KALAQAMA 2
2
1Maganu gordonna baatto, giddose noore baala kunni garinni kalaqe gudino.
2Leelki barra loososi baalanka gude, lamalki barra fooliishshi'rino. 3Maganu kalaqate loososi baala gude fooliishshi'rino barra ikkino daafira, lamalki barra maassi're baxxinoha assino. 4Gordunna baatto kalaqantinohu kunni garinniiti.
ADDAAMINNA HEEWANI EDENI GENNETI YINANNI DARGA
Kaaliiqi Maganu gordonna baatto kalaqi waro ikkino coyi kunninni aane nooho: 5Xeena ganinokki daafira, baattote aana mitturichi nafa dimu'rino. Baatto loosanno mannino nookkihura, baattote aana mittu haqqino difulino; mu'rinorino dino. 6Ikkollana, baattote giddonni fulanno wayi uulla qufisanni no.
7Kaaliiqi Maganu baattote aaninni bushsha haa're, manna bushshunni seekki; sanosirano lubbo aanno foole ufuufi; mannuno lubbo noosi kalaqama ikki.
8Kaaliiqi Maganu soojjaati ragaanni Edeni Genneti yinanni darga qixxeessi; kalaqino mannano hakkiicho hee'ranno gede wori. 9Kaaliiqi Maganu illete biiffinota sagalimmate dancha ikkitinota addi addi haqqe mu'risi. Gennetete mereerono heeshsho uyitanno haqqicho no; danchanna busha badde leellishshannoti wole haqqichono no.
10Genneti hayikkisanno wayi Edeninni fulanno; kuni wayi Edeninni fule shoolewa beehamanno. 11Umi wayi su'ma Fishooni yinanni; kuni wayi culku noowa Hawiila yinanni baatto baala gaangeesse lolahanno. 12Hatte gobba culki xumaho; qoleno, hatte gobbara muxxe ikkitino shittonna muxxe ikkitinoti dilqa kinna no. 13Layinki wayi su'ma Giyooni yinanni; kuni wayi Itiyophiyu#2:13 Itiyophiyu yaannoha, Ibiraawootu afiinni borreessinoonnihu Kuushi yaanno. gaangaawira lolahanno. 14Sayikki wayi su'ma Xegiroosi yinanni; kuni wayi Asoorira soojjaatoonni lolahanno. Shoolki wayi su'ma Efiraaxisi yinanni.
15Kaaliiqi Maganu manna, loosannonna agaranno gede, Edeni Gennetete masse wori. 16Kaaliiqi Maganu mannaho, «Edeni Gennetete noo haqqe baalate laalo ita dandaatto. 17Bushanna dancha bade afate egenno uyitanno haqqicho laalo kayinni ittooti; tenne haqqicho laalo itootto barra, halaalinta reyatto» yee kulisi.
18Kaaliiqi Maganu, «Mannu callisi hee'ra dancha di"ikkitino; kunnira, labbannosita kaa'laancho kalanqosi» yii.
19Kaaliiqi Maganu baattote bushshunni saada baalanna cea baala kalaqi. Su'ma fushshanno gedeno haa're Addaamiwa#2:19 Addaamiwa yaa, Ibiraawootu afiinni manchunniwa yaate ledo mittete. abbi. Addaamino lubbo afi'rino kalaqami baalunkura su'ma fushshi; hatte su'muwano woshshinanninsata ikkitu. 20Kunni garinni Addaami ceatenna saada baalantera su'ma fushshinsa. Addaamira kayinni labbannositanna kaa'litannosita dianfoonnisi.
21Kunnira, Kaaliiqi Maganu Addaami lowo goxano amaddannosi gede assi. Goxe hee'reenna midaadisinni mitto miqicho haa're, hakko darga maala wonshi. 22Kaaliiqi Maganu Addaami midaadinni haa'rino miqicho meyata asse seekki; iseno haa're Addaamiwa abbi. 23Addaamino, «Xa kune ani ane labbannota afi'roommo; kuni miqichi miqicho'yaati; maaluno maala'yaati; labbaahuwiinni anfoonnita ikkitino daafira meyate#2:23 meyate yaannohura, Ibiraawootu afiinni ishi yaa labbaaho; isha yaa meyate. yinose» yii. 24Kunnira, mannu annasinna amasi agure, galtesi ledo mitto ikkanno; lamunku mitto biso ikkitanno.
25Addaaminna galtesi mullootu no; ikkollana mimmitonsa disaalfattino.
હાલમાં પસંદ કરેલ:
KALAQAMA 2: QulMax
Highlight
શેર કરો
નકલ કરો
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014