От Марка 16

Иисусым Уңувалъҳа Туқулъыӷмың

1Суббота алъпагьян Мария, Магдалаӷмӣ, Мариялъю на̄ңа Иаковым, Саломиялъю, тыпыңлъя̄сиңыхкат Иисусым югусӣ аңиҳналюку. 2Сивулӣм аӷныӷани неделям, уна̄ңупихлъюку сиқинық пӣтыкыста̄люку лъивыҳтыкат. 3Тумыми та̄кўани а̄пқуӷўа̄ӷуткат: «Китумңам улъҳитаҳта̄нъақилъю уйӷахлъягмың лъӣвӷым па̄йңанилңуӷмың?» 4Та̄хкын сивухсялӷӣмың уйӷахлъяк аўитңўа̄ӷлюни аюқыфтуқ. 5Лъивыӷмун итыӷлютың ысҳақа̄т нукалъпигақ қатылӷӣмың аткуя̄лык ақумгалӷӣ аӷынқигныӷани. Аӷнат ынңа̄талъ сяӷӣӷаюкат.

6Нукалъпигам пикӣ: «Сяӷӣӷаюхпынаси, лӣсимакамси ива̄ңўа̄ҳси Иисус Назаретыӷмӣ, қақӯрақа̄ялӷӣ. Хўа̄нъыӷитуқ, уңуваҳтыстыка̄гуқ! Ысҳақаҳтыхуқун, хўагун лъикақсяӷа̄т. 7Уңипа̄сяҳтуҳтыки малихся̄ҳтыңи, Петырлъю, ага Галилеямун сивулъха̄ӷума̄қ пинақнилъыӷмитун. Та̄гани ысҳаҳлъықаҳси».

8А̄нлютың анагнӣқат лъивыӷмың, қаюҳлъяк кукшагьюгумаӷмың алиңрӯӷулӷӣт, рыпалъ уңылыхлъютың. Талўа кина алңунак сямың пимаңилъкаңат, қаюҳлъяк алиңрӯӷулӷӣт.

Иисусым Алӣӷвикыхкаңа Мария Магдалаӷмӣ

9 Сивулӣм аӷныӷани неделям, уна̄ңупихлъюку Иисус уңувақа̄лӷӣ туқулъыӷмың. Алӣӷвиксюхўа̄қа̄ Мария Магдалаӷмӣ. (Аӷнамың та̄хкын а̄ныстыкақыхкаңи ма̄ӷраӷвинлык туӷныӷа̄т.) 10Уңипа̄сяҳтуқӣ лъңанисялӷӣт қивӷумалюки, қиямалюки. 11Иўырңа уңипа̄систың Иисус уңува̄манилюку туқулъыӷмың, лъңанунлъю ысҳа̄манилюку ухпықумаңилъкаңат.

Иисусым Алӣӷвикыхкык Ма̄лӷук Малихся̄ҳтык

12 Та̄м киңуңаның Иисусым алъяңулюни алӣӷвикыхкакык ма̄лӷук малихся̄ҳтыгни, навык пималюкык. 13Утыӷниӷлютык уңипикаткақсяқаңит илятың иўырңа ухпықумаңилъкыхкыт.

Иисусым Алӣӷвикыхкаңи Қуля Ата̄сиқ Сӣпнықлъюку Малихся̄ҳтыни

14 Та̄м киңуңаның Иисусым алӣӷвикыхкӣ қуля ата̄сиқ сӣпнықлъюку малихся̄ҳтыни ныӷӯсималюки. Аӷью̄қӣ ухпықинӷитылъҳитныңлъю, айгуӷикылъҳитныңлъю ысҳа̄ткат лъми уңуваҳтыстылъыӷми киңуңаның. 15Пикӣ: «Аӷуляқлъюси нунатаҳа̄нун тамаҳа̄нун уңипақитыки Пинилӷӣт Уңипат тамаҳа̄нун югнун. 16Кина алңунак ухпықилӷӣлъю, крестилӷӣлъю югулилъыңьяҳқа̄гуқ. Иўырңа кина алңунак ухпықинӷилңуқ аӷью̄лъыңьяҳқа̄гуқ сыӷлыҳқылъыӷминун. 17Ухпықат алъя̄ҳлъюхўаҳтилъықут лӣгикысқылъюку аҳтуӷьяҳқа̄нӷилъыҳтың Кияӷныӷмың пиңутаңа. Ынка̄м атымкун а̄нысқуҳлъықӣт туӷныӷа̄т югның; акузилъықут алъястун улюстун; 18тугусяӷңа̄ӷмың нымыӷьямың, налиӷмың мыӷьяӷңа̄ӷмың туқуналӷӣмың сяна̄нӷитут; қинуюлӷӣт ся̄фныӷмыхтыки на̄лъҳулъықут».

Иисусым Маюлъҳа Қилягмун

19 Атанӷым Иисусым малихся̄ҳтыни алыҳқуныӷмың та̄қсяки, Кияӷныӷым маюҳтыстыка̄ қилягмун, ынка̄м ақумыхкақ Кияӷныӷым аӷынқигныӷакун. 20Та̄хкын малихся̄ҳтыт аӷуляқлъютың тамаңанун уңипақикат Пинилӷӣның Уңипаның. Атанӷым қыпҳалгусиқӣ, ипапиҳқыстыка̄лъю уңипақ алъя̄ҳлъюхўаҳтистылъыӷмикун. Аминь.

હાલમાં પસંદ કરેલ:

От Марка 16: ess2

Highlight

શેર કરો

નકલ કરો