানার পরেদি মহললেলে আরঅ আস্তোশ ত্রিশ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 17আস্তোশ পাচানব্বই বজর বাঁজি থানার পরেদি মহললেলে মুরি গেলঅ।
18যেরদর একশঅ বাষট্টি বজর বয়জত্ তার পুয়ো হনোকর জর্ম অলঅ। 19হনোকর জর্মানার পরেদি যেরদে আরঅ আস্তোশ বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 20নয়শঅ বাষট্টি বজর বাঁজি থানার পরেদি যেরদে মুরি গেলঅ।
21হনোকর পাচছোট্টি বজর বয়সত্ তার পুয়ো মথূশেলহর জর্ম অলঅ। 22মথূশেলহর জর্মানার পরেদি তিনশ বজর সং গোজেন লগে হনোকর উদো-লোলি এলঅ। এ ভিদিরে তার আরঅ ঝি-পুয়ো ওইয়োন্। 23হনোকে তিনশঅ পাচছোট্টি বজর এ পিতথিমীত্ বাঁজি এলঅ। 24ইয়েনর পরেদি তারে আর্ দেগা ন-গেলঅ। গোজেন লগে তার উদো-লোলি এলঅ বিলিই গোজেনে তারে নিজো ইধু নেযেল।
25মথূশেলহর একশঅ সাতাশি বজর বয়জত্ তার পুয়ো লেমকর জর্ম অলঅ। 26লেমকর জর্মানার পরেদি মথূশেলহ আরঅ সাতশঅ বিরাশি বজর বাঁজি এলঅ। এ ভিদিরে তার আরঅ ঝি-পুয়োর জর্ম ওইয়োন্। 27নয়শঅ উনসত্তর বজর বাঁজি থানার পরেদি মথূশেলহ মুরি গেলঅ।
28লেমকর একশঅ বিরাশি বজর বয়জত্ তার এক্কো পুয়োর জর্ম অলঅ। 29তে কলঅ, “আমার বেক্ কামানির্ ভিদিরে, আজল্কধা লগেপ্রভু মাদিগানরে অভিশাব দেনার পরেদি সিয়েন উগুরে আমার যে কামানি গরা পরে সিয়েনি ভিদিরে এ পুয়োবো আমারে সান্তনা দিবো।” ইয়েন কোইনে তে তা নাঙান্ দিলো নোহ। 30নোহর জর্মানার পরেদি লেমকে আরঅ পাচ্শঅ পাচানব্বই বজর বাঁজি এলঅ। এ ভিদিরে তার আরঅ ঝি-পুয়ো ওইয়োন্। 31সাতশঅ সাতাত্তুর বজর বাঁজি থানার পরেদি লেমকে মুরি গেলঅ।
32নোহর বয়জ্ পাচশঅ বজর পার ওই যানার পরেদি তার পুয়ো শেম, হাম আরঅ যেফতর জর্ম ওইয়্যে।
હાલમાં પસંદ કરેલ:
পত্থম 5: CBT
Highlight
શેર કરો
નકલ કરો
Want to have your highlights saved across all your devices? Sign up or sign in
Copyright © 2021 Bangladesh Bible Society