От Марка 9
9
1Нагныӷуткӣлъю хўатын: «Ипа уңипа̄тамси, иляси ныкывӷалъҳӣт хўани туқуна̄нӷитут кынляңа ысҳалъыӷмыхнун Атаныҳпагулъҳа Кияӷныӷым тагикан аҳтуӷьяҳқа̄нӷилъыҳтӯмаӷми».
Иисусым Алъяңуҳлъыӷа
2Аӷвинлык аӷнық атуӷлюку, Иисусым кылъқылъюки Петырлъю, Иаковлъю, Иоаннылъю, маюқат ӯсқалӷӣмун на̄йӷамун. Лъңинаҳа̄лӷӣт таўани Иисусым югусӣ алъяңуҳтыкақ ысҳа̄малъҳитни. 3А̄ткӣ қылмыҳтыкат қатытун, қа̄тҳатаӷаӷлютың китум алңунак нунами қатыҳсяӷақыхкаңаның. 4Та̄хкын малихся̄ҳтыт ысҳапакахкыт Илиямлъю, Моисейемлъю алӣӷлютык алыҳқуқаңак Иисус. 5-6Ынка̄м малихся̄ҳтыт алиңрӯӷутыҳлъякат рыпалъ сямың пипагниңиткат. Та̄хкын Петырым пика̄ Иисус: «Апыҳтуӷиста, итагнапихтукут хўа̄нлыңӯкут! Пиңают азигутат ныкыфнақапут: лъпынунлъю, Моисейемунлъю, Илиямунлъю». 7Та̄хкын қиляўа̄қ алӣӷлюни ся̄пыхкӣ. Қиляўа̄ӷмың мым пикӣ: «Унаңӯқ пиниқыпихтыкыхка Иӷнықа; нагатақитыху!» 8Та̄хкын юхсюӷа̄ӷаҳсялӷӣмың Моисейемлъю, Илиямлъю авӣтук, Иисусыңинаҳақ таўантыфтуқ.
9Укигуткылъюку на̄йӷамың Иисусым уңипақыснаниӷўа̄қа̄ ысҳа̄тылъҳат кынляңа Иӷныӷа Югым туқулъыӷмың уңуваҳтыкан. 10Ынка̄м иныҳсистың қа̄ткыхка̄т, иўырңа лъңина̄ҳныӷмыхни пӣқылӷӣт: «Сямыңтуқ писӣўа “Туқулъыӷмың уңуваҳтылъық?”» 11Та̄хкын а̄птыка̄т Иисус: «Сяңан апыҳтуӷикаюгыт Лӣлиҳтӯсяның пӣқатху Илия сивуклъюни тагипыста̄ӷьяҳқа̄нилюку?» 12Кӣмсиқӣ: «Ипаңӯқ Илия сивуклъюни тагипыста̄ӷьяҳқа̄гуқ ята̄ҳқынъалюку сяңўа̄ тамаҳа̄н. А̄птаҳлъямси, нақам сяңан Акузитыт Игақыхкат пикақатху, Иӷныӷа Югым икфиқыҳлъягьяҳқа̄нилюку, сясӣнӷилңуӷыстунлъю кияӷусяҳқа̄нилюку? 13Иўырңа уңипа̄нъақамси Илия тагика̄гуқ, югыт пиюкылъыӷмыгыстун пикақа̄т катам таўатын Акузитыт Игақыхкат пинақнилъҳистун».
Иисусым На̄лъҳускаңа Мыкылӷӣқ Илюмикун Туӷныӷалык
14Такуяқмыхтыки иляңи малихся̄ҳтыт, юлӷутыҳлъяк таўантутыфтуқ. Иляңита апыҳтуӷикаюгыт Лӣлиҳтӯсяның а̄ҳтӣра̄ӷақыфтӣт малихся̄ҳтыт. 15Лыган югыт ысҳаӷлюку Иисус сяӷӣӷаюхлъяглютың па̄йӷаҳлъюку қуякыхка̄т. 16Иисусым малихся̄ҳтыни а̄птыкӣ: «Сямың а̄ҳтӣра̄ӷақыстыки апыҳтуӷикаюгыт Лӣлиҳтӯсяның?» 17Юлӷутыҳлъягыт акулңитның югым кӣмсиқа̄: «Апыҳтуӷиста, иӷнықа тагисяӷақа лъпынун, қаюҳлъяк илюмикун туӷныӷалгӯқ. Та̄м туӷныӷа̄м акузисигата̄. 18Ка̄тыпихныӷминигу иқустақа̄, қа̄нӷалъю нувахлъӣҳқыстақа̄, хӯтңи тышқита̄хтаҳтыстақӣ, тывыҳқўа̄стақа̄лъю. Малихся̄ҳтыхпынун каягутаҳсяӷақа туӷныӷақ а̄ныстысқылъюку иўырңа пипагниңита̄т». 19Иисусым малихся̄ҳтыни пикӣ: «Лъпыси югни ухпықилъҳитуси! Натын тахка̄н лъпысининъақсиңа ухпықысқылъюңа? Мыкылӷӣқ хўавык тагитыху!» 20Ынка̄м тагитка̄т. Лыган туӷныӷа̄м ысҳаӷлюку Иисус, мыкылӷӣқ иқуслъюку сяюхпахтаҳтыстыка̄. Тама̄ни тымңи улъҳитапырыўа̄ҳтыстыка̄, қа̄нӷалъю нувахлъӣҳтыстыка̄. 21Иисусым а̄птыка̄ атаңа: «Қавңаҳа̄ның таўатыта?» Кӣмсиқа̄: «Мыкыстаҳа̄тминың има. 22Угляӷңа̄н кынӷыгнунлъю, мыӷмунлъю иқустақсяӷа̄ туқусқылъюку. Пияҳқа̄кувык наңлъыгьягулъютуң каюсӣтаҳтикуң!» 23Иисусым пика̄: «Сяңавык таўатын пизин: “Пияҳқа̄кувык”? Кияӷныӷым сяңўа̄ алңунак пияҳқақа̄ югмун ухпылӷӣмун». 24Таўаниңинақ мыкылӷӣӷым атаңа игляхтулюни пикақ: «Ухпыҳтуңа, иўырңа ухпылъыҳтуҳтаӷақаӷңа!»
25Иисусым ысҳаӷлюки ўата югыт тагиляӷа̄лъҳӣт қывӯлъюку аӷью̄қа̄ туӷныӷақ: «Уюқ туӷныӷақ тӯслъяҳтыстилӷӣлъю, акузистиңигалңуқлъю қылӷамкын а̄ни мыкылӷӣӷмың, алъямыңлъю итыфқа̄вык лъңанун пилӷа̄тын». 26Туӷныӷа̄м мыкылӷӣқ араӷа̄таҳтыстыҳлъяглюку, сяюхпахтаҳтыстыҳлъяглюку, а̄ныхкақ. Лыган мыкылӷӣқ ысҳақа̄люни туқукақ рыпалъ ысҳапалӷӣт пикат: «Туқума̄қ!» 27Иўырңа Иисусым ӣхакун тугулюку каюсӣтка̄ ныкывысқылъюку ынка̄м ныкывыхкақ.
28Иисус мыңтыӷамун итыӷьян лъңинаҳа̄ҳсямың малихся̄ҳтыңита а̄птыка̄т: «Сяңан хўаңкута а̄нысныӷмың аҳтуӷыстыху туӷныӷақ?» 29Иисусым кӣмсиқӣ: «Таўатылңуқ туӷныӷақ юӷаҳӣна̄м а̄нысяҳқақа̄, ся̄м алъя пина̄нӷита̄».
Иисусым Акузиткылъя̄тақаңа Туқулъыҳқани
30Та̄хкын нымың аӷуляқлъютың нагнықат Галилеякун. Иисусым китумун алңунак лӣсимакысюгумаңитка̄ на̄нтулыни, 31қаюҳлъяк апыҳтӯңукаңи малихся̄ҳтыни туқулъыҳқаминың. Пикӣ: «Иӷныӷа Югым тугулюку тӯнылъықа̄т югнун туқутысқылъюку, нақамынрақ пиңают аӷныӷыт атуӷлюки уңуваҳлъықуқ». 32Иўырңа лӣгикумаңилъкаңат апыҳтӯся̄ сямың писӣтаңа, ынка̄м а̄псюгумаңилъкаңат тытуглютың.
Кина Аңылъыҳпига̄ўа?
33Капернаумымун ка̄лъютың, итыӷа̄сямың Иисусым а̄птыкӣ: «Иглыӷуткылъюку сяңўа̄ а̄ҳтӣра̄ӷуткақыстыху?» 34Кӣмсиӷьюгумаңилъкаңат, қаюҳлъяк иглыӷуткылъюку а̄ҳтӣра̄ӷуткат налиҳтың аңылъыҳпига̄яҳқа̄таңа. 35Иисусым ақумлюни, қуля ма̄лӷук сӣпнықлъюку малихся̄ҳтыни туқлъюӷлюки пикӣ: «Кина алңунак сивулӣҳсюкуми ныкыхлъи киңулӣлюни, қыпҳаҳтыңулилъю тамаҳа̄нун».
36Та̄хкын таӷнуҳақ тугулюку ныкывыстыка̄ қукӣтхун. Қылъюку пикӣ: 37«Китум алңунак тугуклъиқумигу таӷнуҳаҳақ ӯтун аюқылӷӣ хўаңа апалъюқлъюңа, тугуклъиӷақа̄ңа хўаңа. Китум алңунак тугуклъиқумиңа, тугуклъиҳлъықа̄ Атака̄ каяхтикақ хўаңамның».
Хўаңкунъың Кипулъхина̄нӷилңуқ Хўаңкутыстун Аюқуқ
38Мулюхпынатың Иоанным пика̄: «Апыҳтуӷиста, ю̄к ысҳа̄ма̄ҳпут атыҳпыгун а̄нысқулӷӣ туӷныӷаӷның. Иныҳсима̄ҳпут қаюҳлъяк хўаңкунъун илятңанӷилңуқ». 39Иисусым пикӣ: «Иныҳтыхпына̄н! Қаюҳлъяк кина алңунак атымкун алъя̄ҳлъюхўаҳтиңукуми сыӷлытун акузиткылӷаҳтуӷна̄нӷита̄ңа. 40Китум алңунак кипулъыгмун пинӷилъкаңилъю, қыпҳалгуткаҳпут. 41Ипа уңипа̄тамси, китум алңунак мыҳсикаңиси хўаңа пикутымның, ипапыста̄қ акилыҳтӯсяңьяҳқа̄гуқ».
Сыӷлыҳқыстилъық
42«Ата̄сиқ таӷнуҳақ ухпықиңалӷӣ хўаңамның, югым сыӷлыҳқыстыкагу, пиниӷатаӷаӷнаяҳтуқ та̄на ю̄к мыӷмун атыҳсяқуми уяқҳўакун қа̄мқаҳфиклъюку уйӷахлъягмың. 43Ӣхыхпык сыӷлыҳқыстыкаңатын кыпнакытын. Пиниӷатаӷаӷнаяҳтутын югусиҳпык налиӷныӷа ифлъякувгу уңувалъыҳпык ифлъялъыҳқа̄ның қӯнпырухлъяк. Та̄на пиниӷатаӷаҳтуқ иңлюхтун ӣхылиӷлютын геенамун аглялъыҳқаҳпының. Таўани кумаӷуӷңалӷӣ кынық қа̄мьяҳқа̄нӷитуқ. 44Таўани: “киңугыт ныӷыхкаюгыт югмың туқуяҳқа̄нӷитут, кумаӷуӷңалӷӣлъю кынық қа̄мьяҳқа̄нӷитуқ”. 45Итыгаҳпык сыӷлыҳқыстыкаңатын, ӣкнакытын! Пиниӷатаӷаӷнаяҳтутын югусиҳпык налиӷныӷа ифлъякувгу уңувалъыҳпык ифлъялъыҳқа̄ның қӯнпырухлъяк. Та̄на пиниӷатаӷаҳтуқ иңлюхтун итыгалиӷлютын геенамун милю̄тылъыҳқаҳпының. 46Таўани: “киңугыт ныӷыхкаюгыт югмың туқуяҳқа̄нӷитут, кумаӷуӷңалӷӣлъю кынық қа̄мьяҳқа̄нӷитуқ”. 47Ийыхпык сыӷлыҳқыстыкаңатын, ипугнакын! Пиниӷатаӷаӷнаяҳтутын Атаныҳпагулъҳанун Кияӷныӷым ӣтқувык иңлюпигаӷмың ӣскылъютын, иңлюхтун ийылгулютын геенамун милю̄тылъыҳқаҳпының. 48Таўани:
“киңугыт ныӷыхкаюгыт югмың туқуяҳқа̄нӷитут,
кумаӷуӷңалӷӣлъю кынық қа̄мьяҳқа̄нӷитуқ”.
49Тамаҳаӷми таӷьюлиҳлъықуқ кыныӷмың.
50Таӷьюқ пиниҳтуқ иўырңа таӷьюӷниңӣскан, натын лъпыси таӷьюӷниҳлъя̄таӷнаяӷыстыху? Таӷьюӷниңӣтыхпынаси, ныкыхмытулъюсилъю».
હાલમાં પસંદ કરેલ:
От Марка 9: ess2
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
