Jɔn 4
4
Yeso ghàm tì àyi Sàmarìyà
1Yeso ya kyeri gha mə̀Farìsi fə zug gha, bəd ndan ndàn mbe bène abɔ̀ʼ məd, bə̀ zug gha, məd we bə̀ nàʼà mənib abə inun bəd ne nɔ̀ʼi chè mbe ne Jɔn we nàʼà mənib inɔb. 2Tesiʼ ya gha, kayi Yeso məd məd yaya nàʼà mənib abə bəd, à ya mə̀mə̀nənùg məd yaya nàʼà. 3Anyumə̀ ne Yeso ya kyeri gha bəd məjìm fə zug anug ze, wì ya nɔ̀ʼ a Jùdeyà ywìrì bə̀ndì ghò a Galìli.
4Məd ya bèrì ni chè inga Sàmarìyà. 5Ane, icheg ne wì yaya ghò, wì ya pè inga asiŋi mɔ̀ʼɔ inga Sàmarìyà ne mbe kàrà ane Sikà. Sikà ya iban asiŋi ìseg ze ne Jàkɔb ya nàʼi abə Jòseb, ŋwan məd. 6Ibighi mənib we ne Jàkɔb ya ghum tɔŋ ya yaʼ angu. Icheg ne Yeso ya nɔ̀ʼi ane igha̰ bɔd, wì ya chughi aseg iban ibighi mənib we. Wì ya pè icheg ane àngɔŋ tisi.
7Anyumə̀ ne àyi Sàmarìyà mɔ̀ʼɔ ya ghò ni sìmì mənib inga ibighi mənib, Yeso ya nɔn mənib ibo gha, “Mə boʼ ibo, nàʼa mənib inum mə̀ no.” 8Mə̀mə̀nənùg məd ya fə ghò ikye aben ni zon tijəg.
9Àyi Sàmarìyà we ya ywìtì ibo gha, “Àghò ya Ju. Mo ya àyi Sàmarìyà. Ze kə che iye gha àghò bìri mənib inum?” Aton ne àyi we ya biri ane ya gha chəyi mə̀Ju yaya jə̀grə tì məSàmarìyà.
10Yeso ya ywìtì ibo gha, “Àkə aghi ne àghò kyèri ineʼi we ne Ŋwiye we nàʼà bə̀ kyèri wə̀d we ne bìre mənib ine, nji à ya àghò bìri ibo, wì si nàʼ mənib ne nàʼà ìtḛ̀ ine.”
11Àyi we ya zug ane, si gha, “Masà, chəyi àghò beri aghi mənib ni toʼ mənib. Ibighi mənib bə̀ sà inga. Mənib ne nàʼà ìtḛ̀ kə àghò biri niŋ aya? 12Àghò kə ijiʼi wə̀d ne che Jàkɔb, ìwa mbaʼ kyen ne ya tɔŋi ibighi mənib gho̰ nàʼ ina? Məd zìye ya no inga. Bɔn məd fɔrɔ nyam məd ya bə̀ no inga.”
13Yeso ya ywìtì ibo gha, “Bəd məjìm ne no mənib mbo̰, adɔʼ mənib biri ya ywìrè ko awɔb. 14Àsi bəd ijìm ne no mənib mbe ne mə nàʼà, chəyi adɔʼ mənib biri ywìri nɔʼ ko awɔb ka. Tesiʼ ya gha, mənib mbe ne mə nàʼà ya icheg àdùrì ne swèghe gwètè nàʼà ìtḛ̀ ighə̀m imɔʼ.”
15Àyi we ya ghà ibo gha, “Masà, nàʼa mənib angu inum ni gha chəyi adɔʼ mənib biri ywiri nɔʼ ko amə. Ane, chəyi mə̀ biri ywiri bə̀ndì yeʼe aŋa ni toʼ mənib.” 16Yeso si ghà ibo gha, “Ndò ghò kàrì ìwe inɔm, mbə̀ fɔrɔ bə̀ndì yèʼe.”
17Àyi we ya ywìtì gha, “Chəyi mə̀ beri inɔm.” Yeso ya ghà ibo gha, “Àghò gha tesiʼ gha chəyi àghò beri inɔm. 18Anug ne angu ya gha, àghò fə kweʼì bèrì mənɔm məta̰. Wə̀d we ne àghò ya chùghə tì məd amad anìŋ ya kayi ìwe inɔm. Anug ne àghò gha ya kwàʼ tesiʼ.”
19Àyi we ya gha, “Masà, mə bàd gha àghò ya wə̀dkə̀n Ŋwiye. 20Ìmba mə̀mbaʼ kyen yaya ghùmnə Ŋwiye ikaŋ iwum aŋa. Si ya gha, mbə̰ mə̀Ju ya ghà gha asiŋi ne tì mənyìʼ ghùmni Ŋwiye angu ya a Jèrusalèm.”
21Yeso ya ywìtì ibo gha, “Abo, àghò zug anug ne mə ghà ine. Nyùmə̀ we yèʼe ne chəyi mbi biri ya ywìrè ghùmnə ìmə Mbaʼ məyi ikaŋ iwum aŋa, kə̀ a Jèrusalèm. 22Mbə̰ məSàmarìyà ya ghùmnə Ŋwiye ne chəyi mbə̀ taŋ kyèri. Mba mə̀Ju ya ghùmnə Ŋwiye ne tì kyeri imbə̀ʼ icheg ne Ŋwiye fə chɔʼ yaʼ awa mba mə̀Ju, ni chwi icheg ne məd Ŋwiye biri pumni bəd. 23Tesiʼ ya gha, nyùmə̀ we yèʼe ne bəd Ŋwiye biri ya ghùmnə aməd ane icheg ne koʼi. Nyùmə̀ we fə pè. À ya nyùmə̀ ne bəd Ŋwiye biri ya zùghə inug abə Azwighi Ŋwiye se ghùmnə aməd ane icheg ne koʼi. À ya ane imbə̀ʼ icheg ne, à ya tiku bəd te ne Ŋwiye ya kə̀bə̀ gha mbe ya ghùmnə aməd. 24Ŋwiye ya Azwighi. Ane, bəd mbe ne ghùmnə aməd mənyìʼ ghùmni aməd inga Azwighi fɔrɔ ane icheg ne koʼi.”
25Àyi we ya si gha, “Mə kyèri gha Wə̀d we ne Ŋwiye zɔ̀ʼi ne mbe kàrà ane Kristo we yèʼe. Wì biri pè tòʼrì inug ijìm ina.” 26Yeso ya si tòʼrì ìwi nyɔd abə àyi we gha, “Kristo we ya mo gho̰ ne ghàmà ine anìŋ.”
Mə̀mə̀nənùg ywìrì bə̀ndì yèʼe abɔ̀ʼ Yeso
27Kwàʼ anyumə̀ we ne Yeso yaya kiri ghàmà ane, mə̀mə̀nənùg məd ya bə̀ndì pè bàd icheg ne wì yaya ghàmà tì àyi Sàmarìyà we, anug chè awɔb. Si ya gha, chəyi wə̀d mɔ̀ʼɔ abɔ̀ʼ inɔb ya bèrì fìŋ ni biri gha, “Àghò kə kə̀bə̀ aghə?” kə̀ “Aton ne àghò ya ghàmà tì àyi gho̰ àkə gha?”
28Àyi we ya si nɔ̀ʼ sàŋi àze aghi mənib, bə̀ndì ghò ikye aben pè ghà abə bəd gha, 29“Mbə̀ yèʼe bàd wə̀d mɔ̀ʼɔ. Wè mə̀ti inug ijìm ne mə̀ kweʼì ghì. Kə̀ məd anìŋ yaʼ Wə̀d we ne Ŋwiye zɔ̀ʼi?” 30Bəd mbe ne àyi we ya ghàmi inɔb ya nɔ̀ʼ inga ikye aben ko ghò ni bàd Yeso.
31Icheg ne àyi we ya nɔ̀ʼi ko ghò ikye aben, mə̀mə̀nənùg ìmbi Yeso ya ghà ibo gha, “Àchwitìnùg, jəg aghi mɔ̀ʼɔ.”
32Yeso ya ton, ghà inɔb gha, “Mə bèrì tijəg ni jəg ne chəyi mbə̀ kyeri anug mɔ̀ʼɔ imbə̀ʼ tiwən.”
33Mə̀mə̀nənùg məd ya si bìri mbɔb mbɔb gha, “Wə̀d mɔ̀ʼɔ wa kə fə yèʼe anjìm nàʼ ighijəg ibo?”
34Yeso ya ghà inɔb gha, “Ìtum tijəg ya ni fàʼ anug ze ne wə̀d we ne cha amə kə̀bi bə̀ màni àfàʼì ze ne wì zi inga ìtum tikye abo. 35Imbə̀ʼ mbə̰ mbe tùmə ìngam mɔ̀ʼɔ gha, ‹À si tèn aməg akwè ni fòʼ ighi a mben?› Mə gha tesiʼ inən gha, mbə̀ fiʼe àzən aghə, nèn icheg ne ighi fə tə̰ a mben kòʼ ni fòʼ. 36Wə̀d we ne biri fòʼ ighi a mben biri niŋ ìwi ikab àfàʼì. Kwàʼ amad anìŋ, wì fə se fòʼò bə̀ fète ighi. Ighi mbe ya bəd mbe ne biri jəg ìtḛ̀ ighə̀m imɔʼ. Ane, wə̀d ne nyɔ̀ʼɔ̀ tì wə̀d ne fòʼò biri si fɔ̀ti gyèndi. 37Àzo̰ ya icheg ìngam we ne mbe tùmə gha, ‹Wə̀d ifibì nyɔ̀ʼ, wə̀d ndəŋ si fòʼ.› 38Mə chà awən gha mbə ghò a mben ghò fòʼ ighi ne chəyi mbə̀ ya nyɔ̀ʼi. Bəd ndəŋ fə fàʼ àfàʼì ne ka, mbə̰ ya anìŋ se jə̀ghə chùd ane àzɔb àfàʼì.”
MəSàmarìyà nɔʼ nɔʼ ya nɔ̀ŋì ibḛfiŋ igun Yeso
39Icheg ne àyi we ya gha, “Wè mə̀tì inug ijìm ne mə̀ kweʼì ghì,” məSàmarìyà nɔʼ nɔʼ ne ya nɔ̀ʼ inga ikye aben, ya nɔŋi ibḛfiŋ igun Yeso. 40Anyumə̀ ne məSàmarìyà mbe ya pe bàra Yeso, mbi ya boʼ ibo gha wì chughi abɔ̀ʼ inɔb. Ane, wì ya chughi abɔ̀ʼ inɔb ane ineg ibe. 41Bəd ndan ndàn ya ywìrì nɔ̀ŋì ibḛfiŋ igun Yeso məyi imbə̀ʼ ìngam məd.
42Mbi ya si ghà abə àyi we gha, “Chəyi tì nɔ̀ŋì ibḛfiŋ igun məd məyi imbə̀ʼ anug ne àghò gha ina. Tì fə zug kwàʼ ane ìmba ìtɔ̀ŋi. Tì bə̀ kyèri gha wə̀d gho̰ ya kwàʼ Wə̀d we ne pùmnə bəd igun isəg.”
Yeso ghù ŋwan mbaŋà ìwi wə̀d kyen gɔbmèn mɔ̀ʼɔ
43Anyumə̀ ne ineg mbe ibe ya che, Yeso ya nɔ̀ʼ angu ghò a Galìli. 44(Yeso ya fə ghà abə bəd gha chəyi mbe ghùmnə wə̀dkə̀n Ŋwiye ibo inga aben.) 45Si ya gha, anyumə̀ ne wì ya pe a Galìli, məGalìli ya niŋ aməd kwàʼ icheg chɔm. Mbi ya fə bàd inug mbe ne wì ya ghi a Jèrusalèm imbə̀ʼ icheg ne mbɔb ya yaʼ angu ane Iteri Chègun.
46Wì ya ywìrì bə̀ndì ghò a Kanà inga Galìli, asiŋi ze ne wì ya bə̀ŋi mənib ane mənoʼ. Wə̀d kyen gɔbmèn mɔ̀ʼɔ ya yaʼ a Kàpenàwum. Ŋwan mbaŋà məd yaya fə taŋ ghɔ̰̀ igun abaʼ. 47Anyumə̀ ne wə̀d gho̰ ya zughi gha Yeso fə nɔ̀ʼ a Jùdeyà yèʼe a Galìli, wì ya ghò ibo pè boʼ ibo ibo gha wì swiʼi yèʼe a Kàpenàwum, ibo inga nəb, ghù ŋwan məd we ne ya yaʼi igun abaʼ ghɔ̰̀ mbi se nḛ̀ nḛ.
48Yeso ya ghà ibo gha, “Mbə̰ ya anìŋ, kirənde mbə̀ bàd ineni inug tì iyeti inug, chəyi mbə̀ biri nɔ̀ŋì ibḛfiŋ igun inum.” 49Wə̀d kyen we ya ghà ibo gha, “Masà, àghò swiʼi yèʼe inum inga achan bɔŋ ìmə ŋwan se kùyə.” 50Yeso ya ywìtì ibo gha, “Ndò awe, ìwe ŋwan biri tèn.” Wə̀d we ya nɔ̀ŋì fìŋ igun anug ne Yeso ya gha, nɔ̀ʼ ghò. 51Anyumə̀ ne wì ya kiri biri inɔnjì, bəd àfàʼì məd ya bɔ̀mbì tì məd, mə̀tì ikən chɔm ibo gha ŋwan məd fə bɔti yi. 52Anyumə̀ ne wə̀d kyen we ya bìre nyùmə̀ ne ŋwan məd ya bɔti, mbi ya ghà ibo gha, “Tichaʼ nyɔd ze kə̀ mèg ane mə̀nyùmə̀ imɔʼ tisi.”
53Mbaʼ ŋwan we ya kɔndi bə̀ bàd gha, à ya kwàʼ nyùmə̀ we ne Yeso kə̀ gha ibo gha, “Ìwe ŋwan biri tèn.” Ane, məd tì inəbi məd ijìm ya nɔ̀ŋì ìwɔb ibḛfiŋ igun Yeso. 54Ayeti anug azo̰ ya ayeti anug ne pè ane ibe ne Yeso ya fàʼi a Galìli anyumə̀ ne wì ya nɔ̀ʼi a Jùdeyà.
હાલમાં પસંદ કરેલ:
Jɔn 4: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
