От Марка 15

Пилатым А̄пқуӷа̄қаңа Иисус

1Аҳтаӷақӣнаӷьягу первосвященнигытлъю, сӣванлъыӷытлъю, апыҳтуӷикаюгытлъю Лӣлиҳтӯсяның, қамахлъютыңлъю агӷистыт қырңуӷуткат агӷинъалютың. Та̄хкын Иисус асиҳқыслъюку агля̄лъюку Пилатымун, тӯныхка̄т лъңанун. 2Пилатым а̄птыка̄: «Иудеит умӣлъката̄н?» Иисусым кӣмсиқа̄: «Лъпык ысҳа умӣлгуникывңа».

3Первосвященнигыт угля̄пихлъыҳӣның алъя̄ҳӣнаӷның анахуника̄т. 4Пилатым а̄плъя̄тақа̄: «Кӣмсӣткаҳқӣсӣн? Наганъыӷисикӣ угля̄пихлъыҳӣның алъя̄ҳӣнаӷның анахунъикаңатын?»

5Иўырңа Иисус сямың пимаңиткақ ынка̄м Пилат сяӷӣӷаюкақ.

Пилатым Туқутыснақыхкаңа Иисус

6Тамаҳа̄ни Пасхам Нықынӷаҳқылъҳани, Пилатым а̄ныстақыхкаңа ата̄сиқ анусимиңлъяӷақ югыт накмикыхка̄т. 7Та̄ўаңуқ Варавва анусимиңлъяӷвигмылңуқ, малигулъюни иляңитнун югнун юхтаӷа̄тақақ сыӷлылӣҳқӣҳлъягми. 8Юлӷутыт тагилютың Пилатымун а̄ныстысқыхка̄т ата̄сиқ анусимиңлъяӷақ таўатын пӣқылъҳатун. 9А̄птыкӣ: «А̄ныстысюгыстыхӯ Иудеит Умӣлгат?» 10Пилатым лӣсимакңўа̄қаңи первосвященнигыт ақинаклъюку Иисус тагитңукаңат лъңанун.

11Первосвященнигыт а̄ҳқутақыхкӣт юлӷутыт Варавва а̄ныстысқылъюку авылӷаӷлюку Иисус. 12Пилатым юлӷутыт а̄плъя̄тақӣ: «Сянақсикунми умӣлъкынъӣқыхкыси Иудеянун?»

13Акилӷӯкат: «Қақӯраҳтыстигу!»

14Пилатым а̄птыкӣ: «Сяңан, сямың сыӷлыӷмың пима̄?» Иўырңа игляхта̄ӷалъютың акилӷӯкат: «Қақӯраҳтыстигу!»

15Ынка̄м Пилатым ыфқуҳсюглюки юлӷутыт, а̄ныстыка̄ Варавва. Та̄хкын Иисус кахсягмихтыслъюку тӯныхка̄ пилъюўаҳтынун қақӯрӣсқылъюку.

Пилъюўаҳтыт Лыгасӣӷўа̄ткыхкаңат Иисус

16Пилъюўаҳтыт итҳутка̄т Иисус умӣлгым мыңтыӷа̄нун (атилъқылӷӣ Претория). Та̄хкын пилъюўаҳтылӷутытың қырңуҳтыкӣт. 17Иисусымун а̄тыстыкахкыт ысныгрукыхтак аткуя̄ӷык. Сикуҳлъюгмың қаҳпаңлъяӷлюку а̄тыстыка̄т на̄сқўакун. 18Та̄хкын лыгасӣӷўа̄ткыхка̄т: «Қӯлваӷамкын лъпык Умӣлгат Иудеит!» 19Унаҳсӣӷўаӷмың на̄сқўакун анагулыӷлюку, қысиқулюку, мануңакун сыгысқуҳлъютың қуңуҳфикыхка̄т. 20Лыгасӣӷўа̄ткынъыӷмың та̄қсямыхтыху ысныгрукыхтак аткуя̄ҳӷык матаҳлъюкык лъңан катам а̄ткӣ а̄тыстыкӣт. Та̄хкын а̄нутка̄т қақӯраӷналюку.

Иисус Қақӯрақаңат

21Тумыни та̄кўани налъяқа̄т ю̄к, а̄тқылӷӣ Симонымың, Киринеяӷмӣ, атаңат Александрым, Руфым. Накын қантаӷаның тагиңуфтуқ Иерусалимымун. Пилъюўаҳтыт қылӷутка̄т Симонымун уямигысқылъюку Иисусым қақӯра̄. 22Иисус агля̄тка̄т Голгофамун. (Голгофа хўатын писӣгуқ: «Югым На̄сқўан Ныңа».) 23Таўани тӯныхка̄т виномың смирнамың акумыхкамың, иўырңа Иисусым иҳсякыхка̄. 24Та̄хкын пилъюўаҳтыт қақӯраӷьямыхтыху атыҳтӣра̄ӷулъюки а̄ткӣ тугуляқӣт.

25Қақӯрақақыхкаңат уна̄ңулюку стаманың иңлюлыккылъя̄гми. 26Қақӯра̄кун ныкыхтыка̄т авуткилъыҳтың игақңалӷӣ хўатын: «умӣлгат иудеит». 27Ма̄лӷуклъю ўаяӷнӣҳтык қақӯрақахкыт, ата̄сиқ Иисусым аӷынқигныӷакун, а̄лъҳа сяӷумигныӷакун. 28Акузитыт Игақыхкат хўатын пилъҳат апыӷӣҳтуқ: «Илялъкӣткақыхкаңат сыӷлытун пистынун».

29Югыт наӷуҳлъыҳӣт на̄сқутың уфсюгусимӣта лыгасӣӷўа̄ткыхка̄т Иисус: «Сыӷлыҳалык, лъпык! Храм на̄фқылъюку ныкыфсяҳқақңукувгу пиңают аӷныӷыт атуӷлюки, 30сяңан югулилютын лъпынун қақӯрамың укигнаниҳсин?»

31Первосвященнигытлъю, апыҳтуӷикаюгытлъю Лӣлиҳтӯсяның лыгасӣӷўа̄ткыхка̄т Иисус, илятың пикӣт: «Югулӣқӣ иляңит нақам лъңаның катам югулипагниңитуқ! 32Христос, Умӣлга Израилым, укигли ма̄тын қақӯрамың, ынка̄м ысҳапаглюку ухпықылътыху». Қақӯралгутыхкынкалъю сыӷлықӯқа̄к.

Туқулъҳа Иисусым

33Та̄хкын қамахлъюни нуна мамлыҳқўа̄кақ аӷныӷым қука̄ның кынляңа пиңаюнункылъя̄гмун. 34Таўани пиңаюмикылъя̄гми Иисус акилӷӯҳлъякақ: «Элои, Элои, лама савахфани?» хўатын писиқ: «Кияӷнымни, Кияӷнымни, сяңама унисиңа?»

35Иляңита югыт ныкывӷалъҳӣт нагалъюку пикат: «Нагатаҳтыкқун, Илия туқлъюӷаӷа̄!» 36Ю̄к ата̄сиқ ақфақуқақ мысиқаюгмың. Та̄хкын ныплъюку қуўа̄лӷӣмун виномун унаҳсӣӷўаҳқун ныкыхлъюку ныңугутка̄ Иисусымун мылюгрӣсқылъюку. Пикақ: «Ўӣнтаку, ысҳапака̄лътыху Илиям ӣксяҳтуӷақся̄ӷа̄ қақӯрамың!»

37Та̄хкын Иисус араҳлъяглюни туқукақ.

38Храмымылңуқ сяфка̄ӷун малӷуҳқыхкақ, пӣкақ пикыхкын канавык. 39Пилъюўаҳтыт умӣлўа̄ӷита қақӯрам мануңанилңӯм, ысҳапагьямигу Иисус таўатын туқулӷӣ, пикақ: «Ипапыста̄қ уна ю̄к Иӷнықума̄гу Кияӷныӷым!»

40Аӷнам иляңи уяваның ысҳапакат. Таўантыфтут Мария, Магдалаӷмӣ, Саломиялъю, Мариялъю на̄ңат уюқлъӣм Иаковым, Иосийемлъю. 41Иисус, Галилеямылъюку та̄кут аӷнат малихся̄қақыхкаңатлъю, каюсӣткақыхкаңатлъю. Иляңилъю аӷналӷутыт таўанлыңӯт, малигулъютың лъңанун Иерусалимыткат.

Лъивылъҳа Иисусым

42-43Та̄ўаңуқ ю̄к, а̄тқылӷӣ Иосифымың Аримафеяӷмӣ, сӣвакумта̄қ иляңат агӷистыт. Лъңанлъю утақаңукаңа пӣнлилъыҳқа̄ Атаныҳпагулъҳа Кияӷныӷым. Хўаникуягу, Ята̄ҳқылъҳым Аӷныӷани, сивуңӣҳа̄ни Субботам, тытугнаниӷлюни Пилатымун пилюни туңсиқа̄ Иисусым югусӣ. 44Пилатым сяӷӣӷаягутка̄ нагақуӷлюку Иисус туқулӷаҳтӯманилюку. Ынка̄м пилъюўаҳтыт умӣлўа̄ӷат тахсиӷлюку а̄птыка̄: «Лъя̄ӷа̄н Иисус туқулӷаҳтӯма̄?» 45Умӣлўа̄ӷмың лӣгиксямигу Иисусым туқулъҳа, Иосифымун тугусқыхка̄ югусӣ. 46Ынка̄м Иосиф тукфиӷияҳтуқақ қатылӷӣмың қӣпаӷаӷмың лъивыӷьяҳқанун атуқақыхкымыхның. Та̄хкын ӣклъюку югусӣ қақӯрамың, ӣмгутка̄ қӣпаӷаҳқун. Та̄ўаңуқ уйӷагрукута̄ҳлъяк сяниминың илютмун ля̄кақ лъӣвӷулюни. Таўавык югусиқ канаҳтыка̄. Та̄хкын уйӷагрухлъяк улъҳитаҳтақа̄ лъӣвӷым па̄йңанун. 47Мариям Магдалаӷмӣм, Мариямлъю Иосийем на̄ңан ысҳапака̄к нагун Иисус лъиматаңа.

હાલમાં પસંદ કરેલ:

От Марка 15: ess2

Highlight

શેર કરો

નકલ કરો