От Марка 8

Иисусым Ныӷыстилъҳа 4,000 Сӣпңалӷӣның Югның

1Та̄м киңуңӣҳа̄ның юлӷутыҳлъяк қырңуӷулъя̄тақақ. Ныӷьяҳқақшахӣӷусята Иисусым малихся̄ҳтыни тахсиӷлюки пикӣ: 2«Укут наңлъыгьягутыпихтанка. Хўаңамнинъақныӷмың пиңаюни аӷныӷни ныӷьяҳқӣӷутут. 3Ныңитнун агляҳтыстыкумки ныӷыстыхпынаки тумыми та̄кўани улъыӷа̄лъықут, қаюҳлъяк иляңи уяваның тагиляӷа̄тка̄гут». 4Малихся̄ҳтыңита а̄птыка̄т: «Ма̄ни па̄ҳқитуқ накын нықыңнақыста хўатын угляҳқакалӷӣнун на̄маяҳқамың?» 5Иисусым а̄птыкӣ: «Натын угляҳқака̄н нықыкшалгустык?» Кӣмсиқа̄т: «Ма̄ӷраӷвинлыгӯт нықыкшагыт».

6Ынка̄м Иисусым юлӷутыҳлъягыт қылъқӣ ақумӯтысқылъюки нунакун. Та̄хкын тугулюки та̄кут ма̄ӷраӷвинлык нықыкшагыт Кияӷнық игамсиқаюгвиклъюку, кагимлъюки тӯныхкӣ малихся̄ҳтыминун уйыхтысқылъюки. Ынка̄м малихся̄ҳтыңи уйыхтыкат. 7Қафсинкӯраҳаӷныңлъю амсякалӷӣның иқалъюлгыт. Иисусым игамсиқаюгвиклъюку Кияӷнық, та̄кутлъю малихся̄ҳтыминун уйыхтысқыхкӣ. 8-9Ынтақун 4,000ңӯт югыт кыпсю̄лъютың ныӷӯткат. Та̄хкын малихся̄ҳтыт қырңуҳсяқмыхтыху сӣпнық, ма̄ӷраӷвинлык корзинат имиқӣт ыслъықаӷаҳлъюки. 10Иисусым юлӷутыҳлъягыт аӷуляқӯтыслъюки, ынка̄м малихся̄ҳтыкулъҳӣт аңьямун ӯхлъютың аӷуляқңина̄маӷмың пикат Далмануфамун.

Фарисеит Алъя̄ҳлъюхўаҳтитысқылӷӣт

11Тама̄нлыңӯт Фарисеит такулюку Иисус а̄ҳтӣра̄қа̄т. Пика̄т: «Алъя̄ҳлъюхўаҳтиҳлъяги, ынка̄м ухпықылъықаҳпут аҳтуӷьяҳқа̄нӷилъҳын Кияӷныӷмың пиңутаңа». Таўатын пика̄т анагнӣлъқавигиӷналюку. 12Иисусым аныҳпаглюни пикӣ: «Сяңамың ма̄тын аӷныӷым юги алъя̄ҳлъюхўаҳтилъыӷмың туңсиӷақат? Ипа уңипа̄тамси, алъя̄ҳлъюхўаҳтинъа̄нӷитамси». 13Та̄хкын унилъюки, аңьямун ӯхлъюни иңлюңанун на̄йвам аӷвиқат.

Иисусым Кылыңася̄қаңи Малихся̄ҳтыни

14Малихся̄ҳтыт пуйгумалӷӣт нықыкшаңлъямың кылъқыхпынатың, ата̄сиҳа̄фтуқ кылъқыхка̄т аңьямылңуқ. 15Иисусым кылыңася̄қӣ: «Кылыңаңўа̄ӷлюси закваскатаңитның Фарисеит, закваскаңаныңлъю Иродым». 16Та̄хкын лъңитның алыҳқӯткат: «Таўатын пӣлъю қаюҳлъяк нықыкшагилңӯкут». 17Иисусым акузиткыңъукаңи апыҳтӯсӣт Фарисеит, апыҳтӯсӣлъю Иродым. Лӣсимакыхкаңи малихся̄ҳтыңан лӣгикынӷилъкаңат акузиткыхка̄ ынка̄м а̄птыкӣ: «Сяңан нықыкшагӣнъилюси пистык? Паниның налъюкыстыхӯ, лӣгикигастыхӯ? Умуҳтакӣ умьюгаси? 18Ийылгулӷӣси, ысҳӣгастык? Сигутылгӯси, нагақӯсигастык? Нықамикынӷистыкӣ 19талъимат нықыкшагыт кагимтыканка 5,000ынун? Қафсинат корзинат сӣпныӷмың имиӷыстыки?» Кӣмсиқа̄т: «Қуля ма̄лӷук». 20Иисусым а̄птыкӣ: «Ма̄ӷраӷвинлык нықыкшагыт кагимтақңамки 4,000ынун, қафсинат корзинат сӣпныӷмың имиӷыстыки?» Кӣмсиқа̄т: «Ма̄ӷраӷвинлык». 21А̄плъя̄тақӣ: «Сяңафси паниның лӣгикигастык?»

Иисусым На̄лъҳускаңа Ая̄кақ Ю̄к Вифсаидами

22Вифсаидамун ка̄сята иляңита югыт Иисусымун тагитка̄т ая̄кақ ю̄к, ся̄фтаҳтысқылъюку. 23Иисусым ая̄кақ таслъюқлъюку аӷуляқутка̄ нымың. Та̄хкын қысиӷлюкык ӣскык ся̄флъюкык а̄птыка̄: «Сямың ысҳа̄нъыӷисӣн?» 24Югым сивухлъюни юхсюӷалюни пика̄: «А̄а, ысҳаӷанка югыт, иўырңа ысҳақа̄лютың лъяңақа уқфигыт пиюгулъҳӣт». 25Иисусым алъямың ся̄фтыкакык югым ӣскык. Ма̄тынлъя̄м ю̄к ысҳа̄нъақыҳлъягьялӷӣми, қымалъ ысҳа̄сягунъықихтуқ хўатыҳлъюўа̄қ. 26Иисусым аглӣсқыхка̄ ныңанун, пика̄лъю: «Аӷулӣфқа̄вык та̄кўани ными».

Петырым Иисус Христосыңуникаңа

27Та̄хкын Иисусылъю малихся̄ҳтыкулъҳӣт аӷуляқыхкат нынун туңаңанилңуӷнун Кесария Филипповам. Тумыми та̄кўани малихся̄ҳтыни а̄птыкӣ: «Кинаңунилюңа югыт пӣқатңа?» 28Кӣмсиқа̄т: «Иляңита пӣқа̄тын Иоанныңунилютын Крестителым, иляңита Илияңунӣқа̄тын, ынка̄м иляңита налиқнилютын ӯкналиқистыт». 29А̄птыкӣ: «Лъпыси киңаңунӣқыстыңъа?» Петырым пика̄: «Христосыңӯтын». 30Та̄хкын Иисусым иныҳтыңъўа̄қӣ: «Китумун алңунак апыҳпынаңа».

Иисусым А̄пқаңа Икфиқлъюни Туқулъыҳқани

31Та̄хкын Иисусым апыҳтуқыстақӣ малихся̄ҳтыни: «Иӷныӷа Югым ынңа̄талъ икфиқыпыста̄ӷьяҳқа̄гуқ, иҳсяксяҳқақа̄тлъю сӣванлъыӷыт, первосвященнигыт, апыҳтуӷикаюгытлъю Лӣлиҳтӯсяның. Та̄хкын туқулъықа̄т иўырңа пиңайӣтаңани аӷныӷым уңуваҳлъықуқ». 32Хўатыҳлъюўа̄қ уңипа̄ткӣ. Петырым иқитулъюку аӷью̄қа̄. 33Иўырңа Иисусым қӣвлюни ысҳақӣ малихся̄ҳтыни та̄хкын Петр аӷью̄қа̄. Пика̄: «Аўӣтын хўаңамның, Туӷныӷақ. Сюмыҳтаӷалъыҳтын югым сюмыҳтаӷалъқӣ, Кияӷныӷым сюмыҳтаӷалъқынӷитӣ!»

34Та̄хкын Иисусым юлӷутыҳлъягытлъю, малихся̄ҳтынилъю тахсиҳтыӷлюки пикӣ: «Китум алңунак малихсюкумиңа, лъңаның катам пиюкылъыни пыхлъюки, қақӯрани уямиглюку малихлъиңа. 35Китум алңунак югулиюкумигу уңувалъыни ифлъяяҳқақа̄. Иўырңа китум алңунак ифлъякумигу уңувалъыни хўаңа апалъюқлъюңа, Пинилӷӣтлъю Уңипат апалъюқлъюки югулияҳқақа̄. 36Сяңўа̄ңам югым пиниҳқусиқылъықагу пилӣлъюку нунаҳлъяк, ифлъякумикык уңувасигни? 37Сямыңʼңам ю̄к выҳтусиқылъықа уңувасигминун? 38Ма̄тын аӷныӷым юги ата̄сӣӷмынъыӷитут Кияӷныӷмун, сыӷлыҳқумаңӯтлъю. Ма̄ни аӷныӷни китум алңунак кайңуягускаңаңа, апыҳтӯсянкалъю, хўаңалъю Иӷныӷани Югым кайңуягулъықақа тагикума аҳтуӷьяҳқа̄нӷилъылиӷлюңа Атамның кылъқылъюки аглыӷналӷӣт яқулгыт».

હાલમાં પસંદ કરેલ:

От Марка 8: ess2

Highlight

શેર કરો

નકલ કરો